* اللجنة المنظمة في اجتماعها امس لم تجد في طاولة الاجتماع قضايا للنقاش بخلاف (شكاوى المريخ) ..
* تربيزة الاجتماع كلها كانت شكاوى المريخ ..
* مجدى شمس الدين قدر ما يرفع ورقه في الاجتماع يلقاها شكوى من المريخ ..
* اى ورقه شكوى ..
* واى شكوى ورقه ..
* شكاوى المريخ في مكاتب الاتحاد بقت اكتر من قصائد الحلنقي ..
* شكاويكم دى المفروض تتلحن وتتغنى ..
* شكاوى زي دى حرام ما تلقى ليها فنان يغنيها ..
* حرام والله ..
* حركات ناس المريخ دى بتذكرني (شُفع الناس المرتاحين) ..
* اولاد الراحات ..
* ود الراحات لو لقى ليهو (كلب) نايم في الشارع يجى البيت يبكى ويشكى ..
* لو في المدرسة الاستاذ نهرو بيجى البيت يبكى ويشكى ..
* لو في شارع الدكان لاقاهو ولد وشال منو (كيس الشبس) بيجى البيت يشكى ويبكى ..
* لو قرصتو (نمله) يجى البيت يبكى ويشكى ..
* لو الفرق بقى ست نقاط بيجى البيت يبكى ويشكى ..
* معقوله ياخى ؟؟
* اى مباراة ضربة جزاء وشكوى ؟؟ الحكاية شنو ؟؟
* قال مريخاب الجنوب دعمو شكوتنا بـ(مستندات خطيرة) ..
* خطيرة بـ(الجاء) ..
* هسه ما بتخجلو ؟؟
* ناس كبااااااار كده تقولو مريخاب الجنوب دعمو شكوتنا بـ(مستندات) ..!!
* تخسرو في الميدان (رجاله كده) وتمشو تقولو مريخاب الجنوب ؟؟
* مريخاب الجنوب يعملو ليكم شنو يعنى وإنتو الكوره غلبتكم ؟؟
* والله تبارو مريخاب الجنوب ديل تنزلو دورى التانية ..
* معقولة فريق بيقولو منافس على لقب افريقي يجي يقول لينا مريخاب الجنوب ..
* خليكم كده .. مريخاب الجنوب ومريخاب تشاد لما جيرجيركم يغرق ..
* والله إحنا زاتنا تانى لو حصل لينا ظلم من الحكام طوالى بنجيب (هلالاب حلايب) ..
* بنجيب هلالاب حلايب عشان يدعمونا بمستندات خطيرة ..
* غايتو جنس غايتو ؟؟
* طبعا اعلام المريخ من يوم ما قال مريخاب الجنوب جابو لينا مستندات طوالى جمهورهم المكسين صدق ..
* جماهير المريخ بقت لما تقابل مواطن جنوبي في السوق بتسلم عليهو بـ(الاحضان) على حس المستندات دى ..
* كان شويه كده ممكن يعملو تكريم لسلفاكير بسبب المستندات دى ..
* قلنا ليكم الشراب من يد الرجال عطش ..
* رزاق يتعب وجرى جرى الوحوش وانتو دايرين تجو بهنا تسرقو عرق الامل وتشيلو النقاط من تحت المكيف والمويه البارده ..
* كده لا يجوز يا عزو ..
* الكلام ده عيب يا عزو ..
* حقك تشيلو من الميدان زي الرجال ..
* حصل سمعتو بشكوى تقدم بها الهلال السنة دى ولا السنة الفاتت ؟؟
* اوع تقول لي شكوى بكري المدينه ..
* انا بتكلم عن شكاوى زي حقتكم الدعموكم فيها مريخاب الجنوب دى ..
* الهلال كبير لو خسر او اتعادل (بيأكلها في حنانو) وببقى مارق ..
* بيشيل حقو بيدو ..
* هلال كادوقلى الاشتكتو ده لعب معانا قبل ما يلعب معاكم لكن إحنا ما اشتكينا ..
* الشكوى ما تغلبنا لكن الاسد ما بيأكل الميته يا عزو ..
* بنأكل عرق جبين وخدمة يمين ..
* ونحمدالله لا منشط فرنسي ولا (فِكس صيني) ..
* ولسه الغريق قدام ..
* الهلال ياداب فضى ليكم ..
* طبعا يا جماعة (خُرم الإبره) ما بتقدر تعاين فيهو بعيونك الاتنين ..
* اى خُرم إبره بتعاين فيهو بى عين واحده ..
* وحتى العين الواحده دى بـ(تكُجها) عشان تقدر تعاين ..
* بـ(تقرُص عينك) عشان تعاين ..
* والهلال السنة دى اتعامل مع ابطال افريقيا باعتبارها (خُرم إبره) ..
* خرم إبره لانو السنة دى البطولة الافريقيه جابت ليها فرق واشكال كده عجيبه .. علمه وعزام ومريخ وغايتو فرق تحيرك ..
