• ×
الجمعة 25 يونيو 2021 | 06-25-2021
محمد الطيب الامين

هيثم حاليا قاعد في الهلال زي الزول القاعد مع نسابتو !!

محمد الطيب الامين

 12  0  1975
محمد الطيب الامين


* ضرب (عصفورين بحجر واحد) هو لا يعني ذكاء (الزول الضارب) بقدر ما يعني غباء العصفورين المضروبين ..
* العصفور لو حافظ علي المسافة بينه والعصفور الثاني مؤكد أن (الحجر) ما بضرب عصفورين ..
* ومهمة الهلال في كردفان تبدو أصعب من (الحجر) الذى مطلوب منه ضرب عصفورين في آن واحد ..
* يستهل الهلال المشوار بهلال كادوقلي بـ(عروس الجبال) وفي الأسبوع الثاني مباشرة يلعب الهلال أمام هلال الأبيض بـ(عروس الرمال) ..
* وهذه ست نقاط .. ثلاثة منها مزروعة وسط (الجبال) وثلاثة اخرى مدفونة تحت (الرمال) ..
* ومؤكد ان هلال الجبال وهلال الرمال سيحافظان على المسافة بينهما حتى لا يضربهما حجر الهلال الواحد ..
* والمباراتين ديل بالذات سيكون لهما تأثيرا واضحا علي مستقبل الهلال سوى كان تأثيرا إيجابيا او سلبيا ..
* ولذلك المطلوب ان يعرف الهلال أنه هلالا وكبيرا لهذه البلد ..
* أكتر حاجة محتاج ليها الهلال هى ان يلبس الهلال شخصية الهلال ويظهر شخصيته باعتباره أفضل فريق في السودان ..
* انت لو ما اديت نفسك قيمتها لن تجد من يقيمك ويضع لك وزنا ..
* والله صحى ..
* شيبوب (يعوعي) في القيروان و(بصلتو) في الهلال ..
* والأخ ألوك (يعوعي) في المريخ و(بصلتو) في الهلال ..
* وبما أن ذلك كذلك نحن نوصي ألوك بالمحافظة على نفسه وشرب كميات من المياه اثناء التدريبات وكذلك شيبوب ..
* خلو بالكم من انفسكم وشهر خمسة قريب بأذن الله ..
* وانت بالذات يا ألوك لازم تأكل كميات كبيرة من (الترمس والعجوة) عشان شهر خمسة لما تجي الهلال تكون جاهز ..
* وياريت والله لو الكاردينال خصص واحد من قدامى لاعبي الهلال لمتابعة ألوك بالمريخ ..
* ممكن يا الكاردينال تعين خالد جوليت يرصد ويتابع تدريبات ألوك مع المريخ لحدي شهر خمسه بأذن الله ..
* ألوك هو اول لاعب مسجل في الهلال وبيتمرن في المريخ لفترة خمسه شهور قادمة ..
* غايتو جنس غايتو ؟؟
* ليس من مصلحة الهلال ان يهمش كافالي بشة الصغير والصيني والثعلب ووليد ..
* ومهم جدا شيخ موكورو يلعب في الوسط بدلا من هذا (التطرف) الذى يخصم من إمكانياته ويجعله يكثر من إرجاع الكرة للخلف وكذلك أبو عاقلة ..
* ثم مهم جدا إعادة (ضبط مصنع كنيدي ايشيا) ..
* وأهم من هذا كله إتاحت الفرصة لولاء الدين ووليد الشعلة حتى ولو كان ذلك على حساب كاريكا ..
* أيام وينطلق الدوري الممتاز ..
* وقبل إنطلاقته نذكر معتصم جعفر بأن اي ظلم للهلال إحنا منسحبين ..
* تظلمو الهلال طوالي إعتبرونا إحنا والأمل عطبرة منسحبين ..
* اعتبرونا إحنا والكاشف اخونا ده منسحبين ..
* وبالمناسبة ..
