• ×
الثلاثاء 5 يوليو 2022 | 07-04-2022
محمد عبدالماجد

الهلال بقى متل (الساعة) مرة (خمسة) ومرة (سبعة) مساء وعصر

محمد عبدالماجد

 0  0  1704
محمد عبدالماجد
صابنها
محمد عبد الماجد

الهلال بقى متل (الساعة) مرة (خمسة) ومرة (سبعة) مساء وعصر

• قولوا ما شاء الله وتبارك الله.
• اللهم احفظها نعمة انتصار من الزوال ..وأبقيها وزيدنا منها.
• الهلال بقى شغال زي (الساعة).
• الساعة السويسرية.
• او خلونا نقول الساعة (البرتغالية).
• الهلال مرة يغلب (خمسة).
• ومرة يغلب (سبعة).
• مرة عصرا.
• ومرة مساء.
• الغريب الجماعة الذين كانوا يهاجمون في جواو موتا ...بعد هذه النتائج صلحو وضعيتهم وصححوها ..وقالوا ان المدرب استجاب لهم وغيّر طريقة اللعب التى كان يلعب بها من 4 – 3 – 3 الى 4 – 4 – 2.
• الناس دي اصلو ما بتعترف .. أي زول عاوز يثبت انه على صواب.. وان كلامه صحيح.
• بعد ما كانوا بقولوا عن موتا انه (ممرن) و (مخرمج) و (سباك) قالوا انه استجاب لهم وغيّر الطريقة.
• مشكلتهم مع المدرب يعني كانت في (الطريقة).
• طيب (السبّاكة) لزومها شنو؟
• لو بقت على الطريقة جيبوا (كفاح) او محمد الطيب مورينهو .. الذي قعد في البيت وبنتقد في موتا.
• مدرب ما لاقى شغل .. بنتقد في موتا وبهاجم فيه ..شوفوا نحن وصلنا وين؟
• الشغل دا شغل (كيزان).
• الشغل دا اصلو ما غريب عليّ.
• الكيزان الدخلهم شنو في الموضوع دا؟
• كانوا يقولون ان لجنة تطبيع الهلال سوف تطيح بالمدير الفني للهلال ، وان الهلال في هذا التوقيت الصعيب وهو يلعب مباريات مهمة في الدوري الممتاز بفاوض في بعض الاسماء البديلة لجواو موتا.
• تتخيلوا.
• والهلال بغلب بالخمسة والسبعة.
• زي الساعة.
• هسع الجماعة ركبوا القطر ..وقالوا المشكلة كانت في (الطريقة).
• ما عارف كفاح رأيو شنو؟
• نطلع فاصل للضحك ونرجع نواصل.
• انتوا وقت بتعرفوا الحاجات دي كلها ... ما تبقوا مدربين ..ما في داعي للمدرب الاجنبي.
• الجماعة بدخلوا حتى في (الطريقة) التى يلعب بها المدرب .. نوع دا قابلكم في حتة قبل كدا؟
• المهم الجماعة ديل ح يسكتوا الآن ..خوفا من التيار ..ويركبوا الموجة ... وينتظروا اول تعثر للهلال لا قدر الله عشان تاني يقوموا على المدرب ويشغلوا نفس الاسطوانة.
• نحن في هذا الوقت نرحب بمن ينتقد المدرب ويوجه قدحه له ... لكن ان يكون الهجوم والانتقاد في اللحظات العصيبة ومن اجل تصفية حسابات واثبات وجهة نظر شخصية فهو امر مرفوض.
• معقولة مدرب يشيلوه بعمود صحفي وتصريح من كفاح.
• كفاح عاوز يحدد لينا من يدرب الهلال وهو يشرف على فريق منافس للهلال في الدوري.
• معقولة بس.
• ركز في توتي يا كوتش.
• الهلال يحتاج للدعم عندما يتعثر وعندما يكون هناك مشاكل وأزمات ..اما الآن فان الهلال لا يحتاج لشيء ويمكن ان يقبل بكل الاراء.
• اسوأ شيء هو الصيد في المياه العكرة ..او المشي مع تيار الجماهير التى كانت تطالب بالإطاحة بالمدرب.
• الجماهير بعاطفتها القوية والجياشة يجب توعيتها بأهمية الاستقرار والصبر على المدرب بغض النظر عن اسم المدرب الذي يقود الهلال وقتها.
• لا يهمنا موتا ولا غير موتا ..بقدر ما يهمنا الاستقرار ..والعمل الاداري الذي يجب ان يؤثر عليه الاعلام والجمهور سلبا.
• نرجع الى مباراة السابعة (عصرا) ونقول ان اهم سمة وميزة في الهلال هي تعظيم فضيلة (الصناعة) في الهلال.
• اهم شيء في الهلال بقت (الصناعة).
• الهلال بقى زي (الساعة).
• أي لاعب في الهلال بقى يحرص ويعمل على ان يصنع الهدف لغيره.
