• ×
الأربعاء 21 أبريل 2021 | 04-20-2021
محمد عثمان الجعلي

من المفكرة ...الشعبى وزوجة إبليس

محمد عثمان الجعلي

 17  0  6018
محمد عثمان الجعلي

نعود اليوم للمفكرة الإجتماعية بناء على طلب إبن الأخت محجوب على من هلالاب قرية قوز جبة بمحافظة المتمة حيث أرسل لى رسالة رقيقة تقول ...ياخال الله يفتح عليك شوف لينا مفكرة عشان نستفيد منها وتفرق لينا شوية ....فقلت له يا إبنى المفكرة عايزة تعب شوية وهى زى ( فطور العريس ) شغلتها كتيرة ، إنتوا بمناسبة فطور العريس يا أخوان مافى طريقة نتخلص من هذه العادة الإجتماعية التى ترهق كاهل العريس !! وطبعاً فطور العريس تحضر معه دستة نساء وكل واحدة عايزة هدية ، وتحدث المباهاة في ذلك ، والفنان مصطفى مضوى في أغنية ( ياشباب العصر هموا ) ناقش هذه القضية حيث تقول الأغنية
*** أنبذوا الزيف والمظاهر ...والملايين والجواهر
*** العفيف الحبو طاهر ...بالكتاب دار بت عمو
*** المهم تلقى السعادة ...البنين والخير زيادة
*** تلقى أحلامها ومرادة ...والمهر ماتقولوا كمو
*** مهرو كان ريدة ومحبة ...أصلو في بيت عز تربى
*** حننوه وسعدو هبّ ...وقالدن خالاتو أمو ...قالدن خالاتو أمو ...
كما أمرنا الشرع الحنيف بتبسيط الزواج وفى الحديث ( خير الصداق أيسره ) وألتمس ولو خاتماً من حديد ، ... الزميل المصرى أستاذ صبرى سألنى ...إنت يا محمد عندكم في السودان لما البنت تتزوج ...صاحبتها بقولوا ليها إيه !! قلت له بقولن لها ( قرصناك في ضهرك نحصلك في شهرك ) فأجابنى لا إحنا مستعجلين أوى ...عندنا البنات في المنصورة بقولوا للعروسة ( أرصتك في ركبتك أحصلك في جمعتك ...وأرصتك في كوعك أحصلك في إسبوعك ) ...قلت ليه نحن بى طبعنا فينا المهلة شوية ... طيب ياشباب هل ممكن تقودوا ثورة التغيير القادمة وتنسوا حاجة إسمها صالة أفراح وفنان أو فنانة بمبلغ وقدره ( إتلقى هسه ناس كمال ترباس وندى القلعة يشوفونى أربعة أربعة !! ) ..ونحن في السودان أفضل من غيرنا من دول الجوار من حولنا لأننا طبقنا عملياً سنة زواج الخير والبركة وقامت في ولايات السودان المختلفة مناسبات الزواج الجماعى ، لكن هسه نامت ...ماعارفين الحاصل شنو !! أما موضوع ( قفة الملاح ) أنا عندى إحساس إن الحكومة ( أكلت في خاطرها شوية ) لأننا طرقنا كثيراً باب تخفيف معاناة هذا الشعب الصابر الذى يستاهل أن يأكل اللقمة الحلال بالتكلفة البسيطة ، ومازلنا في إنتظار ( مؤتمر قفة الملاح الجامع ) الذى تتداعى له أحزابنا السياسية حكومة ومعارضة وتجتمع بقاعة الصداقة وترفع توصياته للسيد الرئيس عمر البشير ...صدقونى كان سويتوا مؤتمر ( قفة الملاح )...ربنا يديكم أجر ويبارك لكم ويعينكم في حياتكم ...والله في عون العبد مادام العبد في عون أخيه .