* في ظل وجود (إتحاد اللقيمات) فأن الدوري الممتاز هذا العام سيكون منقولا على (الواتساب) ..
* النقل المباشر في (الواتس) والإعادة في (الفيس) بأذن الله ..
* أوقفت قناة (الشروق) بث حلقة رئيس الهلال المعلن عنها اليوم السبت ..
* (الشروق) أوقفت بث الحلقة رغم ان الكاردينال في هذه الحلقة لم يقل (العارف عزو مستريح) ..
* والله صحى ..
* صحيح ان مباراة قورماهيا إحتفائية تدخل في إطار الاعداد للموسم الجديد ..
* ولكن دون شك ما فعله الهلال باستاد بورتسودان أكبر من ان نغض الطرف عنه او نتجاوزه ..
* كونو المباراة اعدادية ولا إحتفائية ده ما بيعني إنو الهلال يظهر بذلك الشكل الأسيف الذي ظهر به ..
* وأنا حقيقة أكره ان اقول : (الهلال بدأ 2016 من حيث انتهى في 2015) ..
* لا أريد ان اقول ذلك لان قناعتي (90) دقيقة لا تكفي لتكون عنوانا لموسم يتألف من ثمانية اشهر ..
* ولذلك يجب ان يكون نقدنا للهلال في حدود الـ(90) دقيقة مع عدم التدخل في المستقبل ..
* والهلال في بورتسودان كان أشبه بـ(فرق الحِله) لدرجة جعلتني احس في بعض الاحيان ان الهلال هو المريخ ..
* والمباراة اكدت ان (الدلع) و(الترطيبة) ظهرت في حركة كثير من اللاعبين ..
* ومجلس إدارة نادي الهلال لو لم يشهر العين الحمرا لهؤلاء اللاعبين ستكون السيطرة صعبة عليهم بعد الآن ..
* ما في حاجة اسمها الكاردينال يجتمع بكاريكا ..
* لشنو الكاردينال يجتمع بكاريكا ؟؟
* السبب شنو يعني ؟؟
* كاريكا داير يعلب كورتو يلعب ما داير يقعد في الكنبة زيو وزي اى معاوية فداسي ..
* حكاية رئيس النادي يقعد مع لاعب ويبحث اسباب تراجع مستواه ده حنك ميت ..
* كاريكا ما عندو مطالب مالية ولا عندو مشكلة لو زعلان من حاجة طوالى يجي يقعد في الكنبة ولما يرضى من الزعل يجى يلعب مع أخوانو ..
* الهلال أكبر من كاريكا واكبر من اى زول ..
* والدلع ما كويس ..
* الهلال أقام معسكر على اعلى مستوى في تونس والمستوى الذى ظهر به الفريق في بورتسودان لا يمكن ان يظهر به اى فريق حتى ولو كان الفريق المقصود المريخ ..
* وانت لما تصرف على الفريق وتدعمو بافضل العناصر تانى ما في مبررات ولا في اعذار ..
* المبرر الوحيد يمكن يكون سوء الطالع ، لكن الهلال في بورتسودان ما عمل حاجة اصلا عشان نلقى ليهو مبرر ..
* بل ان الهلال ضيع فرصة ذهبيه لفتح (الشهيه) والعودة بـ(كاس) قبل انطلاقة الدوري ..
* إحنا قلنا الهلال ماشي (يظبط رأسو في بورتسودان) استعدادا للدوري ..
* ولكن أحبط الهلال الناس وتواضع بشكل كبير ..
* نعم .. صوت العقل بيقول الخسارة في المباراة الودية أفضل من الفوز ..
* والوقت ما وقت حساب ..
* كل الحنك ده إحنا عارفنو ..
* لكن كمان شكل الهلال في بورتسودان ما في زول بيسكت عليهو ..
* وعشان ما في زول يقول لينا حكمو صوت العقل ..
* نحكم صوت العقل مع ناس كاريكا ونيلسون ديل والله وطاتنا تصبح ..
