أغنية الحقيبة الشهيرة ( أنة المجروح ) للشاعر سيد عبدالعزيز والتى تقول بعض مقاطعها *** الحب فيك ياجميل معنى الجمال مشروح *** الحب لهيب فى الجوف زى الزناد مقدوح *** منو الحبابرة تلين لى صوت بلابل الدوح *** وأرى الهلال فى ظلال تلك الخميلة يلوح *** سحر العيون بجمال لى سواه ماممنوح *** حورية فى السودان بى حبى ليك أبوح *** ياعنب جناين النيل أتمنى منو صبوح *** أنا بهدى ليك الحب من فؤاد مجروح *** حب الشحيح للمال حب الجبان للروح *** منو الغزال تقف موقف المفضوح *** أنا لو ضمنت رضاك أكون سعيد ممنوح *** ياملفت الأنظار يابسمة المفروح .... معليش ياشباب سرحنا مع الحقيبة لأن هذه الأغنية كأنها نظمت لهلال العشق الجميل ممثل الوطن الوحيد فى بطولة كبار أفريقيا الذى ينازل فريق ليوبارد الكنغو ( برازفيل ) بطل الكونفدرالية عام 2012 ... والمباراة الأولى فى الكنغو يوم الأحد 22 مارس ومباراة الحسم بالخرطوم بعد إسبوع وبإذن الله لو إحترمنا الخصم سوف نتأهل لدور المجموعات خاصة وأن الفريق كما قال مدربه السابق نصر الدين النابى قام بتغيير جلده وزى الفريق هو الأبيض مخطط بالأخضر ويمتاز بخط دفاع جيد ... وكما قال النابى يجب السفر للكنغو مبكراً وتوقع النابى معاملة سبئة وهذا طبع الافارقة وسوف نرد لهم الصاع صاعين بالخرطوم ، و يخوض سيد البلد مباراة مساء الخميس 19 مارس ضد الرابطة كوستى فى الدورى الممتاز وهى خير إعداد للهلال ... ونتمنى من الإتحاد العام أن تكون المباراة بالخرطوم حتى يستعد الهلال للسفر الأفريقى ، وكما نعلم أن ليوبارد فى أكتوبر 2012 هزم المريخ 2/1 بالكنغو وتعادل بدون أهداف بالخرطوم !! بالمناسبة شيل التار الكتير ده عمل لنا فلايت !! لذا لزم التنويه .
*** وتحركت شعراء البادية بالمسادير
الشاعر عثمان حوبة القرياتى تحرك سلطان شعره بالمسادير الجميلة بعد أن تأهل هلال السودان على حساب الملعب المالى العنيد بثنائية بشة وكاريكا فنظّم المسادير التالية وتحدث عن بنى جلدتنا الذى صوروا الهلال بأنه فريق ضعيف !! فقال ***هلال الساجدين الصوروك حمام *** ديل صم بكم مابعرفوا أى كلام *** جابوا العالمى ونشروه فى الإعلام *** مات فى مهدو مامشى خطوة لى قدام ....لكن إنت ياحلم الرجال الصالحة *** نزالك للخصم قاسى وضربتك جارحة *** السويتها فى ناس مالى ليلة البارحة *** خلت أعداك من الخوف عقولهم سارحة .... ولقد جادت القريحة بالمسادير الآتية *** هلال الصالحين بصراحة إنت خطير *** بقيادة المعلم وفى دفاعو أتير *** بكرى وبشة وكاريكا فى التحضير *** سيبك من إشاعات العجوز شوبير .... حسمنا المالى وتيم الصفوة كيف أخبارو *** ناس الشماتة بعد المغيب إتضارو *** هلال الساجدين شايف مولعة نارو *** دفاعو حديد وحارس شباكو حينارو ...يلا ياالأمين جيفارا أخد ليك عرضة مع صديق بحر العلوم .
*** رسالة ظريفة من هلالابى بالطائف
محمد عبدالمجيد المحسى الشهير بمحمد جبرة يعمل بمطعم النيلين فى الشرفية بالطائف هلالابى ظريف فيه لطافة أهلنا المحس وخفة دمهم أرسل لى رسالة عفوية وطلب منى نشرها بحذافيرها ...حيث قال ....نصيحة لى ناس المريخ كبر النفس لايقدم الواحد ...والكبير كبير أتعلموا من سيد البلد لو عايزين السنة الجاية تلعبوا فى دورى الكبار ...أسمع ياجعلى إنت أوتوفيستر عندو مرافق عشان يجيبوا الميدان !! ولاّ بجى براهو !! وعندما سألته عن السبب قال ...عجوز ومابشوف وتعبان !! وأضاف... أتوفيستر من مرحلة الشيخوخة باقى ليه 3 شهور ، وتحياتى للمريخابى محمد عباس بشارع عكاظ بالطائف ...وختم محمد جبرة رسالته بالرطانة وقال ( خيرقو وو ماسورنجى ) ومعناها ...مع السلامة يامواسير ، أها يامحسى نشرنا رسالتك وشيل شيلتك مع الصفوة والعفش داخل البص على مسؤولية صاحبه .
*** همسة الوداع
أكان قلت ليكم حاجة مابتصدقونى !! تخيلوا أوتوفيستر من مواليد مدينة كولن فى ألمانيا يوم 24 نوفمبر 1937 يعنى بعد 8 شهور يقفل 77 سنة ( عمر الجدود عمر الهناء ) والحنين البى ماقدروا ... والعمر من وين يشتروا !! وبدأ التدريب عام 1972 مع منتخب رواندا ( جمال الوالى كان الزمن داك فى التمهيدى !! أقصد الروضة ) وفى الفترة من 1995 حتى 1997 قام بتدريب منتخب بنغلاديش !! وبدأ تدريب المريخ عام 2007 ... وبهذه المناسبة نهمس فى أذن صاحب القلم الأحمر هسه الخواجة ده لما يحتفل بعيد ميلاده عايز ليه كم كرتونة شمع ؟ مجرد سؤال .
