• ×
الجمعة 17 سبتمبر 2021 | 09-16-2021
محمد عثمان الجعلي

تعادلت قمة السودان ونامت العاصمة بأمان

محمد عثمان الجعلي

 20  0  3578
محمد عثمان الجعلي

كنا ليلة الجمعة بمنزل الأخ فيصل الأقرع بجدة لمشاهدة قمة السودان الأفريقية وهذه أول مرة نقابل فيها أستاذنا الظريف ود الأقرع وبحضور بعض هلالاب جدة منهم الأخ عبد العظيم ود البركة وراشد على كمبال والمريخابي الوحيد بيننا المعز محمد أما أبناء فيصل الأقرع ( إبراهيم والشيخ ) فهذان الشبلان من ذاك الأسد رغم أنهما يشجعان الأهلي جدة ومن مواليد البلد دي إلا أنهما تركا مباراة الأهلى والفيصلي في الدوري السعودي وحرصا على مباراة قمة السودان وكان إنفعال الشباب واضحاً ضد تيتيه وكاريكا وأطهر أما عندما أحرز الزول شيبولا الهدف الأول في شباك جمال سالم في الدقيقة 31 دوت الغرفة بالهتاف والتكبير ولزم معز الصمت وعندما أحرز السماني الصاوي هدف التعادل في الدقيقة 61 إحتفل معز وحده ، وحينها قلت في نفسي بالفعل هلال الملايين هو فريق الجماهير الأول في السودان ولو عملنا إستفاء من بيت فيصل الأقرع فقط تظهر لنا هذه الحقيقة ، طبعاً التعادل بهدف يعتبر خسارة لسيد البلد الذي كان جاهزاً أكثر من المريخ خاصة في الشوط الأول ، وفي الشوط الثاني حول غارزيتو بكري ومحمد عبد الرحمن للأطراف فقلت حركة بوي وأطهر وهذا شئ طبيعي لأن بكري قناص ومحمد عبد الرحمن ( عنده غبينة داير يفشها ) وسيطر المريخ على جزء كبير من الشوط الثاني وتأثر الهلال بخروج شيبولا المصاب ودخول شيبوب الذي لم يكن جيداً كما تأثر المريخ بخروج كونلي ودخول صلاح نمر وبذل نزاراً جهداً مقدراً ولكنه أهدره بالأنانية والعزف الإنفرادي ، أما تيتيه فقد واصل مسلسل الفشل المؤقت ولا يعني هذا دوام الفشل فلكل مباراة ظروفها وتيتيه يضيع الأهداف السهلة ويحرز الصعبة والكابتن كاريكا فقد جهود محمد أحمد بشة لأن بينهما ثنائية جميلة ، وأهم مافي المباراة بالنسبة للهلال عودة الثقة لخط الدفاع بوجود حسين الجريف والإيفواري واتارا والأخير هو قلب الدفاع الذي كانت تتمناه جماهير الأزرق أما قذيفة البلدوزر محمد موسى لو سكنت الشباك الحمراء ( أناطين المريخ كانوا يشربوا مايرووا ) وبالفعل محمد موسى وواتارا مكسب أما بعد عودة بشة والثعلب فالهلال سوف يكون عجوة معطونة في عسل ، عجبت لعجوز مصر( شيخ الغفر ) عاشور الأدهم الذي قال إن حكم أفريقيا الأول دانيال بينيت ظلمهم في ضربة جزاء ( يارااااااجل ) قول غير كدة ونحن لو متعودين علي الخرخرة كان نقول قون السماني الصاوي جاء بعد أن عبرت الكرة خط التماس !! أظرف حاجة الشيخ قال لي أبوه يا أبوي أكب ليك شاي لبن وكان فيصل الأقرع مشغول بالمباراة فقال له ... ياولد أنا ساعة الكورة تكون شغالة النفس دا كان في طريقة تحبسو كنت حبستو !! أما عبد العظيم ود البركة لما شاف مازدا في الأستديو التحليلي للجزيرة الرياضية قال ( الله يكفينا شر التلاتات ) وأهم مافي المباراة أنها كانت رائعة تشبه قمة الوطن الدولية ونامت العاصمة هادئة ، بالمناسبة الكاسب الوحيد من مباراة الأمس كراسى الجوهرة الزرقاء مرقت سلامة من عبث الصفوة !! لذا لزم التنويه .