* تاني الحساب بالثانية ..
* والكاردينال يفترض يراجع الدوائر في الهلال منذ الآن ..
* حسب علمي ان هيثم مصطفي ما عارف نفسو بيعمل في شنو وما قادر ينسجم ومكسور الخاطر ..
* وهيثم البنعرفو إحنا ما ممكن يسكت فترة طويلة ..
* هيثم حاليا قاعد في الهلال زي الزول القاعد مع نسابتو ..
* التواصل بين هيثم ونجوم الهلال ضعيف و(اشتر) وفيهو (جزء من النص موفقود) وحكاية الصور البتتنشر دي ما كفاية ..
* الناس لو زعلت ولا ما زعلت وجود هيثم في الهلال وفي هذه الفترة قنبلة قابلة للانفجار ..
* لو دايرين الهلال يعمل حاجة السنة دى بطلو العواطف والنرجسية والأنانية ..
* موضوع هيثم ده سأعود له غدا ..
* المهم ..
* فشل المريخ في علاج علاء الدين يوسف ..
* علاء يوسف قال ليهم انا مصاب قالوا ليهو (إتعالج بلدي) ..
* المريخ عاد للعلاج البلدي والعلاج بالاعشاب يا رجاله ..
* وعلي فكرة ..
* في السوق في بضاعة بيجيبوها بالطيارة وببيعوها بالخسارة ..
* وفي الدوحة المريخ جاء المطار ورجع قبل ما يركب الطيارة ..
* والمريخ الذى فشل في ركوب الطيارة بعد ما وصل المطار سيفشل في تسجيل اى هدف بعد ما يوصل الشباك لان هجومه يتألف من (النعسان) ..
* الأغنية بتقول : (الناعسات يعونن) وإحنا وأولاد حلتنا بنقول لناس المريخ : (الناعسات هجومن) ..
* أنا حقيقة لو كنت رئيس بعثة المريخ (لا قدر الله يعنى) كنت ما برجع من المطار لو جا الجن الاحمر زاتو ..
* قول لي كيف ؟؟
* كنت بتحرفن ..
* بقوم بوزع اللاعبين ..
* بوزع اللاعبين مع الركاب ..
* يعنى يبقو (صحبة راكب) ..
* والله صحى ..
* بشوف لي زول أماراتي بقول ليهو : عليك الله شيل معاك ضفر ده في طرف يدك خلي يركب معاك (صحبه) ..
* بجيب المعز محجوب وبشوف لي مسافر مصري بقول ليهو شيل لي معاك المعز ده (صحبه) ..
* المريخ غلط غلطة كبيرة والله ..
* ما كان يرجعو من المطار نهائي ..
* شنو يعني ما عندكم فيزا ؟؟
* تسافرو (صحبة راكب بس) ..
* هو اصلا وجود المريخ في حياتنا الرياضية (صحبة راكب) ..
* من البداية وجودكم في (الكون الرياضي) صحبة راكب ..
* والسنة الفاتت بلغتو دور الأربعة مع الإتحاد الليبي (صحبة راكب) ..
* وحياتكم كلها (صحبه في صحبه) ..
* عليك الله ما بتخجلوا ؟؟ تجو لحدى المطار وترجعوا ؟؟
* طيب أها بكرة بتجو كيف ؟؟
* عندكم حق الفيزا ولا نوجه رابطة الهلال بالدوحة للقيام بالواجب ؟؟
* معسكر المريخ في الدوحة كان برعاية رابطة الهلال بالدوحة ..
* ورابطة الهلال مطلوب منها ان تشرف غدا على اجراءات عودة المريخ من داخل المطار ..
* علي الأخوة في رابطة الهلال ان يقوم بهذا الواجب تقديرا وعرفانا للرجل الهلالابي الكبير والمعروف أسامة ونسى رئيس نادي المريخ ..
* وبالمناسبة .. إحنا في الهلال فات علينا ان نهنئ قطب الهلال المعروف أسامة ونسى بمناسبة تمديد فترته برئاسة المريخ ..
