• ×
الثلاثاء 13 أبريل 2021 | 04-12-2021
محمد عثمان الجعلي

معروف البحر مرات بشيل عوامو

محمد عثمان الجعلي

 16  0  3483
محمد عثمان الجعلي
تقول العرب في حكمتها ...الحب الصادق يعذب صاحبه ولذا حزنت الأقمار لخروج الهلال المبكر من دورى الأبطال لأن نسر السودان الأزرق إعتاد أن يحلق عالياً في سماء الكبار ، وفى مرات قليلة يتواضع ويغادر مبكراً ، وهلال هذا العام خرج من دورى 32 بعد أن خسر من أهلى طرابلس بهدف في تونس وفاز بهدفين لهدف في أم درمان أحرز ثنائية الهلال مدثر كاريكا وصعد الفريق الليبى بقاعدة إحتساب الهدف الإعتبارى خارج الأرض ...نعم حزن الهلالاب لخسارة فريقهم ولكن خسارة الهلال ليست خاتمة المطاف ولا نهاية الدنيا ...فقدر الله وماشاء الله فعل والخير فيما إختاره الله ، والهلالاب عودونا على إمتصاص الصدمة بسرعة لأن الهلال من طينة الكبار والضربات القوية تهمش الزجاج وتصقل الحديد ، ويجب على أبناء الهلال الجلوس ومناقشة أسباب هذا الخروج المبكر بالعقل ، وكما قال رئيس الهلال في الزمن الجميل اللواء / عمر على حسن ...إذا أردنا عودة الهلال بقوة وبسرعة يجب أن نستفيد هذا العام من تقوية البناء بالعقل لا بالعاطفة ، والهلال في هذا الظرف محتاج لجهود جميع أبنائه ...ولقد أعجبتنى مسادير جميلة لشاعر الهلال أحمد ود المجذوب ونختار مسدار واحد حيث يقول الشاعر ود المجذوب
*** مصلحة الهلال النية تصبح صافية
*** ومصلحة الهلال للأمة ليست خافية
*** ومصلحة الهلال ننسى الشلل والمافيا
*** ومصلحة الهلال خلتنى أنظم قافية
وكما يقول أهل الخليج ... صحّ الله لسانك ياود المجذوب ، لم يخسر الأقمار وحدهم وإنما خسرت أفريقيا بالخروج المبكر لهلال العشق الجميل فالهلال كما يشهد التاريخ هو أول فريق عربى سودانى يصل مربع الذهب لأبطال أفريقيا عام 1966 هلال سبت دودو وجكسا وأمين زكى وهو آخر فريق سودانى يصل مربع الذهب عام 2015 هلال بشة وكاريكا ومساوى ( طبعاً السنة الفات أخدنا الجيران معانا صحبة راكب لمربع الذهب !! ) ، لا نريد الآن أن نزيد آلام الأقمار وخاصة المغتربين خارج الوطن ونتحدث عن السلبيات التى صاحبت الخروج فيكفى هؤلاء حالياً ( شماتة المريخاب ) ومعروف البحر مرات بشيل عوامو وكما قال شاعر الدوبيت في مسداره الجميل
*** معروف البحر مرات بشيل عوامو
*** والعاشق القمر يحذر ليالى ضلامو
*** ياسيد ( البلد ) بيك الخلائق هامو
*** توجتك ملك كل الملوك خدامو
بالتأكيد الهلال هو ملك الساحة الوطنية ومتصدر الدورى الممتاز وخروجنا من التنافس الأفريقى هذا العام نعتبره إستراحة محارب ، وعايزين نقعد نتفرج نشوف ناس قريعتى راحت بعملوا إيه !! إيه رأيكم ياهلالاب مادام السنة دى نعيش مرحلة بناء الفريق ومرحلة بناء الجوهرة الزرقاء رأيكم شنو نتواضع ونشارك في سيكافا !! أنا شايف سيكافا عند المريخاب حاجة عظيمة !! ( الله يستر الهلالاب مايفتحوا فوقى بلاغ إشانة سمعة !! ) أنا خوفى الصفوة يطاردونا في سيكافا ومادام شارك فيها هلال الملايين تبقى ليهم أحلى من الأبطال ...ياصفوة مالكم ومال مازيمبى والأهلى القاهرى والزمالك وكان نزلتوا كونفدرالية فيها الترجى وفيتا كلوب والفتح الرباطى ، وكما يقول ( مثلنا السودانى !! ) العارف عزو مستريح ...بمناسبة المريخ تلقيت رسالة من الأخ خلف الله ود العقيدة من مريخاب خيبر ، يقول فيها إن جماهير وفاق سطيف أصابها الخوف من ملاقاة ( الزعيم !! ) والله زى ما أقول لكم !! ولا يفوتنا أن نهنئ الأخ ود العقيدة الذى رزقه الله أمورة حلوة إختار لها إسم أمنية ...جعلها الله من بنات الإسلام العاملات ومن بنات المستقبل الناجحات ومن مهيرات الهلال ...ولا شك أنها سوف تسير في طريق أخيها ( أباذر ) الذى حاول والده أن يغريه بالمال من أجل أن يترك تشجيع الهلال فقال أبوذر ( والله يا أبوى لو سجلت لى عربيتك البوكس بى إسمى ما أشجع المريخ !! ) بالمناسبة ولدنا ( أباذر ) في الصف الثامن !! لذا لزم التنويه .