*** المباريات القادمة مهمة بالنسبة للقمة
يلعب يوم غد الأحد في مجموعات أبطال الكونفدرالية هلال التبلدي مع ريكر تيفو في أنجولا ونسأل الله النصر الجميل لأخوان الغزال والشغيل ومباراة فرسان التبلدي الثانية مع زيسكو الزامبي بملعب شيكان بعروس الرمال والثالثة ضد سموحة المصري بالإسكندرية ، أما قمة السودان في الأبطال سوف يسافر هلال العشق الجميل يوم الأحد للعاصمة الموزمبيقية مابوتو لملاقاة فريق فيرو فيارو يوم الثلاثاء 23 مايو وموزمبيق تتحدث اللغة البرتغالية وتقع جنوب شرق أفريقيا وفريق فيرو فيارو يلبس أخضر مخطط بالأبيض ويجب على الهلال كسب نقاط موزمبيق حتى يضع رجل التأهل لدور الثمانية مبكراً ومباراة الهلال الثالثة مع النجم الساحلي في مدينة سوسة يوم الجمعة 2 يونيو وكما نعلم أن النجم فاز على فيرو فيارو بخماسية أحرزها البرازيلي أوكستا هدفين والغيني بنقورا هدف وعامر بوعزة هدف وحمزة الأحمر هدف ، ومباراة الرد الرابعة مع النجم بالجوهرة يوم 20 يونيو والمباراة الخامسة مع المريخ بأستاده مساء الجمعة 30 يونيو ومباراة الختام مع فيرو فيارو بالجوهرة مساء الجمعة 7 يوليو ، أما المريخ سوف يلعب مع النجم الساحلي بأم درمان يوم الثلاثاء 23 مايو وبعدها يسافر لي موزمبيق في رمضان 2 يونيو يوم الجمعة ثم مباراة الرد مع فيرو فيارو ومباراة المريخ الأخيرة مع النجم في عروس الساحل التونسي مدينة سوسة ، طبعاَ مدرب ليتوال هو الفرنسي هوبير فيلود ... يقدر يتونس مع غارزيتو بالفرنسي كويس ... الله يستر على ناس جعفر وصلاح نمر من رفاق الحارس أيمن المثلوثي وزهير الزوادي وعمار الجمل وغازي عبد الرزاق الطرف اليسار الخطير الذي غاب عن لقاء فيرو فيارو بسبب الإصابة وأيضاً غاب المدافع رامي البدوي بسبب الإنذار وديل كلهم في مباراة المريخ في البقعة بكونوا موجودين !! والمريخ بعد كدة غير نقاط فيرو في البقعة ماأظن يطلع ( قوزاً أخدر ) عشان مباراته القادمة مع النجم الساحلي والخامسة مع سيد البلد بعد عودة بشة وشفاء أبوستة والمباراة الأخيرة...نسأل الله السلامة ... في سوسة محل أخد الفيرو خمسة ( نعوذ بالله من سوء الخاتمة ) إنتوا ياود العقيدة مريخاب خيبر وعثمان جميل مريخاب الدوحة وعزالدين أبراهيم مريخاب الرياض في دنياكم عملتوا شنو !! كل ماترفعوا حجر تلقوا تحتو دقر ، يلا ياكوكي إنت تونسي شوف لينا شيل التمساح في الجيران ، عشان مباراتنا الثالثة مع النجم في تونس ومن فيرو فيارو مابنرضي بي نقطة بإذن الله تعالي لو كان مغلوب خماسية في تونس نحن ناس ظرفاء نديهم بس ثنائية .، وكما قال مامون ود العباس من هلالاب الرياض رغم التعادل أنا متفائل القادم أحلى بعون الله وقال أبوضحي هلالاب محايل الهلال لما يكون جاهز ويطبلوا ليه بيطلع متعادل بس .
