* في العادة (الدلع) بيفسد التربيه ..
* في البيت لو دلعت اولادك لما يكبرو بتكون مشاكلهم اكتر من مشاكل الاولاد الما مدلعين ده إذا ما طلعو ليك (منقوليين) ..
* والله صحى ..
* و(دلع البيت) قد يكون بسبب (الريدة) الشديده للاولاد او بسبب (حنيه الأب والأم) ..
* وبعيدا عن (دلع البيت) اى دلع تانى وراهو مصلحه ..
* وجمهور المريخ بلغ مرحلة متقدمه جدا من (الدلع والدلال) ..
* وفي ظني ان سبب هذا الدلع هو السيد جمال الوالى الشهير بـ(عزو) ..
* زمان يا جماعة لما المريخ يخسر نقاط بتلقى الجمهور ينتقد اللاعبين ويكورك فيهم وممكن (يفقلهم) بالحجار والقارورات والطوب ..
* عادى بتحصل ..
* والحاجة دى حصلت في الهلال ..
* مرة الهلال خسر مباراة قام الجمهور طارد اللاعبين امام الاستاد واذكر ان انور الشعلة قد استغل ركشه للهروب من جمهور الهلال الغاضب ومع ذلك الجماهير لحقت به و(قلبت الركشه وبداخلها انور الشعله) ..
* وبعد هذه الحادثه الهلال بقى يلعب الكوره زي ما الله خلقها ..
* جمال الوالى (دلع اللاعبين ودلع الجماهير) ..
* ومصلحة جمال في هذا الدلع هو الاستمرار في الكرسي ..
* الزول ده لا عندو انجازات ولا عندو فهم في الكوره ..
* زول الحكومة جابتو يحكم المريخ زيو وزي اى موظف ..
* وجمال عشان يستمر في المريخ قام اشتغل على محورين اتنين ..
* المحور الاول هو (البنيان) وعمل ليهو (طابقين ومقصور طائره) ..
* المحور التانى هو الاقتراب من الجماهير وتلبيه رغابتها حتى وإن كانت تلبيه رغبه الجمهور تاتى على حساب القانون والمبادئ ..
* واظن جمال الوالى خرق المبادئ في كثير من الاحيان وهو يفاوض لاعبين داخل كشف الهلال بل ويقدم لهم المال (مقدم عقد) وهم يلبسون شعار الهلال على نحو ما حدث في موضوع كلتشي ..
* وايضا (بصمة علاء الدين) تعتبر جريمة وخرق للقانون والمبادئ ..
* وقد جاءت تلك البصمة من اجل كسب ود الجمهور حتى لا يذهب فييرا للهلال ولكنه ذهب رغم البصمة ..
* كثير جدا من الاحداث والمواقف تؤكد ان (عزو) حاول ارضاء الجمهور على حساب حاجات تانيه ..
* جماهير المريخ من جانبها قابلت تضحيات جمال الوالى وخروقاته للقانون والمبادئ قابلتها بحب كبير لهذا الرجل ..
* وقد توج هذا الحب بـ(طابق شاخور والمظله الطائرة) ..
* حدث هذا بينما فريق الكره سنويا ملطش في الممتاز من الهلال وطاير من التمهيدي على الصعيد الافريقي ..
* (12) سنة طيران من التمهيدي ودور الـ(32) ووصافه محليه حتى اصبح الحنطور هو اشهر وصيف في الدوريات العربيه والافريقيه ..
* هسه أنا لو المريخ شال الممتاز برضو بقول عليهو وصيف ..
* بقول عليهو كده لانو إتعودت إنو المريخ يكون وصيف حتى ولو كان هو بطل الدورى ..
* ودى زي قصة العزابي ..
* قال ليك واحد عزابي (12) سنة ساكن في الحله وفاتح ليهو دكان ..
* العزابي ده بعد اطناشر سنة إتزوج وجابو ليهو ولد ..
* يوم السمايه نسوان الحله مرقن ماشات بيت السمايه ..
* في مرا من نسوان الحله ما عارفه السمايه قامت سألت ليها واحدة قالت ليها : خير ان شاء الله ؟؟ قالت ليها خير والله ماشين بيت السمايه مرت العزابي وضعت ..
* إتخيل .. (مرت العزابي وضعت) !!
* الراجل إتزوج ولسه الجماعة بيقولو ليهو (عزابي) ..
* وده حال المريخ طبعا ..
* المريخ لو شال الممتاز برضو في نظرنا وصيف ..
* مجرد ضل ..
* المهم ..
* جمال الوالى ومجالسه المتعاقبه هى سبب الدلع ..
* طبعا جمال الوالى (ثابت) والمجلس بتغير كل مرة زي (رزاق) في الامل ..
* رزاق ثابت والامل كل مره بغير جلدو ..
* مجلس المريخ واعلامه السالب كل انتكاسه للمريخ وما اكثر انتكاساتهم يحاول ان يوهم الجمهور بأن هذه الانتكاسه حدثت بفعل فاعل ..
* وهو الامر الذى جعل الجماهير المسكينه تعفى اللاعبين وتبحث عن الطرف الثالث الذى يستهدف المريخ ..
* اسمعوها مني .. والله العظيم مريخكم ده مافي زول مستهدفو غير الهلال ..
* إحنا مستهدفنكم لاننا اسياد بلد ..
