* أي (جُزلان) بتلقي فيهو (13) جيب ..
* والـ(13) جيب ديل المستخدمات فيهم جيبين أتنين فقط ..
* جيب للقروش (إن وجدت) وجيب للبطاقات ..
* وجُزلان الكاردينال (جُيبو) الـ(13) مليانة وبطاقاتو في (العربية) ..
* وجُزلان أسامة ونسي (جيبو) الـ(13) فيها بطاقات والقروش عند جمال الوالي ..
* غايتو جنس غايتو ..
* ورد في الأخبار ان مكافحة التهريب بولاية كسلا ضبطت (بطاطس إسرائيلي) مُهرب ..
* والله صحي ..
* اليهود ديل لما فشلوا في (التطبيع) قالوا أحسن يخش لينا بواسطة (الدمعة) ..
* دمعة البطاطس ..
* هو عليك بلدنا دي ناقصة بطاطس عشان نجيب لينا بطاطس إسرائيلي ولا (بصل) دنماركي ؟؟
* حاجة تكسف ..
* بمناسبة البطاطس ..
* مبار اة الهلال والأهلي ستسبق مباراة الريال وبرشلونة وهذا يشبه (شوربة الدجاج) البتسبق (وجبة الدجاج) ..
* فقط نتمنى ان يدفع العشري بالشباب حتي يقدموا (كرة قدم) تشفي جروحنا النازفة ..
* العشري في الأبطال طلع (ما عندو كيس أصلا) فنرجو ان يكون (كيسو) في الدوري المحلي (مافاضي) ..
* وأنا عندي سؤال لخبراء الأكياس ..
* سؤالي : إنتو حكاية (الكيس دي) بتعرفوها من خلال المباريات الافريقية ولا المباريات المحلية ؟؟
* جاوبوا لينا علي السؤال ده عشان ما نكون بره الشبكة ..
* يمكن نقدر نساعدكم في معرفة الكيس ..
* قلت لي يا العشري حافظ الكرة الليبية حفظ ؟؟
* صااااااح ..
* والله انت طلعت مواطن ساكت يا العشري ..
* قال حافظها قال !!
* العشري ده كيسو (دهني) ..
* والله مرات نبكي من كفرنا ومرات كفرنا يبكي الكافر ..
* سافر المريخ إلي القاهرة من أجل إقامة معسكر تحضيري ..
* وبما اننا عارفين (ظروف) المريخ فمن حقنا ان نسأل : (من أين لكم هذا) ؟؟
* كونو المريخ يسافر مصر رغم (ظرفو) المعروفة دي هذا يجعل سؤالنا مشروعا .. من أين لكم هذا ؟؟
* شلتوا سلفية ولا صرفتوا صندوق يا أسامة ونسي ؟؟
* أنا عندي إحساس إنو المريخ (شال تمويل أصغر) من بنك (الثروة الحيوانية) ..
* عندي أحساس كده ..
* واي زول طبعا حر في (محاسيسو) ..
* بيكونوا شالوا (تمويل) عشان يعسكروا بيهو ..
* لكن التمويل ما بحلكم والله ..
* تراوري براهو (مرتبو) أكبر من التمويل الأكبر ..
* قالوا تراوري من شدة الفلس بقي (يمسكل) لخطيبتو ..
* أما أوكرا قالوا بيرسل رسالة (الرقم أعلاه يطلب الاتصال به) ..
* غايتو جنس غايتو !!
* أكثر لاعب في الهلال محتاج يراجع حساباته هو كاريكا ..
* كاريكا ليس كاريكا الزمان ومن هم في قامة وقيمة كاريكا عليهم ان يحاسبوا أنفسهم قبل محاسبتهم ..
* وبراك يا كاريكا شايف الحساب في الهلال بقي (حار كيف) ..
* ناس الهلال لما يجو يتحاسبوا لا بيعرفوا مهند الطاهر ولا عمر بخيت ولا معز محجوب ..
* ناس الهلال في (الحساب) بقو عمانين عديل ..
* هسه عليك في زول عاقل بيشطب مهند الطاهر ؟؟
* حاجة تكسف ..
* كل المني ان يعود كاريكا كما كان بالجد والاجتهاد و التركيز ..
