((())) ويا يوم بكره ما تسرع تخفف ليا نار وجدي :

اداء الهلال امام الخرطوم لا بأس به وان تخللته بعض الهنات

مشكلة الجمهور الهلال انه يريد نتيجة تفوق نتيجة المريخ

حتي وان كان خصم المريخ فريق تعبان

وللجمهور الحق في ذلك

فقد ارتسمت في مخيلته وحسب المبالغات الاعلاميه الزرقاء ان الهلال ١٠٠ ٪

وان بلاتشي حيجيب الديب من ديله ما بين ليلة وضحاها

المهم في مباراة الامس ان الهلال قد استحوذ علي الكرة وسيطر علي الملعب

والاهم من ذلك انه خرج فائزا واقتنص الثلاثة نقاط وده المهم

ولا ننسي اخوتي ان الخرطوم فريق ليس بالهين

وهو بصراحه افضل من المريخ تجهيزا واستعدادا

وكل خطوطه متكامله

وبعكس اهلي شندي المتهالك والذي يلعب بدون هدافيه وغياب الكثير من الاساسيين

ودايما اهلي شندي يظهر ضعيفا ومفكفكا امام المريخ وقويا واسدا امام الهلال

وهذا كله بفضل تحريضات صلاح ادريس الذي لا يرغب في نصر للهلال في غيابه

المهم فريق الهلال الذي كان امام الخرطوم فريق يبشر بالخير

وان كان سادومبا بجانب كاريكا لكانت النتيجه غير

وانشاء الله الاهداف في لقاء القمه ستكون بعدد حروف الشين في الهلال

شيبون بشه شيبولا

والمهم للجميع ان الهلال يغرد منفردا في قمة الدوري

ومتصدر ولا تكلمني

وانت الوصيف غصبا عنك وما تعاينلي

الوصيف الآن يبكي ويولول للحاق بالبطل

والكاردينال لوحده يقود سفينة الهلال

و٢٤ شخص يقودون سفينة المريخ

وريسين يغرقوا المركب

ويا يوم بكرة ما تسرع تخفف ليا نار وجدي


((())) المريخ اصبح دبوس حكومي :

وعلي مر العصور كنا نحترس من اي دبوس

و الناس بطبعها لا تحب الدبوس وهو عرفا ( ناس الامن )

رغم كل ما يقومون به من عمل وطني كبير وان تخللته تجاوزات ضد المواطن وظلم

والناس وهي قاعده لو جاهم واحد بتاع امن يغيروا الموضوع

او يعم الصمت ذلك المجلس

او يستعيذ البعض من الشيطان الرجيم

ومن ثم تبدأ الانسحابات التكتيكيه من ذلك المجلس

ويا جماعه انا ماشي اعبي انبوبة الغاز

وانا بجيب عيش لناس البيت

وانا عندي مكالمة مهمه مع اخوي في قطر

ويبقي الدبوس وحيدا في ذلك المجلس

وتزداد احقاده علي الجميع

الآن المريخ اصبح اشبه بذلك الدبوس

ففي كل المباريات وخاصة في الاقاليم المريخ فريق غير مرغوب فيه

المريخ مكروه لانه فريق الحكومه المدلل

ودائما ما تثير الجماهير ضده وترشق الملعب بالحجاره والقارورات الفاضيه

وبعكس الهلال الذي تحبه كل اقاليم السودان

وما حصل ان غضبت الجماهير علي فريق الهلال

وتنتهي مباريات الهلال ويتصافح الجميع في محبة والفه

فالفرق اصبح شاسع ما بين الهلال والمريخ

فالهلال هو المواطن العادي المسكين

والمريخ يمشي كل لاعبوه مرحا وكانهم يريدون ان يخرقوا الارض ويبلغوا الجبال طولا

امس في شندي حصبت الجماهير الملعب

فالجماهير لا تحب الزول المتكبر والرافع منخيره


((())) الوك خطأ شيبون صاح :

المريخ بكل غباء تقدم بشكوي ضد الهلال في اللاعب شيبوب

وهم يعرفون جيدا كل تفاصيل الماده ٥٥

و الاهلي شندي تقدم هو الآخر بشكوي في عدم قانونية مشاركة الوك اكيج

والمريخ من ( حرقتو ) قال انه سيصعدها للفيفا

رغم ان الفيفا لن تنظر للقضيه لان الاتحاد السوداني اعتمد التسجيل وابلغ الفيفا مسبقا

والهلال هو الآخر يحتفظ بكرت الوك لكي يورط به المريخ امام الفيفا

لاعب من دولة اخري يستخرج له كرت وطني مزور ويتم تسجيله دون اخطار دولته

هي جريمة كبري لا يعرف اهل المريخ مصيرها

اذا تقدم الهلال بكرت هذا اللاعب الذي اشتراه من الملكيه جوبا الي الفيفا

المريخ في ورطه كبري

وهم يعتقدون ان الهلال في ورطه بخصوص شيبون

شيبون لاعب هاوي ترك المريخ وسافر الي تونس ومن ثم عاد ليتسجل في الهلال

اين الخطأ في تسجيل شيبون ايها السذج ؟


((())) هروب المدرب البلجيكي من المريخ مخجل :

لم يتحدث اعلام الهلال كثيرا عن هروب مدرب المريخ البلجيكي ايميل

ولكن اعلام المريخ السالب ظل يتحدث عن هروب العشري والكوكي

والبلجيكي هرب عديل من الجحيم الاحمر

وقال ليهم بالبلجيكي ( اي ول نط كم باك ) انا ما راجع بالانجليزي

والراجل سيكلف المريخ كثيرا في شكواه المقدمه للفيفا

الراجل داير من المريخ ٢٠٠٠٠ الف دولار

خطأ اداري قاتل في العقد

والراجل داير ٦٢٠٠ يورو قيمة فيتامينات للاعبين

وهناك فواتير اقامه في الفنادق بطرفه

وهناك مؤخر العقد

هو هروب مخجل بكل المقاييس

وبعكس هروب العشري او الكوكي

فلم يكن لديهم مستحقات بطرف الهلال

ماخدين حقوقهم علي داير مليم

عيب اعلام المريخ هو انه يريد فقط الشماته بالهلال

ولكن سبحانه الله ترتد عليهم المصائب

اعلام سيد البلد هو البيضحك في الآخر



محمد حسن شوربجي