• ×
السبت 31 يوليو 2021 | 07-30-2021
محمد كامل سعيد

كاسونغو باليورو يا مريخ وليس بالدولار..!!

محمد كامل سعيد

 17  0  3446
محمد كامل سعيد

* يشهد جميع العرب للشعب المصري بالبراعة في (التجارة).. وبما انهم سلكوا سكة الاحتراف قبلنا في السودان فمن الطبيعي ان يتفوقوا ويتقدموا علينا بخطوات ثابتة في ظل تعاملهم باهتمام مبالغ مع (أكل العيش) المقرون عندهم بكلمة (الصعوبة)..!!
* ويتخذ ابناء مصر من التجارة وسيلة للتكسب في كل المجالات ويتخذون من الشعارات البراقة اداة لتسهيل النجاح ويتداولون العبارات الدالة على اهمية (التكسب) لدرجة صارت معها العديد من (الافيهات) محفوظة خاصة للعرب الذين احتكوا بهم..!!
* ومن العبارات الشهيرة (الرزق يحب الخفية.. التجارة شطارة.. ويا بخت من نفّع واستنفع.. القرش الابيض ينفع في اليوم الاسود) وغير ذلك الكثير المثير الموزون من العبارات والامثال والافيهات المحببة لهواة السير في سكة التجارة والبيع والشراء..!!
* سقت تلك المقدمة لقناعتي بانها ستكون المدخل المناسب للموضوع الذي تدور تفاصيله حالياً بين ادارة نادي المريخ وضيفه الاتحاد السكندري ووكيل اللاعبين اسلام سراج الدين بخصوص المحترف الكنغولي كابونغو كاسونغو المراد (تلبيسه) للاحمر..!
* ولعل الوضع المالي المأسوي الذي يمر به الاتحاد السكندري وما حدث في صفقة استعارة المريخ للاعب عاشور الادهم مقابل نصف مليون دولار كشف لادارة النادي المصري ان الحل لكل مشاكله المالية موجود في السودان وتحديد عند رئيس المريخ..!!
* الشاهد ان ادارة الاتحاد منحت كاسونغو اجازة منتصف الموسم عقب نهاية الدور الأول وتوقف المسابقات في شمال الوادي لاتاحة الفرصة لمشاركة الفراعنة في نهائيات بطولة الأمم الافريقية بالجابون ثم اعلن النادي عن انهاء وقطع اجازة المحترف فجأة..!!
* اللاعب التحق بالبعثة في الخرطوم بعدما غاب عن المشاركة في لقاء كأس السياحة الذي اقيم ببورتسودان.. وفي هذه الاثناء تحرك الوكيل سراج وقادة البعثة الادارية في اتجاه رفع سعر اللاعب بـ(تسخين) سوقه ورفع قيمته ربما لايقاع المريخ في الفخ..!!
* وبمساعدة الارزقية الحمر وربما بدون قصد تابعنا تفاصيل الاثارة وهي تفرض نفسها على السيناريو بتأكيد الوكيل بوجود عرض (كبييير) من نادي الاتحاد السعودي.. و(كبيير دي) القصد منها مغازلة قادة المريخ لاجل (كشكشة الجيب) وزيادة العرض..!!
* كاسونغو وعدد كبير من لاعبي الاتحاد واعضاء الجهاز الفني لم يتسملوا رواتبهم منذ شهور هذا بخلاف متأخرات مقدمات العقود والدليل ان النادي وبعدما تسلم قيمة استعارة الادهم قام بحلحلة جزء كبير من مشاكلة وفي السكة المزيد من الحلول على يد المريخ..!
* تردد في اجهزة الاعلام المصرية ان وكيل كاسونغو اشترط على المريخ الحصول على (600) ألف يورو مقابل بيع اللاعب.. يعني العملية قلبت يورو وتخطت مرحلة الدولار.. وفي المقابل نتابع (المُدّاح) وهم سضاعفون من حرارة وقيمة وحجم الصفقة..!