• هذا الامر جعل الغربال يصنع وياسر مزمل يصنع وجيرالد يصنع والشعلة يصنع ..اما عبدالرؤوف فهو اختصاصي في هذا المجال.
• كلهم يصنعون للأهداف لهذا ظهرت روح جديدة في الهلال ..وبقى أي لاعب في الهلال يعمل من اجل زميله.
• بقى في تعاون وتكافل وتعاضد كبير في الهلال.
• جمهور الهلال جمهور واعي ومدرك ..منذ قديم الزمان وهو يحب ويفضّل اللاعب الذي يصنع.
• احب الهلالاب الطاهر حسيب وفائز نصرالدين و الرشيد المهدية والديبة وحمد وهيثم مصطفى ومهند الطاهر لأنهم كانوا يصنعون الاهداف.
• قيمة اللاعب الذي يصنع في الهلال ربما تكون اعلى من قيمة اللاعب الذي يسجل الهدف.
• وهذا امر جميل ...ونحن نرى روفا يحظى بكل هذا الحب والدعم من جماهير الهلال لأنه يصنع الاهداف.
• قدم الكرة وألعبها لمن هو في موقع افضل منك ، هذا دأب الهلال .. لهذا اصبح الهلال يسجل كل هذه الاهداف ..بعد ان كانت مباريات الهلال تنتهي بفارق هدف وحيد.
• هذه الفضيلة رفعت حصة الهلال في الاهداف الى الخمسة والسبعة.
• الهلال بقى زي (الساعة).
• سبعة وخمسة دي ما كنا بنسمع بيها إلّا في الساعة ..بفضل الله وتوفيقه بقينا نشوفها في الهلال.
• نطلع فاصل للضحك ونرجع نواصل.
• من الطبيعي ان يقوم روفا وجيرالد وجاجون بالصناعة فهذه هي مهمتهم الاساسية ...الجميل هو اننا اصبحنا نري ياسر مويس يقوم بصناعة الاهداف للشعلة وجيرالد والغربال بصورة مفرطة ..ويصنع الشعلة للغربال ويفعل الغربال العكس. هذه هي القيمة الحقيقية لموتا في الهلال ..تعدد الصناعات في الهلال.
• تعظيم فضيلة صناعة الاهداف في الهلال.
• أي لاعب بقى يصنع ويمرر الكرة لزميله حتى ولو كان المرمي امامه يبدو خاليا.
• الهدف الذي سجله جيرالد في مباراة الامل ..هدف لم نشاهده حتى في الدوريات الاوربية.
• هذا الهدف يجب ان يتم تدريسه ..فهو علامة فارقة في الجمل التكتيكية او دعونا نقول الجمل (الموسيقية) مع تمرير الكرة بسلاسة مع السرعة والإتقان.
• كل هذه الاشياء كانت تتم بروعة.
• ابداع.
• الهلال بقى زي (الساعة).
• قولوا ما شاءالله.
• الذين لم يسمعوا محمد وردي وهو يغني في (جميلة ومستحيلة) عليهم ان يشاهدوا هدف جيرالد في الامل عطبرة.
• سوف احكي ليكم قصة الهدف.
• هدف الهلال الخامس الذي سجله المحترف فيري جيرالد بدأ بمثلث (تمريري) بين محمد المنذر والطيب عبدالرازق الذي مرر الى عبدالرؤوف الذي كان رأس المثلث في تلك التمريرات ... عبدالرؤوف مرر الكرة في العمق الى الغربال ...الغربال بذكاء يحسد عليه اعادها لعبدالرؤوف ...كان جميل من عبدالرؤوف ان اعاد الكرة مرة اخرى (مباغتة) الى الغربال وهو يتسلل من منتصف الملعب لينطلق في المساحة الخالية ويجد نفسه في مواجهة مع حارس المرمي الذي تخطاه الغربال ومرر الكرة بعد ذلك عكسية الى ياسر مويس الذي قام بإنزال الكرة بصدر رحب على الارض امام فيري جيرالد ليسجل الاخير هدف مثل (الختم) في شباك الامل الخالي.
• الشغل دا شغل علمي.
• شغل فيه كيمياء وفيزياء واحياء.
• شغل معهد الموسيقي والمسرح عديل.
• نحن النصيحة بنقولها.
• الهدف دا ممكن يعمل للهلال رابطة في الدوري الاسباني ورابطة في الدوري الانجليزي.
• ولا بكضب.
• الهلال بقى شغال زي (الساعة).
• قولوا ما شاءالله.
• الله يديم علينا هذا الفضل وتلك السعادة.
• الكاميرا لم تظهر التمهيد الذي قام به ياسر مزمل لجيرالد فيري من عكسية الغربال لأن الكرة كانت تنقل بسرعة كبيرة بين لاعبي الهلال وقد سجل الهلال هدفه الخامس والمرمى خالي بعد كل تلك التمريرات مما يؤكد (السرعة) الفائقة التى انتهجها الهلال في تمريراته الرائعة.
• نتكلم بعد كدا شوية عن (الشكاوي).
