• ×
الجمعة 29 مارس 2024 | 03-28-2024
محمد عثمان الجعلي

الكتيبة الزاهية ومباراة قورماهيا

محمد عثمان الجعلي

 14  0  3601
محمد عثمان الجعلي

كنت أريد أن أكتب هذا الرحيق يوم الخميس بعد مباراة الهلال وقورماهيا ولكن إتصال هاتفي من أحد أحباب الرحيق عجّل بكتابته اليوم هو الأخ عزالدين إبراهيم من مريخاب الرياض حيث قال لي بلهجة أخوالنا الدناقلة الممزوجة بلهجة شايقية ( وينك يازول !! والله أصبحنا نخرم ونتقريف للرحيق عديل كدة زي الزول داك الما لقى الجبنة ) والله يعلم أنه رغم مناكفتنا البريئة فإن أحباب الرحيق كلهم كحل على العين لا نفرق بين هلالابي ومريخابي والدنيا قائمة على الثنائية والله تفرد بالوحدانية ، طبعاً هلال العشق الجميل سوف يضئ سماء أستاد الخرطوم عندما يلتقي فريق قورماهيا الكيني وهذه المباراة ( تيست ) لفريق توسكر الكيني الذي سوف يلعب مع سيد البلد في دوري 32 في العاشر من مارس ( والدائر يشوف فاطنة يشوف أم حمّد في السوق ) بضم الحاء وفتح الميم المشددة ، أما ليه بهدلنا إسم محمد كدة ماتسألوني أنا أسألوا ناس الأمثال السودانية وبالعدم عندكم سيف خواجة في الدوحة وفيصل الأقرع في جدة ومنعم أبوناصر في الدمام !! تاني أعمل ليكم شنو !! أديكم إقامتي !! وكل جماهير الأقمار تعلم أننا نملك خط هجوم كاسح وخط وسط صاح بحمد الله أما خط الدفاع لسه عايز شغل وفي يونيو القادم سوف يتحسن الوضع بعد دخول المدافع العاجي واتارا في التشكيلة ، ولكن بإذن الله مع وجود بوي وأطهر والصيني وأم بدة وربما نضيف لهم أبوعاقلة وفي الأيام القادمة سوف يدخل أبوستة التشكيلة ، ووقتها عينك ماتشوف إلا النور وكان سمعتوا بي جدو واوا حولوه لدار العجزة والمسنين في ساحل العاج ماتستغربوا ، أما صلاح نمر وعلي جعفر ممكن يشتغلوا مع الجماعة ( شيك... ريال ... دولار ) ، وبالتأكيد في مباراة مساء اليوم لن نندهش إذا ولجت شباكنا أهداف ولكن سوف نندهش إذا صام هجومنا عن التهديف ، إن شاء الله الحكم يدينا ضربة جزاء عشان الإعلام السالب ( عينو تطلق وماينوم ) طبعاً عندنا بحمد الله أخصائي ضربات الجزاء والضربات الرأسية هو المستر تيتيه ، وناس كاريكا وأوكرا مافي طريقة لمدافع الخصم أن يوقف زحفهم الميمون إلا بإرتكاب مخالفة في المنطقة المحرمة ونحن جاهزين ( جاهزين جاهزين لإصابة العرين ) أما ناس نزار ديل ناس صواريخ بعيدة المدى من خارج خط 18 ولو عاد للتشكيلة اليوم المهندس بشة ( معناها بي موية وكملت ) ، و عندما يعود شيبون نقول لك ياطارق أحمد آدم تمشي عطارة التيمان طوالي وتجيب اللبان الضكر عشان العين الحمراء وشرارة حايمة أكتر من لعب الوصايفة في التمهيدي ، أولادنا ديل يافوزي المرضي حصنوهم بالمعوذتين من عين ناس واوستي !! بالمناسبة واوستي قاصد بيها إسم الدلع لي واوا !! لذا لزم التنويه .