* بالمناسبه دى .. عندي سؤال ..
* سؤالي : عزام ده أخو العلمه ؟؟
* لانو سمعت تحت تحت قال العلمه عندها اخوها اسمو عزام ..
* سمعت كده ..
* واى زول طبعا حر في (سمعو) ..
* المهم ..
* الهلال لاول مرة لعب السنه دى تمهيدى ..
* بعد 15 عام السنة دى يا داب لعبنا تمهيدي ..
* الهلال بدأ لعب في التمهيدي (مغمض) ..
* ولما بلغنا دور الـ(32) بيقينا نلعب بـ(عين واحده) ..
* ووصلنا المجموعات بـ(عين واحده) ..
* بـ(عين واحده) وبدون منشطات كمان ..
* وفي الزمن العلينا ده نادر جدا تلقى ليك فريق يصل المجموعات بـ(عين واحدة وبدون منشطات) ..
* ناااااادر ..
* لكن ده الهلال يا مولانا ..
* والهلال ياداب قبل عشره ايام فتح العين التانية ..
* ياداب الهلال صحصح يا حبايبنا ..
* اعتبارا من مباراة الرابطه الهلال فتح عينو التانية ..
* الزمن ده كلو كنا شغالين بـ(عين واحده) ..
* والهلال لما يفتح عيونو الاتنين يبقى كل قرد بيطلع شجرتو ولا كتر خير ملك الغابه ..
* كنا مستهترين بهذه النسخه من دورى ابطال افريقيا ..
* كنا مستهترين بيها لانو فيها فرق غريبه زي عزام والمريخ والعلمه وسموحه وما عارف شنو ..
* مما شفنا فرق سيكافا بقيادة كبيرهم المريخ الذى علمهم (التسكف) طوالى الابطال طلعت من نفسنا ..
* استهترنا بيها ..
* لكن اعتبارا من اليوم ما في مشكلة كل قرد يطلع شجرتو ..
* واقول ليكم حاجة ..
* كضااااابين لو قلتو بتنسحبو ..
* كضااااابين والله ..
* لا بتنسحبو ولا بتقدرو عشان كان ما تغشو جمهوركم ..
* قرار الانسحاب ده داير ليهو فريق (مستقل) مش فريق تابع للحكومة يا عزو ..
* فريق لو ما عندو شخصية ما بقدر ينسحب ..
* لو قررتو الانسحاب (تلفون واحد) برجعكم ..
* إنتو فريق حكومى (لوحتو صفراء) ..
* وقراركم ما في يدكم ..
* عشان ده ألعبو كورتكم وما تمسكو بينا زمن ..
* نقابلكم في الابطال نطيركم ، نلاقيكم في الممتاز نخلى ريحتكم طير طير ..
* قال المريخ يدرس خيار الانسحاب من الدورى والكأس ..
* الكلام ده قولو لزول ما عندو (ود خالو في الحكومة) ..
* شوفو ليكم زول (اجنبي) وقول ليهو الكلام ده ..
* لكن ما تقولو لينا إحنا ..
* إحنا اولاد تسعة ودافننو سوا ..
* واتحداكم لو تقدرو تنسحبو ..
* وعلى فكرة ..
* ما تخافو ولاء الدين ما ح يلعب في مباراة القمة ..
* و(كوفي) ولدنا برضو ما بيلعب معانا إلا السنة الجايه ..
* ونفس الشي (ولدنا) امير كمال ..
* ديل كلهم ما بيلعبو معانا إلا السنة الجايه ..
* والله مساكين الجماعة ديل حالتم بقت تحنن ..
* خايفين من الهلال خوف عجيب الناس ديل ..
* وناس الهلال زاتم صعبوها قبل ما الموسم ينتهى جابو ولاء الدين ودخلو في كوفي وامير كمال وعماري ..
* ما خلو حاجة للحنطور ..
* الحنطور بقى زي واحد صاحبنا كده خيالو واسع جدا ..
* الزول ده بيشكى من السخانه ..
* قال الايام دى شدة ما الدنيا سخانه تفتح باب الشارع تلقى الشارع قاعد في ضل الحيطه ..
* هسه المريخ (وصيف الوصيف) لو فتح باب الشارع بيلقى الشارع قاعد في ضل حيطة نادى الهلال ..
* غايتو جنس غايتو ؟؟
* و..و..
* و(الشكوى) قالو مرحله وبعدك (الفريق) اصبح خلا ..
* و..و..
* وشايفك في (الشكاوي) تكوسي وليه يا النجمة ما بتفوزي ؟؟
وماذا تقول في مزمز وكب كب وسيك سيك
ام مالكم كيف تحكمون؟
يا طب طب اديهم وطير النوم من عيونهم!!!!
أيه الهرجلة دي؟
أنت لامحلّل ولا ناقد ولا تعرف الكتابة
للهلال كتّاب كبار وقورون منهجيون نعلّم منهم
وأنت قدوتك و معلمك (شوربجي الفسيخ )