*** مبروك أهلى شندى والمريخ
نحن ناس بنعيش حياتنا الغالية بالنية السليمة .....وكل زول دايرين سعادته تشهد الأيام علينا ... وهلالاب الحركة الوطنية يسرهم تهنئة أهلى شندى الذى صعد لدورى 16 كونفدرالية بعد أن تخطى لوبوبو الكنغولى بهدف كلاتشى ، ونهنئ المريخ الذى تخطى ذئاب وارى النيجيرى بهدف بكرى المدينة ، ونتمنى لكل من يمثل السودان بالسير في طريق النصر ، ونذكر فريقى الأهلى والمريخ أن المرحلة القادمة هى مرحلة الإعداد الجاد ويجب أن تكون راية الوطن خفاقة بغض النظر عن من يرفعها ، وإن خرج الهلال والخرطوم من التنافس فهذه سنة الحياة ...وإن الرياح إذا إشتدت عواصفها ...فليس ترمى سوى العالى من الشجر ، أما السخرية التى يتعرض لها الأقمارمن الجيران في قابل الأيام فهى ملح التنافس ولا تنقص شيئاً من قدر الهلال وسوف يظل الهلال هو سيد البلد ومحبوب الملايين وإن أصابت جواده كبوة هذا العام ، والهلال لا يمكن مقارنته بأى فريق آخر ولله در القائل *** ألم تر أن السيف ينقص قدره ...إن قيل أن السيف أمضى من العصا ...أستاء كثير من عقلاء أهل الرياضة من المانشيت العريض الذى كتبته صحيفة الزعيق الحمراء غير الراشدة وهى تبرز في صدرها اللاميمون عبارة ...زنقة زنقة ...حتة حتة ...طارت الكسكتة ، في إشارة لرئيس الهلال أشرف الكاردينال بمناسبة خروج فريقه من التنافس الأفريقى هذا العام على يد أهلى طرابلس !! في حقد يا أخواننا أكتر من كدة !! وصدق جمال الوالى عندما وصف إعلام فريقه بالسالب .
*** همسة الوداع
حبايبنا الحلوين أعجبهم خروج الهلال أكتر من تأهل فريقهم ( عقدة الدونية بالمناسبة مشكلة ) ففى قرارة أنفسهم أن الهلال هو مثلهم الأعلى ، ولقد تحدثوا عن خروج الهلال المبكر ونقول ليهم الخروج المبكر ( فضلة خيركم ) ففى العام قبل الماضى وبالتحديد في فبراير 2014 خسر المريخ في دورى 32 من فريق كمبالا سيتى بثنائية نظيفة بأستاد الخرطوم أحرز الثنائية هيرمان واسو وتونى أدور في دقيقتين فقط في الدقيقة 20 والدقيقة 22وأضاع واوا ضربة جزاء !! وفاز المريخ في كمبالا بهدفين لهدف أحرز ثنائية المريخ الباشا وتراورى وودع المريخ مبكراً ، أما الهلال فقد سار حتى وصل مربع الذهب ، وبهذه المناسبة نهمس في أذن الإعلام الأحمر أها المرة دى الدور جاء عليكم بتصلوا مربع الذهب زى الهلال ولا العرجاء لى مراحها ؟ مجرد سؤال .
