فوز الأزرق اليوم في الممتاز سيتسبب في شفاء المرضي ونجاح العمليات الجراحية .. وتناسي الآلام والجراحات وسيخفف من ضغط المعيشة وعودة المياه الي مجاريها بين الزوج وزوجته والمحب الي محبوبته والتفوق في الامتحانات والإقبال علي (العمل) بالنسبة لللموظف بكل همة ونشاط وسيزيد من الانتاج .. فوز الهلال سيؤدي إزالة الاحتقان بين الكمساري والركاب والسائق سيستمتع بمتعة القيادة بالرغم من وعورة الشوارع.
فوز الهلال سيجعلنا نعيد ترتيب علاقتنا مع الجميع سنتأهب لإستقبال الضيوف زي زمان ونكرمه (ونحن حفايا زي جدودنا زمان) .. فوز الهلال سيجعل السوق ينتعش .. (التاجر وست الشاي وبتاع المطعم وصبي الأورنيش وسائق الدرداقة بمهارة وسيد الطبلية وناس تحويل الرصيد والصاغة والجزارة والخضر والفاكهة وعمال اليومية والناس الشغالين في المزارع والحواشات البعيدة وبنزلوا فيها من الفجر (زي ما قال فنان الطمبور محمد جبارة ديكنا يادبوا بدأ الصياح) .. ديل كلهم سوف تغشاهم السعادة في أعمالهم ويقنعوا بالرزق المكتوب كان كتير ولا قليل بسبب فوز الهلال.
فوز الهلال ح يخفف الضغط والسكري وكل الأمراض .. والطب قال العلاج موجود في الضحكة والإبتسامة والسعادة .. وديل اذا توفروا تاني ما محتاجين علاج ولا حتي تاني ح نلجأ للعمليات .. فوز الهلال سيخفف الضغط علي المستشفيات وغرف الطوارئ نسبة لإنعدام الحوادث .. فوز الهلال سيجعل الطبيب والممرض يتعاملوا بكل حنان ورقه مع المرضي لتخفيف أوجاع المرض .. فوز الهلال سيمنح كل صاحب مرض أستمر طويلاً امل كبير في الشفاء بإذن الله تعالي.
فوز الهلال سيتسبب في إكمال زواج العديد من الشباب والشابات .. وراحة بال الاباء والأمهات علي مستقبل بناتهم بالسترة والعيشة الهنية .. فوز الهلال سيؤدي الي خروج (زغاريد الحسان من كل بيت) .. فوز الهلال سيعمل علي توفيق كل شاب لإكمال نصف دينه ويعمل علي تأسيس منزله بعد ان تعثر ذلك لفترة من الزمن وسيزفه أصدقائه وأحبائه الي زوجته في ليلة العمر بعد ان ينال رضا الحبوبات والأمهات والخالات والعمات وحتي الأخوات.
فوز الهلال سيتسبب في تقوية العلاقات وصلة الرحم وبين ناس الحي والجيران .. سيكون فوز الهلال وعودته للإنتصارات محور الحديث وسيأخذ كل الوقت .. فوز الهلال ايضا سيكون أحلي ونسة (ضهرية) ووسط شراب القهوة سكره زيادة وكمان ناقص عشان ناس السكري ما يزعلوا وكمان بدون سكر .. بعد فوز الهلال سيقود رب الاسرة ابنائه الي الحدائق وشارع النيل (عشان ليهم زمن من الطلعة الحلوة) .. فوز الهلال سيستعيد الجد الراقد في الديوان بسبب (وجع الكرعين) ذكريات هلال جكسا وسبت دودو وقاقرين .. وحمد والديبة حاجة عجيبة ومنقستو وكندورة المرحوم والي الدين. فوز الهلال سيتسبب في عودة مغترب غاب عن أحضان أبنائه لسنوات طويلة وقتله الشوق عمدا لرؤية عيون والديه وكافة الأهل .. وتراجع آخر عن فكرة الاغتراب للبقاء وسط الأهل ورؤية الهلال أمام عينيه ودخول مبارياته ومتابعة تدريباته والإستمتاع بفنون نجومه في ملعبه بأم درمان وهو يصرع نده المريخ وسط جماهيره .. بسبب فوز الهلال سيعفي الدائن ديونه وشطب الشاكي قضيته والحراسات ستظل فترة طويلة خالية .. والخروج الجميع راضين بقرارات القاضي من قاعات المحاكم .. وسيحصل التصافي بعد خصام وجفوة. شفتوا فوز الهلال بعمل شنو .. ديل كلهم محتاجين لفوز الهلال .. عشان الدنيا تصفي لينا وتبقي أحلي في عيون الأطفال .. (مش ديل بستاهلوا) تعيدوا ليهم الإبتسامة من تاني .. مشاكلنا وخلافتنا وأوجاعنا وآلالام والجفوة والمخاصمة والمقاطعة وحتي أحقادنا .. ستزول كلها بعد فوز الهلال .. (يلا إنتصروا من تاني منتظرين شنو). إنتصروا عشان خاطركم انتوا كمان .. والفترة القادمة تصبح أفضل ومليئة بالطموحات والآمال .. إنتصروا عشان عودة روح الأزرق القوية والدخول للبطولة الافريقية بوجه جديد .. وجه كلو تحدي وعزيمة لقهر عملاقة افريقيا .. إنتصروا الاعلام الازرق يرجع زي ما كان .. خط الدفاع الاول للكيان الازرق .. عشان يتناسي الخلافات وصبح يد واحدة ضد أعداء الهلال الذين أصبحوا في سعادة ونشوة بسبب تحارب الإعلام الازرق ويأمل هؤلاء في ان لا يعود إعلام الهلال مثل الماضي قويا يخشاه الجميع. (صمت اخير) .. نحن الهلال بنريدو جد. أرجوكم إنتصروا عشان خاطر ديل.
