• ×
الأربعاء 3 مارس 2021 | 03-02-2021
محمد عثمان الجعلي

الهلال الأفريقي واللعب الموسيقي

محمد عثمان الجعلي

 9  0  3242
محمد عثمان الجعلي


هلال العشق الجميل يعتبر بطولة كبار أفريقيا هي بطولته المحببة لأنه أول فريق عربي سوداني يصل مربعها الذهبي عام 1966 ( هلال جكسا وأمين زكي وسبت ) كما أنه وصل نهايتها مرتين أولها عام 1987 ولقد حرمه الحكم المغربي لاراش من الكأس بعد أن نقض هدف وليد طاشين الصحيح وإعترف بذلك بعد مضي 28 سنة كبار قادة العمل الرياضي بمصر حيث قال الإعلامي المصري مدحت شلبي إن الهلال السوداني هو البطل الحقيقي لكأس أبطال أفريقيا عام 1987 وأكد ذلك الحكم العالمي جمال غندور ومن المدربين حسن شحاتة ومصطفي يونس ، وذلك أن الرئيس المصري السابق حسني مبارك كان لا يدخل مباراة هامة إلا إذا ضمنوا له فوز الطرف المصري حتى لا تتشاءم به الجماهير وإنتهت المباراة بثنائية للأهلي أحرزها أيمن شوقي وعمل لاعب الأهلي فاول مع الثعلب وعندما ولجت الكرة شباك يور إعتبرها الحكم المرتشي قون للأهلى ، ولكن ياعناقيد العنب المساكين ليها رب ، وها هو الهلال عام 2007 يقصي الأهلي من مربع الذهب بثلاثية حارقة في الخرطوم تبادل في إحرازها داريوكان وكرنقو وقودون ، كما أن هلال 2017 هلال كاريكا وبشة ونزار رفع نفس الشعار ( الفوز بالأميرة السمراء ) مش ملاحظين سر تألق الهلال وسر الرقم 7 في الأعوام 1987 و 2007 و2017 وهاهو هو مارد أفريقيا الصعب يصل المجموعات ليواصل مسيرة النور ، والهلال عندما يلعب أفريقياً يصبح أسداً جاسر ونسراً كاسر ، ولقد دوّن ذلك شاعر السودان الكبير الراحل محمد الحسن سالم حميد ( رحمه الله ) عندما قال *** البلد الليلة هلالابي ... والنيل الأزرق نشوان ...والأبيض أبيض يا أحبابي ... يامشرف كل الأتيام ... في يوم السعد الأفريقي ...يامفرح كبد الأيتام ... باللعب البعد الموسيقي ... ياهلال يا جبيرة سودانك ... في جبين الشعب الحبوب ... أبشر وباشر لي أقوانك ... ياعريس السمر المحبوب ... البحر الليلة هلالابي ... المطر ... الحجر ... الترّابي ... الشدر الشايل متكابي ... الساقي عروقو الحطابي ...الشوقو عنقريب هبابي ...الشاقي مروقو هلالابي ... الوسار ذوقو هلالابي ... القمر البابو قصاد بابي ... حبيتو لأنو هلالابي ، وهلال المجموعات السنة ( ربنا ريحو ) ومباراة البداية مساء الجمعة 12 مايو الساعة عشرة وبالجوهرة ، وسوف يضاف شيبوب للكشف الأفريقي ويعود بشة بعد أن عاد نزار وشيبولا الحمد لله بقي سوداني من ناس أم درمان والمدافع واتارا سوف يتم تسجيله رسمياً ماعايز أتكلم عن كاريكا وتيتيه وبوي عشان العين الحمراء وشرارة ، والحمد لله أول مباراة لبطل السودان مع حمام الجيران !! بالمناسبة الأقمار رامين لي قدام وبحبوا شوربة الحمام !! لذا لزم التنويه .
*** كل من يعرقل مسيرة السودان يعتبر ياسر عرمان
عندما أراد الله الخير لشعبنا الطيب المضياف برفع الحظر الجائر عنه إنبرى المارق ياسر عرمان ليطالب أمريكا بعدم رفع الحظر عن أرض الخير والطيبة ولكن الأمريكان ( كسفوه وأحرجوه ) ... وفي الجانب الرياضي عندما خسر إتحاد اللقيمات العملية الإنتخابية لجأ لعمته الفيفا بمعلومات مغلوطة لينال تمديد مؤقت حتى أكتوبر وسوف ينجلي الأمر عندما تصل المستندات الأصلية والمعلومات الحقيقية للفيفا وكما قال أبو القوانين الأستاذ محمد الشيخ مدني إن العملية الإنتخابية وفوز المدهش وصحبه عملية قانونية وأن عمومية إنتفاضة 30 أبريل شرعية والفريق المدهش يؤكد خاطبنا الفيفا وسوف نمارس نشاطنا من داخل مباني الإتحاد ، وكالعادة شذ الإعلام السالب عن الإجماع الوطني وهو يدافع عن العهد المباد وتحدث عن فوز معتصم بمقعد في الإتحاد العربي بإنه إنجااااااز وقالت صحيفة الصدي ...