* وذلك المبلغ الخرافي والذي بالامكان ان يساعد المريخ على التعاقد مع عشرات المحترفين الصغار في شكل استثمار بالامكان ان يجد التشجيع من الارزقية الحمر الذين يتعاملون مع النادي من باب انه مصدر الرزق الأول لهم بالتطبيل والاجماع السكوتي.!!
* ستكتمل الصفقة ولن نجد غير عبارات الغزل الموجهة للرئيس الطوالي جمال الوالي وبذات تفاصيل السطحية وبالطبع لن يتجرأ احد على توجيه اي كلمة نقد بل على العكس سنجد الكوال والصفاقة وهم يلتقطون الاشارة ويسيرون بكتاباتهم في الاتجاه الواحد..!!
* وفي ظل غياب الشفافية سنتفرغ لـ(الغلاط) ونتوه في محيط اثبات القيمة الحقيقية للصفقة وتحتفل الجماهير وتزيد القصائد الغزلية في اللاعب وصاحب الصفقة وتمضي الايام ويستفيد النجم والوكيل والنادي والارزقية ويكون المريخ هو اكبر الخاسرين..!!
* تخريمة أولى: لظروف خاصة لم اتمكن من التعليق على احداث لقاء أمس بين المريخ وضيفه الاتحاد السكندري.. وباذن الله نعود للتعليق في عدد الغد مع الامنيات ان يكون الاحمر قد اقنع المتابعين وازال المخاوف التي سكنت دواخلهم بعد مباراة بورتسودان..!
* تخريمة ثانية: يعود علاء يوسف للمشاركة بعد نهاية فترة الايقاف التي صدرت في حقه من جانب الاتحاد الافريقي وبلا شك فان ما حدث في مباراة المغرب امام الكوكب المراكشي يعتبر مهزلة كبيرة اساءت للاعب ونادي المريخ ولابد من الاستفادة منها..!!
* نخريمة ثالثة: اقتربت نهائيات الامم الافريقية من الانطلاق وفي ذات الوقت لا احد يعرف بالسودان ما هي الخطة او الفهم الذي سيخوض به صقور الجديان التصفيات القادمة والتي لا نستبعد ان نكتفي فيها ايضاً بالفرجة من المنازل.. انها المهازل..!!
امسح للحصول على الرابط
بواسطة : محمد كامل سعيد
 17  0
التعليقات ( 17 )
الترتيب بـ
الأحدث
الأقدم
الملائم
  • #1
    السما الأحمر 01-13-2017 01:0
    أنت دافع من جيبك ولا اصلا المريخ خزائنه فاتحة وجمال الوالي ومجلسه بياخدو منها . هؤلاء الرجال يدفعون من حر مالهم لاسعاد الجمهور وانت مالك حاسد ولا بتخدم أغراض جهة معارضة الوالي ومجلسه .
  • #2
    نعمان عمر 01-13-2017 05:0
    انا نفسي افهم انت عايز شنو بالضبط كدا ياخي عشان يتعمل ياخي ما ممكن ااي شي يكون في نظرك سلبي انت بتنتقد من اجل النقط وبطرقة متهكمة غير ذات هدف واضح او بناءة .. ياخي استحي فهمنا انت عايز شنو .. امجاد مافي بح ..