*** أقلام حمراء وزرقاء قبل اللقاء
نكون صريحين ياجماعة فريق الجماهير الأول في البلد وكبيرها سوف يظل كبير على الدوام وعايز قراء الرحيق ( هلالاب ومريخاب ) يكونوا هم الحكم ، تعالوا نشوف أمثلة لبعض الأقلام الحمراء والزرقاء قبل اللقاء وسوف نحصر أنفسنا فقط في صحيفة كفر ووتر الغراء حيث كتب المريخابي الأستاذ موسي مصطفي قبل اللقاء في عموده المقروء ( صيحة ) وهو يحذر لعيبة المريخ من ثلاثي الهلال كاريكا وبشة ونزار وأنهم مفتاح اللعب في النادي الأزرق ، ونقول للأخ أبومروة كاريكا رغم أنه لعب تمريرة الهدف لشيبولا إلا أنه لم يكن في يومه و نزار أبدع وضاع بسبب عدم تعاونه مع زملائه أما بشة فقد غاب عن اللقاء ، ومن الأقلام الزرقاء نأخذ الثنائي أحمد الفكي صاحب ( الأوتاد ) ومحمد الفاتح ( كتاحة ) في همساته الدافئة قال ... لقاء القمة لقاء أشقاء في بلد واحد ويرفعون علماً واحداً في المحافل الدولية لذا يجب التحلي بالروح الرياضية والأخلاق السودانية ، أما صاحب الأوتاد فقال سيحظى لقاء السحاب الدولي بين هلال الملايين الموج الأزرق وشقيقه المريخ العظيم الأحمر الوهاج بمتابعة واسعة عالمياً وليت جمهور الفريقين يشكل شعار بالألوان الأربعة أزرق وأصفر وأبيض وأحمر ويكون مضمونه ( أقول للدنيا أنا سوداني ) ...الجماعة التلاتة ديل كلامهم جميل لكن تعالوا شوفوا ( عدّالة القصص أم تفّة عوجاء ) بابكر سلك ماذا كتب تحت عنوان إما نتشفتن أو نتبشتن حيث يقول بكوري ... الهلال عنده مواسير كتيرة ويطلب من جماهير المريخ ألا تنقاد لتفلتات الجهة الأخري بل تلجمهم بعبارات ... المطار وين !! المطار بي جاي ... الصفر بي وين !! الصفر بي هناك مع التأشير على جهة الصفر ( طيب ياسلكوني ) مش إحتمال جماهير الهلال ترد وتقول شهادة الجمهور المثالي بي وين !! بي جاي !! وناس الجلاكسي بي وين !! ناس الجلاكسي بي هناك !! الزول دا عليكم الله زول عاقل !! يحرض في جماهير أصلاً محرضهم الإعلام السالب ( دراويش لا قوا مداح ) بالمناسبة بابكر سلك سمعنا قالوا قارئ قانون ( والله زي ما أقولكم ) لكن إن شاء الله لا قرايتكم ولا تحوم عليكم .
*** همسة الوداع
حبايبنا الحلوين كانوا معتمدين يهاجموا حكام السودان المساكين ويسرقوا عرق الآخرين لكن أمبارح العجوز واوا عايز يعمل حركاته البايخة قام طوالي دانيال بينيت قطع فيه الكرت الأصفر ( ومعاه صرة وشي ) طوالي ناس بكري المدينة وأمير كمال بقوا أولاد ناس ، ياربي ( رواكيب الخريف ) دي كيف بتواجه هجوم الليتوال !! وبهذه المناسبة نهمس في أذن الإعلام الأحمر طيب لوعرفنا ليتوال بالفرنسي معناها النجم هل ممكن تسألوا لينا مدربكم أب قفة عن ( غمتة المزين !! ) بالفرنسي معناها شنوا !! عشان هو بعرف الحاجات كويس !! مجرد سؤال .