*** الجنس اللطيف سبب الدمار العنيف
أول حاجة أخوكم في الله من أنصار المرأة ( لى الطيش ) وحتى في البيت ( حنين مع البنات لأبعد حد ) لكن التاريخ بقول أن سبب الجرائم الكبرى هو الجنس اللطيف ( بالتضامن مع الجنس الخشن طبعاً ) فأبونا آدم عندما أكل من الشجرة كان السبب أمنا حواء لأن عدو الله إبليس عليه اللعنة جاء عن طريقها ، وقابيل عندما قتل هابيل كان السبب المرأة ، لأن أمنا حواء كانت تلد توأم ذكر وأنثى ، وكانت الشريعة في عهدهم تقتضى بأن يتزوج التوأم الذكر الأول من أثنى التوأم الثانى ، وكان أول توأم مولود هو قابيل والتوأمة هى لويذاء وكانت بيضاء وجميلة أما هابيل فكانت توأمته إقليمياء ( سوداء ودميمة ) فرفض قابيل أن يتزوج إقليمياء ( الزرقاء وشينة ) وقال ستين يمين مايتنازل لشقيقه هابيل... وقال لآدم أنت تنحاز ضدى ولم يأمرك الله بهذا ، وقال لهم أبوهم... قربا قرباناً فإن الله سوف يرسل ناراً فمن أكلت النار قربانه فهو من يتزوج لويذاء ، وقدم قابيل شعير وكان مزارعاً وقدم هابيل كبشاً من أفضل غنمه وكان راعياً فجاءت النار وأكلت الخروف ، فرفض قابيل ذلك وأخذ لويذا وهرب بها لليمن وفجر بها بعد أن قتل شقيقه هابيل في جبل قايسون شمال شرق دمشق ، وبعد أن كبر أولاد قابيل رجموه بالحجارة حتى مات لأنه خالف الشريعة ، ولقد لعب إبليس اللعين دوراً مهماً في تحريض قابيل على قتل هابيل لأن قابيل كان لا يعرف كيفية القتل ، ونلاحظ أن القرآن الكريم لم يذكرإسم أمنا حواء ولم يذكر من أسماء النساء إلا مريم بنت عمران ( والدة عيسى المسيح عليه السلام ) لأنها مبنية عليها عقيدة وذكرت حوالى 30 مرة ليعلم النصارى أن عيسى ليس إبن الله وإنما إبن أمرأة إسمها مريم ، وفى زماننا هذا يحاول البعض أن يعرف حتى إسم زوجة إبليس عليه اللعنة .. سأل أحدهم عن ذلك الإمام الشعبى ...والشعبى هو أبوعمرو عامر بن شرحبيل ولد بالكوفة عام 19 هجرية في عهد الفاروق عمر وكان عالماً وفقيهاً حاضر البديهة وصاحب نكتة ، تولى القضاء أيام الخليفة عمر بن عبد العزيز ، سأله أحد العراقيين هل إبليس متزوج فأجابه نعم فقال له مادليلك فأجابه قولى تعالى ( هو وذريته ) والذرية لا تكن إلا بزوجة !! فقال العراقى إذن ما إسم زوجته !! فأجابه الشعبى ذلك عرس لم أحضره !! ومن أولاد إبليس خنزب الذى يوسوس في الصلاة والأعور صاحب الزنا وداسم الذى يدخل مع الإنسان بيته إذا لم يذكر المسلم إسم الله عند دخول البيت ،وبنته البكر إسمها بلقيس ... و يرى البعض أن اللعين إبليس يبيض ولايلد إستناداً لحديث ( لا تكن أول من يدخل السوق ولا آخر من يخرج منها فيها باض الشيطان وفرخ ) ، بالمناسبة يرى بعض أهل العلم أن زوجة إبليس اللعين إسمها لهاليها ومعناها ستيرة !! لذا لزم التنويه .
*** الخليفة حسن عثمان ومعرض القرآن
هو شاب من أبناء المتمة الحبيبة في عقده الرابع مقيم بجوار الحرم المدنى منذ 17 عام ومن حفظة كتاب الله يحب الخير للجميع وتراه رطب اللسان بذكر الله ، إسمه حسن عثمان ويطلق عليه البعض لقب الخليفة أو حسن الكون ( لأنه يردد عبارة الكون منظم ) خفيف الظل شهم وكريم وطيب المعشر يعرف المناطق الأثرية بالمدينة المنورة ويساعد كل إنسان يريد أن يتعرف على هذه الأماكن