• ×
الخميس 28 مارس 2024 | 03-27-2024
محمد عثمان الجعلي

مامتلك ولد ياسيد البلد

محمد عثمان الجعلي

 11  0  1830
محمد عثمان الجعلي
عندما يردد سيد خليفة أغنية ( طرير الشباب ) كلمات التيجانى يوسف بشير والتى تقول بعض مقاطعها *** ياطرير الشباب غن لنا غن ... ياحلو يامستطاب أنشودة الجن *** وأقطف لنا الأعناب ...وأملأ بها دنى *** من عبقرى الرباب ... أو حرم الفن *** صح فى الربى والوهاد ... وأسترقص البيداء *** وأسكب على كل ناد ...مايسحر الغيداء *** وفجر الأعواد ...رجعاً وترديدا *** حتى نرى فى كل البلاد ... من فرحة عيدا ...نعم إنه هلال الشباب هلال العشق الجميل الذى عاد من فاشر السلطان بنقاط المباراة كاملة ومعها ربع دستة من الأهداف الصافية ...ومازال سيد البلد يغرد فى الصدارة منفرداً وناس سيكافا مازالوا يلهثوا فى خطراتنا فى مركز الوصافة الحلوة قيافة ( وصافة ناس سيكافا طاعمة !! ) ونقول للأخ عبد الرحيم العوض من مريخاب الرياض الذى يتمنى أن يعود الهلال ليلعب فى سيكافا ، نقول لى أبوعبدة سيكافا بينا وبينها بعد المشرقين فبئس القرين !! إحنا الهلالاب لو سمعنا إسم سيكافا ساكت بتعمل لينا حساسية ...خلونا من سيكافا ( بطننا قلبت !! ) عايزين نرجع لمباراة الهلالين حيث المتعة والروعة رغم سوء أرضية أستاد المباراة ( النجيلة زى صلعة أحمد بدير ) وكما قال فيصل الأقرع من هلالاب جدة ...صلعة أحمد بدير فيها الخير، بكرة يا الأقرع فوز الهلال يمنح فرصة لعاشق الهلال ليقلب هوبة فى التعليق زى مهند الطاهر ...معليش ياشباب سرحنا من هلال الجمال والجمال هيلنا ...وتيم الأبطال هيبة زى نيلنا ...تخيلوا رغم الظروف وغياب المدرب مبارك سلمان كان الشاب عاكف عطا ...خير خلف لخير سلف ...وفاز الهلال بثلاثية وخرجت شباك المعز عذراء وأحرز هدف الهلال الأول محمد عبد الرحمن فى الدقيقة 29 وأضاف كاريكا الهدف الثانى فى الدقيقة 62 وبعد ست دفائق أضاف كاريكا الثالث ، وهذه رسالة لفرق الممتاز بأن هلال الأبطال صعب المنال ، فى الدفاع مالك وديفيد سيمبو وسيسيه وفداسى وفى الوسط نزار والشغيل ونيلسون وفى الهجوم جكسا وكاريكا ...تخيلوا الأهداف تم إحرازها بحرف الميم ( محمد عبدالرحمن ومدثر الطيب ) وكما يقول الأستاذ محمد عبدالماجد ...إحنا أى حاجة عندنا بى نظام ...وسوف يلعب الهلال مبارياته الثلاث القادمة مع الآرسنال فى شندى ومع الأمل فى عطبرة ومع السلاطين فى بقعة المهدى ...وهلال الملايين مازال يرفع شعار... تمتع بالرحلة ودع القيادة لنا... حيث إرتفع برصيده إلى 48 نفطة وأحرز رماته 39 هدف ولجت شباكه فقط 7 أهداف ( مافى زول جاب سيرة لى سباعية الوحدات ولا حاجة ) لأن سباعية الأردن حصلت فى مباراة واحدة ياكافى البلاء أما أهداف الهلال ولجت مرماه فى 18 مباراة !! والمريخ لعب 16 مباراة ويحتل مركز ( وصيف عمرى المادمت حى ) برصيد 43 نقطة وأحرز رماته 40 هدف وولجت شباكه 10 أهداف ... مفروض نقيف لحدى هنا ...مايقوموا يلطشونا عين !! الأيام ديل العين الحمراء وشرارة حايمة أكتر من إحتفالات سيكافا ...ويبقى الهلال هو إبن السودان البار وممثلنا فى مجموعات الكبار الذى يجلب لنا حوافز الدولار ... ولانملك إلا أن نردد ... تمساح جزاير الكرد ...البتقضى الغرض ...مامتلك ولد ...ياسيد البلد .