  • #3
    ضفر 01-13-2017 12:0
    والله العظيم انت إنسان مريض كل الفرق في العالم بتسوق لاعبيها ودا جزء من نشاط كرة القدم كنت أتمنى انك تتحدث عن اللاعب ومدي إمكانية الاستفادة من إمكانياته ولكن حديث ينم عن حقد دفين ربنا يشفيك . إداره الموقع يانشر تعليقي كامل يا عدم النشر
  • #5
    عزالدين ابراهيم عبدالرحمن حاج موسي 01-12-2017 06:0
    بالله عمودك دا اليوم ولا حتي علقت علي المباراة كانت كيف عاجبه سيادتك والله لا نغير ليك مين الوالي والله مزمل والله نغير ليك اسم المريخ ما عاجب سيادتك انت انسان مريض نفسي أي حاجه تنتقد من اجل الانتقاد ما من اجل المريخ يستفيد مع اني ما شايف حاجه منك يستفيد منها المريخ اقلب وجههك الوالي قصبا عنك زعيم طوالي ومزمز علي دماغنا من فوق والله نتوسط ليك تشتغل معاه لا اشكالك ما تستاهل تشتغل في صحيفه ما عارف ليه كفر ووتر بخلوك تكتب .....
  • #6
    OMER 01-12-2017 04:0
    وانت مال اهلك باليورو او الدولار او الاسترليني او الين او الجنيه
    ياخي انتي زول نكدي بشكل ماعادي
    والله العظيم محتاج طبيب نفسي
    ياخي حس شوية ياخ
    يعني ماممكن الناس دا كلها تكون غلط وانت الوحيد الصاح
    عليك الله اقعد مع نفسك شوية واسألها ليه انا مكروه من القراء والصحفيين وشيل من راسك الاجابة المقتنع بها انت وهي لانك بتقول الحقيقة المجردة .
    بتستفيد شنو لما تبقي زول مكروه وتنكد علي الناس ؟؟
    مليون سنة تكتب بنفس الاسلوب ونفس الافكار بتاعت نظرية المؤامرة وانو اي كلام يقولوهو الصحفيين وراهو مصلحة وسمسرة وبعد دا كلو ماغيرت حاجة من الوقع ولو بنسبة 1% وانما ازداد عدد كارهيك .
    ياخ اذا كان واقعنا الرياضي دا ماعاجبك وماقدرت تغير فيهو شئ فهذا يعني فشلك في مهمتك فمافي داعي تحرق اعصابك واعتزل الكتابة وشوف ليك شغلة تانية غير الصحافة الرياضية وريح اعصابك وارحمنا ياخ .
    نقطة آخيرة : كل المؤيدين لكتاباتك علي قلتهم هم من الهلالاب .
  • #8
    Sami Mustafa 01-12-2017 03:0
    لا جديد يذكر ولكن قديما يعادانت قروش الوالي دي محرقاك عشان ما لقيت فيها نصيب هههههههههه
  • #9
    عمر الفاروق 01-12-2017 02:0
    الكاتب محمد كامل سعيد دا انا استغرب كيف صار صحفي من أساسه.. كل كتاباته لا تخلو من الارزقية والمطبلين والصفاقة ومش عارف ايه.. يا اخي اين كتاباتك الني يستفيد منها القراء؟؟ اذا كان عندك مشكلة معينة مع شخص محدد وانا اعلم من هو فلا يمكن ان تكتب يومياً لدرجة الملل الشديد لتصفية الحسابات بينك وبينه.. هذا مرض نفسي ادعو الله ان يشفيك منه.. اتق الله في القراء واكتب للفائدة والمصلحة العامة
  • #10
    حسن الامبن 01-12-2017 01:0
    تخريمة اولي انت دافع في القروش دي كم ؟؟؟
    تخريمة ثانية ليه انت علي طول تهاجم المريخ عبر الصحف ليه ما تسال اهل الشان ان كان فعلا المريخ لم يستفد من الاتحاد السكندري شي فقط السكندري جاء من مصر عشان يتخلص من مشاكله علي حساب المريخ
    تخريمة اخيرة نتمني ان تكون صحفي متابع ولا تكتب فقط بمضمون المأمرة والتخمين روح لاهل الشأن وتحدث عنهم واعرف قبل ان تتهم المريخ بكل شي دون علم فقط تظن ان فلان وعلان ارزقية هم من فعل كذا وكذا
  • #11
    احمد عمر 01-12-2017 12:0
    الزول اصلا ما في شي عاجنه في المريخ حتى لو المريخ جاب كاس اندية افريقيا برضو ما حيكون مسرور
  • #12
    الزعيم 01-12-2017 11:0
    بالدولار باليورو بالإسترليني. عليك تجلس فى الرصيف. مع. الجاهل شوربة وأستاذك. حاج ابكر ادم وأبكى.