*** بطل الثنائية العنيد ومنافسة العام الجديد
في بداية إنطلاقة الدوري الممتاز في العام الجديد إذا إلتزم إتحاد التأجيل بمواعيده التي ضربها على نفسه سوف تكون بداية الإنطلاقة بإذن الله يوم 24 يناير وأول أربع مباريات لهلال الملايين ومحبوب السمر الميامين سوف تكون الأولي في الإسبوع الأول بالجوهرة أمام الرهيب ( مريخ كوستي ) والثانية أيضاً بالجوهرة أما الرابطة كوستي والثالثة يلعب بطل الثنائية في كادوقلي أمام أسود الجبال والرابعة في الأبيض أمام هلال التبلدي ، أما أولاد ( المصارين البيض ) المريخاب سوف يلعبوا مباراتهم الأولى أمام الوافد الجديد الشرطة القضارف وليت المباراة كانت في القضارف حتى تستمتع جماهير القضارف بنجوم القمة ولكنها في أم درمان !! ( بالله إتحاد اللقيمات دا بيخاف من الله !! ) فريق الشرطة فريق صاعد حديث للممتاز لماذا تحرموه من مؤازرة جماهيره ، يا أخي قولوا الأستاد كعب أو اللعب في التراب ناس حقار والنعسان وبخيت خميس والتكت مستعدين يلعبوا في الظلط !! والمباراة الثانية مع الوافد الجديد أيضاً حي العرب في بورتسودان !! وإحتمال تتحول لي أم درمان إذا ركاب بص التسيير ضربوا ( بوري ) لأسامة عطا المنان !! باقي ليكم تريعة البجا أريتو كان المريخ لعب معاها المباراة التالتة عشان تكملوا الناقصة !! والتالتة مع أهلي مدني في أم درمان والرابعة مع مريخ الفاشر في أم درمان ، بختك يا أبوشيبة ( غني صعيد ساكت ) ومن هسه أبدأ هاجم التحكيم !! ومباراة المريخ العاشرة مع فرسان التبلدي بأم درمان والحادية عشر أمام الآرسنال في عاصمة دار جعل ، لكن الإسبوع 15 والإسبوع 16 الوصايفة لاعبين مع الأمل والإكسبريس في عاصمة الحديد والنار ( شيلوا شيلتكم ) أما مباراة الختام مع سيد البلد بأستادكم ( دا في حالة ناس المريخ مايهربوا من أستادهم زي كل مرة ) غايتو ناس أوكرا وجابسون وإبراهومة عارفين إن السكة سالكة والإشارة خضراء لشباك جمال سالم .
*** سودان الفخر ورفع الحظر
إتصل بي يوسف عمر أبوضحي من هلالاب محايل عسير عقب مباراة الهلال وبطل غانا وقال والله أنا مبسوط عشان إتنين !! عشان تألق الهلال وعشان رفع الحظر عن السودان ، نعم يا أبوضحى سودان الخير والطيبة لا يستحق هذا الظلم والحظر الغاشم الذي إستمر من 1997 حتى عام 2017 عشرين سنة بالتمام والكمال والشكر أولاً لله العلي القدير الذي فرج عنا هذه الكربة والشكر ثانية للأشقاء في المملكة العربية السعودية والأمارات الذين كانوا واسطة خير والشكر موصول لإبن البلد وكبير البلد الرئيس عمر البشير الذي تولى هذا الملف وتابعه بنفسه ، ومن لا يشكر الناس لا يشكر الله ، وكما قال وزير المالية بدرالدين محمود سوف يندمج الإقتصاد السوداني في الإقتصاد العالمي ويزدهر الإستثمار وينهض الإقتصاد وبدأت البشائر بعد يومين من صدور القرار حيث إسترد الجنيه السوداني بعض عافيته وأصبح الدولار يساوي 17 بدل 20 جنيه قبل رفع الحظر كما إنخفضت قيمة الجنيه المصري أمام الجنيه السوداني ففي السابق كان الجنيه يساوي 75 قرش مصري والآن أصبح يساوي جنيه و14 قرش ، سمعنا ( تحت تحت ) المصريين رافضين رفع الحظر عن بلادنا الحبيبة عشان مصلحة جنيهم التعبان ، وإحنا مالنا !! وكنا في السابق نسمع الكلام المعسول زي ( نحن أخوات يابيه ) ووحدة وادي النيل وغيرها من الشعارات البراقة والصديق الصدوق هو من تجده وقت المحن ولله در القائل *** صن النفس وأحملها على مايزينها ... تعش سالماً والقول منك جميل
*** وإن ضاق رزق اليوم فأصبر إلى غد ... عسى نكبات الدهر عنك تزول
*** ولا خير في ود إمرئ متلون ... إذا الريح مالت مال حيث تميل
*** وما أكثر الإخوان حين تعدهم ... ولكنهم في النائيات قليل
ووطن الجدود نعم الوطن ...خيراتو كم يتدفقن ، ونتمني أن ينعكس رفع الحظر على معيشة المواطن البسيط في وطن الأجاويد ، وتعود لى قفة الملاح عافيتها السليبة .
