* في أي بلد في العالم هنالك هيئة لـ(المواصفات والمقاييس) ..
* مهمة هذه الهيئة كما هو معروف (التأكد من سلامة المنتج وفحصه) ..
* وأهم شرط في هذه الهيئة يفترض ان يكون (الضمير) ..
* واصلا بلدنا دي فيها (أزمة ضمير) ..
* الناس يقول ليك في أزمة موية ..
* لا والله ..
* في أزمة ضمير يا مولانا ..
* أزمة الموية بتتحل لكن أزمة الضمير حلها صعب ..
* والضمائر لو ماتت سيدفع ثمنها كثير من الأبرياء ..
* المهم ..
* الهلال يجب ان يستحدث (هيئة) مثل هيئة المواصفات والمقاييس ..
* نعمل داخل نادي الهلال (هيئة المواصفات والمقاييس الهلالية) ..
* مهمة هذه الهيئة (فحص المحترفين) والتأكد من أنهم ما (مواسير) ..
* نفحصهم عمليا ونظريا ..
* لانو ما ممكن كل سنة نجيب محترفين اسوأ من محترفين السنة الفاتت ..
* لمتين إحنا نقعد نجيب في المحترفين البيشبهوا (ألحان صلاح أدريس) ؟؟
* لمتين عليك الله ؟؟
* (ألحان) صلاح أدريس هي (أشباه ألحان) ومحترفننا ديل (أشباه محترفين) ..
* والله صحي ..
* الهلال حاليا عندو محترف واحد هو (مكسيم) من جملة محترفين آخرين (ضاربين) ..
* وصلاح أدريس عندو لحن واحد هو (أعذريني) من جملة ألحان أخرى (ضاربة) ..
* و(أعذريني) ذاتها اللحن بتاعها بذل فيه سيف الجامعة (جهد خرافي) فخرج بشكله الحالي ..
* وعلي بالنعمة إحنا عارفين اي حاجة ..
* عارفين سيف الجامعة قدر شنو عمل سمكرة لـ(أعذريني) ..
* وعارفين كمان الراحل محمود عبد العزيز ليه (جري ورفض التعاون مع الأرباب الملحن) ..
* إحنا اولاد تسعة ودافننو سوا ..
* المهم ..
* الهيئة دي لو إتعملت بتساعد الهلال كثيرا ..
* وأنا بقترح إنو مدير هيئة المواصفات والمقاييس الهلالية يكون رئيسها نجم افريقي معتزل ..
* يعني مثلا زي النيجيري (كانو) ..
* لانو بصراحة إحنا جربنا قدامي اللاعبين في (اللجنة التى كان مقرها دبي) ..
* جربناهم وجابوا لينا ناس (جوليام وكيبي) وغيرهما من الأشباه ..
* عشان كده يجب ان يبتكر الهلال طرق جديدة لاستجلاب الأجانب ..
* غايتو ده مقترح يا الكاردينال لو قبلت بيهو إحنا ممكن نشرح ليك بشكل أكبر فكرة هذه الهيئة ..
* ولو ما قبلت بيهو كمان مبروك عليك المحترفين الزي ألحان الأرباب ..
* غايتو جنس غايتو ..
* وفي حاجة تانية يا الكاردينال عايز أقولها ليك ..
* حكاية الإستعجال في الجوهرة الزرقاء دي ما بتنفع ..
* انت لو مستعجل والله إحنا ما مستعجلين ..
* بنصبر لحدي السنة الجاية ..
* بس الشفقة ما حلوة ..
* وبراك شفت الشفقة عملت فينا شنو في موضوع الإضاءة ..
* الإضاءة ركبتوها الليلة ودايرين تلعبوا (تحتها) بكرة ..
* ياخ (الكشافة في بيت العرس إحنا بنجربها قبل يوم) ..
* معقولة تربط ليك كشافة يوم التمرين الرئيسي عشان تلعب بيها مباراة افريقية ؟؟
* أهو في النهاية لا لعبنا تحت الكشافات ولا بلغنا دور الـ(16) ..
* إتجوبكنا ساكت ..
* ما صاح كده ..
* والعطل الحصل في الكشافات هين ومقدور عليهو ..
