عندما نسمع حمدان شاعر الناظر حاج محمد ( ناظر عموم الجعليين ) وهو يمدح الناظر بقوله *** كفات بالشمال أسد الكدادة القارح ... الحجّر غابتو من البفر والسارح ... من نظرتو الفارس يسيح والدارّة تصبح طارح ... قمر السبعتين ماهو الهلّ ود البارح ، حينما نسمع هذه الكلمات الجميلة يذهب الخيال مباشرة لهلال العشق الجميل الذي يلتقي مريخ كوستي مساء الأربعاء بالجوهرة ، ومباراة الهلال الخصيب والرهيب هي أول مشوار لهلال 2017 في عامه الميمون ، وبإذن الله سوف نبدأ مسيرة النور والسرور ويتواصل العطاء عندما نلتقي الرابطة كوستي في الإسبوع التالي وبعدها يسافر محبوب الملايين لكردفان الغرة ويلعب ضد أسود الجبال في كادوقلي ومن بعدها يتحول بطل الثنائية للأبيض ليلعب ضد هلال التبلدي وبإذن الله النصر المبين هو حليف هلال الساجدين والناس والصالحين ، شباب ماشاء الله في عمر الزهور عمر الهناء زي الريدة وشلش وبخاري والسموأل ميرغني وكابو وأطهر أما ناس كاريكا وبشة وشيبولا وأوكرا ونزار ومكسيم وبوي إحتمال ( من هسه نشفرهم ) عشان دوري أبطال أفريقيا طبعاً كبير السودان معفي من التمهيدي مع التسعة الكبار للقارة ، لكن نحن برضو كرام ممكن نحاول نطعم الدوري السودان ونشرك بعض هؤلاء النجوم في دوري الوطن الممتاز وإن كان إتحاد اللقيمات مايستاهل لكن عشان متعة الأقمار في الداخل والخارج ( وعشان خاطر الزهور نسقي النجيلة ) ، تخيلوا إتحاد الخمول الكسيح حتى الآن لم ينزل جدول مباريات الدوري الممتاز في موقع كوورة للدوري الممتاز السوداني وإذا حاولت أن تعرف جدول مباريات العام الجديد تجد فقط جدول عام 2016 ، معقول تنزيل جدول المباريات فى الإنترنيت صعب للدرجة دي !! ولاّ إمكن معتصم جعفر ومجدي تكلوها على أمين المال أسامة عطا المنان وأسامة مشغول بمصالحه الخاصة ، سألنا عمنا قوقل عن جدول مباريات العام الجديد قال أنا ذاتي إتحاد اللقيمات ده شطب رأسي لسه مشغول بموضوع البث والرعاية ( والبث إن شاء الله لا بثك ولا يحوم عليك !! ) ، هذا عن الهلال ومباراة الإفتتاح ، أما أخواننا التذكرجية ( مضاريب جيبوتي ) فأول مباراة لهم أمام الوافد الجديد للممتاز شرطة القضارف بمدينة كسلا الجميلة ، وربما يقدم فرسان حرس الشرق مايذهل الجيران ، بالمناسبة مدرب الشرطة محمد الطيب قال إنه أكثر المتضررين من إقالة هاي لأنها أضاعت عليه فرصة نصر سهل ( يعني تميرات فوق فكي ) !! لذا لزم التنويه .
*** بابكر سلك في بنك التخدير مشترك
بابكر سلك من قادة الإعلام السالب العظام وله أسهم كثيرة في بنك تخدير الجماهير فعندما كتب إعلام الهلال الصادق ومعه بعض الأقلام الحمراء الأمينة مثل الأساتذة محمد كامل سعيد وموسي مصطفي عن فشل معسكر تركيا كتب بابكر سلك مقال بعنوان ( جو أوربي ) ، أما الآن عندما ظهرت الحقيقة واضحة وتعادل أصحاب الجو الأوربي مع الجيبوتي ... تعالوا شوفوا ماذا كتب سلك ... حيث قال سلكوني ...لسنا الصومال حتي نفرح بالتعادل مع جيبوتي على أرضها ، وجيبوتي أرضها كلها قدر صالحة جنوب أم درمان وقد يقول البعض لا نستعجل الحكم على اللاعب والمدرب ولكن الواقع يردد المثل السوداني ( الفيهو بخور بنشم ) أيها الناس دا مالعب فندقين ولا لعب معسكرين واحد أوربي والتاني آسيوي ، فهل ضعف شخصية هاي !! يقابله جبرة قاعد ساي !! وهل نحن كمجلس سألنا حكيم عن هروبه !! حكيم خلوه ... هل سألنا أنفسنا !! نسأل الله السلامة !! أيها الناس التعادل مع فريق مابعرف التراب وجمهوره لابس قرقاب يعتبر خسارة ، ماممكن لاعب واحد يعرض جوة وعشرة يعرضوا برة الدارة ، ونكتفي بهذا القدر ونقول لصاحب القلم الظريف سلك ... من بعد مافات الأوان الليلة جاي بتعتذر ...بترجع أيامنا الزمان من وين نجيب العمر ، ومشكلة المريخ يا أستاذ سلك ليس مكاواة هلالاب وإنها تحتاج لعلاج بالكي وتبديل المدرب ليست العلاج الناجع لأن الجرح مازال ينزف ولله در القائل *** رزية هالك جلبت رزايا ... وخطب بات يكشف عن خطوب
*** إذا ما الجرح رمّ على فساد ... تبين فيه تفريط الطبيب
ونجي لي شمارات والي الخرطوم وكان شفت ياوالينا الليلة سلكوني مرق النصيحة لكن كان الصفوة لمت فيه بتلحقوا ليك سفاري لكن سفاري أحسن كان عنده ساطور في البرادو حمى بيه نفسه ... والكلب كيف ينبح والجرح تحت البنج فوق التلج لسه ينتح .