المقدسة ، طاف بى معرض القرآن في الناحية الجنوبية بجوار الحرم وبه مصاحف عمرها أكثر من ألف عام كما طاف بى الناحية الغربية وفيها معرض أسماء الله الحسنى يعرض الأسماء الحسنى بطريقة حديثة وبشاشات عرض ضخمة مثلاً إسم الجبار تجد شاشة عرض تعرض أمواج سونامى وهكذا ، كما أن الخليفة حسن مطلع على معظم الكتب بمكتبة الحرم ولم أذكر له جزء من كتاب إلا أكمل الباقى ، وكنا نتناقش في بعض التفاسير أحببت أن أنقل طرفاً منها للقارئ الكريم حتى تعم الفائدة ...وعلى سبيل المثال أول سورة النازعات ( والنازعات غرقاً ...والناشطات نشطاً ) ومعنى النزع في لغة العرب هو الأخذ بشدة والغرق هو منتهى القوة والنازعات غرقاً هى الملائكة التى تنزع أرواح الكفار بشدة وعنف ...كما قال أحد علماء العصر الحديث تنزع روح الكافر أشد وأقوى من خلع ضرس بلا بنج ، أما النشط فهو الأخذ برفق ولين ومنه تنشيط الجسم ( مثل عملية المساج ) وأصل الأنشوطة في لغة العرب ربطة الحبل التى يسهل حلها والعرب تطلق على تكة السروال أنشوطة لأنها سهلة الحل ، قلت للأخ الدكتور السر الطاهر إن نزع روح المؤمن يتم برفق زى المساج والدلكة فأجابنى ضاحكاً ...لكن مساج الملائكة إنت قايلو هين !! فقلت له والله لما الرؤوف الرحيم يقول ليهم ترفقوا بعبدى المؤمن يكون ليك خراج الروح أسهل من ( مساج ودلكة بت الشيخ ) ..وأولئك هم أصحاب النفوس المطمئنة الذين رضى الله عنهم ورضوا عنه ، وكما قال أهل التفسير رضى الله عنهم لأنه سبحانه وتعالى إمتحنهم بأنواع البلاء فصبروا وشكروا ورضوا عنه بالمنزلة الرفيعه لهم في جنات عدن ...نسأل الله أن يجعلنا وإياكم من الصابرين في الضراء والشاكرين في السراء ...إنه حميد مجيد .
*** خاتمة قبل الوداع
إتصل بى الخال أحمد النور قبل أيام وسألنى عن آخر أخبار الخليفة حسن لأن الخليفة ذهب معه قبل شهر لمسجد قباء عندما جاء الخال للعمرة وأراه مكان مبرك ناقة الحبيب المصطفى صلوات ربى وسلامه عليه عندما جاء مهاجراً ...فقلت له ...الخليفة قال زوجة إبليس إسمها ستيرة !! فقال الخال مازحاً ...إنت الخليفة ده بسأل من إسم زوجة إبليس داير يناسبو ولا شنو !! قول ليه كان كدة أنا علىّ حق البارد !! فأجابنى الخليفة ضاحكاً ...هو خالك مالو جلدة كدة !! مايقول علىّ الشيلة ، ومن طرائف أهل المتمة بمناسبة الزواج أننا كنا في الثورة أم درمان ومعنا جارة مصرية إسمها نعمة ...وقد أصبحت نعمة المصرية مشروع تكامل لوادى النيل حيث تلبس التوب السودانى وتعوس الكسرة وتعمل المفروكة وكنا في جلسة عائلية ومعنا الحاجة زينب بت البشير والدة الخال أحمد النور أطال الله عمرها ، وتطرق الحديث لإختلاف العادات بين السودان ومصر فقالت نعمة إحنا الزواج عندنا زى عندكم ، بس مشكلتكم إنتوا في العزاء بتنقطوا ( يعنى تدفعوا فلوس في الكشف ) وتعملوا كمان أكل!! فقلت لها طيب إنتوا العزاء عندكم كيف !! فقالت نقدم للحضور قهوة مرة بس !! فقلت لها معقول ماعندكم كشف !! وهنا لم تتمالك الحاجة بت البشير نفسها وصاحت في وجهى ...لكن إنت داير كشف فوق الجوع والغلاء !! وهنا نظرت لها نعمة المصرية ببرود وقالت ...إنتوا يازينب ميتكم بتبيعوه !! ولا إيه ؟ مجرد سؤال ...وإلى اللقاء في مفكرة قادمة نترككم في حفظ الله ورعايته وكما يقول الحبيب / محمد الفاتح ( كتاحة ) أقعدوا بالعافية .