* وما ينطبق علي كاريكا ينطبق بشكل اقل علي النجم بشة والشغيل وعبد اللطيف بوي ونزار حامد ..
* أهلنا بيقولوا : (الماعندو كبير يشتري ليهو كبير) .. وإحنا عندنا (كبار) عشان كده ما دايرين نشتري كبار ..
* وثقتنا في إمكانيات هؤلاء اللاعبين كبيرة جدا وما زلنا ننتظر منهم أكثر وأكثر .. فهل عادوا كما كانوا شعلة من النشاط وبحر من الأبداع ؟؟
* نتمتى ذلك ..
* المهم ..
* في بيوت الأعراس عادة (جمال الحفلة) عندو علاقة بـ(بنات الحفلة) ..
* لو الحفلة فيها بنات سمحات معناها الحفلة ح تطلع سمحة حتى لو الفنان ما عندو (صوت) ..
* والزمن ده طبعا الفنان بتلقي عندو أي حاجة ما عدا (الصوت) ..
* والله صحي ..
* زمان في حلتنا عندنا (خمسة بنات سمحات) ..
* والباقيات كلهن بشبهن (افياني) ..
* واحدات بشبهن (افياني) وواحدات بيشبهن (سلمون جابسون) ..
* وكمان في واحدات بيشبهن (شلباية) ..
* المهم ..
* لما تكون في حفلة في حلتنا إحنا من النهار بنعمل (إستطلاع) عشان نشوف البنات الخمسة السمحات جايات الحفلة ولا ما جايات ..
* بنستطلع (أخوان) البنات الصغار ..
* بنقول للشافع : (الليلة إنتو جايين الحفلة) ؟؟
* لو قال جايين معناها ح يجي مع أختو ..
* ولو قال ما جايين معناها أختو ما جاية ..
* كده بتكون في واحدة ما جاية ..
* الباقي أربعة ..
* يعني لحدي ما العصر يجي إحنا بنكون قدرنا نعرف شكل الحفلة ح يكون كيف بعدين ..
* والله صحي ..
* مرات بيصادف الخمسة بنات ما بيجو ..
* تلقي الحفلة عاملة زي (معسكر مازيمبي) ..
* أحلي زولة في الحفلة بتكون بتشبه (ساماتا) ..
* وكمان مرات بتجي واحدة من البنات الخمسة وبتمرق قبل نهاية الحفلة ..
* هي تمرق بهنا وإحنا نمرق بهناك ..
* المهم ..
* أنا عايز أقول إنو خروج الهلال من الأبطال يشبه تخلف (السمحات من الحفلة) ..
* زي أجمل زول في الحفلة لما يطلع قبل ما الحفلة تنتهي ..
* بمسخ الحفلة بخروجه ..
* هسه الهلال بخروجه اصبحت الابطال مثلها ومثل سيكافا وستصبح سيكافا مثلها ومثل الأبطال ..
* وهكذا هم الكبار ..
* الكبار مؤثرين إينما ذهبوا ..
* وشخصيا بتوقع خروج مازيمبي وخروج الترجي والاهلي ..
* يعني الأبطال ح تبقي (أطفال) ..
* غايتو جنس غايتو !!
* غني الفنان جعفر السقيد : (المحبوب وكت يجرحنا لو في ضمير يحس أو يوعى جرح الريدة كان ينعد من ضمن العجائب السبعة) ..
* وإحنا وأولاد حلتنا بقينا نغني الأغنية علي هذه الطريقة : (التحكيم وكت يظلمنا لو في ضمير يحس أو يوعى تأهل المريخ كان ينعد من ضمن العجائب السبعة) ..
* والله يا جماعة أنا أصلو ما قادر أصدق بطولة طار منها الهلال بجلالة قدرو والمريخ مواصل فيها ..
* والله الحاجة دي باقية لي كيف كيف كده ..
* بحس بيها كاميرا خفية كاميرا خفية ..
* ما واقعة لي ..
* أبت تلفق معاي ..
* فعلا : تموت الأسود في الغابات جوعا ولحم الضأن تأكله الكلاب !!
* كلاب بـ(الفاء) ..
* و..و..
* وجيت أهنيئك وأصافحك وجيت أقول (قلبي جا محل الكلي والكلي طلعت محل القلب والحمدلله) ..