بدأ معسكر الهلال الإعدادي يؤتي ثماره رغم أن نسبة الجاهزية 80% كما قال المدرب الفرنسي لافاني وكما نلاحظ أصبح هلال الملايين يسير من نصر إلى نصر رغم مبارياته الودية من العيار الأفريقي والمباراة الأولى كانت مع بطل غانا وكما نعلم أن كرة غرب أفريقيا متطورة لذا قدم هلال اللمسة الجميلة كوامن إبداعه والمباراة الثانية مع كرة وسط وشرق أفريقيا ورغم عنف عنقالة سيكافا إلا أن بطل الثنائية أيضاً إستطاع الفوز بهدف جميل على فريق قورماهيا الكيني أحرزه المهاجم تيتيه وأثبت للجميع أن الأقمار ماضية في مسيرة الأنتصار ، صحيح أن الهلال فقد شيبولا وبشة والشاب كابو إلا أنه إستطاع الفوز رغم أن عنقالة الضيوف عوقوا علينا المدافع الصيني ، ناس سيكافا ديل ماخطرين وين شفتوا ليكم هجوم يصيب مدافع حتى يحرمه من مواصلة المباراة ، والغريب الهلالاب قالوا مستوى الهلال لم يكن جيداً !! بالله الهلالاب ديل مامفترين !! طيب الناس العادلوا مع جيبوتي ( ياكافي البلاء ) يقولوا شنو !! لكن بيني وبينكم الهلالاب سقف طموحهم إرتفع وليهم حق ، ألم يرفعوا شعار أن هدفهم هذا العام هو الأميرة السمراء !! وكما نعلم أن هلال العشق الجميل عرفت له أفريقيا قدره وقطعت له تعظيم وتم ضمه للتسعة الكبار الذين لا يخوضون غمار التمهيدي لذا وجب على نسر السودان الأزرق المحافظة على سلامة نجومه وكما نعلم أن ملعب أرضية أستاد الخرطوم لها ضريبة خاصة تأخذها من كل من يمارس عليها هواية الركض ، لا أدرى لماذا لاتهتم الدولة بصيانة نجيلة أستاد الخرطوم ، ومن فوائد مباراة قورماهيا منح الفرصة للمدافع الشاب بخاري بجوار حسين الجريف ، والطاهر سادومبا عندما يدخل يحصل الحراك في الملعب لماذا لايجربه الفرنسي في قلب الدفاع وإذا نجح في ذلك يحسب له إكتشاف نجم فى وظيفة جديدة ، مدرب قورماهيا قال أدهشه أوكرا ، ( كلنا أدهشنا والعجب أبوشيبة ) ومامون مرة مرة قاعد يمرق النصيحة قال أوكرا لاعب وسط هداف ولاعب الوسط الهداف أصبح في هذا الزمن عملة نادرة وخاصة من يلعب باليسار ، الحمد لله مسيرة النور مازالت ماضية وفي هذا الإسبوع سوف تنطلق منافسة الدوري الممتاز وسوف نضع أول 3 نقاط في رصيدنا ببنك النيل الأزرق بإذن الله عندما نلتقي رهيب كوستي بالجوهرة وبعده مباشرة نلتقي الرابطة .
*** جيبوتي في حجم جزيرة توتي
تمهيداب العرب ناس إتصالات جيبوتي عملوها ياجدعان وحرموا المريخ من نقاطهم الثلاث ويااا لله أدوه نقطة ( والله زي ما أقول لكم ) تعادل ( الزعيم ) مع إتصالات جيبوتي ( زعامة التاباني والياباني والتايواني ) معقول المريخ يحرز الهدف الأول في أول دقيقة ويعجز عن إضافة الثاني حتى يتمكن ناس جيبوتي من إدراك التعادل ( حقو اللاعب الجاب القون دا ناس المريخ يسجلوه ) ومساحة جيبوتي كلها 123 ألف كيلو متر وسكانها 864 ألف نسمة يعني جيبوتي قدر جزيرة توتي ، مع العلم أن الألماني هاي قال الإتحاد العربي ظلمنا عندما وضعنا مع خصم مجهول !! وناس المريخ قالوا الإستقبال كان سيئ ... يعني كنتوا متوقعين طالبات جامعة جيبوتي يستقبلنكم بالورود في المطار !! وجيبوتي منذ إستقلالها مروا عليها رئيسين فقط حسن جوليد وإسماعيل عمر جيله ( مش ملاحظين جيبوتي ماحصل فيها إنقلاب بعد وصول بعثة المريخ لها ) إمكن كراع الجيران أصبحت باردة أو ناس جيبوتي أخطر !! حديد يلاقي حديد ، وكما قال البابا من هلالاب الرياض خائف على ناس جيبوتي تجيهم بلوى صحبة راكب ، لكن يابابا الحمد لله مرت جوار القائم زي كور بكري والأدهم ، صحافة المريخ قالوا محمد عبدالرحمن أرهق دفاع الفريق الجيبوتي ( إرهاق ساكت يعني !! ) ومدرب الإتصالات إسمه إدريس سليمان ( هسه دا مدرب ولا غفير مدرسة !! ) المهم إدريس سليمان قال تفاجأ بمستوى المريخ المتواضع !! ياربي إدريس قال كدي بعدين لافاني يقول شنو !! أحرجوتنا ياعالم مع ناس جيبوتي ، وفول الحاجات القلنا ليكم جيبوه لينا معاكم ( هادي طرفنا منو ) ، لكن ياجماعة أصلهم التمهيداب ياهو حالهم ناس صحراويين ، نحن الحمد لله أولاد راحات !! ولو في زول قال لينا ياتمهيداب طوااالي نفتح فيه بلاغ إشانة سمعة ،بالمناسبة هاي قال هدفه كأس البطولة العربية !! لذا لزم التنويه .