امسح للحصول على الرابط
بواسطة : محمد عثمان الجعلي
 16  0
التعليقات ( 16 )
الترتيب بـ
الأحدث
الأقدم
الملائم
  • #1
    الكتاااااحة والتفاااااحة 03-22-2016 06:0
    image

    امنية خلف الله بلة ود عقيدة


    مبروكة وتتربى فى عزكم لكن باقي لى وشها ازرق ماشاء الله تبارك الله
       الرد على زائر
    • 1 - 1
      الامين عبد القادر 03-22-2016 04:0
      ياخى ما كفاية وعقيدة بنفسة كمان تجيب لينا بنته -- ربنا يجعلها من المستورات والصالحات والبارة بوالديها ان شاء الله
  • #2
    ودعقيده خلف 03-21-2016 07:0
    يا شباب بعد التحيه ( أمر امير الامراء بحفر بئر في الصحراء ليشرب منها الفقراء كم راء في ذلك )في السودان واحد؟ في مصر مافي ؟ في تونس ثلاثه؟ في ليبيا خمسه؟ طبعن انتو عارفين ليبيا الايام دي
  • #3
    ودعقيده خلف 03-21-2016 07:0
    يالله يا شباب ليبيا نفر ليبيا نفر ليبيا نفر ليبيا نفر
       الرد على زائر
    • 3 - 1
      الكتاااااحة والتفاااااحة 03-22-2016 06:0
      انا كان عارفك بتتريق علينا ماكنت نزلت ليك صورة امنية لكن معليش خيرا تفعل شرا تلقى .... طينة واااااحدة ياكافى البلاء
  • #4
    ودعقيده خلف 03-21-2016 07:0
    يالله يا شباب ليبيا نفر ليبيا نفر ليبيا نفر ليبيا نفر
  • #5
    ودعقيده خلف 03-21-2016 07:0
    استاذ الجعلي لك التحيه ابشرك ابوذر قلب مريخابي علي السكين بعد خروج الهلال الافريقي واما بالنسبه الي أمنيه ابشرك من الان مريخابيه علي السكين لان مشكله الصفر الدولي يائسه مافي ليها حل الا عن طريق ليبيا
  • #6
    فيصل الاقرع 03-21-2016 07:0
    ى العام قبل الماضى وبالتحديد في فبراير 2014 خسر المريخ في دورى (32 )×2=64
    قال 32 بقيت يا الجعلي تقسم ليهم النص برك الله فيك
  • #7
    ودعقيده خلف 03-21-2016 06:0
    الصفرراااب لكم التحيه الجع وكتا قال ليكم سواق حافله شاحن ليبيا بالردميه لما جاء قصاد استاد الهلال بوليص الحركه صفر ليهو عشان يقيف لكن بتاع الحافله رفض يقيف وبعد مسافه لحقو ليك بالموتر وقفو وقال ليهو انا ما صفرت ليك ما سامع الصفاره دي بتاع الحافله قال ليهو سامعه لكن افتكرتها ضربه جزاء الهلال
  • #8
    ودعقيده خلف 03-21-2016 06:0
    الصفرراااب لكم التحيه الجع وكتا قال ليكم سواق حافله شاحن ليبيا بالردميه لما جاء قصاد استاد الهلال بوليص الحركه صفر ليهو عشان يقيف لكن بتاع الحافله رفض يقيف وبعد مسافه لحقو ليك بالموتر وقفو وقال ليهو انا ما صفرت ليك ما سامع الصفاره دي بتاع الحافله قال ليهو سامعه لكن افتكرتها ضربه جزاء الهلال
  • #9
    فيصل الاقرع 03-21-2016 06:0
    سلام جعلينا سويت العليك والله وما قصرت في تخفيف وجعنا الشدييييد ولكن عزاءنا الوحيد ان الهلالين 2&3مازالا موجودين في التنافس فالهلال 2 هو بالفعل فريقنا بعد الهلال ويقود هجومه كلتشي اما الهلال 3 فيقود هجومه بكري وتراوري وعبده جابر ومايسترو وسطه المعلم الصغير تاني شن فضل
    لك الشكر بما خففت به علينا جعلينا والتحيه لاخينا ودعقيده ونبارك له امنيه نتمني ان يغر الله بها عينه وعين ام ابا زر ولدنا وصعود الهلال3 ويا الجعلي شنو الفضيحه التحكيميه الفي المتمه دا 16 دقيقه زمن بدل ضائع برضكن بقيتوا بتاعين جلكسات مجرد سؤال
  • #10
    ودعقيده خلف 03-21-2016 06:0
    استاذ الجعلي لك التحيه دوما وكثر الله من امثالك ورحك رياضيه لكن الكسكسته سوته فيكم الله يجازي محنكم يا صفررراب اليكم المسدار التالي طار الهلال ودع خلاص واتلاشئ وكضاب البقول حيشوفو يوم في شاشه كل كوره الهلال فوضئ وكروت وهشاشه بلعب في الصحف الديمه ياخ غشاشه من حال الهلال قلنا بس يا كافي مرضان الهلال واصلو مو متعافي طار الهلال ودع دروب الكافي مزنوق الهلال زي زنقه الغزافي اعقل يا هللال واقنع خلاص من كاس واصل في الصفر يا لمبتعرف الياس حيرت الجميع توهت تب لي ناس والداير الكؤؤس في ارضو ما بنداس طبعن المسدار هديه للجعلي وصاحبه كتاحه بمناسبه الكسكسته ( طاااااررررت)فرررررررررررررررررررررررررررررررررررررررررررررررررر