امسح للحصول على الرابط
بواسطة : محمد عثمان الجعلي
 17  0
التعليقات ( 17 )
الترتيب بـ
الأحدث
الأقدم
الملائم
  • #1
    البدوى المسلمى 03-30-2016 04:0
    والله يا الجعلى قمة الروعه جمعت بين الطرافة والعادات والتقاليد ونفحات من المدينه المنوره واهلها
  • #3
    جلابي الدوحة .قطر 03-24-2016 08:0
    موضوع جميل وشيق واكملته حتي النهايه واصابتني السعاده وانا اري تداخل اخي كتاحه والذي يجب ان نطبل له كثيرا لكي نخرجه الي صفحات المقالات الهادفه والذي نكن له كل الحب والود ونتمني ان نري له مقالتين يوميا ..فنحن جوعي وهرمنا من مقالات لا تشبع فكرنا ولا تخرجنا من زمرة المهاترات
    تشكرات الجعلي ..وتشكرات محمد الفاتح . ولكم تحياتي واشواقي
    اخوكم مجدي الجلابي...ها هو اسمي يا من تريد الاسم لا اظهره الا لمن خلق في نفسي حبا واحتراما
  • #4
    ناجي عوض الكريم ...شندي فوق مربع 8 03-24-2016 11:0
    السلام عليكم اخونا محمد الجعلي والله انا داىما بقراء عمودك وبستمتع بي المواضيع الجملية دي ....انت راجل راقي وتمتلك ناصية الابداع اول ما تكتب في حاجة غير الهلال عليك الله اكثر في كتابة المواضيع الذي دي ولك حبي وتقديري
  • #5
    الجعلي 03-24-2016 11:0
    حياك الله اخي محمد عثمان الجعلي علي المفكرة الاجتماعية الرائعة جدا ... حقيقة اخرجتنا من الحزن الذي غرسه فينا لاعبو الهلال الله يسامحهم ... لك كل الود
  • #6
    عزالدين سيد وديدي 03-24-2016 11:0
    يا سلالالام الطيران المبكر يخلق الابداع وكفى
  • #7
    فيصل الاقرع 03-24-2016 11:0
    سلام جعلينا والله مفكره كالعاده مدنكله بلحيل علمتنا ما لم نكن نعلم وقصة هابيل وقابيل كنا نعلمها من غير تفاصيل اما عن زوجة ابليس يا الجعلي فهي معلومه جديده بالنسبه لي ما كدا وبس لم افكر في ذلك اصلا يا حجعلينا وانت يا الجعلي علي خايف مننا تقوم تزعج تفاحه اخر الليل الم تراعي فروق الوقت اها الان تفاحه خلا كفر وكفر كلها شيطانات كلما نقلب صفحه نقرأ سورة الناس ومشكور يا محجوب الدفرت خالك علي المفكره والتحيه للخليفه حسن جار الحبيب علسه افضل الصلاة والتسليم ومن فهمه دا يبدو انه هلالابي ويا الجعلي شكلك ما سمعت بشاي العريس الذي يضمن كل اصناف الكيك والحلويات وثرامث الشاي الضخمه الفخمه والكبابي المذهبه صحي النوم قال قفة الملاح ايه رايك يا جعلي بدل رحيق الختام نسميه قفة ملاح مجرد سؤال ومجرد سؤال اخر بكدا اولاد قابيل ديل اولاد حرام ام اولاد حلال
       الرد على زائر
    • 7 - 1
      الأرباب حسن 03-26-2016 11:0
      كيفني تعليقك يا اخونا عز الدين

