• ×
الثلاثاء 22 يونيو 2021 | 06-21-2021
محمد عثمان الجعلي

هلال زمان يعود الآن

محمد عثمان الجعلي

 13  0  4597
محمد عثمان الجعلي

الحمد لله إنتظم نجوم الأقمار في معسكر الدفاع الجوي بقاهرة المعز وإستلم المدرب الفرنسي دينيس لافاني التقرير الكامل من المدرب العام طارق أحمد آدم وزير دفاع الهلال في العهد الذهبي ، عندما وصل هلال كندورة والثعلب ووليد طاشين وتنقا أمام الأهلي القاهري نهائي أبطال أفريقيا عام 1987 كأول إنجاز يحققه فريق سوداني ، نحن نعلم كيف خسر الهلال كأس أبطال أفريقيا بالظلم الواضح من الحكم المغربي لاراش الذي رفض إحتساب المخالفة التي تمت مع جمال الثعلب وجاء منها هدف الأهلي الظالم كما نقض الحكم هدف وليد طاشين الذي أحرزه برأسية محكمة في شباك الأهلي ( موجود الهدف في اليوتيوب لمن أراد مشاهدته ) وإعترفت الصحافة المصرية بصحته ، كما كان الرئيس المصري حسني مبارك لا يدخل مباراة إلا إذا ضمنوا له فوز الفريق المصري ، لذلك إنكشفت قصة رشوة العشرة آلاف دولار التي إستلمها لاراش وتم مصادرتها منه في مطار القاهرة ( غلطان المرحوم ويستاهل ) ... بينما كان أهل السودان لا يعرفون الخبث الكروي الذي قال عنه المدرب التونسي فوزي البنزرتي ... إن الكرة السودانية بها مهارات فنية ولكن ينقصها الخبث الكروي ، والكل يذكر أن مباراة الهلال والأهلي عام 1987 بالخرطوم إنتهت بالتعادل السلبي ورفض سكرتير الهلال وقتها عبدالله السماني رشوة الحكم وقال إن الهلال إسمه نادي الهلال للتربية قبل أن يكون نادي الهلال لممارسة كرة القدم ، وهلال 2017 فيه ملامح هلال 1987 وسبحان الله الفرق بين التاريخين 30 سنة بالتمام والكمال وهلال 2017 مرصع بالنجوم وربما تشابهت الأسماء فهناك جمال الثعلب وهنا صهيب الثعلب وكان كابتن الهلال وقتها هو الخلوق طارق أحمد آدم والآن كابتن الهلال هو الخلوق مدثر كاريكا وفي الهلال زمان الفنان كندورة والآن عندنا المهندس بشة وزمان عندنا الصاقعة صبحي والآن عندنا الصاقعة نزار وزمان يحرس شباكنا العملاق يور والآن العملاق مكسيم بالإضافة للنجوم الواعدة في هلال 2017 مثل الطاهر سادومبا وبوي وحابسون وأوكرا وتيتيه وشلش وأبوستة ... نقيف حدي هنا عشان فيصل الأقرع ( ورّعنا وحذرنا ) مانذكر نجوم الهلال خوفاً من العين الحمراء وشرارة ... يافيصل يا أخوي العين الحمراء وشرارة الأيام دي ماقادرة تشوف من شدة برد تركيا ، والحمد لله كابتن الهلال عام 1987 هو الآن مدرب عام هلال 2017 إنها من الصدف الجميلة والأقدار المقدرة ، طبعاَ نحن بحمد الله وصلنا نهائي أبطال أفريقيا مرتين ، بالمناسبة وصول نهائي الأبطال عند الوصايفة إلا يسمعوا بيهو سمع ساكت عند الجيران !! لذا لزم التنويه ,
*** أبوشيبة المرتبك أصبح يقلد سلك
لا أدري لما تذكرت قصة المرحومة ( ست البليلة ) التي كانت لاتعرف في فن المطبخ غير عمل البليلة فشبكت زوجها بليلة في الفطور وبليلة في الغداء وبليلة في العشاء ( حبة 3 مرات في اليوم ) وعندما توفيت أصبح زوجها المسكين يبكي على قبرها ويتذكر البليلة السمحة ، فمرت به إحدى النساء وعندما علمت بحاله قدمت له صينية مدنكلة فيها الشية والمفروكة والسلطة والتحلية ، فسألها كل هذه الطيبات تقدم للناس وأنا ماجايب خبر !! فأخذ حزمة من الحطب وأراد أن يحرق بها قبر المرحومة التي أضاعت عمره في البليلة ، ربما كان السبب الذي ذكرني بهذه القصة