الدكتور معتصم يرد على المؤامرات بمزيد من الإنجازات ، والطريف في الأمر أن الفيفا أصدر لائحة تصنيف المنتخبات حيث تدحرج منتخبنا الوطني للمركز رقم 155 ومنتخب ( أولاد الجنوبين ) مركزه العالمي رقم 146 والتطوير ياكدة يابلاش يامعتصم ومجدي !! سألني الأخ مامون علي العباس من هلالاب الرياض قائلاً ... إنت يا أستاذ مادام مجدي قدم إستقالته من الإتحاد السوداني بعد سقوطه في الكاف ليه جاري وراء الشكاوي للفيفا !! ونقول للأخ ود شندي العزيزة والله يا المامون إتحاد اللقيمات دا شطب رأسنا عديل كدة !! بي قليبك تقول لي تعال وتعال وبي عيونك تقول لي مافي مجال ، لكن يا مامون الحمد لله مباراة القمة مساء الجمعة سوف يحكمها حكم أفريقيا الأول الجنوب أفريقي ( دانيال بينيت ) وبينيت ماعنده يمة أرحميني ، ومافي طريقة الإعلام السالب يقول الحكم إنحاز للهلال وأنا إحساسي إن النتيجة ثنائية زرقاء فما فوق ، وصبحية السبت يامامون كان شفت ( سميك ) يعني إسمه على إسمك ( مامون أبوشيبة ) رأسه ضرب زي الزول النشلوه في موقف الحافلات ماتستغرب !! بس هلالاب مكة والمدينة يساعدونا بالفاتحة القوية !! يلا يا على عبد الحي إنت قلت فوز الهلال يعجبك زي دخول إبنتك سلمي كلية الطب عشان كدة عايزنك من صباح الجمعة تداوم لينا في الروضة الشريفة ، ونحن خلونا في الحرم المكي عشان أناطين المريخ نخليهم يشربوا مايرووا .
*** رسائل غنائية رياضية من الفنان بادي محمد الطيب
نريد أن نرسل 4 رسائل غنائية رياضية من أغنية ( في الفؤاد ترعاه العناية ) كلمات الشاعر يوسف مصطفى التني غناء الفنان بادي محمد الطيب والرسالة الأولى من هلال الخريجين والحركة الوطنية وهو يناصر النهضة والإصلاح من أجل نهضة الرياضة في وطننا العزيز وتقول الرسالة *** في الفؤاد ترعاه العناية بين ضلوعي الوطن العزيز ... لي عداهو بسوي النكاية ... وإن هزمت بلملم قواي ... غير سلامتك ماعندي غاية ... إن شاء الله تسلم وطني العزيز ، والرسالة التانية من إعلام الهلال الذي يدعو لجمع الصف الوطني وهو يرد على الثنائي الإعلام الأحمر والإتحاد السابق وأن فرح هذا الثنائي الضعيف فرح مؤقت لأن مهزلة ترتيب منتخب الوطن طعنة في خاصرة الوطن وتقول الرسالة ***مرفعينين ضبلان وهازل ...شقوا بطن الأسد المنازل ...النبقى حزمة كفانا المهازل ... ونبقي درقة وطني العزيز ، والرسالة الثالثة من وزارة الشباب والرياضة وهي تستنكر إستعانة قادة العهد المباد بالأجنبي ضد وطنهم وتقول الرسالة *** عندي وطني بقضي لى حاجة ... كيف أسيبوا وأروح لي خواجة ... يغني وطنو ويحيجني حاجة ... وفي هواك ياوطني العزيز ، والرسالة الأخيرة من نائب رئيس العهد الجديد المهندس عبد القادر همد وهو يرد على أفراد القبيلة الحمراء بأن الإنحياز لنادي بعينه كما كان يحدث في السابق سوف يضر بالرياضة وأنه سوف يولد الضغائن في النفوس وتقول الرسالة *** نحن للقومية النبيلة ... مابندور عصيبة القبيلة ... تربي فينا ضغائن وبيلة ...تزيد مصائب وطني العزيز ، يجب أن نعلم أن مايقوم به إتحاد ( أسماء في حياتنا ) هو فرفرة مذبوح ساعة خراج الروح ...أما مباني الإتحاد فارقوها فراق المريخ لي نقاط المكاتب .
*** همسة الوداع
حبايبنا الحلوين زى ماقال الأستاذ ياسر فضل المولى ( ناس المريخ كان أخدوا طماطم يا خدوها بالصفيحة ) عشان كدة عندهم التسجيل بالكوتة ، في أول الموسم سجلوا 3 حراس مرمى وقاموا فكوا (أبوعشرين ) للشرطة القضارف وكلكم عارفين تألق أبوعشرين مع الشرطة وسجلوا من أهلي شندي باسيرو بامبا وشطبوه ورجعوا تاني قالوا دايرين يسجلوه وكتب إعلامهم أن باسيرو قال لا يهمني المال عايز ألعب مع المريخ مباراة الهلال !! ياربي باسيرو دا ما داير مال إمكن جاي لي خلاوي أولاد الحاج جابر !! والظريف تسجيل كوتة محترفين من نيجيريا إعادة كلاتشي وتسجيل كونلي ومعه أوجو !! تخيلوا أوجو شطبوه !! ( والله زي ما أقول لكم ) خلي بالكم الناس ديل ماعندهم ( صيبة ) وعرفة في التسجيلات !! وبهذه المناسبة نهمس في أذن الإعلام الأحمر إنتوا أوجو رجع نيجيريا سريع كدة !! الزول دا جاء يرفع معاكم الفاتحة ولا جاكم مرسال .؟ مجرد سؤال .







