حاولت أن أستنطق بعض جيل العصر الذهبى لمعرفة أسباب تدهور الكرة السودانية ولماذا تميز جيل عام 1970 وأحرز كأس أمم أفريقيا من بين 8 دول هى مجموعة الخرطوم التى كانت تضم السودان وأثيوبيا وساحل العاج والكاميرون ومجموعة مدنى التى كانت تضم مصر وغانا وغينيا والكنغو كنشاسا ...وسألت نجم المريخ فى الستينات والسبعينات الأستاذ سليمان محمد سليمان الشهير بسوليمون فقال لى يجب أن نعترف أن نهضة الكرة بدأت فى عهد الرئيس عبود وقطف منتخب عام 1970 ثمار تلك الجهود لأن أول مراحل النجاح هى الإحترافية التى تقوم على الإنضباط حيث كان العساكر الذين يتميزون بالإنضباط هم قادة الأندية ففى الأهلى العاصمى العقيد محمد حسن وفى المريخ حسن أبو العائلة وفى الهلال عمر على حسن وغيرهم ...كما كانت روابط الناشئين فى كل حى بالإضافة للإهتمام الرسمى والدعم الحكومى للرياضة ...وأضاف سوليمون نعم المواهب موجودة زمان والآن ولكن المحافظة على هذه الموهبة وصقلها هو المفقود الآن فى زمننا اللاعب يحافظ على مستواه فجكسا ياهو جكسا وقاقرين ياهو قاقرين وبشارة ياهو بشارة وكمال عبد الوهاب ياهو كمال ...لكن اليوم فى حاجة مامفهومة اللاعب يوم تلقى مستواه فى السماء واليوم التانى فى الواطة ... وأضاف سوليمون أنا لا أقبل حجة ضعف الإمكانيات فنحن زمان الناس العندهم عربات بالعدد معروفين جكسا وسبت دودو مثلاً عندهم عربات مش عشان لاعبين فى الهلال لكن عشان شغالين فى شركة شل وموبيل و كمال عنده فيسبا وكذلك بشارة ، أما لعيبة اليوم الواحد فيهم راكب عربية أحسن من عربية الوزير وبعد كدة كل يوم مهزومين !! لأن الولاء أصبح للمادة فقط ، وفى كأس عام 1970 كانت تشكيلة المنتخب من كل أندية السودان وليست حكراً على هلال مريخ فعلى سبيل المثال من الهلال جكسا وقاقرين والدحيش وأمين زكى ومن المريخ عبدالعزيز وبشارة وجادالله وسليمان ومن التحرير جيمس ( باك الحكومة ) ومن النيل نجم الدين حسن ومن مدنى الأسيد وسمير صالح ( الشهير بسمارة ) ومن برى حسبو الصغير وعبدالكافى وغيرهم ، والسودان فى المجموعة الأولى خسر فقط من ساحل العاج بهدف وكانت ساحل العاج تضم النجم المشهور وهداف البطولة لوران بوكو ..وفاز السودان على أثيوبيا بثلاثية أحرزها جكسا وقاقرين وحسبو الصغير وفزنا على الكاميرون 2/1 أحرز ثنائية السودان جكسا وحسبو الصغير ..وفى المربع الذهبى كانت المباراة الشهيرة بين السودان ومصر والتى فاز بها السودان بهدفى لهدف أحرز هدفى السودان محمد البشير الأسيد وكانت مباراة الكأس بين السودان وغانا وفاز السودان بهدف حسبو الصغير الذى تلقى تمريرة من جكسا ...ويتمنى الأستاذ سليمان لمنتخب السودان أن يعود لسابق مجده وينهض من كبوته ويفوز فى مبارياته القادمة حتى يتأهل لأمم أفريقيا 2015 بالمغرب ... بالمناسبة مدرب منتخب عام 1970 هو الكوتش عبد الفتاح حمد وليس محمد عبد الله مازدا !! لذا لزم التنويه .