*** سيكافاب عزام وبنادر أكلوا نقاط الفاشر
بندر وبنادر وبنادير الصومالى تعنى إتصالات العاصمة وبندر هو الفريق الأول الذى تسلق المريخ على أكتافه ليصل مجموعة سيكافا ( إن كان لسيكافا مجموعة فى الأصل !! ) المهم ناس معزتنا بعد جابوا كأس سيكافا أصبحت عندهم جرأة غريبة على المكاورة والتكويش بالصاح والخطأ !! وأقرب مثال نقاط الفاشر وفوز المريخ على سلاطين الفاشر بيتيمة رمضان عجب ...سيد البلد رجع من الفاشر بربع دستة خدمة يمين وعرق جبين والمريخ رجع بهدف وحيد ولو كان الحكم صديق على الطريفى شجاعاً ومنح أصحاب الأرض ضربة الجزاء التى إرتكبها جمال سالم مع مصعب العلمين لكانت النتيجة تغيرت ...ولما سخطت جماهير الفاشر على الحكم المنحاز الذى خرج من الملعب ( تهريب ) وتحت حماية الشرطة ...إتحاد الفشل العام إذا كان يتحلى بى ذرة من الإنصاف مفروض يفرض رسوم حماية إضافية للحكام الذين يديرون مباراة طرفها إبن الإتحاد المدلل ...بالمناسبة الجماهير التى ثارت على الظلم والظالمين هى جماهير مريخ الفاشر وليست جماهير هلال الفاشر !! لذا لزم التنويه .
*** إتحاد الهوان والضلال يسعى لنسف إستقرار الهلال
إختارت السفارة الأمريكية بالتنسيق مع إتحاد أبناء العمومة الأحمر عشرة مدربين من السودان لكورس فى تدريب كرة القدم من بينهم مدرب الهلال مبارك سلمان ، مع العلم أن أمريكا تفضل كرة السلة وكرة القدم الأمريكية التى تشبه لعبة ( شليل ) عندنا فى السودان ..المهم فى الأمر إتحاد معتصم جعفر حاول أن يلعب بخبث ولا نقول ذكاء !! لأن الذكاء عندما يسعى صاحبه للضرر يسمى خبث ، ويعلم إتحاد الغفلة عدم الإستقرار الفنى الذى يعانى منه فريق الجماهير الأول فى السودان ففى خلال 3 شهور تعاقب عليه 3 مدربين وعدم الإستقرار الفنى يؤثر على مستوى الفريق مهما كان ... وبلع مبارك سلمان الطعم وترك الهلال وأمامه 4 مباريات حساسة أمام الخيالة فى الفاشر والآرسنال فى شندى والفهود فى عطبرة والسلاطين فى أم درمان وقرر أن يسافر لكورس أمريكا رغم أن هناك عقد موثق بين المدرب ونادى الهلال ورغم ذلك مارس مبارك العشوائية وضرب بالعقد عرض الحائط وكانت النتيجة الطبيعية هى الأستغناء عن خدماته ، والحمد لله قاد عاكف وفوزى المرضى الهلال للفوز على الخيالة بثلاثية نظيفة فى الفاشر ...وتساءل الأمين العام لنادى الهلال الأستاذ عماد الطيب عن إختيار الإتحاد العام لمدرب الهلال ولم يطلب من إدارة النادى إبتعاث أحد أبناء الهلال لدورة أمريكا التدريبية !! ونقول للعمدة هدف إتحاد أبناء العمومة الأحمر واضح هو أن يتعثر سيد البلد حتى يخلو الجو للمريخ للتكويش على كأس الممتاز ودورى السودان ولكن هيهات ثم هيهات ...وعشم إبليس فى الجنة .
*** همسة الوداع
حبايبنا الحلوين يادوب عرفوا كأس سيكافا منزوعة بركة !! لأنها لاتعفى حاملها والمحمولة إليه من اللعب فى التمهيدى !! ياربى نقدر نقول خربانة من كافا ولاّ من ناس سى كافا !! هلال السودان فى العام الجديد معفى من التمهيدى أما الجيران نقول ليهم ...عزاز علينا ...شالوا نوم عينينا ... فراقكم جبرى والله مابإيدينا ، أمشوا شوفوا التمهيداب والسيكافاب وين !! الحاجة المحيرانى ومحيرة كل الهلالاب ... إتحاد أبناء الأحمر ليه ما يختار مدرب المريخ لكورس أمريكا !! وبهذه المناسبة نهمس فى أذن الإعلام الأحمر إنتوا قلتوا لى معتصم جعفر ....برهان تية ضعيف فى الإنجليزى ولاّ شنو ؟ مجرد سؤال .