امسح للحصول على الرابط
بواسطة : محمد عثمان الجعلي
 20  0
التعليقات ( 20 )
الترتيب بـ
الأحدث
الأقدم
الملائم
  • #1
    محمد عثمان الجعلي 05-14-2017 11:0
    الأخ ميرغني العامري أول حاجة أشكرك على كلامك الجميل وأنا مامتعود أرد على الرحيق إلا نادراً لأني أعتبر مساحة الرد ملك للقراء وماعايز أكون أناني ولكن مادام سألتني بالله عن قون السماني بصراحة لما جاء قوون شيبولا أنا ماتحركت لما الهلالاب هاجوا وإنما دونت في الورقة صاحب الهدف والزمن وكذلك لما جاء قوون السماني برضو سجلت الإسم والزمن وأخوك كان جائي من مكة يعني جعلى وثبت قلبو بالصلاة في الحرم وأسأل فيصل الاقرع والشلة ، أرجو تسجيل جوالك للتواصل ياظريف ولك شكري
  • #2
    فيصل الاقرع 05-14-2017 10:0
    ود عقيده سلام عليك انت ما حلتكم دي مليانه قرع بنوروا الحله يوم الكهرباء تقعطع؟ اها امس بعد جبنا الهدف كان معانا ولدنا المعز المريخابس شفتو زعلان اهاقمت رخيت السبحه شويه علي شان تجيبوا هدفكم ان شاءالله من بعد خط التماس ما مشكله واتمني انك ت
    تحضر معانا مباراة الرد في
    بيتنا علي شان نوريك الشيطان بايل وين
  • #3
    ابوحسن 05-14-2017 10:0
    لك التحية استاذنا محمد عثمان واللي الحقيقة ابوالهل الدفاع متباعد وغير منسجم يعني فيه ثغرات وعدم تركيز في الهجوم والدليل
    علي ذلك اضاعة اكثر من ثلاثة فرصة وعدم حماس من اللاعبين في نوع من البرود او عدم الجدية مافي روح قتالية بعربي من الهلال في حاجه قلط عكس المريخ في روح ورهبا والله صح والدليل علي ذلك اي هجمة للمريخ كنا بنحبس انفاسنا معها بزات بعد الهدف من السماني رغم قلة هجمات الصفوة
  • #4
    ابو حازم الجعلي 05-14-2017 08:0
    سلام عليكم ورحمةالله
    لك التحية يا الجعلي وللاقرع ولكل هلالاب بلادي داخليا وخارجيا، وبداية جيدة للهلال والجيران الله مرقهم من الهزيمة كان بشتنتهم وفرتقتهم، لكن كويس انهم اتعادلو عشان يجو مباراتهم مع النجم وهم اقويا والنجم يقدر يلعب معهم كويس ما يستهتر بيهم، وبعدها يمكن لجمال سالم ان لا يخرج سالما من ناس التوال.
    مشكلة الهلال لعبو بطيء يا الجعلي ناس ابوعاقلة لما يلعبو الباص بحسسوك ان هناك لاعب ساقط على الارض وعايزين يطلعو الكرة لعلاجه، هذا اقرب مثال وتوضويح لبطء الكرة عندهم، ومشكلتهم ما برتفعو مع ايقاع المباراة، يعني مثلا اخر 5 دقائق لو شدو حيلهم بس كان سجلو هدفين على الاقل.
