واصل هلال العشق الجميل مسيرة الخير والنور وفاز على أسود الجبال بثلاثية نظيفة ، مع العلم أن الهلال لم يكن جيداً فى شوط المباراة الأول خاصة خط الوسط المكون من المعلم ونزار وسيدى بيه وأنقذ جينارو مرماه من هدف محقق فى الشوط الأول بعد خروجه الخاطئ وإبعاد الكرة برأسه وكان ثنائى الهجوم كوليبالى والشاب محمد عبدالرحمن فى إنتظار الإمداد من خط الوسط الغائب الحاضر وكان خط الدفاع بقيادة مساوى وأتير وبوى وخليفة مهزوزاً بعض الشئ ، لم يتعلل أبطال الهلال بعدم توفر الأمن فى كادوقلى كما فعل حبايبنا الحلوين من قبل وإنما ثبتوا وصمدوا صمود الجبال ، وفاز النابى على ماو فى شوط المدربين الثانى حيث تعمد دفاع أبناء الجبال عرقلة المزعج كوليبالى خارج خط 18 وتصدى للضربة الثابتة الجنرال عبد اللطيف بوى بصاروخ كاتيوشا بعيد المدى سكن شباك الحارس فيصل حسين ... وأجرى النابى تغييراً موفقاً فى الشوط الثانى قضى بخروج سيدى بيه الذى تأثر بإيقاف الحكم الظالم وديدى الفاتح ودخل مكانه بشة وخرج نزار ودخل الشغيل وخرج الشاب جكسا ودخل الشاب وليد علاء الدين وبدأ الهلال فرض السيطرة وتحرك كاريكا بإيجابية وأرسل قذيفة لم يكن أمام المدافع محمد حامد غير أن يكمل مسيرتها داخل الشباك برأسية لا مناص منها وختم الثلاثية الدكتور بشة مستفيداً من تمريرة نجم المباراة المهندس مدثر الطيب كاريكا ... والغريب فى الأمر أن المدرب ماو لم يهاجم التحكيم ويزعم أنه قد ظلم فريقه لأن هلال العشق لا يعتمد على هدايا وإنما يحرز النصر خدمة يمين وعرق جبين ... ولقد قام المدرب ماو إن الهلال تفوق عليه بسبب فارق الإعداد وغياب بعض النجوم ، وسوف يلعب سيد البلد مباراته القادمة مساء الأثنين أمام الأهلى الخرطوم ويوم الثلاثاء يغادرنا فى حفظ الله ورعايته هلال الملايين لمالى ليلعب فى أول مشواره فى دور 32 ضد الملعب مساء السبت ... ومباراة الرد الأفريقية بمدينة كريمة الكريمة ...بالمناسبة المريخ فاز على السلاطين بثلاثية مقابل هدف أحرزها راجى وواوا و أوليفيرا وقال محسن سيد إن ضربة جزاء راجى وهمية والحكم ظلمنا !! لذا لزم التنويه .
*** هلالابى جديد لنج بالمدينة المنورة
إتصل بى الأخ جلال صالح من هلالاب المدينة المنورة وقال عندنا مريخابى تحول لتشجيع هلال الملايين وظننت أن الأمر مناكفة بين جمهور الفريقين وجاءتنى رسالة من الأخ على عبد الحى من هلالاب طيبة الطيبة ليؤكد لى نفس الموضوع وقال إن هذا الأخ إسمه عثمان محجوب السيد وأرسل لى رقم جواله ...وإتصلت على الأخ عثمان محجوب وأجريت معه حواراً ظريفاً بإعتباره هلالابى جديد لنج ووجدته داخل الحرم النبوى والرجل صاحب منطق قوى وخفيف الظل وفى أوقات كثيرة كنت أوقف الحوار لأنى لا أتمالك نفسى من الضحك وكما يقول مثلنا السودانى سمح الغناء فى خشم سيدو ... بس عن إذنكم ( نظبط الرأس بى كباية شاى كاربة ) سألت البطل الهلالى من وين فى الأهل !! فأجابنى من الشمالية منصور كتى ( قرية دقيرن كتى ) وأشجع المريخ منذ عشرين عاماً والأخ محجوب يعلق فى منتدى كوورة سودانية بإسم ( عالى النجوم ) وأضاف عثمان محجوب إخوتى مريخاب وهلالاب والمريخاب هم محمد والسر وأبوالقاسم والهلالاب حسن والسيد وعندى خال مريخابى فى البلد أحترمه جداً هو عثمان عبدالله وكذلك صديقى المريخابى الدكتور محمد أحمد عبدالرحمن ( الفيل ) بالمدينة فمازحته طيب يامحجوب مادام عندك الناس ديل وبحترمهم ليه تركت تشجيع المريخ !! فأجابنى حبوب الضغط والسكرى يعنى رخيصة !! يا أخى أنا المريخ يكون