*** رسائل غنائية رياضية من الفنان خلف الله حمد
نريد أن نرسل 3 رسائل غنائية من أغنية ( أنا في التمني ) كلمات الشاعر ود الرضي وغناء الفنان خلف الله حمد ، والرسالة الأولي من مدرب المريخ الألماني هاي الذي لم يجد له ظهر من إعلام المريخ ولا من مجلسه وتمت إقالته بثمن بخس وعشان خاطر إتصالات جيبوتي وأنه رغم عشقه لنجوم المريخ إلا أن كل ذلك لم يمنع مصرعه وأنه غير محظوظ ولم يسمح له بمقابله حبيبه جمال الوالي وفي الأخير ترك الديار الصفراء وغادر لبلاد بني الأصفر وتقول الرسالة *** أنا في التمني ديمة هديلي ساجع ...ما لقيت مغيث ولا لقيت لي مراجع ...داير أشوف حبيبي اليوم داك شفته رائق دمه ناقع ...أسود شعرو حالك أما صفارو فاقع ... أشوف في خدو شخصي وفي صدرو المصارع ، والرسالة الثانية من نجم الهلال المهندس بشة وهو يعود للسندس الأخضر بعد الشفاء وهو مشتاق لسماع هتاف الأقمار المحبب له وهي نغمة ...بشة بشة بشة التشة يابشة و مشتاق لبسمة الجماهير وتقول الرسالة *** يفر خيط بسمو يشبه برقاً ليلو هاجع ....يرفع ناعساته ويسيل نظرو واقع ... يتغطي بسواعدو ويحنو كأنو واجع ... يردد لي نغيماً تشتاقلو المسامع ، والرسالة الأخيرة من غارزيتو وهو يعود للمريخ مرة أخرى ويفرض المزيد من الشروط ويقدم ويؤخر في العقد ورغم أن غارزيتو قدم كل ماعنده ولايملك الجديد ليضيفه والمريخ يقبل بلا إعتراض وتقول الرسالة *** أعاين فيهو وأضحك وأضحك وأجري وأجيهو راجع ...متلاعب ليس إلا وماموضوع مطامع ... دي مابلقاها زولاً زي أنا صيدو ناجع ... بس حيلتي التمني والبي ماهو نافع .
*** همسة الوداع
حبايبنا الحلوين مادام الهلال مدربه فرنسي لازم يكون مدربهم فرنسي وكما تقول الحكمة ( الوصيف مغرم بتقليد البطل ) عشان كدة رجعوا لي غارزيتو ، والملاحظ هذه المرة أن غارزيتو عاد بدون رفقة ولده الميكانيكي أنطونيو ، مع العلم أن ورشة المريخ مليانة كوامر قديمة ناس واوا والأدهم وكلاتشي لكن الظاهر ماعايزين يعمروا الكوامر دي هسه ، أحسن يدفعوا كل يوم 100 جنيه غرامة إيصال ترخيص أوبالعدم يسلموا زول المرور 20 جنيه ( غمتة مزيّن ) ، الغريبة غارزيتو صبح فجر في الخرطوم !! الشئ شنو !! الزول دا قاعد على الهبشة !! وبهذه المناسبة نهمس في أذن الإعلام الأحمر معقول تستغنوا من هاي أمس والليلة غارزيتو يصبح في الخرطوم شايل شنطتو !! دا مدرب ولاّ داية ؟ مجرد سؤال .