    لكن هذ مشكلتنا العويصة مع هؤلاء
    ولك التحية مرة اخرى
  • #5
    مجاهد عبدالله الجعلي 05-14-2017 02:0
    يا خوي انتو فاكنها في روحكم ساي ..لو عملتو استفتا ح تطلع انتا ويعقوب والشوربجي وبتاعين جده مواليد هنا ديل وناس سوق العيش ومنكم شابههم..المريخابب كتاااار يملو العين وصفوه كمان...يكفي انهم الاصل..سؤال بس ما في زول مختلف انو المريخ تأسس قبل الهلال..طيب ليه ما سميت اي شي بدل الهلال..سوق العيش مثلا
  • #6
    عماد سعيد 05-14-2017 01:0
    بالله سلك خريج قاااانون ؟؟؟؟!!!! والله قايلو من سوق العناقريب لا اسلوب ولاخلقه ولا اااالو حاجه والله لهسي مستغرب كيف دخل السلطه الاربعه ولكن طالما ناس مزمل فيها فلا غرابه الرقي في الصحافه مسؤليه واجبه تجاه الجميع ولكن من يؤجج للتشرذم والعنف هو قطع شك رباطي ساااااكت وكلهم علي تلك الشاكله مزمل وسلك يااخوانا مافي مريخي زي احمد محمد الحسن الراقي وين تلاميذه ؟؟؟
  • #7
    فيصل الاقرع 05-14-2017 12:0
    حباب جعلينا اقد تشرفنا وسررنا بتلك الزياره وكان اول تعليق علي من اخونا معز بعد ان قرأ رحيق اليوم قال لي الجعلي لما كان شكله صفوه وهادي الكلام دا جابو من وين
    وانا شخصيا رايي من رأيك عكس ما قال الكثيرون انها كانت قمه جيده واجمل ما فيها انه شفنا الجوهره وبان جمالها علي بين اسبورت وكانت الرياضيه مضيعه جمال الجوهره ولك بان جمالها علي بين اسبورت
    اما حبايبك الحامضين فمحتفلين بالتعادل واخر بهجه وبرضو تقول لي نديه؟ نحن والله حاسين كانه هزيمه وحلوه غمتة المزين دي ويا ابوناصر غمتة المزين دي زمان الحلاقه ما عندها سعر محدد بس من يدك ليد الحلاق ياجعلي ومشكور علي تبصيرنا بمباريات سيد البلد القادمه وبالله ما عيب عليك تقارن الاساتذه احمدالفكي ومحمد الفاتح بالجماعه فالتين ديل
    وانا كما قلت لك بعد المباراه انني متفائل بان الهلال سيمضي الي مانريد بإذن الله
  • #8
    Abojeddo 05-13-2017 10:0
    عمودك هرج شديد ومافيه إنصاف،، كفر ووتر كل الصحفيين هلالاب وانت عارف كدة كويس عدا إثنين فقط،، وما جبت لينا حاج آدم يعقوب وشوربة كاتبين شنو؟. وللا عشان ديل بفضحوك يا جعلي،، بعدين مجرد سؤال : سيما كيف؟؟؟؟ والبلنتي الغير محسوب كيف؟؟ دي حاجات ما بتجيب سيرتها،، وبعدين زنقة الشوط التاني دي كيف؟؟ شوف عيني معانا هلالاب الشوط التاني عملوها في روحهم والله زي ما بقول ليك،، اتخيل معاي شوربجي جامعي
  • #9
    طائر الهوى 05-13-2017 09:0
    خلينا من مقال أحمد الفكي ومحمد الفاتح.. جيب لينا مقال زولنا حق الفلافل ههههه
  • #10
    ودعقيده خلف 05-13-2017 07:0
    استاذ الجعلي كل اوقاتك تشاهد مباراه هليلك التعبان من دخل بيت العزابه وكمان النصر بكون حليف لكم خاصه لما تكون المباراه في استادتكم ووسط كسكتكم وجوهوركم بس اليوم الوداك تمشي بيت اخوانا فيصل الاقرع شنو انت ما عارف البيت داء كج( ابليس بايل فيهو ) عشان كدي السماني الصافي عملها شينه عديل كدي
  • #11
    ودعقيده خلف 05-13-2017 07:0
    استاذ الجعلي عليه الطلاق فقدته المنطق وطاقت انزرقت والدخلت فيك ما مرقت الله يستر عليكم من الفريق الموزمبيقي لانه زعلان من خماسيه التوانسه الله يستر ما يفشي الغبينه فيكم اما بالنسبه لعنوان الرحيق المفروض يكون مريخ السودان ونقطه الامان ) استاذ الجعلي عندما احرز السماني الصافي هدف الامان رحل الخيال مباشره الي العرضه جنوب وغني الفنان حمد الريح كلمات الاستاذ محجوب الحاج /نجمه العز ياسماحه طوفي بالنصر في كل ساحه
  • #12