امسح للحصول على الرابط
بواسطة : محمد عثمان الجعلي
 11  0
التعليقات ( 11 )
الترتيب بـ
الأحدث
الأقدم
الملائم
  • #1
    Hajjam 09-17-2014 10:0
    صدقت ياود الجعلي سيكافا لا اجد لها تشبيها الا بلحم الفطيسة....ولذلك حرمت علي سيد البلد...
  • #4
    Hassan 09-17-2014 02:0
    أمس الجعلي الجو جميل والجمهور جميل والفريقين اخر روعة لا في حكم ( سكو) لا في جمهور تعصب وكمان روعة في الاداء والأهداف ثلاثة وليست هدف واحد استروبيا
  • #5
    جعفر صالحين 09-17-2014 11:0
    هاك يالجعلى أقرا لى سلك .. مع انى متأكد انك قريته ... ومتأكد ان الهلالاب بيقروا جرايدنا قبل كل شى ... عشان يتعلموا .... فماذا قال سلك ... (((
    > الإخوة الأهلة الشرفاء
    > بعد ربطوا لجماهيرهم مكنة الشكوى
    > وبعد رفعوا التقسيمة بحكاية التصعيد للفيفا
    > وبعد عادوا لقصة الاحتجاج على البرمجة
    > وبعد طلعوا بشمار تلاته محترفين من العيار الثقيل.
    > زادوا المحلبية
    > قالوا ستة محترفين من العيار الثقيل.
    > لما جماهيريهم رحبت بالفكرة.
    > قالوا تسعة محترفين من العيار الثقيل.
    > ذكروني قصة الزول بتاع رمضان
    > الزول القالوا لما اعلنوا جائزة للبشوف هلال رمضان.
    > صنقع كدااااااا
    > وقعد يكورك.
    > يا هو داك يا هو داك.
    > قالوا ادوهوا مية الف ريال.
    > قال ليهم داك واحد تاني.)))

    يا سلك .. الله يجازيك ... طممت بطن الجماعة ... ههههههههاع
  • #6
    مانديلا وسيكافا 09-17-2014 10:0
    حبيبنا الجعلي تحياتنا.مبروك الفوز على هلال الفاشر .بس شايفكم خليتو الهلالين وبقيتو تشجعو مريخ الفاشر ومريخنا في بيتنا اقصد زيتنا في بيتنا انتو المزعلكم شنو كلو احمر في احمر .مازمبي لاتكلمي.
  • #7
    الامين عبد القادر 09-17-2014 10:0
    التحية والسلام اخوى الجعلى عاد هلال الملائين بالنقاط كاملة ولكن لن يكمل مادام اتحاد السجم يقف بهذه السلبية والتعديلات والبرمجة والخرمجة المعهودة واتمنى ان يكون حكام الديربى او مباراتنا مع الوصيف بحكام اجانب والا اعطوهم الكاس ونريح اتحاد السجم العام من المشاكل والحمد لله امس كان ملعب النقعة ولم يكن استاد ارض المحنة الذى وصفه اخونا فيصل الاقرع بصلعة احمد بدير ***
    كتب اخونا يعقوب حاج ادم فى عمودة اليوم عن الراحل ابورونق ويطالب السفارة فى الرياض فى اعفاء سيارة الراحل لتذهب لاسرته ولابنته وهذا اقل مايقدم للراحل ولاسرته لانه علم سودانى ويكفى ما اخذ منه فى حياته من ضرائب ونامل الوقفه معه بعد مماته ومع اسرته المكلومه ونناشد من هنا اخونا حاج ماجد سوار ان يقف مع اسرة الراحل داؤد عبد الحق (ابورونق) *****
    وتحياتنا لكم وللاخوان فيصل الاقرع وللحبيب كتاحة ودمتم للوطن والهلال فى حفظ الرحمن
  • #8
    خلف الله بله ودعقيده 09-17-2014 08:0
    استاذ الجعلي لك التحيه والله بكل صراحه لو هللالك ما غلب الحمام كان البارح رقت مستشفي عديل كدي لكن الله نجدكم من السلاطين اما بالنسبه لكاس سيكافا والله العظيم مورم فشفاشك من جو
  • #9
    كمال مجذوب 09-17-2014 08:0
    شنوا يا الجعلي الهضربة شنو كيرت وراحت ايامك ياحليلك يا0000 كفر ووتر
  • #10
    ابوعبدالرحمن 09-17-2014 08:0
    ياراجل اتقي الله كم مرة شارك الهلال في سيكافا وماهى النتائج وكم مرة شارك الهلال من التمهيدى تم ماهو الحصاد صفر جديد والعرجا لي مراحها
  • #11
    أحمد الفكي - حائل 09-17-2014 07:0
    ظريف يا الجعلي .. خليتني أضحك في عدم اختيار برهان تيه . طيب ما كان يختاروا محسن سيد . الظاهر ما معترف به
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019