• ×
الإثنين 2 أغسطس 2021 | 08-01-2021
بلل

الخطاب مالو عيان عشان يفحصوا ليهو

بلل

 1  0  844
بلل



نحن ما عارفين الوصيف دا عايز شنو.
تأجيل أجلوا ليهو.
عايز الاتحاد ينظر في شكوي ولدنا شيبوب نظرو ليهو.
كلو يوم بطلع بكلام جديد.
يا أخوانا انتو عايزين شنو.
كمان طلع بحاجة جديدة.
قال عايز يفحص ليهو خطاب شيبوب.
كفارة.
الخطاب مالو عاين.
كمان في خطاب بيبقي عيان.
والله دي جديدة لنج.
ما سمعنا بيها إلا منكم.
خطاب عيان.
وعايز تفحصوا ليهو.
يا ربي يكون مالو عندو شنو.
اكيدو عندو ارهاق وسوء تغذية.
من اللف الكتير.
طالعين بيهو ونازلين بيهو.
وماشين علي الاتحاد العام.
وجايين راجعين من الاتحاد العام.
ويضربوا الهوااا.
واحيانا السخانة.
عارفين حلكم شنوو.
حلكم انتو تقابلوا دكتور كلتشي.
اخصائي الخوف والرهبة والجري.
علاجكم عندو مضمون.
ما بقصر معاكم.
مش برضو كان ولدكم.
أكيد ما بقصر معاكم.
بس أنتو تعالوا قابلوه.
بطلوا الخوف والرهبة دي.
عارفين جرستكم دي كلها عشان خايفين من دكتور كلتشي.
المشكلة أنو لم تطلعوا من دكتور كلتشي.
الألم ح يزيد زيادة.
وتاني ما تقدروا تنوموا من الألم دا.
وكمان دكتور كلتشي في العلاج ما بهظر.
حريص علي شغلوا.
بشتغل بضمير.
لازم ينجز عملوا بإتقان.
****
وكلام بيني وبينكم كدا.
النيجيري دا قال حالف يجيبكم التالت.
قال انا لاعب كبير ومعقولة ألعب مع فريق ونحتل المركز التالت.
وتاني قال انا عمري كلو بلعب في ابطال افريقيا.
ما ح يجي اليوم وألعب في الكونفدرالية.
الكونفدرالية دي ما بتشبهني.
يعني لازم نغلب لازم نغلب.
كان سنة ما جيتو برضو ح نغلبكم.
بصراحة كدا.
النيجيري دا ما بنقدر.
ما عندو تفاهم.
كان بتونس مع زول صحبو كدا.
قال ليهو انا عندي أقل حاجة تلاته اقوان في الوصيف.
عشان يعرفوا الكبير منو.
ونحن كمان نكون واقعيين يا جماعة.
الوصيف ما بيستحق مركزو المحبب دا.
خلاص مدتو انتهت.
في اندية بتستاهل اكتر منو.
شفتو ناس اهلي شندي وهلال الابيض والخرطوم الوطني.
ديل كلهم بستحقوا اكتر من الوصيف.
قدموا موسم روعة.
يستحقون عليه الاشادة.
الوصيف عمل شنو.
موسمو كلو هروب وجري.
دا مستواه الفني كان تعبان خالص.
تعب شديد.
لكن تعالو شوفو مستوي الثلاثي.
متعة ورعة وفن وجمال.
ما جبنا سيرة سيد البلد.
ما قلنا دا كلامو براه.
ما بتهبش.
عشان كدا لازم ارسنال شندي يفوز.
والفوز دائما لمن يستحق.
***
واصل سيد البلد اداء تجاربه الودية.
واجه جريف الخرطوم.
النتيجة عندنا ما مهمة.
الجريف كمان من الاندية القوية.
نشيد بعقلية الجهاز الفني للهلال.
عملت كدا عشان تعد اللاعبين.
كدا اصبحوا جاهزين.
كدا باقي لينا المدرب الاجنبي.
مفاوضتكم مع غارزيتو وصلت وين.
عليكم الله اسرعوا شوية في الموضع دا.
ما عايزنو يضيع مننا.
سمعنا انو في فريق تونسي قال عايز.
أها كدا كويس.
التعاقد مع غارزيتو عندنا من الفوز علي الوصيف.
هدفنا أبطال افريقيا.
المحلي دا تاني ما عايزنو.
شبعنا.
برضو كلتشي راجيكم.
أنتو بس تعالوا.
بطلوا الخوف والرعب ديل.
وكمان سيد البلد في انتظاركم.
نحن الهلال بنريدو جد.
الهلال مفخرة داخل وخارج الجوهرة.
(صمت اخير) ..
الخطاب مالو عيان عشان يفحصوا ليهو.
امسح للحصول على الرابط
بواسطة : بلل
 1  0
التعليقات ( 1 )
الترتيب بـ
الأحدث
الأقدم
الملائم
  • #1
    عزالدين وديدي 10-11-2016 02:0
    انت كان بقيت تنتقد المريخ ... سبحان الله هانت الزلابية وأكلتها الكلاب
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019