امسح للحصول على الرابط
بواسطة : محمد عثمان الجعلي
 9  0
التعليقات ( 9 )
الترتيب بـ
الأحدث
الأقدم
الملائم
  • #1
    فيصل الاقرع 05-07-2017 11:0
    سلام جعلينا والرقم7 انا زيك متفاءل به ااما رسائلك الغنائيه فصلته تفصل وخاصه في الحته دي(مرفعينين ضبلانوهازل )...ويا روعتك يا حميد عليك رحمةالله وبعدين حرام عليك تربط اسم مامون باسم ابوشيبه وتقول له سميك
    اليوم قريبك عصام الحاج جيب له فتنه جديده قال جماهير المريخ لن تسمح للمدهش باقتحام الاتحاد بالله دا جلس في مدرجات كلية القانون؟ لم تكلمنا عن التسجيلات يا جعلي
    ههههها قال خلاوي ود الحاج
  • #2
    ابو حازم 05-07-2017 10:0
    سلام حبيبنا الجعلي، شايفك ما جبت سيرة قرعة ابطال العرب ، تخيل ناس السعودية عنوانين صحفهم كلها قالت الهلال يواجه الترجي ما جابو سيرة المريخ، الامر ده زعلني جدا، يكون ما معتبرين المريخ فريق كبير يخافو منو زي الترجي ولا شنو.
    المهم عندنا يالجعلي هلال العز عايزنو يحقق فوزا كبير على المريخ يوم الجمعة ويفتح شهيتو لمباريات المجموعات.
    وتحياتي
  • #3
    الامين عبدالقادر 05-07-2017 09:0
    التحية والسلام اخوى الجعلى -- ربنا ينصر هلال الساجدين والناس الصالحين والفالحين يوم الجمعة القادم ونتمنى ان يكون اشاوس الازرق فى يومهم لرد الدين للوصيفاب بعد الخسارة فى كاس الطلاب وليست ببعيدة ان شاء الله
    والكنكشة مستمرة من اتحاد السجم البائد ولاندرى متى ينتهى هذا المسلسل وهل الفيفا التى ابعدت بلاتر وميشيل بلاتينى سوف تقف مع اتحاد الوكالات والسفريات ونحن ننتظر دور الاتحاد الجديد والا اتينا بشداد !!!
    ولازلنا مع دفاعنا الذى يحتاج لقلب دفاع عينو حمرة وشرارة والموية ماتمر بجانبه ؟؟؟
    ودمتم للوطن والهلال فى حفظ الرحمن ورعايته
  • #4
    05-06-2017 11:0
    هلال جكسا ولي هسا كاس افريقيا بشمو قدحه
    حتي صار عمر الصفر الافريقي 86 سنة
  • #6
    عزالدين ابراهيم عبدالرحمن 05-06-2017 08:0
    دا نفس السنه الفاتت الشطيهم كردنه قبل نص الموسم يا جعلينا ونشوفكم يوم الجمعه ان شاء الله تردو لينا بس
  • #7
    احمد بشير محمد 05-06-2017 06:0
    من انت لتحدد المارق من الشريف؟?؟؟ كاتب ركيك العبارة انطباعي مكرر وممل.
  • #8
    ودعقيده خلف 05-06-2017 05:0
    استاذ الجعلي سيب االهضربه والجرسونه طيب انت ما دام عارف اللعب في استادتكم والنقاط مضمونه ليش تطلب من هللاب مكه والمدينه ناس الروضه الشريفه ان يدعو للهلال بالفوز دي دلاله علي ان فريقك ضعيف وخايفين من لدغه العقرب الغدار
  • #9
    منعم ابوناصر 05-06-2017 04:0
    جعلينا رسايلك حلوه زى رحيقك دوما وكانت فى محلها تماما لكن ياخوى ناس الجاكومى ديل ماهم مارقين من اتحاد اللقيمات لانهم سوف يشتهون اللقيمات هم وحبايبك والحين انعرف مين المدعوم والمدفور واصحابك يناصرون فى الباطل والجاكومى حالف طلاق مايمرق من محل اللقيمات والنقاطه يقع عليه المثل (الجمل الرقد فى البلاد ان جرو كسرا وان خلو خسرا) وفعلا يقليبك تقول لى تعال ونعال وبعيونك تقول لى مافى مجال
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019