* مرة نشيل الدورى بفارق (18) نقطة ومرة بفارق (7) نقاط والمرة دى بنشيلو بفارق (11) نقطة ..
* إحنا ديل مستهدفنكم ..
* إحنا ومعانا الأخ الكريم (رزاق) والأخ الاصغر (فريد) ..
* دلع جمال الوالى للجمهور جعلهم بلغو مرحلة طرد الشرطة من الاستاد بموافقه المجلس والاتحاد العام في سابقه لم تحدث ولن تحدث ..
* ده دلع ولا ما دلع ؟؟
* طردو الشرطة وناس متوكل احمد على يضحكو ..
* عشان كده يا جماعة اللافتات المحموله من قبل جماهير المريخ امس لم تكن مستغربه ..
* هى نتائج طبيعيه لسياسه بتاعت دلع لا يعلم به إلا الله ..
* جمهور المريخ داير يهددنا بـ(داعش) ..
* دايرين يهددونا بـ(داعش) وما عارفين إحنا (داعش زاتا) ..
* إحنا داعش زاتا ياشباب ..
* والبتعملو فيهو ده ما بحلكم على بالقسم ..
* مش لو قلتو داعش لو جبتو اسامة بن لادن زاتو الفرق ست نقاط قابله للزيادة ..
* لو علمتو (تنظيم القاعده) الفرق ست نقاط ..
* لا داعش ولا بورسعيد ..
* لو كان عندكم رجاله كان تعملوها مع الامل عطبرة داخل المستطيل ومع هلال كادوقلى داخل المستطيل ..
* مش تتغلبو جوه الميدان وتجو جاريين على المكاتب عشان تشيلو النقاط ..
* النقاط لو بشيلوها بطريقتكم دى على بالنعمة تانى ما بنلعب كوره ..
* نجى الاستاد نتمرن ويوم الكوره ما بنجى وتانى يوم نشيل لافتات ونمشى الاتحاد ونكسب النقاط ..
* ياخى فريقكم هلكان وخسر كوره عدييييل كده مالكم ومال شكوى وداعش ؟؟
* هسه مريخاب الجنوب يقولو ليكم شنو ؟؟
* مريخاب الجنوب قطع شك بيكون عندهم رأي في حكاية اللافتات دى ..
* مريخاب الجنوب لما جابو ليكم المستندات الخطيرة بتاعت الشكوى ما قالو ليكم شيلو لافتات واطلعو ..
* انا متأكد (مليون في الميه) مريخاب الجنوب ما قالو ليكم شيلو لافتات واطلعو الشارع ..
* ياخى إحنا المويه عندنا من رمضان ما جات وما طلعنا الشارع دايرين تطلعو إنتو ؟؟
* دايرين تطلعو عشان ست نقاط خلتكم قاعدين في موقعكم الطبيعى (وصيف) ؟؟
* انا داير اعرف الجده شنو ؟؟
* الجديد شنو ؟
* شن جده على المخده التنجيد ولا الكيس الجديد ؟؟
* ما كل سنة بتكونو وصيف لينا ..
* البشوف لافتاتكم دى يقول الممتاز ده بطولتكم المحببه ..
* غايتو جنس غايتو ؟؟
* الدلع بيعمل اكتر من كده ..
* الجمهور الامبارح كان شايل لافتات ده مفروض يجيبو ليهم (رزاق) بس ..
* والله انا لو كنت مسؤول بجيب (رزاق) وبدخلو مكاتب الاتحاد العام ان شاء الله يعمل إعاره وهميه بس الجمهور يشوفو داخل على الاتحاد ..
* والله لو كان شافو رزاق كان نسو لافتاتهم وجرو ..
* وكضابين والله ما بعملو اى حاجة ..
* لو ده كان جمهور الهلال معليش نقول الموضوع ممكن يكون خطير ..
* لكن ديل ما بعملو حاجة ..
* إنتو لو صحى صحى مظلومين انسبحو من البطولة ..
* شاور مريخاب الجنوب وإنسحبو من البطوله ..
* ما تمسكو بينا زمن بـ(لافتاتكم دى) لانو إحنا والله عندنا حاجات اهم منكم ..
* ما فاضين لمواضيعكم الهايفه دى ..
* إنسحاب وما بتقدرو تنسحبو لانو قراركم ما في يدكم والسبب إنتو (نادى حكومى) ..
* وداعش البتقولها دى ما بترجع ليكم نقطة حتى لو مريخاب الجنوب جو سكنو معاكم في العرضه ..
* واهم من كده نقابلكم ونوريكم داعش وحماس وطالبان كيف ..
* نرجع ونقول .. موضوع اللافتات ده ما تشتغلو بيهو كتير لانو موضوع جد هايف وما جايب حقو ..
* وعلى جمهور الهلال العظيم ان يلتفت لما هو قادم ..
* الجماعة ديل (جرجيرم غرق) وبقو يشيلو اللافتات ويطلعو البيانات .
* وكمان قالو (الكاف) ح يعمل ليهم كشف منشطات في المباراة القامه .
* وعلى فكرة .. (الكاف) جاب جهاز جديد بيكشف المنشط الفرنسي والمنشط الايطالى ..
* ايطالى بـ(الظاء) ..
* و..و..
* وبكره يا قلبي الحزين تلقى ...(الفرق بقى 11 نقطة) .