    ودعقيده خلف 05-13-2017 07:0
    استاذ الجعلي عليه الطلاق فقدته المنطق وطاقت انزرقت والدخلت فيك ما مرقت الله يستر عليكم من الفريق الموزمبيقي لانه زعلان من خماسيه التوانسه الله يستر ما يفشي الغبينه فيكم اما بالنسبه لعنوان الرحيق المفروض يكون مريخ السودان ونقطه الامان ) استاذ الجعلي عندما احرز السماني الصافي هدف الامان رحل الخيال مباشره الي العرضه جنوب وغني الفنان حمد الريح كلمات الاستاذ محجوب الحاج /نجمه العز ياسماحه طوفي بالنصر في كل ساحه
  • #13
    الامين عبدالقادر 05-13-2017 06:0
    التحية والسلام اخوى الجعلى وهاردلكم بالتعادل فى الجوهرة والهلال مابسر ابدا والنجم الساحلى بطل هذه المجموعة بلاشك ونحن نحتاج لمهاجم يعرف طريق الشباك بدلا عن تيتية التائية ودفاع المريخ اعطوه هدايا ولكن الواضح كان اكعب منهم وقلبى الدفاع كانوا الافضل فى الهلال حسين واوتارا ولم يرتقى الوسط حتى نعود بنقاط المباراة كاملة وسوف تكون المهمة شاقة جدا
    لقد كانت هنالك لافتات من الفريقين تسىء لنا وللسودان ولابد من بتر ومعاقبة حامليها ولماذا الشرطة سمحت بذلك واللجنة ايضا شريك فى ذلك واذا لم يعاقب جمهورى الفريقين سوف تكون مباراة الرد كارثة فى المريخ --
    لابد من وجود الثعلب فى بقية المباريات واخذ جرعة كبيرة فى الفيحاء تعرض لظلم من المدرب الاول وهو موهبة كالصاوى واكثر منه
    ودمتم للوطن والهلال فى حفظ الرحمن ورعايته
  • #14
    النوبى 05-13-2017 06:0
    لعلمك يا الجعلى الما فاضى من النضمى الكتير نحنا كنا 14شخص فى بيت صديقنا 12 مريخابى و2 هلالابى واحد من الشخصين يقول انا كنت بشجع الهلال زمان اما الان فاز ما فاز ما فارقة معاي لانو الاسمو الكاردينال زى السرطان دخل لينا فى نادى الهلال وما تنسى يا ظريف قبل شهر مباراة المريخ الافريقية عدد الجمهور كانوا 66 الف ودخل المباراة كانت 2مليار و600 مليون وهذا كان حديث وكالات الانباء لو عايز تتاكد افتح اليوتيوب او اسال الفاتح النقر الهلالابى الذى خدم الهلال المستوى بين الزعيم فريقك نحنا الصفوة راضين عن فريقنا ربنا يطول لينا عمر الكاردينال فى الهلال ابو كلام قال كاس الاميرة 2017 نجيبوا يا سلام صاحب هذا الحلم الجميل ربنا يديمه مع الهلال حتى يتمطى الصفر الدولى مين يقنع ناس الجعلى وعمه المدعو حاط ادم يعقوب والعاطل شوربة اليطالع مقالاتكم قبل المباراة يقول الناس ديل يشجعوا ريال مدريد والله عندك الحق يا ياسر القحطانى صحى لسانك فى تصريحاتك المتزن وربنا يوالى ناس الجعلى بالصحة والعافية مخدرين نفسهم والجمهور الغلبان وربنا يطول فى عمر الصفر ورييسه الجميل. اجمل
  • #15
    ابن الوهاج 05-13-2017 05:0
    سلام جعلي الهنا ..اولا" تهنئة خاصة لكم بخروجكم باقل الخسائر التعادل في مقبرتكم سابقا" و جوهرتكم الحالبة ..انتصر الأحمر الوهاج عليكم في عقر داركم بالأمس و كان يمكن ان يرجع بجميع النقاط لولا تصرفات ذلك الحكم الذي يبدو انه خايف من مصير زميله الحيمودي الذي طرح ارضا" بالضربة القاضية في المقبرة و هذا الحكم عارف انه اذا عدل بين الشوطين ربما اخذ علقة ساخنة و سقط مغشيا" عليه و هذه المرة لا يوجد تراب عندكم لأن الجوهرة قزاز في قزاز...على كل ايها الصحفي المخضرم نشكر لك اعترافك بتفوق سيد البلد الحقيقي و زعبم الكرة السودانبة عليكم للمرة الثانية على التوالي ..ختاما" اقترح عليكم تغيير اسماء لعيبتكم الجداد لأسماء سودانية طالما انهم تسودنوا.. يعني مافي داعي لي شيبون و شيبولا و ووكرا اسماء ما انزل الله بها من سلطان..