* عطل الكشافات ما فيهو خسائر في الممتلكات ولا فيهو خسائر في الارواح ..
* لكن (شغل البنيان) لو بقي فيهو إستعجال قطع شك ح تكون فيهو خسائر في الاموال وخسائر في الارواح ..
* وبرااااك انت شفت البلد دي وقعت فيها كم عمارة !!
* عشان كده ما تستعجل ..
* خلي الشركة تشتغل بالمهلة ..
* والمهلة أصلا سمحة ..
* والله المهلة دي سمحة في اي حاجة إلا (آخر الشهر) ..
* الشهر أول ما يدخل يوم (20) بمشي بمهلة عجيبة ..
* أنا مرات بحس إنو الشهر بعد يوم عشرين أكتر من الشهر قبل يوم عشرين ..
* كيف يعني ؟؟
* يعني بحس انو العشرة أيام البتكون في اخر الشهر هي أكتر من العشرين يوم البتكون في أول الشهر ..
* زي رمضان ..
* عشرة رمضان الأخيرة اي يوم فيها (دبل) ..
* وبمناسبة الدبل ..
* رمضان باقي ليهو (66) يوما ..
* يعني باقي ليهو شهرين و(أسبوع إلا يوم واحد) ..
* نرجع ونقول ..
* إحنا فرحانين جدا بالجوهرة الزرقاء ..
* وبنعتبرها إنجاز غير مسبوق في تاريخ الهلال ..
* ولذلك لن نقبل بالاستعجال و(الكلفتة) ..
* وأصلا السنة دي (طرنا من العصر) ..
* والطيران ده يا الكاردينال من مصلحة الجوهرة ..
* إشتغل فيها بالمهلة والإتقان والدقة ..
* عشان لما يجي يوم الإفتتاح تكون الجوهرة زي الجوهرة الفي أذهاننا ..
* تشرفنا وتشرف (نسابتنا) ..
* بمناسبة نسابتنا ..
* صادق جدا المثل الذي يقول : (تجري جري الوحوش غير رزقك ما بتحوش) ..
* ولو تمعن أهل المريخ هذا (المثل) لما فرحوا بالتأهل لدور الـ(16) ..
* تأهل المريخ ده والله العظيم بذكرني (نكتة قديمة) ..
* في النكتة قالوا في (نقطة تفتيش) في الحدود الفاصلة بين القرية والمدينة ..
* ناس القرية بيجوا شايلين خيارات الزراعة وداخلين علي المدينة ..
* وفي (نقطة التفتيش) جا عمك شايل ليهو (نبق) ..
* قاموا العساكر (حلقوهو صلعة وفلقوهو بالنبق في صلعتو) ..
* عمك بيفقلو فيهو وهو بيضحك ..
* قالوا ليهو البضحكك شنو ؟؟
* قال ليهم بضحك في حاج حامد خليتو جاي وراي وشايل معاهو (دوم) ..
* هسه إحنا بنضحك في المريخ الجاي وشايل معاهو دوم ..
* والله صحي ..
* أنا شايف إنو المريخ (يحلق صلعة) ويمشي جاهز ..
* أنا شايف كده ..
* واي زول طبعا حر في (شوفو) ..
* مستحيل بطولة الهلال ما عمل فيها حاجة يجي المريخ الشهير بـ(الإصيفر) يعمل فيها حاجة ..
* بالمنطق ما بتجي ..
* اي حاجة فشل فيها الهلال تأكد المريخ ح يفشل ..
* لكن الحاجة البيفشل فيها المريخ الهلال بينجح فيها ..
* والدليل علي كلامي ده إنو المريخ حداشر سنة لو بالغ بيصل دور الـ(32) بينما يصل الهلال حتي المربع الذهبي ..
* يبقي أنا عايزك تعرف حاجة إنو (الما كفي الهلال حرمان علي المريخ) ..
* الما بقدر عليهو سيد البلد قطع شك ما بقدر عليهو (الإصيفر) ..
* أصيفر بـ(الباء) ..
* و..و..
* وكان نفسي أقوليك من زمان (لستك القروش ما فيهو أنبوبة) !!