هلال العشق الجميل يبدأ يوم الجمعة 12 مايو في تمام العاشرة مساء هوايته المحببة في حصد نقاط الأبطال عندما يلتقي وصيفه الدائم بالجوهرة الزرقاء وأجمل مافي الأمر أن قاضي الجولة هو الجنوب أفريقي دانيال بينيت وهذه المباراة هي الفيصل لجماهير الرياضة لمعرفة البطل الحقيقي والبطل المزيف ومن هو الفريق المدعوم والمدفور بالتحكيم ، ومباراة الجمعة لها نكهة خاصة حيث يخوضها الشاب الكوكي بعناصر شابة قوامها مكسيم وبشة وكاريكا وأطهر ونزار وتيتيه وكمان شيبولا أصبح سوداني يعني ( زول ) ونقول لي عزيز ( شيبو ) حبابك ماغريب الدار وماك لي حقنا الودار ... لينا زمن نفتش ليك وجيتنا الليلة كايسنا وجيتنا وفيك ملامحنا بعد ياشيبو مايئسنا ونرجع لينا توصينا ونسمع ليك تحدثنا ، طبعاَ يئسنا ماتوقعنا تجنيس شيبولا والحمد لله الموضوع تم على خير ويمكن إضافة صخرة الدفاع واتارا ، وبعد كدة شباك مكسيم تشفوها بالرقراق والشاب أبوعاقلة نقول ليه أظهر وأتألق يامعلم والداير يتألق يلبس أزرق ، طبعاً في أبطال 2015 عندما وصل المريخ مربع الذهب للأبطال صحبة راكب مع سيد البلد كان نجم المريخ وقتها هو شرف شيبوب أما الآن الشاب شرف قد نال شرف إرتداء الفنيلة الزرقاء وأصبح من أبناء الهلال ( والله زي ما أقول لكم ) عشان كدة نقول لعجوز الدولتين ( أب قفة ) جيب ( هكرك وكوامرك المعمرة ) ناس واوا وكلاتشي وعاشور وتعال في مقبرة الخصوم يوم الجمعة من بدري ... ( عندك ربع دستة أخدها وأتطلب الله ) والإعلام السالب مايقدر يفتح خشمو ويقول ديل حكام صلاح أحمد محمد صالح ، أما إذا عايزين تعرفوا مين صاحب الثلاثية في الشباك الحمراء (شوفوا المسدار دا )
*** هلال المكاسب في صدرو عدة نياشين
*** والإعلام السالب بصراحة فعلو مشين
*** الحكم دانيال كارب ماهو من المرتشين
*** وإسم الغالب فيهو الباء ومعاها حرف الشين
(ياربي يكون المقصود بحرف الباء و الشين يكون شجرابي)
يعني بعد كدة عايزين من هلالاب المهجر الفاتحة القوية خاصة هلالاب طيبة الطيبة ناس محمد الأمين التني وفيصل عبد المنعم ومصطفي سمير ( أبومرين ) وبابكر عوض الشيخ وعبد الدائم عبد المجيد وجلال صالح وكل الشلة أما هلالاب الدمام نقول للإخوة أبوناصر وأبوحسن يوم الجمعة بعد مولانا عثمان يعمل ليكم التلاوة في الزاوية شيلوا منو الفاتحة القوية وهلالاب مكة ناس ود المتمة ميرغني حماد إنت محل شغلك مقابل الحرم ماداير وصية وأخونا أدروب بكري عيسى حمد الرجل الذي لو وزع حبه على هلالاب مكة لوسعهم الأيام ديل في السودان وهو رجل ظريف قال لى والله ياجعلى أنا ( حاسي وشي سمح مع خصوم المريخ ) كل ما أدخل مباراة أفضل نتيجة للمريخ تكون التعادل !! أها يابكري البركة تنجعل في عضامك ...مادام عارف نفسك فال خير علينا ...مفروض على الأقل مجموعات الأبطال السنة دي يكون دوامك في أستاد المريخ وماتشيل هم لي التذكرة من جدة لي بورتسودان لو عايزها بالريال السعودي عندك فيصل الأقرع ولوبالريال القطري في سيف خواجة أما إذا عايز بالدرهم الأماراتي ( كتاحة ) مابقصر ، بس شد حيلك ، سوف نعود للمفكرة الإجتماعية مساء الأربعاء وصباح الخميس بإذن الله .