      و حبيت أعمل عليه مليار لايك .

      و إن شاء الله دائمآ طايرين من التمهيدي .

      عشان نعرف باقي شدرة نسب الأبالسة ..

      و علاقتهم بالمردة و المرجفين .


      تحياتي للخليفة حسن و للخال أحمد النور .
  • #8
    سيف الدين خواجه 03-24-2016 10:0
    يا حبيب اليوم كفاية كتاحة التفاحة وكمان خروج الهلال خلاك تهلوس تجيب الشياطين ونحن ناقصين !!!فقط لما امشي عمره اديني تلفون الخليفة وشكرا
  • #9
    ابوحسن 03-24-2016 10:0
    لك التحية استاذنا الحبيب محمد عثمان وشكرا علي هذه المعلومات والطرائف وخفة الدم لقد كانت نقلة جميلة من جو الكورة الي الفائدة
    بهذه الثقافة في المفكرة الرائعة والتحية ايضا الي الحبيب الخليفة حسن له كل الود والاحترام
  • #10
    منعم ابوناصر 03-24-2016 09:0
    على بالطلاق اتتعبت القارى والمستمع يأخى دى مفكره اخر ابداااع بعدين ياخوى جابت ليها ابليس مع زوجتو تقلبو فى المحن كان قلنا شى تلومونا,,,,, كمان تم الناقصه حبيبنا كتاحه جايب لينا صور ابليس واهلو الشى ياكتاحه نحن عايزين نخطب منهم يعنى هى ناقصه ماكفى حبايب الجعلى الحمر هو فى ابليس اكبر منهم صراحه استفدنا كتير من التفسير والشرح وبالذات فى اسماء التوأم وانشاء الله خروج الروح يكون خفيف ونكون من اصحاب النفوس المضمئنه .... وعمنا الخليفه حسن عثمان لازم تعرفنا عليهو .... واختنا نعمه بنت النيل قليها نحن زولنا بنكرمو حيا وميتا
  • #11
    الامين عبد القادر 03-24-2016 09:0
    التحية والسلام اخوى الجعلى خيرا فعلت ياشيخ الجعلى وانت تبحر بنا بعيدا عن الرياضة وعكننتها وكلما نتطلع على المفكرة نرى من خلالها شيخ كبير وورع ومتطلع كمان وبالمراجع ومن اطهر البقاع طيبة الطيبة ومن مكتبات الحرم النبوى الشريف ( يعنى ابليس فى الحلم مافى يا كتاحة )) وأعجبتنى تفاصيل قصة قابيل وهابيل و لاول مرة اطلع عليها بالتفصيل من الشيخ الجعلى -- ياخى شوف ليك تبروقة كبيرة وسبحة لالوبة ولا احسن سبح المدينة اشكال وانواع ورسل منهم لاصحابك كتاحة وفيصل الاقرع لزوم الحيران --
    وقفة الملاح التى اعيت من يداويها هى شغلنا الشاغل واضحت هم كل بيت سودانى بالجد دى التى يجب دراستها واخوتنا من يقفون على اقتصاد السودان ان ينظروا لدخل الفرد لشعبنا المغلوب على امره والاسعار كل يوم فى زيادة ولكافة السلع و لابد ان تطرق صحافتنا بقوة على اصحاب القرار والحزب الحاكم ربنا يقلعهم اليوم قبل الغد ---
    ودمتم للوطن فى حفظ الرحمن
  • #12
    ود الحاج 03-24-2016 09:0
    والله الزيكم إنتو إن كتبوا فى الرياضة نحبهم
    إن إختلفنا أو إتفقنا لأنكم ناس زوق وبتعرف للكتابة
    والمناكفة
    والشيا طين الحمر قاعدين ولابتين
    بس إنتو يا الجعلى وياكتاحة حلوين وظريفين
    متعكم الله بالعافية
    ناس ترد الروح
    ود الحاج
  • #13
    بكرى النيلين 03-24-2016 08:0
    اخونا الجعلى..التحيه والاشواق
    والله موضوع جميل جدا وشيق وابحرنا فيهو بمزاج بدون امواج ولا مطبات ..
    نعرج شويه لخروج الهلال المؤسف من البطوله الافريقيه..
    صراحه لم يقدم الهلال ما يشفع له من الاستمرار فىالبطوله...والغلطه الكبيره تسريح اللاعبين بعد معسكر مصر..وهو سبب البلاوى ..واللبيب بالاشارة يفهم..
    لك التحيه ولنا جميعا واجب العزاء فى الخروج المهين.. ودمنا هلالاب حتى الموت
  • #14
    ودعقيده خلف 03-24-2016 08:0
    استاذ الجعلي لك التحيه كفيت واوفيت ما قصرت والله لكن بس بركه كتاحه الجاب لينا تعليق ونسي الفات وفتح صفحه جديده مع ابليس اللعين الاعازه بالله السميع العليم من ابليس
  • #15
    الكتاااااحة والتفااااااحة 03-24-2016 07:0