*** قمة السودان بفاشر السلطان
صراحة إتحاد الفشل العام عمل لينا عقدة بسبب التأجيل والخرمجة فى البرمجة والله أنا جنى وجن أملك القارئ معلومة خاطئة ( لكن الله يجازى الكان سبب ) المهم نقول ليكم ربما يلعب المريخ العاصمى أمام سلاطين الفاشر عصر الأثنين بأستاد النقعة 15 سبتمبر ، وهذه أول مواجهة لمحسن سيد أمام فريقه السابق ( مش ملاحظين برهان تية صدق أكذوبة كأس سيكافا وزاد حبتين !! فاكر نفسه يواخيم لوف ) وهذه فرصة لأخوان فيصل العجب وديفيد ألينا وهنو ليكسبوا نقاط الفاشر ، أما الهلال سوف يلعب مع الخيالة عصر الثلاثاء 16 سبتمبر ويقود هلال الفاشر المدرب فاروق جبرة ويضم هلال الفاشر عناصر طيبة منهم عبدالله عبد الواحد وفى الدفاع معتصم المناقل ويحرس المرمى بدوى عثمان ولقد سبق للمريخ أن فاز على الخيالة فى الفاشر بثنائية بعد وجد المريخ الكرم الحاتمى من الحارس بدوى عثمان والمدافع الأحمر معتصم المناقل وبالتأكيد هذا الثنائى سوف (يتقطع )أمام هلال العشق الجميل ، ونتمنى أن نشاهد قمة الفاشر فى مباراة نظيفة وألا يتعرضوا لظلم التحكيم ، سيد البلد معروف دائماً يجيب الفوز جهد يمين وعرق جبين أما حبايبنا الحلوين إذا ما إستعانوا بصديق واطاتهم أصبحت والرماد كال حماد ...الهلال فى المقدمة وناس سيكافا بعدنا طوالى والهلال لعب 18 مباراة والسيكافاب لعبوا 16 مباراة حتى الآن .
*** يجوا عايدين ناس كتاحة من الصين
الأستاذ محمد الفاتح صاحب همسات دافئة بصحيفة كفر ووتر سوف يغادر يوم السبت القادم لجمهورية الصين فى رحلة عمل تستغرق شهر ...وسوف يفتقده كل أحباب الجمال والبسمة الصافية ...لأن قلم الأستاذ محمد الفاتح قلم مميز لاتأخذه فى الحق لومة لائم أما تعليقاته الجميلة وصوره المتحركة فإنها تنتزع الضحكة من الأعماق ...وبالتأكيد سوف أفقد كتاحة ومعى القراء الكرام وفترة شهر كتيرة ياكتاحة ونسأل الله أن يوفقك فى حلك وترحالك وسفرية سعيدة وعودة حميدة ...ويطيب لنا أن نردد مع الراحل أبو داؤود هذه الأغنية مع بعض التحريف *** حبيبى غاب فى موضع الجمال بلاقيه *** فى نور لو ظهر بلاقيه ...فى شاطئ النهر بلاقيه ... فى ( الصين ) لو غاب شهر بلاقيه ...نعم الأرواح جنود مجندة فما تعارف منها إئتلف وماتناكر منها إختلف ...كما ورد فى الحديث الشريف ، ونقول للاخ كتاحة يجب التواصل مع قراء كفر ووتر وكمان نحب نشاغلك شوية ونقول ليك ...شوف لينا صينى نجيض معاه جهاز كشف الدهب ويكون معانا شريك عايزين جهاز كشف الدهب يكون حديث يكشف حتى دهب الحبوبات المدفون فى بطن الواطة ...وإنتوا ياالمسافرين الصين أقعدوا عافية وإنتوا ياناس كفر ووتر أقعدوا منتظرين ورددوا مع الفنانة الراحلة عشة الفلاتية ..يجوا عايدين إن شاء الله عايدين يا الله ...يجوا عايدين ناس كتاحة من الصين يا الله .
*** همسة الوداع
حبايبنا الحلوين حيرونا عديل كدة وبالذات بعد ماجابوا كأس قريعتى راحت والحفلة أصبحت بى حرم النور وفرفور... وفرفور كمان بقى كسار تلج ... قال المريخ هو الفريق الذى يجبرنا على الذهاب للمطار ...صدقنى يافرو إنت ومعاك ناس كأس سيكافا مفروض يطبقوا فيكم نظرية الأستاذ محمد عبد الماجد الصحفى الظريف وصاحب عمود ( وإن طال السفر ) عندما قال ...مفروض ناس سيكافا يحبسوهم لما تضربهم الشمس شوية حتى يسمحوا لهم بدخول صالة الوصول بمطار الخرطوم !! هى إنت فى شنو ياود عبد الماجد ناس الإعلام السالب قالوا ده مطار المريخ مامطار الخرطوم ( والله زى ما أقولك !! ) بالله عالم زى ديل مش مفروض يعملوا ليهم التطعيم أو ( القروحة ) ضد مرض إيبولا 7 مرات !! ناس المريخ جابوا كأس ناس بندر وعزام ( توم آند جيرى ) عملوا حفلة بى فرفور !! وبهذه المناسبة نهمس فى أذن الإعلام الأحمر يعنى كان وصلتوا دورى مجموعات كبار أفريقيا زى الهلال وأدوكم جائزة 500 ألف دولار بدل 30 ألف !! كان عملتوا حفلة بى الطيب عبدالله ولاّ شنو ؟ مجرد سؤال .