*من أشهر الثنائيات في السودان هي ثنائية : (السجم والرماد) ..

* ثنائية (السجم والرماد) أشهر حتي من ثنائي (أبو كدوك) وربما (ثنائي العاصمة) كذلك ..

* يقول ليك : (فلان ده ما عندو سجم رمادو) ..

* بيربطوا (السجم) بـ(الرماد) ..

* مع إنو (السجم) وحده يكفي ..

* و(الرماد) وحده يكفي ..

* ولكننا نعزز السجم بالرماد وفي ذلك إنصاف لفشل الشخص المقصود ..

* وإحنا واولاد حلتنا بصراحة كده بنقول ليكم صلاح الجزولي من عندو (سجمو) ..

* قلنا سجمو ولم نقول (سجمو ورمادو) وذلك لاعتبارات تتعلق بشعار الهلال ..

* وكل من يرتدي شعار الهلال له في قلوبنا مساحة ..

* حتي ولو كان صلاح الجزولي ..

* لكن يا جماعة الزول الما عندو (سجمو رمادو) هو الكريم حسن مدافع المريخ المالي ..

* والله صحي ..

* ده ما عندو علاقة بالكرة رسمي وشعبي ..

* صلاح الجزولي (جمب) الكريم الحسن رونالدو عديل .. مع مراعاة ان الجزولي مهاجم وداك مدافع ..

* قال ليك أصدقاء كريم الحسن في مالي لحدي الآن ما مصدقين إنو الزول جا السودان عن طريق الكرة ..

* فاكرنو جا السودان مع قوات حفظ السلام ..

* قايلنو (يناميد) ..

* غايتو جنس غايتو ؟؟

* إعتبارا من مباراة كركوج الودية أمس الأول ربط الهلال (الكرفتة) في عنقة ..

* والكرفتة في الهلال هو (الثعلب) ..

* وأغرب حاجة مباراة النسور الموسم السابق كانت سببا في ظهور الثعلب الذي تألق فيها ..

* وغدا يواجه الهلال النسور والثعلب قد تعافى من اصابته واصبح تحت الخدمة ..

* وشقاوة النسور مع الهلال شقاوة ..

* بمناسبة النسور ..

* أنا والله معجب جدا باخلاق جمعة جينارو ويونس الطيب ومالك ..

* هذا الثلاثي صبر علي الكنبة (القاسية) زمنا طويلا ومع ذلك تجدهم أحرص الناس علي التدريبات والمعسكرات ..

* الجلوس علي الكنبة نار والله وقد وقف جمهور الهلال بنفسه علي (الثورة) و(الغضب) الذي تحدث به اليافع أطهر الطاهر لمجرد انه جلس علي الكنبة (4) مباريات في عهد كافالي ..

* أطهر اليافع شكى وبكى من الكنبة فما بالك بيونس الطيب وجمعة ..

* هذا الصبر الجميل مؤكد ان جماهير الهلال ستقابله بكثير من الحب والتقدير ، ويبقي جمعة واحدا من أحب الناس لقلوب عشاق الموج الأزرق وكذلك يونس الطيب ..

* المهم ..

* الهوا من أكبر أعداء (الجيوب الأنفية) ومن صفاته (الغبار والكتاحة) ..

* والهوى من أكبر أعداء (جيوب العاشقين) ومن صفاته (الخلط والحب من طرف واحد) ..

* والجيوب الأنفية هي جمع (جيب) ..

* يعني (جيب أنفي) ..

* وأظن ان أخونا محسن سيد قصد (جيبه الأنفي) ولم يقصد جيب فنلته والله أعلم ..

* انت يا محسن قاصد ياتو جيب ؟؟

* لو قاصد (الجيب الأنفي) يبقى ما في مشكلة ، لكن كمان لو قاصد جيب فنلتك صدقني جيب فنلتك ما فيهو (أبو النوم) ..

* غايتو جنس غايتو ؟؟

* أكتر حاجة عاجباني في الهلال حاليا هو (اعمار اللاعبين) ..

* الهلال عندو تسعة لاعبين (زي الطلقة) واعمارهم دون الـ(22) سنة ..

* ومنعا للغلاط .. هم : وليد علاء ، الثعلب ، أطهر ، ولاء الدين ، أبو عاقلة ، بشة الصغير ، محمد محمود ، وليد الشعلة وعمار الدمازين ..