  • #11
    nasr 03-21-2016 06:0
    تحلى بالرياضة واذا كان انقلب الوضع وتاهل الهلال وسقط المريخ ايضا كذلك لا ترحمونا وانت وكل كتاب الهلال لا يخلو اعمدتهم في الكتابة في المريخ اكثر من ما يكتب نصائح واشياء تفيد الهلال وكلها مناكفات وزرع الفتن بين جمهور الفريقين
  • #12
    ابوحسن 03-21-2016 05:0
    لك التحية استاذنا محمد عثمان يجب ان لا يكون هناك اي مجاملة لقد خرج الهلال وهو باسوء حالتة من الناحية الادارية والفنية
    الكاردنال يبحث عن الشهرة الزاتية دون مصلحة الي الهلال والفنية لماذا يتم تغير المدرب في هذا الوقت المهم بزات في وقت
    بطولة الابطال ومشاكل هيثم و العشري المصري كل هذا وغير ما تسمي فاطمة التي تتكلم وتصرح عن الهلال اين رجال الهلال
    وتتحدي بان يعودا هيثم لاعبا يجب ان يكون هناك من يشجب هذه الصفات التي لا يعرفها اهل الهلال صحفي او اداري بل كل
    مشجعي الهلال الكبير والكثير رفض اي اهانة الي الهلال
  • #13
    الامين عبد القادر 03-21-2016 05:0
    التحية والسلام اخوى الجعلى وظننتك لن تكتب بعد الخروج المر لهلال الملائيين ولكن كنت رياضى اصيل وكلماتك ويراعك يدل على الفهم العالى وهذا عهدنا بامة الهلال وانتم احد فرسانها وكرة القدم لاتخرج من ثلاثة نصر وهزيمة وتعادل ولابد ان نتقبل ذلك وان نتحمل وبصدر رحب السهام التى تصيبنا من جيراننا ونتمنى لهم الارتقاء مع الاهلى شندى لانهم يمثلون الوطن ولا شعار يعلو فوق الوطن وان كثرت سكاكينهم وسهامهم ---
    لقد اعجبنى المسدار الجميل (** معروف البحر مرات بشيل عوامو
    *** والعاشق القمر يحذر ليالى ضلامو
    *** ياسيد ( البلد ) بيك الخلائق هامو
    *** توجتك ملك كل الملوك خدامو )
    بكل الفخر نحن اسياد البلد وفخرها وان غادرنا المنافسة الافريقية المحببة لنا ومع ان سيكافا لاتشبهنا ولكن بدلا من الجلوس علينا ان نعتبرها هذا العام لسد هذا الفراغ والهوان الذى اصاب جسد امة الهلال --
    المحاسبة للادارة والجهاز الفنى واللاعبيين واعلام الضلال الذى صور لنا لاعبينا كانهم ابطال افريقيا والحمد لله نحن امة هلال الساجدين والناس الصالحين لن نتأثر بهزيمة وان كانت مرة !!!
    ودمتم للوطن والهلال فى حفظ الرحمن
  • #14
    ابوميار 03-21-2016 05:0
    الليله وين بالعصر مرورو
    خليهم يقولو يقولو الماعارفين اصولو
    ديل ناس الغنودي شالو كل الاامال
    عاجباني الصداقه ...الصداقة
    بين اشرف وفطومة
    فطومة جابت هديه
    هديه فيزاء ليبياء
    والمصيبه طلع كفيلو الغنودي




    الجعلي يا الجعلي
    يا الجعلي انتا مالك مطنشني
    الجعلي .يا الجعلي الطفاء النور منو
  • #15
    03-21-2016 04:0
    كيف يمكن للهلال الخروج من قاع الصفر الدولي الذي بلغ عمقه ال 86 عام ؟ ؟ ربما بعد أن يطير النعام
       الرد على زائر
    • 15 - 1
      الكتاااااحة والتفاااااحة 03-22-2016 06:0
      وهل العمق يقاس بالسنين يا ...... وتعليقك ده بتردد فيه سنة واحد اشتغل بيك مافى لكن هنا فى عمود الاستاذ الجعلي لا والف لا واحسن ليك تلعب بعيد والنعام بتاعك ده كلم ايميل خليه يطيرو لينا وانت حدك وارى ماتحلم تمشي بعيد عشان كده طولة اللسان مافى ليها داعى ووفاق سطيف جااااكم ... بكرة بنقعد جنب الحيطة وبنسمع الزيطة
  • #16
    عزالدين سيد وديدي 03-21-2016 04:0
    يا ايها الحاقد المريخ كان مربع الذهب العام الماضي ام الحقد طلع في راسك كمان. مين غير المريخ يعرف طريق البطولات لاخارجية اقليمية وقارية. طارت الطيارة طارت شالت الحمام وطارت وشالت لاكسكتة وطارت
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019