غالب وأكون عائش على أعصابى لأنه ممكن فى أى لحظة ننغلب !! عكس الهلال يكون لاعب أفريقياً ويكون مهزوم ورغم ذلك يقلب الطاولة فى أى لحظة وينتصر !! وسألت الأخ محجوب أكيد الصفوة هاجموك !! قال لى يازول !! ده كلامك !! ماخلوا لى صفحة أنقلب عليها ... واحد قال لى يعنى إنت بتشجع المريخ عشان الإنتصار بس !! قلت ليه يعنى إنت بتشجعه عشان إنهزم بس !! وقال لى آخر نحن بحثنا فى فيشك ولم نجد مايؤكد إنك كنت بتشجع المريخ !! فقلت له مادام كدى إنت زعلان مالك عشان أنا خليت المريخ !! يا أخى إمكن أنا سبب الكج ليكم ... وسألت الأخ عثمان محجوب عن أفضل لعيبة كان يحبهم بالهلال فقال ...هيثم مصطفى ومهند وكاريكا ... وأضاف بالله فى زول بيعرف كورة مايحب مهند الطاهر !! وسألت عثمان سؤال أخير عن قاصمة الظهر فى ترك المريخ وتشجيع هلال الملايين فقال بصراحة ... كمبالا سيتى !! وختم محادثته بعبارة زهجنا كل مرة ننتظر وننتظر ونطلع من التمهيدى وردد مسدار شعر ظريف يقول فيه :
وداعاً يازعيم .. والقلب زائد حرقة
وحباب سيد البلد أب فنيلتاً زرقة
موسم الخبت راح شمار فى مرقة
وجانا العالمى وفررر طرنا زى الورقة ...
ونقول للأخ عثمان محجوب بالخليجى ( صح الله لسانك ) ومناسبة زى كدة تستاهل ( عشاء بيك ) بالمدينة من حسن محجوب وفيصل عبدالمنعم وغيرهم من الهلالاب وبعد كدة من حقك تخلف كراعك وتستمع بى هوبة الغزال ، وربنا شافك من التمهيدى وناس البلدية وواوا وشيم لص وضفر والزومة ... وكما قال نصر الدين الشغيل الهلال عالم جميل ...ومرحباً بك فى صفوف هلال الساجدين والناس الصالحين ...وإنت ذاتك زول صالح ياشيخنا .
*** رسائل غنائية رياضية من الفنان صلاح بن البادية ** الرسالة الأولى من جماهير الهلال وهى تستقبل سيد البلد فى كادوقلى وتشجعه بكل حماس وتردد :
غار المساء والكون صبح ... عشان جمال إتأملوا
كل الحروف الفى الخيال بى لهفة جادو وماغلو...
قالوا الجمال ياغالى بيك كانت نهايتو وأولو ...
ونحن فى هواك ياغالى ..لا بنطيق بعاد لا بنحملوا ...
والرسالة الثانية من جماهير الصفوة الوفية لقائدها السابق الملك فيصل العجب وهو يحرز هدفاً فى شباك أكرم وتذكرت خروجها على يد كمبالا سيتى فى غياب العجب فأصبحت تردد :
نحن سافرنا وبعدنا وماعرفنا هواك بعدنا
كل مالاقتنا فتنة الفؤاد حنً ولفتنا
جينا بى لهفة مشاعر ليه تزحمنا الخواطر ...
والرسالة الأخيرة من إبن الهلال الجديد عثمان محجوب السيد بعد أن تحسر على ضياع سنينه بالمريخ ورفض مطالبة الصفوة له بأن يعود للمريخ بعد أن أنجاه الله منه وأصبح يردد *** فات الأوان والإنكتب على جبينّا الليلة بان ...وقال مخاطباً الهلال ...عشت من قبلك غريب ماعرفت تقدير الزمن ...أحبابى من قبلك دموع ...وأصحابى من بعدك شجن ...الله ...على القلب الإتحرق يوم إنفتح للجنة باب .
*** همسة الوداع
الكلام ده كيف ياشباب !! معقول حبايبنا الحلوين أصبحوا حبايبنا المحليين ... طيب البص الجديد ده يعملوا بيهو شنو !! الناس ديل بقوا عطالة بس يشربوا فنجان القهوة فى ضل الضحى ...وحتى فى المحلى داخل عطبرة هيثم مع كروجر عامل مشكلة !! وكشف ذلك جمال الوالى فى حواره مع الإذاعة الرياضية 104 وقال مشكلة هيثم مع كروجر ماصيام ولاحاجة !! وإنما هيثم عايز يتدخل ويفرض على المدرب تشكيلة 4/4/2 !! طيب ياجماعة ماهى نفس مشكلة هيثم مع غارزيتو !! وبهذه المناسبة نهمس فى أذن صاحب القلم الأحمر .. نديكم الأمين البرير سحبة لمدة إسبوع ليحسم لكم بعض القضايا العالقة .. رأيكم شنو ؟ مجرد سؤال .