*** رسائل غنائية رياضية من الفنان محمد ميرغني
نريد أن نرسل 3 رسائل غنائية رياضية من أغنية ( شفتك وإبتهجت ) للفنان محمد ميرغني ، الرسالة الأولي من جماهير الصفوة وهي تخاطب لاعبها السابق أوكرا الذي مازال يواصل مسيرة النور والألق بالقميص الأزرق وأنهم أصبحوا تحت رحمة عاشور الأدهم الذي يضيع دستة ويحرز هدف وتقول الرسالة *** شفتك وإبتهجت وين ياغالي إنت ... نحن الزمن شقانا آه شقانا وإنت زي ما إنت ... وين وين وين وين وين بالله إنت ، والرسالة الثانية من جماهير الأقمار وهي تخاطب نجمها الجديد تيتيه الذي قال إن بيئة الهلال تساعد على الإبداع وإنه مبسوط في القلعة الزرقاء وأن أهدافه ترجمة لجهود زملائه وتقول الرسالة *** شفت بسيمو يضوي في ضحكاتو لا لا ... ولسه عيونو ناعسة في أحضان هلالا ...ونفس الخصلة نازلة يحكي النسيم دلالا ... وسبحان المصور أبدع في جمالا ، والرسالة الأخيرة من لجنة تسيير المريخ وهو تخاطب جمال الوالي الذي عاد للصرف على الفريق بعد فشل بعض أعضاء مجلس الشرف في سداد حتى مبلغ الإشتراك وقدره عشرين ألف جنيه وتقول الرسالة *** مرحب بي ربيعنا الليهو زمن جفانا ...وأهلاً نور عيوننا السابنا بعد سبانا ... أها كيف ناوي تعمل في قلوبنا وحنانا ...بعد ماجيت لقيتنا حافظين الأمانة ... حافظين الأمانة وين وتذاكر جيبوتي راحت مكتول صف .
*** همسة الوداع
حبايبنا الحلوين عندهم محن عجيبة فقد ذكرت صحيفة الكوتش أن تذاكر سفر جيبوتي تم فيها سمسرة وكبري وقيمة التذكرة 8 ألف جنيه وقالوا 16 ألف جنيه ( دبل يامفترين !! يخسئ عليكم ) مالقيتوا تلحسوا إلا تذاكر جيبوتي الغلبانة !! ولاّ أخلاق التمهيداب أصلها كدة وإحنا ماجايبين خبر !! وبهذه المناسبة نهمس في أذن الإعلام إنتوا مع تذاكر حيبوتي عملتوا كدة يعني لو لاعبين في بطولة أندية العالم ومسافرين البرازيل كان لحستوا الخزنة كلها ولاّ شنو ؟ مجرد سؤال .
يا حبيبنا الجعلي ياخي براحة على الجماعة ديل الفيهم مكفيهم وزيادة، جايين من جيبوتي فترانين ومرخمين من "القات" تقول لي فول حاجات.
معقولة المدرب القالو ده داهية وحا يقود المريخ للمنصات لانه اكتشف لهم خانة جديدة لمحمد عبد الرحمن، وصدق من قال هااي في الباي باي وما رجوه الموسم الجاي وما لقو غير غارزيتو الما بحب هناي.
وتحياتي للجميع
جابت ليها سمسرة في التزاكربالله هههههههههههههه هو مجلس الشرف ما ملتزم بدفع العشرون الف الله يكون في عون جمال الوالي
احسن يشتقل براهو زي ما قال المثل السوري دا ضحك علي الدقون
جابت ليها سمسرة في التزاكربالله هههههههههههههه هو مجلس الشرف ما ملتزم بدفع العشرون الف الله يكون في عون جمال الوالي
احسن يشتقل براهو زي ما قال المثل السوري دا ضحك علي الدقون
الله يكافي محنك يالجعلي التاباني والياباني ذكرتني مناقشة إمرأة مريخابية قال لها زوجها بعد مباراة جيبوتي إنتي اليومين ديل ماكي ياكي فردت عليه وقالت أنا الماني ياني ولا إنت الماكا ياكا ؛ ياربي الكلام ده كلام الجيبوتيين ولا اليابانيين
الله يكافي محنك يالجعلي التاباني والياباني ذكرتني مناقشة إمرأة مريخابية قال لها زوجها إنتي اليومين ديل ماكي ياكي فردت عليه وقالت أنا الماني ياني ولا إنت الماكا ياكا ؛ ياربي الكلام ده كلام الجيبوتيين ولا اليابانيين
ماشاء الله عليك مدرب شااااطر
انت عايز تودى الهلال فى داهية؟
وعايز تضحك فينا ود عقيدة
ان شاء الله الامين عبدالقادر مايكون سمعك
بس انا بعجنى رأى فيصل الاقرع
ممكن يا فيصل تقول لينا
الموضوع ده رايك فيهو شنو ؟
وتفتكر الجعلي ده شارب شاى بلبن
ولا شارب شنو
كلو من الشاني الشربها ليه ودعقيدة
فى المدينة المنورة