*** همسة الوداع
حبايبنا الحلوين عندما إحتاجوا لحارس إحتياطي طواالي تم رفع الحظر عن حارسهم الجديد منجد النيل الموقوف مع خمسة من لعيبة هلال كادوقلي بسوء السلوك ، ويابخت ناس هلال كادوقلي !! وفي جاه الملوك نلوك ، والمدفور هو إبن الإتحاد المدلل ( وعتود المك منو البقولو تك !! ) كما يقول مثلنا السوداني ، ورغم ذلك الوصيف (مابطلع قوزاً أخدر ) عشان لملم كل عجائز القارة من مصر جاب عاشور الأدهم والكبر ظاهر فيه ومن ساحل العاج واوا وحتى الدقن عمل لها صبغة ومن نيجيريا جاب كلاتشي سنيناتو إتكسرت لما قامت ليه ( سنينات اللبن ) !! وبهذه المناسبة نهمس في أذن الإعلام الأحمر إنتوا مسئولين من الخير البيختار ليكم تسجيلاتكم دي هلالاب !! وحسب مقاس التمهيداب !! ولاّ شنو ؟ مجرد سؤال .
امسح للحصول على الرابط
بواسطة : محمد عثمان الجعلي
 14  0
التعليقات ( 14 )
الترتيب بـ
الأحدث
الأقدم
الملائم
  • #1
    ابوحسن 01-19-2017 11:0
    لك التحية استاذنا محمد عثمان اول حاجه نهني الشعب السوداني برفع الغمة التي كانت قايضة علي انفاس سودانا الحبيب هذا
    الشعب الصبور الجسور لك كل الفخر والاعتزاز الشكرلله في الاول والاخر وايضا المشايخ والاولي الصالحين الذين لن يتوقفوا
    من الدعاء لهذا البلد الطيب بمكارم اخلاقة ونتمني بعد انتهي هذا الحظر من الحكومة ان تفتح صفحة جديدة بزات من السيد
    رائيس الجمهورية عمر البشير ان بضرب بيد من حديد كل المفسدين والذين لا يردون الخير للسودان حسب الوانهم الشخصية
    وايضا يا الجعلي لا نسي ابوالهل الذي نريد ان يظهر باحسن المظهر بزات في هذا العام حيث قامت الادارة بتوفير كل المتطلبات
    بزات الفنية
  • #2
    منعم ابوناصر 01-19-2017 09:0
    فعلا عتود المك منو البقولو تك هذا هو وصيفك الدائم وهكذا هم دوما عتود الاتحاد الكسيح وشبهينه واتلاقينا وهذا هو المدفور دوما من اتحاد اللقيمات وبعد دا كلو حبايبك ناس العارف عزو ودالعقيده وابن الوهاج لسانهم طويل رقم انهم غيرمقتنعين بما يكتب لهم من المدفورمزمز عشان كده يتصلوا على الحبيب الجعلى لان كل الكتاب عندهم خارج الشبكه من ناس ابو خيبه وتبع الراقصات وسلك العريان وهولاء لايفقهون فى الكوره ولكن لو كنت مدفور ممكن تتكلم فى اى شى وعن اى شى هولاء هم المفروض تكون الاستتابه منهم وليس الجعلى ياابن الوهاج مالكم كيف تحكمون
  • #3
    يف الدين خواجه 01-19-2017 09:0
    شكرا صاحب الرحيق نشرح الامثال بعد ما خرفنا اما استرداد الجنيه لبعض من عافيته هذا استرداد مؤقت وظاهري غير حقيقي ناتج من عدم الاستقرار وعلي وزير المالية اتخاذ اجراءات معينة في ظل عدم الاستقرار ليكون الانخفاض حقيقي غير وهمي ليسير الاقتصاد بالاتجاه الصحيح وهو زيادة الانتاج والتصدير مع اجراءات ادارية حازمة ولازمه تعيد للدولة هيبتها من الفوضي وشكرا عشان خاطر نخطط لقفة الملاح حتي يسترد الانسان السوداني عافيته ايضا !!!
