• ×
الجمعة 29 مارس 2024 | 03-27-2024
صحيفة كفر و وتر

سجمنا ود الغرب هجمنا !!

صحيفة كفر و وتر

 5  0  2824
صحيفة كفر و وتر


* في ناس في الدنيا دى من (الفسيخ) بيعملو (شربات) ..
* زي (داليا البحيرى) مثلا .. داليا دى ممكن تديها فسيخ تطلع ليك منو شربات عادى ..
* تطلع ليك منو شربات (تبلدى) زي الما حصل شي ..
* وفي ناس يا كافى البلا من (الشربات) بيعملو (فسيخ) ..
* زي (افراح عصام) مثلا .. افراح تديها شربات تبلدى تطلعو ليك فسيخ ..
* افراح عصام طبعا وصيفابيه ..
* مريخابيه عشان كده (الغنا بتاعها زي كوره على جعفر) ..
* هسه افراح دى لو كانت هلالابيه حنك ساي بتركب مع ناس نانسى عجاج في سرج واحد ..
* لكن مسكينه تابعه للحناطير ..
* المهم ..
* غارزيتو المسكين جابو يعمل (من فسيخ المريخ شربات) ..
* جابو يعمل من فسيخ المريخ شربات قام عمل ليهم من الفسيخ فسيخ ..
* في زول عاقل بيعمل من الفسيخ فسيخ ؟؟
* الناس ديل الجرجير حقهم غرق والله ..
* وجرجيركم ده لا غرق الليلة ولا امس ..
* جرجيركم غرقان من يوم طردتو الشرطة من استادكم وحسن كمال عملها جوه دياركم ..
* حسن كمال عملها فيهم وهسه عنكبة برضو عملها .. الجماعة ديل كلو ما يربُو كتُوت يكبر ويفوت ..
* و(فريد) البريدو احضر جديدو وانحننو في ايدو يا الله حضرني ..
* اثبت هلال الابيض ان (بريق الاسم وحده يكفى) ففعل ما فعل بحنطور العرضة جنوب في سهرة ابدع فيها (اولاد كردفان) وقدمو كثير من العرق والجهد فكان لهم النصر والانتصار ..
* هلال الابيض فريق محترم وطموح احسن نجومه القتال داخل المستطيل وهزمو (وصيف الوصيف) داخل ارضه وبين جماهيره المغشوشه من قبل الاعلام السالب ..
* لم يقصر اخوان التاج ابراهيم وحموده بشير وكل الكوكبه الذهبيه التى اضاعت فوز تاريخى على فريق اكثر من متواضع ..
* المباراة اكدت ان مريخ الوالى لا يقدر على اى هلال حتى ولو كان هذا الهلال هو (هلال عريس مربوط في الجبين) ..
* من هلال كادوقلى لهلال الابيض يا قلبي لا تحزن ..
* قصة المريخ مع (الاهله) دى زكرتني نكته ..
* قالوا في راجل زهجان من مرتو ومرتو زهجانه منو ..
* الراجل ده كل يوم بيجى داخل البيت الساعة (واحده صباحا) ..
* المرا قالت ليهو : سهرك بره البيت ده جاب لي روحي في طرف نخرتي ..
* قام الراجل قال ليها : روحك في طرف نخرتك مش ؟؟ قالت ليهو : ااى .. قال ليها : طيب اعطسى ..
* عمك داير المرا تعطس عشان مع العطسه روحها تطلع ..
* عمك ممكون وصابر ..
* هسه هلال كادوقلى وهلال الابيض جابو للمريخ روحو في طرف نخرتو ..
* وان شاء الله لما نقابلكم بعد اربع اسابيع بنخليكم تعطسو ..
* والله إلا تنسحبو لكن لو قابلناكم بنخلى (جمال الوالى) في حتة و(عزو) في حتة ..
* هلال الابيض عمل ليكم مناظر والفيلم قدام ..
* تعالو لينا بجمال سالم ده عشان نوريكم الفيل بشطفو كيف ..
* الفرق بين جمال سالم واكرم الهادى سليم (الجنسية) بس ..
* ومن هسه كورتنا معاكم في الممتاز ح نلعب بالثعلب وبشه الصغير والصيني ومحمد محمود ..
* والله انا المحيرني إنو الحكم ما قصر معاكم امس ..
* اى حاجة الحكم عملها ليكم ..
* اصلو عندكم ضربة جزاء ثابته زي (حبوب السكرى) اداكم ليها ..
* واداكم سبعه دقايق في شكل سته دقايق ..
* الحكم لعب معاكم عديل لكن الراكوبه في الخريف مشكلة يا حبيبي ..
* عنكبة وكول خلو دفاع المريخ زي (خشم الشايب الما فيهو سُنون) ..
* والله انا لما شفت على جعفر ده اتمنيت حاجة واحدة بس ..
* اتمنيت على جعفر يكون (حارس ليهو بنك وانا اكون حرامى) ..
* يكون خفير في بنك وانا حرامى ..
* اتمنيت كده والله .
* واى زول طبعا حر في (امنياتو) .
* على جعفر ده كده فتشو بيكون عندو موهبه في حاجة تانية ..
* بيكون عندو موهبه في حاجة تانية غير الكوره ..
* يمكن يكون (عازف عود) ..
* او يمكن يكون عندو موهبه في (الصيد) ..
* معقولة البلد دى فيها مدافع بالشكل ده ؟؟
* ياخى مدافع أ تقول (بيحب) الكوره كلها هو سرحان ..
* الزول ده بيكون شاعر ..
* سرحانو ده سرحان شعراء ولا ما كده يا هيثم عباس ..