    زوجة ابليس بعد المكياج

    image
       الرد على زائر
    • 15 - 1
      الجعلي 03-24-2016 04:0
      كتاحة مرحب بيك وين يا راجل اختفيت كدة ... ووين اختنا كتوش رد الله غربتها
    • 15 - 2
      وردة 03-24-2016 01:0
      بدون مكياج كان ممكن تكون أحلى , غايتو يا كتاحة الليلة دخلتنا في حتة الله يستر , نبدا أوراد المساء من النهار للمساء.
    • 15 - 3
      وردة 03-24-2016 12:0
      أعوذ بالله من الشيطان الرجيم .
  • #16
    الكتاااااحة والتفااااااحة 03-24-2016 06:0
    اعوذ بالله السميع العليم من الشيطان الرجيم
    اليوم صفحتك كلها شياطين


    image
       الرد على زائر
    • 16 - 1
      وردة 03-24-2016 07:0
      حرام عليك يا كتاحة تخرب لينا المفكرة الرائعة بالمناظر المخيفه دي , الحمد لله المقال نزل بعد ما نمت .
  • #17
    الكتاااااحة والتفااااااحة 03-24-2016 06:0

    بعد يوم عمل شاق
    كنت اغط فى نوم عميق
    ولأول مرة اترك الهاتف بجانبي
    فى حالة التشغيل
    واثناء النوم الهادي
    رنً الهاتف ....
    لم ار على الشاشة من المتصل
    وضعت السماعة على اذني
    وانا بين النوم والصحيان
    كان فى الطرف الآخر استاذنا الجعلي
    ده وقتو يالجعلي عايز شنو ؟
    قال لى : اليوم عندي مفكرة
    لكن خايف منك ومن فيصل الاقرع
    لان المفكرة عنوانها : زوجة ابليس
    يالجعلي زوجة ابليس عديل كده ؟
    اعوذ بالله السميع العليم من الشيطان الرجيم
    ياخى تصحينى من النوم بدل تقول لى
    شايفك فى الحرم فى مدينة الرسول
    صل الله عليه وسلم
    تصحيني بابليس
    وهو ابليس متزوج يالجعلي ؟
    ومنو سعيدة الحظ دى ؟
    وقبل ان اسمع الاجابة
    غلبني النوم وانا اسمع
    صوت ضحكة يأتيني من
    بعيييييد .....



    image
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019