  • #4
    فيصل الاقرع 01-18-2017 07:0
    سلام جعلينا والتحيه لرابطةالرحيق المركزيه وهي زي حكومة الوحده الوطنيه فيها ناس جنوب وشمال العرضه والاخ عزالدين ما براهو الخرمان لكن كان عزالدين عارفك بتكتب المقال الارهابي واستعراض القوه ما كان اتصل عليك بالله يا الجعلي خلي الجغم البسوي فيه دا ااما عن امحمد عندنا اسما والله الهمزه قدرماكستلا ما لقيتها زي عتمان والضيب النبارك وحلوه ضربوا بوري لاسامه دي والدولار نزل ياالجعلي لكن قفة الملاح في غلاها
    ا
  • #5
    عزالدين ابراهيم عبدالرحمن حاج موسي 01-18-2017 06:0
    جيناك يا الجعلي قلت لي عندك هجوم كاسح ناس تيتيه وثلاثه اهداف متفق مع الفريق الغاني عشان يثبت رجولي وعارفكم عقولكم صغيره وبعدين زي ما قيل في مسرحيه المك نمر
    الليله النمر مالو التقول متبالد وكان للنسب ما اداهو حظا زايد
    قالو اصل المثل الخال شريك الوالد انظر لي عماره وعمر واحمد وخالد
    انت ماك شايف بكوري والله ماك شايف الغربال ديل احمد وخالد نحن ما بنتهدد يا جعلينا وكمان التهديد لما يبقي من الهلال دا كملن كلامو بره لان انتو ما قدر التحدي ونحن أمثال هليلك ما يجارينا ابدا
  • #6
    الامين عبدالقادر 01-18-2017 05:0
    التحية والسلام اخوى الجعلى ياخى نحن من ابوشيبة المخرف لاخونا عزالدين المستعجل وفيك الخير والبركة يا جعلى وأدب العكننة عجب جماعتك اصبحوا خرمانين عاوزين دفرة زى فريقهم هذا الموسم ولكن ان شاء الله اتحاد السجم اكثر ماقعد مايقعد تانى
    وبعدين كل الصحف ثأرية - هل قورماهيا اخذ مننا كأس افريقيا وأعتبرها جزء من الاعداد المفضل لهلال الساجدين والناس الصالحين --
    وبينى وبينك أفضل من يتغنوا بهلال الملائين انت وود عبدالماجد والله يستر علينا !!!
    وفي جاه الملوك نلوك ، والمدفور هو إبن الإتحاد المدلل ( وعتود المك منو البقولو تك !! ) أروع الامثال وأختيار صادف أهله تماما
    ودمتم للوطن والهلال فى حفظ الرحمن ورعايته
  • #7
    ودعقيده خلف 01-18-2017 05:0
    استاذ ا لجعلي لك التحيه دوما اولا الشكر كل الشكر الي الاخ بن الوهاج عز الدين ابراهيم الذي تقبلت طلبه بترحاب كان ما تكون مجامله ساهي اما بالنسبه للدوري والقرعه الذي اوقعتكم مع فريقين من ولايه واحده من هسع بقوله ليك بالخط العريض لو مرقتو من الاول الثاني ما بتمرقو منه ساهي لان عكازين في ان واحد تبقي كارسه اما بالنسبه للمصريين ليهم الحق يعارضو الحظر لان المسوليين في الدوله ما بفهمو ومن المفترض يكونو اخزو درس وعبره لان انا عارف تمام اولاد الرقاصات هم السبب في زعزعت وامن بلادنا لكن الله أكبر عليهم ولانامت اعين الجبناء الخونه المرتشيه السماسره قدر الله عليهم الفراعنه اليهود
  • #8
    الامين عبدالقادر 01-18-2017 05:0
    التحية والسلام اخوى الجعلى ياخى نحن من ابوشيبة المخرف لاخونا عزالدين المستعجل وفيك الخير والبركة يا جعلى وأدب العكننة عجب جماعتك اصبحوا خرمانين عاوزين دفرة زى فريقهم هذا الموسم ولكن ان شاء الله اتحاد السجم اكثر ماقعد مايقعد تانى
    وبعدين كل الصحف ثأرية - هل قورماهيا اخذ مننا كأس افريقيا وأعتبرها جزء من الاعداد المفضل لهلال الساجدين والناس الصالحين --
    وبينى وبينك أفضل من يتغنوا بهلال الملائين انت وود عبدالماجد والله يستر علينا !!!
