* في (الرأس) عادة (الشعر) بتساقط من حتة وفي الحتة التانية بيكون في شعر ..
* اي (صلعة) بتبدأ من (حتات معينة) ..
* ما في صلعة بتجي دفعة واحدة ..
* في ناس الصلعة بتجيهم من ورا وفي ناس من قدام وفي ناس من نص الشعر ..
* يتساقط الشعر من قدام بينما تجد (الجنبات) مليانة شعر ..
* نفس (التساقط) ده حدث في استاد المريخ ..
* يوم مباراة منتخبنا وساحل الحاج إنهار جزء من سور استاد المريخ الشرقي ..
* والله صحي ..
* وأمس الأول أثناء مباراة الهلال والأهلي إنهار جزء من سور استاد المريخ الشرقي ..
* ويوم مباراة المريخ ووفاق سطيف سينهار المريخ أولا ومن ثم سينهار السور الشرقي ..
* وإحنا بصراحة إنهيار المريخ ما بيهمنا بقدر ما بيهمنا إنهيار السور ..
* بيهمنا إنهيار السور لسببين أتنين ..
* السبب الأول : دايرين سلامة الجمهور ..
* والسبب التاني : الأستاد ده هو استاد الحكومة وإحنا عندنا فيهو (ربع رطل سكر) ..
* الاستاد ده زي ما بيهم جمهور المريخ بيهمنا إحنا برضو ..
* وأول أمبارح الهلال لعب في استاد الحكومة ..
* والهلال ما غريب علي هذا الاستاد الذي نعتبره مثل (المدينة الرياضية) ومثل الملاعب التى دشنها أبوهريرة حسين في وقت سابق ..
* يعني الحكومة لو قررت (تقسم إستاد المريخ ورثة) سيكون للهلال النصيب الأكبر في هذه (التركة) ..
* والله صحي ..
* المهم دعوتنا الآن للرجل الهلالابي والقطب الكبير أسامة ونسي ان يقوم بتصليح هذا السور حتى ينال آجر (صيانة الممتلكات العامة) ..
* الممتلكات العامة هي مسوؤلية جماعية ..
* الطوب البيفضل من (الجوهرة) نرجو من الكاردينال تحويله لملعب استاد الحكومة ..
* ولا اعتقد ان الكاردينال سيبخل علي (الممتلكات العامة) بماله ..
* المهم ..
* رفض جمال سالم الإنضمام لبعثة المريخ بالقاهرة ..
* جمال سالم كان بيقول ليهم : (أنا جاي بكرة) ..
* بيصبر فيهم ..
* كلو ما يسألوا منو بيقول ليهم (جاي بكرة) ..
* وهو قصد يقول (بكرة دي) عشان يحولوا ليهو قروشو ..
* وصبر ..
* وصبر ..
* لكن هم ما إنستروا ..
* في النهاية قفل التلفون وعمل رايح ..
* يتصلوا لا يمكن الوصول أليه ..
* ولما قنعوا من الوصول أليه قام ابوجريشة عمل (حركة بحركتين) ..
* أبوجريشة قال فيما معناها : (جمال سالم تاني ما بدقها) ..
* جريشة قال ما بيحب سياسة لي الزراع ..
* هو عليك الله المريخ فضل فيهو زراع عشان جمال سالم يلوي ؟؟
* المريخ بقي ما عندو زراع أصلا ..
* زراعكم ده الحضري لواهو وكسرو مرة واحدة ..
* الحضري الكان بيتمرن مع الفريق الصباح وبيسافر القاهرة عشان يشرب شاي المغرب مع زوجتو !!
* الحضري القال إنو جمال الوالي ما كان بيحلم يسلم عليهو في يدو !!
* الحضري السافر مصر زعلان وجا راجع في نفس يوم مباراتكم مع أهلي شندي ولقى العربة (الباردو) واقفة في المطار ومن المطار والي شندي ثم إلي الملعب مباشرة (اساسيا) ..
* وبعد ده يجي ابو جريشة يقول ليك (لي زراع) ..
* هو وينو الزراع ؟؟
* حكاية الزراع والكرامة وعزة النفس دي نرجو من الأخوة في المريخ ان لا يتحدثوا عنها ..
