سوبرهاتريك
طارق محمد عبد الله
في زول عندو اعتراض ...؟؟؟؟
يخوض سيد البلد وزعيمها الاصلي ومحرك الاحداث المهمة فيها وامبراطورها وملكها ووزيرها والطابية والرخ باختصار رقعة الشطرنج باكملها مباراة استثنائية عشية اليوم امام الرومان في اطار مباريات الجولة 18لبطولة دوري سوداني الممتاز .
*وكما هو معلوم وقادي اضان الكل فان ابو الهل فاز اخر مبارياته كما جرت العادة علي نده السابق المريخ بثلاثية من نار بعقر الدار تدحرج علي اثرها الاحمرالي خانة شبه الند واصحاب (البصمات )اي الدمغات اقصد الاهداف المعلم ،بوي وبشة وتوج بنجومية الديربي نزار او نيزو علي غرار زيزو في زول عندو اعتراض ؟؟العندو اعتراض يشرب من البحر ثلاثة جغمات عند اللزوم..!! *بئس من يحاولون ان يبخسوا البرير اشيائه وتسجيلاته ولعمري فان البرير اذا لم يسجل غير نزار حامد الجامد فقط لاغير طوال مدة رئاسته للهلال لكفاه ذلك .
*المهم نعود والعود (احمد الباشا )اللاعب الاول بالوصيف برغم انف الاعلام السالب ونرجسية سيبا لمواجهة اليوم امام الرومان الخرطوم والتي تصادف هذه المرة (اكبرعملية شد وجذب من الفنلة داخل خط تمنطاشر) مابين هلال الملايين بمهارة وحرفنة لاعبيه الشباب والاحمر غير الوهاج (بعواجيزه)ورفيقه وحليفه الحظ والذي حصد معظم نقاط المريخ في هذا الموسم لامهارة لاعبين ولا فلاحة مدربين ولولاه اي الحظ اللعين لنافس الاحمر علي تجنب الهبوط من الممتاز الحالي .
*ولان ابطال الازرق الاشاوس الصناديد ظلوا وعلي الدوام فرسان المباريات الصعبة والمعقدة وبعد تجاوز الاحمر عليهم مواصلة الانتصارات بعيدا عن( الطنقعة )والاستهتار لان الاتحاد لايقل عن المريخ في شيء بل يتفوق عليه بصغر معدل اعمار لاعبيه يعني هيثم مصطفي ده في الرومان يا اداري يامدرب (لاعب نهي ذندر كهي) .
*المهم ان ابطال الازرق يقع علي عاتقهم اليوم مواصلة رد التحايا لمجلس الشرعية والذي ظل منافحا ومكافحا حتي لاتسقط راية الديمقراطية بنادي الحركة الوطنية وانتصر في نهاية المطاف وللجماهير الهلالية المخلصة الوفية درع الازرق الواقي في وجه مصائب الزمن.
*رفاق المعلم عمر بخيت عليهم تقديم قطعة موسيقية كروية علي سلم الشرعية الخماسي والاقتراب اكثر واكثر من المحافظة علي اللقب لان الدوري الممتاز خليق به الفريق الممتاز وبذاد العزيمة والاصرار وعمق هلاليتكم واخلاصكم واحترامكم لانفسكم ولشعبكم الرائع المدهش سستتواصل المسيرة الزرقاء الظافرة باذن رب العالمين حتي النهاية السعيدة .
*نريدها مباراة تنتمي للتاريخ الهلالي الحافل بالابداع خاصة وان المسرح وجغرافية المكان هي قلعة الشموخ والنضال والكبرياء المفخرة الزرقاء واستنادا علي حساب المثلثات المهاري والذي يتفوق فيه ابطال الازرق علي غيرهم من لاعبي الاندية السودانية بدون استثناء .
*نتطلع لمبارة تحفة محتشدة بالجمال تليق والق وبهاء ونضار الهلال رمز الجمال في الكرة السودانية بسحره الحلال واللييييييييييلا يا حداثة الليلة وقعتكم سوداء منقطه بالاسود ده الازرق الشامخ العاتي البنحلم بيهو يوماتي فنان ومبدع وديمقراطي
اهداف سريعة
*في كل صباح جديد يتضح ان سيد البلد الازرق العاتي الجبار هلال العز والفخار هو الذي يحرك الاحداث الرياضية بالسودان ويترك لغيره اقتفاء الاثر .
* الهلال هو سيد البلد وزعيمها الاصلي والمريخ وصيف البلد وبقية الاندية مجرد كومبارس وتمامة عدد الكلام ده غصبا عن اعين اعلامييي الاحمرومهما كابر الاعلام السالب (وفرفر وجقلب )وده هلال قيافة فايت باقي الناس بي مسافة بعيدة بعيدة بعيدة ولو الوصيفاب ديل بحلموا يلحقونا في يوم من الايام بنقول ليهم نجوم السماء اقرب .
*مالك واتير دخلوا قلوب الاهلة والتشكيلة الاساسية من اوسع ابواب القراش الفاتحة كده والبقية تأتي تباعا لصياغة واقع الهلال الجديد بقيادة المامي ووليد .
*حتي نشاهد جميعا الازرق المدهش الفريد وينقرش (حلقومنا )من الهتاف والصياح اوكي قرض علي كده ياصلاح.
* سيدا البيه برغم انوف المغرضين والحاقدين موسيقار وفنان ماهر مهمته اسعاد الملايين انتوا بس شيلوا الصبر ياهلالاب ياحلوين.
*الني للنار عليه فان التدثربروح العزم والاصرار صك الضمان الوحيد للمحافظة علي الانتصارات في بقية المشوار.
*وباذن الله الرومان الليلة في خبر كان في ملحمة الرجم بالاقوان .
*واخيرا احمد الله كثيرا انني حي ازرق.