*** يامن يسر الجوهرة الزرقاء لم شمل الفرقاء
شرف الخصومة في العهد الزاهر أمثلته كثيرة فرغم موقعة الجمل التي كان هدف الناس منها إصلاح ذات البين وشاء الله أن يقع قتال !! وسئل سيدنا على كرم الله وجهه من أحب الناس لرسول الله ( صلوات ربي وسلامه عليه ) فقال عائشة فقالوا له من الرجال فقال أبوها ، وسئلت السيدة عائشة نفس السؤال فقالت فاطمة فقيل لها نقصد من الرجال فقالت زوجها ، ونحن في سودان اليوم ما أحوجنا لشرف الخصومة خاصة في المجال الرياضي ، ولقد شاهدنا الكرادنة وهم يناصرون أشرف الكاردينال والأرابيب وهم يناصرون صلاح إدريس ، ولو سلمنا جدلاً أن هلال الديمقراطية يسمح لأبنائه بالصراع الديمقراطي بالوسائل الصحفية وأن هلال القانون قد يتصارع أحبابه بالوسائل القانونية وفي النهاية تبقي حقيقة أن الكاردينال هو من بنى الجوهرة الزرقاء وسجل للهلال تيتيه وأوكرا وشيبولا وغيرهم وأنه رئيس الهلال الحالي وله مكانته وإحترامه وأن صلاح إدريس هو من سجل للهلال بشة وكاريكا وبوي وفي عهده هزم الهلال الأهلي القاهري بثلاثية حارقة وهزم مازيمبي في عقر داره ونال الهلال كأس أبوظبي الجوية وله مكانته وإحترامه ، والسؤال الذي يطرح نفسه مادخل المريخاب في هذا الصراع الأزرق !! وهم الذين رفعوا يافطة مكتوب عليها (شكراً للكاردينال) عندما سجلوا محمد عبد الرحمن وقالوا إن الكاردينال يخدم مصالحنا !! طيب ليه محتفلين بذهابه !! مفروض تنصبوا سرادق العزاء !! وحتى لو رجع صلاح للهلال فهو إبن الهلال ورئيس الهلال وليس رئيس المريخ ، بالله ياصلاح ( مخصم بالرسول ) يوم الجمعة بعد صلاة الفجر عايزين منك فاتحة كاربة ربنا ينصر الهلال ( كيتاً على الإعلام السالب ) ، وإن كان من مأخذ على الأرباب فهو كتابته في صحيفة ( الخاوية ) وإن كنا لانعلم الظروف التى جبرته على ذلك !! وكما قال الرئيس عمر البشير إن لجوء الإمام الصادق للمعارضة يخصم من الرصيد ولا يضيف له المزيد ، تأن ولا تعجل بلومك صاحباً ... لعل له عذراً وأنت تلوم ، ونسأل الله الذي يسر لنا أمر الجوهرة الزرقاء أن ييسر لنا لم شمل الفرقاء ، وكل الأقمار كحل على العين وتاج على الرأس .
*** حوار ظريف في باب شريف
ذهبت أمس لسوق باب شريف في جدة وقابلت محمد آدم مكنن من هلالاب جدة وكان معنا من المريخاب عصمت عبدالله وهباني النور وإبراهيم محمد على ومازال الأخ عصمت عند مقولته المشهورة عندما شاهدني وهو يقول ... الزول القدامي دا محمد عثمان إنسان محترم لكن محمد عثمان الجعلي بتاع كفر ووتر من أخبث خلق الله ، أما هباني فقال لو الهلال جاب كأس أفريقيا أنا بشوف أعلى عمارة في جدة وأقع من فوق ليها !! وداعبهم محمد مكنن قائلاً ... إنتوا في الدورة العربية بدل تمشوا تتبهدلوا وتنغلبوا ستة وسبعة من الهلال السعودي والترجي مفروض تكتبوا في فنايلكم عبارة ( حلايب سودانية ) عشان المصريين يرجوعكم من المطار !! ونقول للأخ عصمت إبنك الصغير المكاشفي طلع هلالابي عشان تعرف خيار الأبرياء هو الهلال ومستقبل الأجيال ، ولقد كانت لحظات جميلة تنفسنا فيها عبير هلال مريخ المضمخ بروح الوطن والعصبية للقمة عند المغتربين أخف من غيرهم لأن أبناء السودان في الخارج يحدوهم الشوق والحنين لأرض النيلين ... والأخ محمد مكنن من أبناء القضارف ويحب فريق الشرطة فسألته عن شعوره يوم مباراة الهلال والشرطة فأجابني ... والله يامحمد أنا الهلال دا مابخت في مكانه حاجة .
*** همسة الوداع
حبايبنا الحلوين إعلامهم مازال شغال تخدير للصفوة ، ضحكت وأنا أقرأ عنوان صحيفة ( الزاوية الحمراء ) ليوم السبت الماضي وهي تتحدث عن القرعة العربية وتقول ... قرعة العرب تقسو على الهلال السعودي والترجي وتضعهما في مواجهة ( الزعيم ) !! الناس ديل بغشوا في منو !! هم فاكرين الصفوة دقوسة لي الدرجة دي !! وبهذه المناسبة نهمس في أذن الإعلام الأحمر ... يعني نفهم من كدة نجوم الهلال ناس إدواردو وعمر خربين ونواف العابد ومحمد البريك حظهم التعيس رماهم في مواجهة ناس واوا وضفر وعلى جعفر وبخيت خميس ؟ مجرد سؤال .