* كل الأمنيات لقطب الهلال اسامة ونسى بالتوفيق والشكر أجزله للحكومة التى اختارت الرجل المناسب للمكان الما مناسب ..
* وما تنسو .. غدا كلنا مريخ حتى تعود البعثة سالمة ..
* سالمة بـ(الصاء) ..
* و..و..
* وأنا في شخصك بحترم (عمار الدمازين) ..
امسح للحصول على الرابط
بواسطة : محمد الطيب الامين
 12  0
التعليقات ( 12 )
الترتيب بـ
الأحدث
الأقدم
الملائم
  • #1
    nono 01-24-2016 03:0
    من قبيل احاول افهم حاجة من عمودك ده ...بس لقيت نفسي ما فاهم حاجة اي نوع من الكتابات ياهذا .... احترم عقول الناس ما تكرهنا الهلال
  • #2
    نصرالله 01-24-2016 10:0
    انت جيت من سوسة مكتمل الاعداد كما تطبلتم انتم صحفي الهليل وقلتم هلال 2016 وجمع البطولات الان جيت تبرر هزيمتكم في اول امتحان لكم من قورماهيا وفي عقر داركم وياخذ منك الكاس ويطير به جوا الى كينيا وانتم تتفاصحون وكاس صفيح ولائي ما قادرين تجيبو جوي لي ناديكم المفلس والمريخ بي سجمو ده احسن منكم وبلو راسكم .
  • #3
    Mustafa Ali 01-24-2016 10:0
    الزول ده مالو من اسه بقى يهضرب بالاتحاد الليبي خلعتو مباراة قورماهيا ولا شنو؟ اتحاد العاصمةالجزايري وليس الاتحادالليبي وكان نسيت الفريق ده غلبك في أمدرمان وحتى صحبة راكب لم يرض ياخذك معه.
  • #4
    احمد 01-24-2016 09:0
    (لو حافظ علي المسافة بينه والعصفور الثاني مؤكد أن (الحجر) ما بضرب عصفورين)....

    ...ههههه ...شكلك كنت عسكرى مرور...
  • #5
    خالد حسن 01-24-2016 09:0
    انت مهلوث بى تلاته اقوان الاتحاد الليبى فى مرمى ماكسيم وتجى تقول المريخ اتاهل بى صحبة راكب مع الاتحاد الليبى ماعارف انو فريق الاتحاد الجزائرى خليك مع ناس كاريكا ومعاويه فداسى سيب المريخ فى حالو بالطريقه دى بتمشو الخور هلال بيه مشاكل كثيره وبيه خلل فنى يحتاج الى توضيح هلالك صفر كبير.
  • #6
    عزالدين سيد وديدي 01-24-2016 09:0
    اقعد اتريق على المريخ لمن تجيك الطامة الكبرى. انت ماعارف اي كاس محمول جوا ليس من نصيب الهلال؟
    قلت الهلال كبير البلد؟ وليه كبير البلد لا يصعد ويستلم الميداليات الفضية وضيوف الشرف منتظرين صعود وصيف المريخ.
    كبيييييير سيكافا وينو؟
    انت كلامك حلمنتيشي وليس لك علاقة بالصحافة.
  • #7
    وطن الجمال 01-24-2016 09:0
    الواحد فيكم الاول يتكلم كلام حلو وجميل وبعدين يتسحب و"يخش" في مواضع الفتن. خليتونا نمل قصة هيثم وعاوزين كمان بتدأوا لينا في كاريكا. ياخي دي مسائل تخص الادارة والجهاز الفنى. ممكن ولو عندكم معرفة تحللوا لينا الامور الفنية البحصل داخل الميدان وتتركونا من الامور اللي تخص مجلس الادارة ودائرة الكرة والا تقدمو ورشحوا انفسكم يمكن الجمهور يسوط ليكم وتجو تجيبو لينا كاس الابطال وكاس الاندية ومين عارف يمكن كمان كاس أبطال أسيا واوربا. صحافة وهم.