* ما تركزوا علي الحاجات دي ..
* الظريف في الموضوع قالوا إنو لعيبة المريخ (دخلوا واسطة) من اجل حل مشكلة جمال سالم وعودته للفريق ..
* دخلوا واسطة !!
* والوساطات بقت في (الطلاق والمشاكل الزوجية) ما جايبة حقها ..
* الزول ده (واسطتو) دولار ..
* عندكم دولار بيجيكم ما عندكم أحسن (تكثفوا التمارين للمعز محجوب) ..
* وبصراحة أنا حكاية إنو لعيبة المريخ توسطوا لعودة جمال سالم ما عجبتني والله ..
* ما عجبتني لانو المعز مظلوم ..
* وهروب جمال سالم هو فرصة كبيرة للمعز محجوب ..
* وكان من المفترض لعيبة المريخ يقيفوا مع المعز بدلا من التوسط لعودة سالم ..
* اللهم إلا يكونوا ما مقتنعين بالمعز ..
* إنتو عندكم رأي في المعز ولا حاجة ؟؟
* لو عندكم رأي قولوا والله ..
* أقول ليكم حاجة ..
* جمال سالم ولا المعز في النهاية المريخ طاير طاير ..
* وطبعا جمهور المريخ ماسك ليك في (حنك) لو طرنا بننزل الكونفدرالية ..
* طيب السبب البطيركم من الأبطال مش برضو ممكن يطيركم من الكونفدرالية ؟؟
* أنا شايف المريخ لو حجز ليهو مقعدة في سيكافا من هسه أحسن ..
* أنا شايف كده ..
* واي زول طبعا حر في (شوفو) ..
* ناس المريخ هسه بيفتشوا في الغريق ولما يطيروا بيجوا يلقوا المطفح فات ..
* والله صحي ..
* لا بتلموا في سيكافا ولا الابطال ولا الكونفدرالية ..
* باقي ليكم أربعة مباريات ألعبوها بدون إزعاج ..
* والحمدلله إنو (الكاف) ألزمكم بتلفزة المباريات ..
* والكاف ما طلع القرار ده عبث ..
* ناس (الكاف) عارفين أي حاجة ..
* عارفين (مراكيب النمر) وعارفين (اللابتوبات) وعارفين (الجلاكسيات) ..
* حتي (اللقيمات دي) ناس عيسي حياتو عارفنها ..
* عشان كده اصدروا قرار يقضي بتلفزة جميع المباريات ..
* والتفلزة بتسهل للكاف معرفة الحكم (الضارب لقيمات) ومعرفة الحكم الإستلم (مركوب نمر) ..
* (تحكيم مركوب النمر) ظاااااااااهر ..
* وطالما (الكاف) جاب سيرة التلفزة يبقي اكيد بعد يومين بيجيب سيرة (المنشطات) ..
* ما علينا ..
* المهم ..
* موضوع جمال سالم ده أحسموا ..
* ورسلوا ليهو قروشو ..
* لانو المريخ بدون جمال سالم ما بيسوى حاجة ..
* إنتو ذاتكم بالغتوا والله ..
* كيف تمشوا معكسر وحارسكم ما اخد قروشو ؟؟
* كان تشتغلوا بالاولويات والله ..
* المعكسر ما أولوية ولا حاجة ..
* لانو اصلا المريخ لو عسكر في الصين ح يجي يطير ..
* كان من الأفضل تحلوا مشكلة جمال سالم وتنسوا المعسكر ..
* في زول بعسكر و(فريقو في يوغندا) ..
* هسه المريخ كـ(اسم معسكر في مصر) والمريخ المتمثل في جمال سالم قاعد في يوغندا ..
* جمال سالم هو المريخ والمريخ هو جمال سالم ..
* يعني لو المريخ عمل معسكر لجمال سالم وحده هذا ربما يكفي ..
* يكفي بـ(الثاء) ..
* سفركم مصر بدون جمال سالم زي العريس لما ينسي القسيمة ويمشي شهر العسل ..
* غايتو جنس غايتو ؟؟
* و..و..
* وأرجع تعال عود ليا ورجع حنانك ليا وخليني في جواك و.(أعرش علي كده) ..