ماكتبه رئيس تحرير الصدى مامون أبوشيبة الذى أدمن مهاجمة التحكيم السوداني بسبب وبدون سبب فربما ذكر لنا أن الحكم منح الهلال ضربة جزاء وهمية عام 1934 في حوش المولد بـأم درمان في نهائي مباراة كأس المفتش العام الإنجليزي ، ولكن بعد توقف الدوري أصبح أبوشيبة يعاني فراغاً فكرياً حيث لايوجد حكام ليهاجمهم ، فحاول أن يخفف دمه ويقلد بابكر سلك ( وخفة الدم من ربنا !! ) فكتب في عموده ( لغم في الكورة ) مقالاً بعنوان قنبلة كردونة ... وقال إن الكاردينال وعد الهلالاب بتسجيل ليونيل ميسي وفي النهاية سجل ليهم شاب يافع موشح بالأزرق كث الشعر عديم الشارب طويل القامة هو أحمد ميسي لاعب الشعلة بحري ، ربما نسى أبوشيبة أن أحمد ميسي كان يلعب بالمريخ !! والغريب في الأمر أن أبوشيبة قبل أيام تحسر علي فقدان المريخ لنجم وسطه ( أوكرا ) وقال إن أوكرا صاحب القدم اليسرى لاعب وسط موهوب وهداف ولاعب الوسط الهداف أصبح عملة نادرة ، ( إغفر لنا الله ) عندما قرأنا كلام أبوشيبة عن أوكرا ظننا أن الرجل ثاب إلى رشده ولكن ( أم تفّة لسه في جنها ) ويجب على عقلاء الصفوة أن يلحقوا مامون قبل ( مايفوت فيه الفوات ) ونقول ليكم إن شاء الله الدوري يبدأ ومامون يرجع لي مهاجمة التحكيم ( أحسن لينا بليلة المرحومة ) إحنا ماقائلين زولكم كدي .
*** رسائل غنائية رياضية من الفنان الطيب عبدالله
نريد أن نرسل 3 رسائل غنائية رياضية من أغنية ( لقيتو واقف منتظر ) كلمات الشاعر صلاح حاج سعيد وغناء الفنان الطيب عبدالله ، والرسالة الأولى من الأقمار وهي تتفاءل أن تشاهد هلال 2017 زي هلال 1987 بل هو أفضل وأن يكسب كأس الأميرة السمراء ولايكتفي فقط باللعب في النهائي وتقول الرسالة *** لقيتو واقف منتظر تشتاق عيون لي طلعتو ... نفس الملامح والشبه والمشية ذاتا وقدلتو ، تاريهو ياقلبي الحنين راجيهو بي شوق السنين ... لكنه آه يخلق من الشبه أربعين .
والرسالة الثانية من مصعب عمر وهو يستعد ليشتكي أمين خزينة المريخ كما فعل المعز محجوب وذلك بسبب إرتداد الشيك لعدم كفاية الرصيد رغم وعوده له المتكررة بأن يقدم الشيك في تاريخه وتقول الرسالة *** ياربي جيت قبل الميعاد ولاّ الزمن غفلني زاد ... قصة يغيب ما أظن تكون وما أظن تدور يوم في إعتقاد ....مرساله لي دائماً يقول أرجاهو في نفس الميعاد !! والرسالة الأخيرة من راجي عبدالعاطي وهو يعاتب مدربه هاي لعدم إضافته له حتى الآن بالمعسكر رغم أن راجي هو إبن المريخ وراجي المريخ وحام بلاد كثيرة من أجل العلاج وتقول الرسالة *** أنا ديمة يا أجمل ميعاد (راجيك) وإنت علي مطول ...أمش وأقول وأسأل عليك صحابي وكل زول ... ويقولوا لي هنا هسه كان عنك يسأل وليك يقول ... أرجاهو في نفس الميعاد وماأظنه تاني عليك يطول .
*** همسة الوداع
حبايبنا الحلوين إختاروا معسكر البرد والمطر في مدينة إنطاكيا التركية عشان معاون المدرب الألماني هاي هو التركي كيمال هيلات !! أنا كنت فاكر هيلات ده أدروب !! عشان الإسم يابكري عيسي حمد من( هلالاب مكة وأدروب أصلي ) ، ومساعد هيلات هو السوداني فاروق جبرة !! الجهاز الفني للمريخ ( سليقة بي سكر ) إتلقي هسه ناس النعسان والتذكرة بالإنجليزي ( التكت ) بقوا إيسكريم من البرد ، وبهذه المناسبة نهمس في أذن الإعلام الأحمر إنتوا معسكرين في الجليد والصقيع فاكرين إتصالات جيبوتي وتفرغ زينة الموريتاني من أندية الإيسكيمو ولاّ شنو ؟ مجرد سؤال .