    وفي جاه الملوك نلوك ، والمدفور هو إبن الإتحاد المدلل ( وعتود المك منو البقولو تك !! ) أروع الامثال وأختيار صادف أهله تماما
    ودمتم للوطن والهلال فى حفظ الرحمن ورعايته
  • #9
    ودعقيده خلف 01-18-2017 04:0
    استاذ الجعلي لك التحيه بس الصاح الكتيبه الخائسه وتار قورماهيا
  • #10
    عزالدين ابراهيم عبدالرحمن حاج موسي 01-18-2017 04:0
    الشكر ارتال جعلينا ابدا من حيث انتهيت تسال البختار لعيبتنا منو ما كردنه وفطومه اختارو لينا بكري والغربال والصاوي وكدي النشوف اخونا أبو ناصر قال العارف عزو مستريح فعلا السنه دي يا أبو ناصر كردنه ما سجل ليكم بنزينا وكاس شنو التتكلم عنو يا خوي حق الليله الواحده دا عندو زيو عشرهواعلامنا متابع الوالي لانو ما ماشيلو وري وليه والله حقتكم شينه تب واخونا ابوحازم نحن فعلا كبار ونشوف تيتيه حقك اليوم مع قورماهيا عشان نشوف الأهداف الثلاثه الفاتت متفق عليها والله صاحبنا هداف واخونا ابوناص البطوله العربيه شن سويت فيها ما هربت من الوفاق للان ماقادرين ترفعو راسكم وسلااااام مربوع لي ود بلل القرياتي تعال الجماعه زي ماك شايف براي مكفيهم وانت فيك الخير والبركه ايد علي ايد تجدع الهيل من ال32 ههههههههههههههههاي
  • #11
    البابا 01-18-2017 04:0
    جعلينا الحبيب لأنه رحيق لذا تحتاجه النفوس الطيبة وأخونا المريخابي ده زول نفسه طيبة وأخلاقة رياضية ياربي يكون مابقرأ جريد الردحي الأحمر ولا شنو ....
    قال ليك ناس جيبوتي مقعدين ليهم 500 شيخ يقرو في القران ومركزين علي (يس) ماتجيهم مصيبة صحبة راكب مع الضيف الأحمر مصدر الكوارث والخطر اينما حل و(ختر).
  • #12
    ودعقيده خلف 01-18-2017 04:0
    استاذ الجعلي لك التحيه بس الصاح الكتيبه الخائسه وتار قورماهيا
  • #13
    ابن الوهاج 01-18-2017 03:0
    و الله يا الجعلي حيرتنا .. يعني الجوطة العاملا دي كلها في مقالك الزي قفة المكسرات المليانة مكسرات شوية و مخلوطة بي عرديب و غرنجال و لالوب و نبق و دوم و عكا و جضيم سببها انك عايز تفك خرمة المريخابي عز الدين من الرياض؟ انت متأكد انه عز الدين الطلب منك تكتب؟ اني لفي شك مريب.. و اذا صح هذا من عز الدين وجبت استتابته فورا"... و بعدين الهيلمانة العاملا دي كلها لي قورماهيا ما قلت ما بتعترف بي وسط وشرق افريقيا و سيكافا و سميتوها المجاعة ؟؟ و الغريبة بتتباهى بي لاعبنك اللافيهم احمد و لا محمد و لا عبد الله زي بوي وأطهر والصيني وأم بدة أبوعاقلةمع انك خبيت أسماء الجبتهم من أدغال افريقيا.. أما حديثك عن الجنيه و استرداده لعافيته تمام مع اننا نحن أصلا"" ما بنتعامل بالجنيه يا أولي الأصفاررررررر....
  • #14
    ابو حازم 01-18-2017 03:0
    لك التحية يا جعلينا مع الامنيات لهلال الملاليين والساجدين بتحقيق الفوز في كل مبارياته القادمة وان يكون عام 2017 بدون خسارة باذن الله.
    حبايبك الحلوين قالو خايفين من الجيبوتي وخايفين من تكرار سبعة الوحدات ، من خشمهم ولباب السماء.
    القرعة تم تفصيلها للمرخرخ ويقولو ليك غير موجهة ، معقولة الهلال والمريخ في نهاية الدورة الاولى كل عام ولا المباريات المريخية جات كده.
    على العموم نرحب بكل من يلاقينا سواء في اول الدوري او اخره، نحن بنقدر الكلام ناس قريعتي راحت.
    تحية مرة اخرى يا جعلينا ولكل قراء الكفر والوتر
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019