• والله نحن فترنا من شغل (الكيزان) دا.
• لو في (غيمة) مرت على ملعب كوبر الذي حقق فيه الهلال الانتصار على الامل عطبرة (عصرا) بسبعة اهداف ، اكيد سوف يتقدم مجلس المريخ (فرع حديقة الموردة) بشكوى في الهلال ويقولوا لماذا لم تمر تلك (الغيمة) في مباريات المريخ التى تلعب عصرا؟
• علما انها (تمطر) عديل في المريخ.
• لعبوا عصرا (نقطت).
• لعبوا مساء (نقطت).
• بعد كدا يعملوا ليكم شنو؟
• نطلع فاصل للضحك ونرجع نواصل.
• الجاكومي طالب بـ 500 الف دولار من الهلال ..الزول دا عاوز يحول المريخ الى (بنكك).
• يا الجاكومي شغل (الجبهة الثورية) دا ما تعمله لينا في الهلال.
• شغل (الكيزان) دا انتهي زمان.
• المضحك ان نادي الامل عطبرة بعد (السبعة) اعلن عن شروعه في شكوى الهلال.
• نطلع فاصل طويل للضحك ونرجع نواصل.
• الكلام دا بعد (السبعة).
• شوف الناس الما بتخجل دي؟
• مضروبين (سبعة) وعاوزين نقاط المباراة.
• بعد (السبعة) النهارية ...ناس الامل لو اشتكوا للمحكمة الجنائية بسبب ما فعله فيهم الهلال ..نقبل منهم ذلك.
• لو اشتكوا بعد (السبعة) لمنظمات حقوق الانسان .. كان يمكن ان نجد ليهم العذر.
• السبعة كتيرة مع (السخانة) دي.
• لكن ان يشتكوا الهلال للاتحاد العام واللجنة المنظمة فهذا هو الامر الغريب.
• قلنا ليهم ح تشتكوا الهلال في شنو؟
• قالوا الهلال امام فريق الشرطة القضارف اشرك (4) محترفين اجانب.
• نطلع فاصل للضحك ونرجع نواصل.
• ناس الشرطة ما اشتكوا ...ناس الامل اشتكوا!!
• شفتوا السبعة عملت في الامل شنو؟
• اركزوا يا ناس الامل .. الجرسة ما خايلة معاكم.
• انتوا ناس الحديد والنار.
• اللائحة بتسمح بوجود (3) محترفين اجانب في ارضية الملعب ولا تمنع استبدال محترف اجنبي بمحترف اخر شريطة ان لا يزيد عدد المشاركين عن ثلاثة اجانب.
• اللائحة واضحة.
• اما عن وجود (4) اجانب في كشوفات الهلال فهذا امر اجازه الاتحاد العام عبر مجلسه وجمعيته العمومية التى قامت باستثناء القمة بسبب المشاركات الافريقية لتسجيل خمسة محترفين ولم يقم الاتحاد العام بإلغاء هذا الاستثناء.
• ناس الامل اذا كانت لجنة تطبيعهم بهذا (الفهم) فاني منذ الآن اتوقع هبوط الامل من الدوري الممتاز اذا كانت هذه هي العقلية التى تدير نادي الامل العريق.
• ح تلحقوا مريخ الفاشر ونيل شندي والنيل الحصاحيصا.
• معقولة الامور وصلت لهذا الحد في الامل عطبرة؟
• معقولة (السبعة) تعمل كدا؟
• هسع يا ناس الامل لو اللجنة منحتكم نقاط تلك المباراة هل سوف تكونوا راضيين على روحكم؟
• هل تقبلوا ان تسرقوا عرق اللاعبين وانتم الذين رفضتم ذلك عندما فعل المريخ معكم نفس الشيء وتضامن معكم الهلال وانسحب من الدوري رغم انه كان يتصدر الدوري بفارق 9 نقاط قبل ايام قليلة من نهاية الدوري.
• ...............
متاريس
• التمديد لروفا والغربال هو اجمل ما يمكن ان تقدمه لجنة تطبيع الهلال لجماهير الهلال في هذه الايام.
• افعلوا ذلك قبل مباريات المنتخب.
• برهان ومحسن سيد أي لاعب يتألق امام الهلال سوف يضموه للمنتخب.
• لماذا لم يتم ضم معتز هاشم التوزة للمنتخب الوطني بعد تألقه اللافت مع الخرطوم الوطني امام المريخ؟
• الغربال في الهدف الثاني للهلال مرر الكرة للشعلة بكعبه على الطريقة التى فعلها امام المريخ.
• الغربال ما بخلي حقو.
• وبطبق نفس النظرية.
• والهلال بقى شغال زي (الساعة).
• والحمدلله.
• .......
• ترس اخير : الناس دي مالها ما بترد؟
امسح للحصول على الرابط
بواسطة : محمد عبدالماجد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019