امسح للحصول على الرابط
بواسطة : محمد عثمان الجعلي
 13  0
التعليقات ( 13 )
الترتيب بـ
الأحدث
الأقدم
الملائم
  • #1
    فيصل الاقرع 12-07-2016 11:0
    السلام عليكم ابوناصر واستاذ سيف الدين ياابوناصر استاذنا سيف طلع ما خواجه طلع سوداني اصلي وبتاع جروف كمان لان عرف انها بليلة لوبه عفن وهو مثل حبةالفاصوليه الا ان لونه بني مثل العدس ويسمي بالفرفروج لانه لما استوي في فرعه ينفتح الغلاف او زي ما تقول ينفرج
    انا فسرت ليكم ياابوناصر انت والحعلي دحين شوفوا موضوع القرقريبه الجابو استاذ سيف الدين
  • #2
    منعم ابوناصر 12-06-2016 03:0
    ياودالاقرع تجيب فى المحن وكان قولنا شى تلومونا خليك من ابوناصر زولك الجعلى عمل بحث مكثف ولم يصل الى معنى فرفروج او ماهو بعدين مشى اكتر من ذالك اتصل الى العقول النيره فى جامعة ام القرى وهى بنت خالو وتربيت حبوبات وهى دخلت فى بحث مع زوجها وهو ايضا فى الجامعه ولم يصلو الى هذا الفرفروج انت ياالاقرع تفتكر جيل الفرفروج موجود عشان تقول للجعلى شوف حبوباتك اذا كان كل الحبوبات رقدن صعيد حبوبات اليوم تبع المس كول والواتس وينك انت ....انا شخصيا سوف استعين بصديق الحقنا ياجيفارا وحلنا من محن الاقرع وحبوباتو .... هل الفرفروج حقيفه ولا حلم مجرد سؤال
  • #3
    سيف الدين خواجه 12-06-2016 03:0
    اخونا الجعلي والاخوان الامين وفيصل خليكم كدا مع ابو شيبه حتي يخلق فولابيا لللاعبي المريخ من التحكيم عقاب عقوبات السنة الفاتت لا الحين فيها رواب اما الحكام ضد الهلال لانه بسحرهم بعروضه الجميلة كما الامير عبد الرحمن بن سعود واصفا لاعبي الهلال زمان بالسحرة مداعبا احمد الفهد لماذا يلبس المنتحب الكويتي الازرق اليس هو حب الهلال السوداني الذي سحر اعين اهل الخليج واسترهبوبهم وجاءوا بسحر عظيم !!!اما البليلة والله يا الاقرع تربية حبوبات والله الاسماء تقولا لبنات الزمن مع المعراكه والقرقريبه تعتبرها اسماء لتخوبفها لو حرجت لوحدها كالعنقاء والغول والخل الوفي وهي وحدها فاطمه السمحه !!!
  • #4
    ابو حازم 12-06-2016 12:0
    التحية لك حبيبنا الجعلي وانت تسعدنا دائما بكلماتك الرائعات في حق الاقمار والتي اتمنى لها التوفيق والفوز بالبطولة الكبرى، ويخلق من الشبه 30 ما 40 ياجعلي.
    ناس ابوشيبة رايح ليهم الدرب وما عندهم شي يكتبو عن فريقهم ويجدو متعة الكتابة دائما في هلالنا العزيز.
    اتحدى اي مريخابي يكتب مقال دون أن يتعرض للهلال.