  • #16
    عزالدين ابراهيم عبدالرحمن 05-13-2017 05:0
    بالله عليك ما حرام عليك والله المفروض الشوط الثاني تطلع مهزوم وهدفك ارجع ليه اوف صايد واضح ولا في حد احتج عليه وشوف هدف الصاوي عابر للقارات هدف عالمي مافيه ولا شخشخه ونحن ناس النجم ديل ما بخوفونا بيهم يخافو منهم الناس الضايقين قرضتهم ونحن اصلا متعودين نجيب ليكم تاركم وبازن الله النجم تشوفو بخمستو دي شوفو في القلعه الحمراء وانتو بس لما تلعبو معاهو هنا والله في تونس اوعو ترباس يمشي معاكم وفي الخرطوم ماتخلوووه يحضر الكوره لانو لو مشي شرب مويه يجي يلقي الهلال مغلوب سته يس اعملو حسابكم انتو
    مسعولين من الخير وين صاحبي ابو ناصر مابان ليه خبر قول ليه لقيت ليك التلفون الكنت عاوزو جري حا يتصل علي ومابرد عليه اي تلفون من الشرقيه
    قول ليه ....... يسلمو عليك ؟؟؟؟؟؟؟؟؟؟؟ هو عارف وانا عارف اقصد منو
  • #17
    عزالدين ابراهيم عبدالرحمن 05-13-2017 05:0
    بالله عليك ما حرام عليك والله المفروض الشوط الثاني تطلع مهزوم وهدفك ارجع ليه اوف صايد واضح ولا في حد احتج عليه وشوف هدف الصاوي عابر للقارات هدف عالمي مافيه ولا شخشخه ونحن ناس النجم ديل ما بخوفونا بيهم يخافو منهم الناس الضايقين قرضتهم ونحن اصلا متعودين نجيب ليكم تاركم وبازن الله النجم تشوفو بخمستو دي شوفو في القلعه الحمراء وانتو بس لما تلعبو معاهو هنا والله في تونس اوعو ترباس يمشي معاكم وفي الخرطوم ماتخلوووه يحضر الكوره لانو لو مشي شرب مويه يجي يلقي الهلال مغلوب سته يس اعملو حسابكم انتو
    مسعولين من الخير وين صاحبي ابو ناصر مابان ليه خبر قول ليه لقيت ليك التلفون الكنت عاوزو جري حا يتصل علي ومابرد عليه اي تلفون من الشرقيه
    قول ليه ....... يسلمو عليك ؟؟؟؟؟؟؟؟؟؟؟
  • #18
    انور التاج - ودسليم 05-13-2017 05:0
    لا تنهى عن خلق وتاتى بمثله حركات بايخة وصرة وشى ورواكيب الخريف مدربكم اب قفة هل هذا اسلوب صحفى رياضى والرياضة سفارة واخلاق كلكم فى الهواء سواء ليس بصحفين بل مشجعين متعصبين لماذا لم تتحدث بامانة عن السمانى الصاوى وهدفه الرائع اهداف ميسى ونجم المباراة اكتبو وحللوا بعدالة حتى نحتركم بالنقد البناء والهادف مش اسلوب ال......... يا حليلك استازنا المرحوم عبد المجيد عبد الرازق اللهم ارحمه واغفر له
  • #20
    ميرغني العامري 05-13-2017 05:0
    يا. ود الجعلي. يا. ظريف. وابو دم. خفيف. اسالك. بالله. امس. لم. السماني. جمع خمسه. من. دفاعكم. ورسم. لوحة. الهدف. كيف.كان حالك ما. جاءك. وجع مصران. الله يخليك. انصح. فريقك. وشوف حال. الدفاع. كيف. بتلعب. مع. النجم. اخاف. عليكم. من. فضيحة.وخماسية
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019