إلى صديقي ( ود السنجك ) .. الذي كان وما زال يؤمن بمثل واحد طوال حياته :

الدنيا إن مشتْ .. بيخيط العنكبوت تِنْقاد ... و إن أبَتْ .. تقطِّع سلاسل الحداد ..

أهديه قصته نظماً مجوبكاً ... بعد أن أقسم ألا يغترب و ألا يمر حتى مجرد مرور بالقرب من بنك ..

***

بكامل قواي العقلية ..
لا خمراً شربتَ .. و لا مسطول ..
و كآخر حل للمُشْكِل المزمن ..
و قبال نجمي يخبو و يكون مصيرو أُفُول ..
وافقتَ أشُور الخالة الشهيرة بتول ...
و أعرف قصة حظي التعيس .. ليه بالفقر موصول ؟
ضِحْكتْ عيشة خيْتي .. و جارتنا أم الشول ..
قالوا أكيد ..
دة كلام زهج .. يا بقيت مخبول ..
وداعية ؟ و كمان بالإسِم الخالة الشهيرة بتول ؟
ياخي ما معقول ..
ما شفتها في حفلة وصال ..؟
سِكْرتْ .. وقفتْ لطْ و غنت ( تكولن كول ؟ )
رطنَتْ .. جابت لغات كل العجم .. من تتار و مغول
كوركتْ .. و ندهتْ .. يابْ إيدن تَسِد و تطول ..
و وقعتْ غمرانة نص الدارة..
و لما أسيادا قالوا :
طلباتك يا حاجة بتول ..
قالت : إسكيرت و بلوزة من عفراء مول ..

***
معليش يا جماعة ..
أسمحوا لىْ
أشوفا بس شن بتقول ..
و أسباب عكوس الحظ ..
و المستقبل المجهول ..
ليه محل ما أقَبِّلْ مَكَجَّن و ما مقبول ..؟
زول ممتاز ..
زول وناس .. و كلي أصول
عني كدة .. الناس جميع بتقول ..
و غير شهادة البكالريوس ..
مخي ملان ... تقول كشكول ...
يا حاجة بتول ...
هاكي .. أهي دي سيرتي ..
قدامك زى كتاب مبهول ..
كشْكشي ودَعِك .. شوفيهو شن بيقول ؟

***
حدرتْ لي ..
ثم أخدتْ سفة ..
و قرطعتْ جُغْمة من جرْكِن في اليمين متكول ..
قالت بفصاحة و عويناتا في الودعات :
يا ولدي .. مصيرك لا غبار عليه
واضح قدامي و غير مجهول ..
جَدِّدْ البظبورطي .. و خليهو ساريَ المفعول ..
فقدَمك يا ولدي سيكون حالاً سريع منقول ..
و سيكون باليورو و اليَنِّ ..كل الرصيد مشمول
و أحرص على ضريبتك
و زكاتك تدفعا ... قبال يحول الحول

فتبسَّمَ شخصي المسكين .. من قولها المسئول
معقول ؟
بسافر ؟
و أبقي المغترب ؟ معقول ؟
و البنية ال غراما في القليب مأهول
تبقي ستي و ست ريدي ؟
و يرتاح فؤادي ال بالكمد مكتول ؟
و سرحتَ بعيييييييييييييييييييييييييييد ..
غايتو أول ولد .. بَدَلِّعُو بي إسم شبلول
مالو ؟ دة ما إسم جدي ..
ال كان أيام التُرُك مسئول
و أول بنية بسميها بت قندول
إسم حبوبتي .. الوارثة جروف و شتول
و جريت فرحان ..
و قدام بيتنا ..
لقيت عسكري واقف منتظر
بالله أتقول مصابح غول ..
شنباتو تقيف عليهن الحِدَّاية ..
عضلاتو تِبِش .. و الكتيف مفتول
قال لي : أركب البوكسي ..
قلت : مالي شن سويت يا جنابو ؟
قل لىْ يا جنا شيكاتك في البلد
طايرة و راكة ... تصول .. و تجول
و رصيدك يا حريف ..
يجيبلك إن كتَّرْ ..
تلات عيشات .. و حَبَّة فول ..


**

الحظوظ إن عاكست ... زى الشرا في القندول