    انت في ناس التكت والنعسان، ولا الكلام بكوري الظاهر في الصورة مخلوع، مجرد سؤال بكوري مخلوع من البلد ولا خانقاه الكرفتة. وتحياتي
  • #5
    ودعقيده خلف 12-06-2016 10:0
    استاذ الجعلي لك التحيه بالنسبه لموضوع الخباثه والرشاوي في الكوره ما دام من عام 87معروفه لكم ليش ما عملتهو لي اتحاد الجزاير عشان تمسحو صفركم وتسجلو اسمكم في الخارج وبعدين دي نصيحه من عندي اي فريق ما يحسم اللقاء في ارضو تمام ما يمشي يدور ليها في ارض الخصم زي مثلنا السوداني تأباها مملحه تكوسه حافه يا حمبر قباض الطير
  • #6
    منعم ابوناصر 12-06-2016 09:0
    تحياتى وابشرك ام تفه مامخليا جنها وانت بتزيد الشيبه جن وانا جنى وجن ناس ابوخيبه ومزمز وكابو رقاقصات وسلك العريان ومعاط السلوك والجاكومى يأخى دى اسماء لوماتكلمت تجيب الحموضه الله يعينك عليهم وانت قدر المهمه وبتكفى كل قبيلة بنى الاحمر هم كلهم قدر كم انت لوحدك بتكفيهم ونحن من خلفك نحن بنقدر ليك على ناس ودبلل ودالعقيده والجلابى ديل نوعا ما خفيفى الظل بعدين (ام تفه دى حلوه) وقول ل وعقيده نحن دائما فى المقدمه ومقيمين فى الاتحاد الافريقى اكثر منكم والدليل التقبم وانت لومعترفين ليك بأبطوله كان اقل شى تقيمك يكون احسن من سيدالبلد ,,,ويافصل الاقرع فسر او كلمنا بالعربى >>>حلوه رسائلك ياجعلى
  • #7
    ابوحسن 12-06-2016 09:0
    لك التحية استاذنا الجعلي يييييييييييييسلام يا الجعلي علي هلال وليد طاشين وطارق وثعلب وكل المجموعة كانوا مخلصين لهلال
    وهم كانوا ابناءالهلال الحقيقين في الزمن الاصيل دي مدرسة الطيب عبدالله ومحمد احمد ملاح كانوا يدفعوا لهلال دون من اواذي
  • #8
    البابا 12-06-2016 09:0
    قال ليك صلاح نمر من شدة السقط ماسيح ركبوا بقى يجي التمرين بالبطانية عشان (يغطي) المهاجمين..
    ......

    تصدق يا الجعلي علاء الدين بعدما سمحو ليهو يتمرن حلف غير يجبلو ليهو فول مصلح مايدقها وقال ليهم كان ماعاجبكم عايز معاهو (قرن شطة) ههههههههههههههههههههههههههههههههه
  • #10
    فيصل الاقرع 12-05-2016 05:0
    انا نسيت حاجه يا الجعلي انت خلاص خليت الشاي المنعنع بقيت علي ابوشيبه مجردسؤال كما تهمس دائما
  • #11
    فيصل الاقرع 12-05-2016 05:0
    سلام جعلينا السيره مرقت عصر حبابك الف بالله عليك المراه المضره دي اكان خلتو علي بليلتو ما اكان اسع ليوم الليله اترحم عليها وعمك مامون يا الحعلي من زمان خرفان بس خرفه كان محصور في الحكام اسع طشش كلو كلو ياودعيسي الجعلي مابراهو انا كمان كنت فاكرو ادروب اكان ما كلام الجعلي دا ويا استاذنا خايف اقول ليك البليله عدسي والا فرفروج اقوم ابو ناصر افتكر فرفروج بالالماني
    اما الرسائل والله فصلتها تفصيل كان ما اطلع لينا اخونا عثمان جميل المهم اتعبتنا بذكر الاقمار المهم كل اسم بنقرأ بعده صورة الفلق
  • #12
    ودعقيده خلف 12-05-2016 05:0
    استاذ الجعلي لك التحيه دوما لكن والله بكل صراحه هلال 2017مرصع بالخوازيق مع احترامي ليك والصفر في محلو لاتخدر الجماهير بالفاضي بالاغاني والتطبل في الفاضي اما بالنسبه للرشاوي والله اول ناس سبقتوا عليها لكن غلبتكم كمان بتتفاصح وعندك لسان بتكلم ولسع سجلك في الكاف الصفر والعجاج والرماد والله بكل صراحه لو كنت مكانك كان اعتزل تشجيع الهلال وابقي مريخابي علي السكين
  • #13
    الامين السمانى 12-05-2016 04:0
    التحية والسلام اخوى الجعلى ياخى مالك علينا ومرجعنا لنهائى 1987 مع الاهلى والذى كان فيه الهلال الافضل والاقرب ولكن حكام اب شيبة نعمل معاهم شنو ؟؟؟
    ان شاء الله هلال هذا العام لها والله يكفينا شر العوارض والعين الحمراء وانت ياخى ماتكثر لينا وصف الاقمار ونحن نجدها من منو ؟؟ منكم ولا المخرف اب شيبة !!!!
    رسائل لطيفة وان شاء الله وقوفنا ما يطول والشبه بعيد وهلال 1987 لم يكن به محترفين اجانب وعلى رأسه الراحل الطيب عبدالله وعبدالله السمانى ومن يومها نحن مع حلم الاميرة السمراء و ان شاء الله يتحقق هذا الحلم فى هذا العام ---
    ودمتم للوطن والهلال فى حفظ الرحمن وتحية خاصة وخالصة عبركم للشفيف الوريف حبيبنا كتاحة وسعدنا بكلمات الاديب الاريب
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019