* هسه عليك يا هيثم عباس بدل اغنية (خبر الشوم) دى لو عملت لينا اغنية كلماتها تقول : (خبر الشوم وخبر الروم فاح وانضرب في الخرطوم يا جنا التبلدى نان كيفن .. عنكبة جارى يتبسم اريت لا شفتو لا اتكلم يا جنا التبلدى نان كيفن .. جعفر قلبو يمين وشمال وناقصو القون ويتبلم يا جنا التبلدى نان كيفن) ..
* الاغنية دى اعملها كده يا هيثم عباس لا بتجيب ليك مشكلة مع المصنفات ولا بتجيب ليك مشكلة مع الجماعة الطيبين ..
* انا داير اقول حاجة لجمهور المريخ المغشوش من قبل الاعلام السالب ..
* وطبعا الذى اطلق على اعلام المريخ اسم الاعلام السالب هو السيد جمال الوالى الشهير بـ(عزو) ..
* بقول لجمهور المريخ حكاية إنو المريخ ما شغال بالبطولة المحليه دى كلام ساكت ..
* ده حنك بغشوكم بيهو ..
* المريخ كده اصلا..
* ما عندو حاجة ..
* كونو المريخ دخل الابطال (هواده) مع الهلال وكونو المريخ بلغ دور التمانية بالتحكيم و(.) وكونو المريخ اتأهل للمربع صحبه راكب ده ما بيعنى إنو المريخ ما مركز محليا ..
* ما يغشوكم بالكلام ده ..
* المريخ (ممحُوق) عشان كده كل ما يتقدم بقع ..
* اقسم بالله المريخ لو السنة دى كان مارى بالظروف المارى بيها الهلال والله من دور الـ(64) تطيرو يا عزو ..
* لكن ده الهلال ..
* والهلال فيهو بركه والمريخ (ممحوق) ..
* إحنا لا بنعرف حبوب فرنسية ولا قروش تحت التربيزه ..
* حاجاتنا بره ..
* هسه عليك الله اسألكم سؤال ..
* فريق في ظرف عشرة ايام خسران مرتين ، عطبرة وام درمان وفي هذا الموسم خسر اربعه مباريات محليه اتنين في استادو واتنين في الولايات ..
* فريق بالمستوى ده وصل المربع الافريقى كيف ؟
* ده سؤال صعب شديد واجابتو واضحه وما دايره درس عصر ..
* لكن الأنا بعرفو زمان عندنا ولد في حلتنا في امتحان الشهادة السودانية جاب مجموع (51) ودرس طب وهسه عيادتو اكبر من شوارع دفاع المريخ ..
* المريخ في الابطال شغال بنظرية ولدنا بتاع الطب ده لكن لما يجى محليا هنا بيكون (تمرجى عادى) ..
* في المباريات الافريقيه المريخ دكتور بـ(حقو) ومحليا المريخ (تمرجى) ساكت ..
* مافي فريق كل اسبوع بيخسر ويتعادل محليا ويتأهل لدور الاربعه افريقيا ..
* اوع تقول لي مركزين في الافريقيه ..
* إحنا ما حبش ولا بنغالا ولا جينا البلد دى (نقلع ضرس) عشان تقولو لينا كلامكم ده ..
* الكلام ده تقولو لزول ببلع منشطات ..
* شوفو ليكم زول ما عندو خالتو في فرنسا وقولو ليهو الكلام ده ..
* لكن ما تقولو لينا إحنا ..
* إحنا اولاد تسعة ودافننو سوا ..
* بمناسبة تسعه دى ..
* وين سيلا ؟؟
* وين عمر بخيت ؟؟
* والله يا عمر بخيت فعلا من يهن يسهل الهوان عليه ..
* منعول ابو القروش البيخليك تقعد احتياطى وعلى جعفر لاعب اساسى ..
* بالمناسبة يا ناس المريخ إنتو طولتو ما (ضبحتو) ..
* هسه لو كان ضبحتو ليكم عجل قبل مباراة هلال الابيض كان كسبتو التلاتة نقاط ..
* لو ضبحتو (تيس) ساى ممكن تتعادلو ..
* لكن ما مشكلة ..
* النقاط دى بتجيبوها بالشكوى ..
* شكوى بـ(الغاء) ..
* فريق شغال شكاوى زي الحله الفيها بيت عزابه ..
* في احياء بيكون فيها بيوت عزابه تلقى الحله كلها تشكى من العزابه ديل ..
* هسه المريخ كل اسبوع عندو شكوى ..
* والشكوى لغير الله مذله ..
* ممكن تشكو هلال الابيض في حموده بشير .
* حموده في الهلال كان لابس الرقم (7) وفي هلال الابيض برضو لبس الرقم (7) ..
* دى شكوى جااااااهزه يا عزو ..
* غايتو جنس غايتو ؟؟
* و..و..
* ولو مني مستني (النقاط) يا سلام عليك يا سلام ..
امسح للحصول على الرابط
 5  0
التعليقات ( 5 )
الترتيب بـ
الأحدث
الأقدم
الملائم
  • #1
    عماد النور 09-03-2015 02:0
    مستوي كتابة صفر عنوان المقال صفرين وغير كدة دمك تقيل جدا
  • #2
    عماد النور 09-03-2015 02:0
    مستوي كتابة صفر عنوان المقال صفرين وغير كدة دمك تقيل جدا
  • #3
    امجد 09-03-2015 01:0
    معقول بس العنوان فقط فيهو من الانحطاط ما فيهو... وشنو داليا وافراح وغايتو جنس غايتو؟؟؟ يا جماعة الزول ده منو وقصتو شنو؟؟ وبكتب وين؟؟ ده عبارة عن مأساة .. عليك الله ارحم نفسك قبل القراء
  • #4
    خالد عبدالله 09-03-2015 12:0
    مستوي كتابي وضيع ولا يرقي حتي في مجلة .. ارحم نفسك
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019