    مزمل. يشكل خطورة عليك با اب دما تقيل. الهمز واللمز ما زال مسيطر عليك. زمان اتحدينا انطق اسم مزمل. لك جائزة. باليورو والدولار مزمز خطير حتى بالإغراءات المالية. ما تقدر تكتب اسمه. فى جبن يا إخوانا اكتر من كدة. نسال اب قلبا ميت محمد ناقص. أيه صار فى المحاكم ان شاء الله طلعت براءة. مزمز جاهز لدفع المحامى. حق الدفاع ما إنسانية. مزمل رجل. يحب يساعد الناس حتى ولو من المنافقين. معروف بالانسانية. لا تضع الفرصة تفوتك أبقى شجاع. امشى قدم طلب لمقابلته. ممكن يقابلك ما رجل متواضع. مع زى ناس الرشيد. وفطومة. بطل التخريمات والكلام الفاضى حل مشكلتك
  • #13
    مصطفى الحسن 01-12-2017 10:0
    القروش رااااااقدة بالكوم بس انت اطلع منها .. رويبضة
  • #14
    عوض احمد خليفة 01-12-2017 10:0
    انت غياظ وقلبك ميت يا بتاع فطومة . جمال الوالى بيدفع من حر ماله ما من مال المريخ يدفع باليورو بالدولار بالمصرى انت مالك شغل فيه . وبالله حاول أرضى فطومة والكاردينال بطريقة تانية . غير كلمة الأرزقية والغمز واللمز يا هماز يا لماز يا مشتء بنميم . شوف شغله غير مزمل لانك مزمل ما بتقدر عليه . يا مرتشى الكاردينال
  • #15
    sahir 01-12-2017 09:0
    اولا لا ظروف خاصه ولا شى انت ما بتعرف تكتب من راسك اصلا لانك لست بصحفى .. هى دى عادتك طول عمرك ما حصل كتبت عن مباراه فى يومها زى (( الرجال )) البتعرف وبتكتب وتقول رايها وتبادر .. انت يا ذكى بتخلى الناس يكتبو وتجى تالت ايام المباراه تشيل فقره من عمود هذا وفقره من عمود ذاك وتجيبه لينا وهذه طريقتك حتى مع مبارايات الدورى الممتاز ... يا اخى العزيز مافى اخس من انك تكتب عن شئ تعرف انه غير مؤكد زى ما تكلتمت عن الصفقه وانت تعلم انها بنسبة تسعين بالمائه غير دقيقه وحتى لو كانت صحيحه يا ابن الحلال دى فلوس الوالى ولو كان راجى نصايحك ما كان بقى الوالى رجل الاعمال الكبير لو محتاج لى نصايحك انت !!! الما قادر تشترى امجاد وعامله ليك عقده ومخلياك تطربق وفاضح نفسك بكلام فارغ وباقى مضحكه للناس
  • #16
    محمد مصطفى 01-12-2017 09:0
    صراحة أسلوبك ركيك جدا وانا سوداني ما أحب الناس تضحط على سوداني وللاسف هو ده الحاصل فيك انصحك أقرأ كثيرا لناس دسوقي مزمل خالد عزالدين وعلم الدين والشباب الهنا الموضوع بسيط ما محتاج لفة تجارة ورزق عايز خفية وكذب على الصحافة المصرية حقيقة فهم متأخر خالص..كمان عامل فيه حريف ها ها ها ها
  • #17
    تونجيلا 01-12-2017 09:0
    كاسنفو باليورو ولا بهللة انت دافع شى من جيبك يا بابور جاز
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019