  • #9
    مانديلا 01-24-2016 08:0
    الله سبحانه و تعالى كرم بنى فكيف تصفهم بالديوك ... واضح انه عندك تخلف عقلى .. تأكد لن تكون فى يوم من الأيام على بوابة الزعيم ... قال رئيس بعثة المريخ دا شرف لن تحلم به حتى حلما ... سؤال هل أنت فعلا صحفى أم كاتب منتديات
  • #10
    احمد عوض 01-24-2016 08:0
    والله المريخ دا عامل ليكم عقده شديده مادام المريخ ضعيف وقاعد في الدنيا صحبه ليه نص مقالك عن المريخ ربنا يشفي انشاء الله
  • #11
    بابا 01-24-2016 07:0
    ما تخافوا التحكيم وبلنتياتو جاهزة وحاضرة ويمكن كمان يطرد ليكم كم لاعب
       الرد على زائر
    • 11 - 1
      .shankoo 01-24-2016 11:0
      ناس التحكيم والبلتيات واكلوا الجيف والمزورين وفاقدو التربية والأخلاق وحتى القاتلون للصحفيين معروفون أيها الدلقون المتدلقن الجربان. ....كفاية وللا ازيدك؟ ؟؟؟؟؟!!!!!
    • 11 - 2
      .shankoo 01-24-2016 11:0
      ناس التحكيم والبلتيات واكلوا الجيف والمزورين وفاقدو التربية والأخلاق وحتى القاتلون للصحفيين معروفون أيها الدلقون المتدلقن الجربان. ....كفاية وللا ازيدك؟ ؟؟؟؟؟!!!!!
  • #12
    osama 01-24-2016 03:0
    اترك كاريكا في حالة ومافي داعي تأتي بسيرة فداسي في هذة النقطة وبطلوا الحقد عن هيثم .. فلتقل خير او تصمت.
       الرد على زائر
    • 12 - 1
      .shankoo 01-24-2016 10:0
      يا شيخ اسامة كلنا نحب كاريكا وهيثم ولكننا نحب الهلال أكثر وعليه فليس أيهما كبيرا على النقد والتوجيه مع علمنا الكامل أنهما يحبان الهلال حبا جما. أوافقك فلنترك هيثم يعمل ونوفر له الجو المناسب للعمل أما كاريكا فلم يعد مقنعا كما كان في السابق فأما أن يجتهد ويعود لمستواه المعروف وأما ان يأخذ استراحة محارب حتى يسترد مستواه المعروف والا.....ودائما الهلال فوق الجميع.
    • 12 - 2
      .shankoo 01-24-2016 10:0
      يا شيخ اسامة كلنا نحب كاريكا وهيثم ولكننا نحب الهلال أكثر وعليه فليس أيهما كبيرا على النقد والتوجيه مع علمنا الكامل أنهما يحبان الهلال حبا جما. أوافقك فلنترك هيثم يعمل ونوفر له الجو المناسب للعمل أما كاريكا فلم يعد مقنعا كما كان في السابق فأما أن يجتهد ويعود لمستواه المعروف وأما ان يأخذ استراحة محارب حتى يسترد مستواه المعروف والا.....ودائما الهلال فوق الجميع.
    • 12 - 3
      .shankoo 01-24-2016 10:0
      يا شيخ اسامة كلنا نحب كاريكا وهيثم ولكننا نحب الهلال أكثر وعليه فليس أيهما كبيرا على النقد والتوجيه مع علمنا الكامل أنهما يحبان الهلال حبا جما. أوافقك فلنترك هيثم يعمل ونوفر له الجو المناسب للعمل أما كاريكا فلم يعد مقنعا كما كان في السابق فأما أن يجتهد ويعود لمستواه المعروف وأما ان يأخذ استراحة محارب حتى يسترد مستواه المعروف والا.....ودائما الهلال فوق الجميع.
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019