* وهنالك تسعة اخرين اعمارهم دون العشرين بقيادة النجم الكسمبر ..

* في المريخ هنالك (19) لاعب تجاوزوا الـ(30) بقيادة كابتن الهلال الأسبق وقائد أهلي الخرطوم السابق عمر بخيت ..

* عمر بخيت ، علاء ، معز ، عبده جابر ، تراوري ، بكري المدينة ، رمضان عجب ، أمير كمال ..

* كمية من كبار السن ..

* ولما تجي تنظر لصغار السن في المريخ بتلقاهم (3) بس ..

* أبراهومة الصغير وده رافع نخرتو في السماء وما اظن يواصل مع المريخ ..

* شمس الفلاح وده كمان كلو مشاكل وبرضو ما ح يستمر مع المريخ ..

* والتالت هو النعسان وده إحتمال كبير الموسم الجاي (تشيلو نومة) ..

* والله صحي ..

* النعسان ده يا الكاردينال الكسكتة بتجي معاهو مية مية ..

* نتمنى من الكاردينال ان (يكسكت) لينا النعسان ده ..

* والله يا الكاردينال إحنا واولاد حلتنا أمنيتنا نشوف النعسان بشعار سموحة المصري ..

* وزي ما وديت لينا شيبوب للقيروان برضو حقق لينا أمنيتنا وخلي النعسان يمشي سموحة ..

* دي بس أمنيتنا ..

* واي زول طبعا حر في (أمنياتو) ..

* أمنياتو بـ(الخا) ؟؟

* يتأهب مجتمع الهلال هذه الأيام من أجل تأبين زعيم الأمة البابا الطيب عبد الله ..

* وذكرى الطيب عبد الله دائما (منعشة) وتشعرنا بكثير من الفخر والعزة ..

* وحقيقة أود أن استغل المناسبة واطالب بأن يهتم الهلال ايضا بذكرى رحيل نجم النجوم والي الدين محمد عبد الله ..

* مثلما نُحي ذكرى البابا وقاهر الظلام لابد ان يكون هنالك حفل تأبين سنوي لاحياء ذكرى الوالى الغالي ..

* وحقيقة لو كنا سنويا بنحتفل بذكرى الوالى ما كان فات علينا مرض والدة الوالي ..

* إبتعدنا من اسرة الوالى حتي جاء ولاء الدين عن طريق الصدفة وكشف لنا مرض والدة الوالى ..

* يعني لو لا قدر الهلال ولاء الدين ده سجل المريخ كنا لليلة ما ح نعرفو إنو والدة الوالى الغالي عيانة ..

* يبقى عشان ما نخلي شي للصدفة لازم سنويا نحتفل بذكرى الوالى وهذا يتيح لنا التعرف علي ظروف اسرته بشكل دوري ..

* طبعا موضوع التأبين ده عندي فيهو ملاحظة ..

* إحنا من قمنا ما حصل سمعنا المريخ عمل حفل تأبين ..

* والله صحي ..

* انا ما عارف العيب فينا ولا في المريخ ؟؟

* يمكن العيب يكون فينا إحنا ما متابعين تأبينات المريخ ..

* المريخ في حاجتين اتنين ما قدر يقلد فيهم الهلال ..

* الحاجة الأولى موضوع (التأبين) ده ..

* انا شخصيا ما حصل سمعت بتأبين مريخي ..

* والحاجة التانية (عم شبشة) ..

* المريخ قدر ما حاول يعمل ليهو (عم شبشة) ما قدر ..

* أصلو ما لقو طريقة ..

* إجتهدوا يجيبوا ليهم عم شبشة زي حقنا لكن ما لقوا ..

* قصدوا يقلدونا في عم شبشتنا لكن فشلوا ..

* والله ديل لو لقوا أخو عم شبشبة ممكن يجيبوا زي الما حصل شي ..

* نصيحتي ليكم شوفوا ليكم عم شبشبة تايواني وإن شاء الله بتبقوا زي الهلال ..

* غايتو جنس غايتو ؟؟

* حاجة تكسف ..

* و..و..

* وما نسيناك جاي تعمل ايه معانا بعد ...(نطيت من البيعة وشلت العربون) ؟؟