رجفة رجفة الليل نعدو.
من زمان تقولو للناس نحن ناس كأس مانديلا وجندلنا اندية افريقيا والكأس دا قلعناه قلع من ناس نيجيريا اسياد الكفر والوتر.
الكلام دا طلع خاازوق يعني.
يا ربي ديك كانت الكاميرا الخفية حقت ناس الكاف الما مساااخ.
يا اخوانا اندية البطولات بتلعب في اليوم 100 مرة يعني ما مرة واحدة بس.
وانتو كلها باقي ليكم مباراتين بس.
كدي قولوا بسم الله وأقعدوا في الواطة دي وألعبوها وبعدين شوفو البحصل شنو.
هسي يمكن تقلبوا الهلال واهلي شندي كدا مرة واحدة.
طبعا مستحيل تعمل كدا .. لكن عشان نطمن فيكم شوية وتجوا تلعبوا.
يعني انتو منتظرين ناس علي جعفر وامير كمال يغلبوا ليكم آرسنال شندي.
البطل خلوه هسي دا كلامو براه.
شفتو اهلي شندي الايام دي كان جبتو آرسنال الانجليز زاتو ما بغلبوا.
كلامي بقي زي الحنضل مش.
هسي كنت ماشي معاكم كويس.
والله جد.
اهلي شندي الايام دي ما بتقدر.
عارفكم مفتحين والانسحاب دا افضل قرار.
إنتو من التبلدي انضربتو خمسة في استادكم.
آرسنال شندي عارفين فيهو منو.
فيهو نسر نيجيري اسمو كليتشي.
دا جاب براه في الممتاز 38 هدف.
الكلام دا جد يا زول.
اي والله العظيم جد.
طيب الوصيف جاب كم قون في الممتاز.
يعني ما اكتر من كدا.
كلامك دا معناه الود النيجيري دا اكتر من نص فريق الجماعة ديل.
بالحيل ياهو كدا.
لا حول ولا قوة الا بالله العلي العظيم.
كان كدي انسحبوا انسحابكم ساااي.
والله مفتحين وعرفتوها.
القصة ما قصة شيبوب ولا استئناف ولا لاعب قلعناه منكم كدا.
القصة خوف سااي من نمور شندي.
النمر معروف بفترس طوالي وما عندو رحمة.
عارفين النمر دا بفترسكم بفترسكم حتي ولو لعبتوها جوه الاتحاد العام في الخرطوم (2).
طبعا في مشكلة جديدة حصلت.
اها في شنو تاااني.
الوصيف قالو ما راضي بالبرمجة الجديدة.
كمان !!
أي والله وقالوا ممكن ينسحب من الممتاز وعايز يسحب الرخصة من الاتحاد العام.
رخصة شنو كدي قول بسم الله الاتحاد العام دا سايق ليهو هايس عشان يسحبوا رخصتوا.
معليش يا جماعة ما قصدي رخصة قصدي اقول سحب الثقة من الاتحاد العام.
طيب الوصيف كدا اذا عندوا المقدرة دي كلها معناها ما يشيل الممتاز قبل ما يلعبو الدوري زاتو.
وطيب ليه سيد البلد بشيل في الكأس طوالي كدا.
القصة ما مفهومة يا زول.
ممكن توقعها لينا حبه حبه.
ياااخ انا زاتي احترت وما بعرف ان بقول في شنو.
الوصيف يسحب رخصة الاتحاد العام.
والهلال بشيل في الدوري طوالي كدا.
فعلا حاجة غريبة.
طيب تاني.
الوصيف ممكن يقفل الاتحاد العام.
وسحب رخصتو ولا الثقة ولا الجنسية زاتها.
يعني كدا بخوف فيهو.
كويس كدا كلام جميل.
في حاجة مهمة ما قادرين نفهمها.
طيب ليه الفارق كبير بين الهلال والوصيف في بطولات الممتاز.
الهلال دا شال البطولة اكتر من الوصيف وحتي مافي مقارنه كدا زاتو.
واذا الوصيف الخفيف بقدر يخوف الاتحاد ويسحب رخصتو طيب ما يشيل البطولة هو اكتر من الهلال.
طيب جيتني في مكاني.
قبيل يا ولد قلت ليك شنو.
مش الكلام في البطل دا كلامو براه وخليهو لي بعدين.
اسي بعدين جااات.
عشان دا اسمو الهلال وسيد البلد.
لا بعرف وصيف ولا اتحاد عام.
كان دايرين تنسحبوا انسحبوا طوالي.
والرجفة دا خلوها.
التنفيذ ضروري.
الجرسة والرجفة خلوها.
انسحاب طوالي.
الازرق مفخرة داخل وخارج الجوهرة.
(صمت اخير) ..
الاتحاد العام دا سائق ليهو هاايس عشان تسحبوا رخصتوا !!.