((())) اعلام المريخ بيكبر كومه علي الفاضي :
الحمد لله ان المريخ اصبح مزهو بانتصاره الاخير علي اهلي شندي
وده هو المطلوب وخلوهو يكبر كومو
وخلاص المريخ افضل من الهلال حسب اوهام اعلام مزمل
والميدان يا حميدان
وزيدوا وتيرة المدح السلبي لفرقتهم الهلكانه
والتي لم يكتمل غذائها حتي الآن حيث فيتامينات المدرب البلجيكي لم تصل
والكثير من لاعبي المريخ ما اكلو فواكه من الليله ديك وكراتين الموز والرتقال
لان جمال الوالي لسع ما فتح الحنفيه
والظاهر انها لن تفتح في هذا العهد الميمون
والا لزومهم ايه ٢٤ عضو تسيير
وقد اعلنها الوالي صراحة انا ما بدفع براي
فرحانيين شديد با نتصار شندي
وخلاص رفعوا فريقهم في الثريا
بالضبط زي ايام البايرن ميونخ وليلة السقوط امام كمبالا سيتي
اتركوهم يتوهمون ان المريخ افضل من الهلال
وهكذا يقول مزمل وهكذا تردد بقية العصابه الحمراء
وعلي شاكلة قولهم ( المريخ يوجه انذار قويا للهلال )
والعقروب والشقلبه وهذه التخاريف التي لا تسمن ولا تغني من جوع
ونتمني ان ينعكس ذلك المدح الزائد تراخيا في مباراة القمه ويا خدوا علي راسهم
ولليوم الثالث علي التوالي يواصل اعلام المريخ دائم السلبيه التطبيل لفريقه الواهن فقط لانه فاز بهدفين
وهم فرحون لان الهلال فاز بهدف علي الخرطوم الوطني
ولكن اذا ما قارنا مابين اهلي شندي والخرطوم الوطني فالفرق شاسع
وهو فرق السماء والارض من حيث المستوي والتكتيك
وفي القمه سيظهر الفرق ما بين هلال الاستقرار ومريخ الفلس
وفرضنا لو فاز المريخ علي الهلال هل سيفوز بالدوري ؟
طبعا لا الا يتدخل اتحاد اللقيمات ويحسب للمريخ ٥ نقاط من فريق كحيان مقابل بعض الدولارات
((())) سينتصر معتصم بأمر الكيزان :
هم في الحقيقه انصار الفشل
يؤيدون الفشل
ويدمنون الفشل
وترأس هذه الانديه ادارات قريبه من السلطه
يعني بالعربي كيزان في المؤتمر الوطني
لا يهمهم ماذا قدم معتصم جعفر للكرة السودانيه
المهم هو الاصطفاف مع الجماعه
وما ضروري الانجازات
رغم كل الفساد الاداري والمالي
والفيفا بصدد بدء تحقيق في حق مليارات ذهبت الي المجهول قدمت للاتحاد العام من قبل
هذه الانديه الضعيفه كانت شاهده علي ما حدث مخالفات في ٢٠١٥
ومنها فرق فقدت نقاط واعطيت للمريخ
رغم غضب جماهير تلك الانديه
فمن بين 14 نادياً يحق لها المشاركة في كلية أندية الممتاز لاختيار تسعة أندية تشارك في الجمعية العمومية لاتحاد الكرة وتدلي بأصواتها
أعلنت تسعة أندية مؤهلة للمنافسة عن وقوفها مع مجموعة الدكتور معتصم جعفر
والأندية التي أعلنت عن مساندتها للتطوير حتى الآن هي أهلي مدني ومريخ نيالا والنسور الخرطوم وأهلي الخرطوم ومريخ الفاشر والرابطة والمريخ من كوستي وهلال الأبيض وأسود الجبال
يجب ان نفهم ان الرياضه في السودان ضحية صراع بين الاسلاميين والمعارضه
واكيد ستعود مجموعة معتصم والتي تمثل الكيزان الي قيادة الاتحاد
بالتزوير بالفلوس بالضغوط الحكوميه
ومن فشل الي فشل ستسير الرياضه في السودان
وما ضروري نتقدم او نمشي قدام
والطيش عند الله يعيش
((())) رغم انهم مصفدون الا انهم يتسربون الي كفر ووتر :
وبما ان الشياطين تصفد في رمضان الا ان بعض ابنائها تتسرب الي كفر ووتر لتمارس السباب والاساءات في هذا الشهر الكريم -
محمد حسن شوربجي
ياااااا سااااااتر من شيطان الشوربجي..
كلام خارم بارم وما فيهو جملة واحدة مفيدة..
ياخي استهدى بالله وبطل الهضربة وروق المنقة شوية..
الكورة مدورة ونتيجتها علمها عند رب العالمين..
عشان كده ياريت تنورنا ولأول مرة في حياتك بمقال هاااادي ومنطقي وعقلاني توضح فيهو لماذا ترشح الهلال للفوز والمريخ للهزيمة..
لأنو بصراحة يا شوربة جنس كتاباتك المتعصبة والخالية من التحليل المنطقي هذه مكانها المدرجات الشمالية الشعبية وليس هنا..