• ×
السبت 12 يونيو 2021 | 06-11-2021
محمد عثمان الجعلي

مباراة ودية بنكهة الندية

محمد عثمان الجعلي

 22  0  3011
محمد عثمان الجعلي

عندما يصدح الفنان إبراهيم خوجلي بأغنية ( كم نظرنا هلال ) كلمات الشاعر صالح عبد السيد ( أبوصلاح ) والتي تقول بعض كلماتها *** كم نظرنا هلال ماشاقنا غير هلالو ...ما أظنو زلال يروينا غير زلالو ...أرى الهلال ينقص وأرى محيو يتجلالو ... كل يوم يزداد في جبينو نور يحلالو ... تتقاصر الأبصار عن حسنو من إجلالو ... ينتبه... يصد... باسم آآآآه ما ألذ دلالو ، عندما نسمع هذه الكلمات الجميلة يذهب الخيال مباشرة لهلال العشق الجميل الذي خسر من نده التقليدي المريخ في قمة صندوق دعم الطلاب بهدفي بكري وعاشور ، تأملوا كلمات أري الهلال ينقص وبالفعل الهلال كان ناقص نجوم مؤثرة في مباراة القمة ولكن الكبير عودنا بالظهور المشرف في المواعيد الكبيرة ، رغم غياب ونزار الهلال كان مولع نار والمجنونة قالت لا ويكفي أن أكثر من كرة صدتها العارضة الحمراء كانت كفيلة بحسم اللقاء منذ الشوط الأول ، لن نهاجم حكمنا القومي الأمين الهادي كما يفعل الجيران ويظل الهلال مثل عود الصندل يعطر فأس قاطعيه ، ويكفي أن المناسبة هي دعم طلاب السودان ولا يمكن لهلال الخريجين أن يتأخر عن هذه السانحة وإن كانت صفوفه تفقد بشة والصاعقة ، وأجمل شئ أننا شاهدنا مباراة قمة جميلة ولو المريخ هو الخاسر لتحول مسار المباراة وأصبحت أم المعارك ولكن نحمد الله أنها وقعت في الناس البحملوها والهلالاب هم أهل الإبداع على الدوام ويظل حب الهلال بين الحنايا والضاوع وكما قال فيصل الأقرع من هلالاب جدة ( عمره المريخ ماغلب الهلال مرتين ) وأرجونا في الدوري الممتاز وخلوا روحكم رياضية وأقل حاجة تعلموا من الأقمار رحابة الصدر عند الخسارة الودية ومعروف البحر بشيل عوامو كما يقول مثلنا السوداني وأعجبني من الهلال شيبوب ورمضان كابو وأبوعاقلة ومن المريخ السماني الصاوي والتاج إبراهيم وأمير كمال ، والحمد لله أبوستة عاد والعود أحمد ونقول مبروك للمريخ نتيجة المباراة الودية التي لا خاسر فيها ونتمنى مثل هذه المباريات الودية حتى نكسر حدة التعصب ، وكما قال شاعر بادية المتمة عثمان حوبة *** معروف الهلال ضمن الكبار ترتيبو ... وليلة البارح الفوز ما إنكتب في نصيبو ... تكسب ولاّ تخسر حبك نحن مابنسيبو ... معروف كل فارس ليه سهماً يصيبو .
*** المريخ من جوة يغلي والكوكي أصبح جعلى
تعودنا في وطن العزة والشموخ أن نصف كل من يتحمس زيادة لدرجة الحماقة بأنه جعلي ، ومدرب الهلال نبيل الكوكي يستحق أن نمنحه الجنسية السودانية بدل باسكال واوا ويمكن أن ننسبه للجعليين التوانسة بعد تصرفه وإنفعاله ضد ظلم التحكيم في مباراة الهلال والأمل الأخيرة بالجوهرة والتي كسبها سيد البلد بثلاثية مقابل هدف وقام الحكم بطرده على هذه الإحتجاج المبرر والإنفعالية الحميدة ، وكان رغم ذلك يوجه حمد كمال ويصيح في اللاعبين بضرورة الحذر وعدم التساهل ، وكما نعلم أن الكوكي مدرب غير سوداني وأن التوانسة لديهم برود أعصاب وخبث كروي ولكن الكوكي كان عفوي ولذلك دخل قلوب الأقمار بلا إستئذان ، ويبدو أن بيئة الهلال تساعد على الإبداع وحب الهلال هبة من ربنا ، بالله مدرب يكون في صفوف فريقه بشة وكاريكا ونزار مش ليه حق يفتخر !! وينفعل كمان ، والكوكي كان إنفعل ( فوق عديلو ) لأن أولاده طبقوا الخطة في الأستاد ولكن الحكم كان لهم بالمرصاد !! ورغم الظلم الذي يحدث لنا إلا أننا نحسن الظن بحكام الوطن ، وأهم حاجة أن ظلم التحكيم أخرج لنا أطنان المحبة التي كان يختزنها الكوكي في صدره للهلال والعكس تماماً يحدث عند الجيران وغارزيتو ينحاز لصف إبنه ضد المدرب الوطني فاروق جبرة وقطار الوالي مازال متعطل في السكة ، لا يهش ولا ينش !! ولانملك إلا أن نقول للكوكي غضبك جميل زي بسمتك .
*** زاوية الحكامات والتلاتة نيسانات
يا أخي الهلالاب ديل عندهم رزانة ماعادية !! في إدارتهم ولعيبتهم وجمهورهم وإعلامهم ، والأخير هو بيت القصيد مقارنة بالصحافة الصفراء وكورال الإعلام السالب صحيفة الخاوية التي أصبحت زاوية للحكامات والفجور في الخصومة وعنوان لعدم الإحترافية الرياضية ، فإن كانت الصحافة الراشدة هي حيادية في الخبر وإنحياز في الرأي ، فتعالوا لعناوين صحيفة الخاوية ( الهبيلة ) وهي تتحدث عن مباراة قمة دعم الطلاب وكتبت الآتي ... حذار من سياسة حكم أب شنب ولعب أب ضنب !! ثم قالت في عنوان آخر ... الكوكي مضطرب وغارزيتو منطرب ويرقص على أنغام التلاتة نيسانات ، ربما تقصد الخاوية بكلمة منطرب أي طربان ( عربي جوبا !! ) أما أغنية التلاتة نيسانات سألت عنها عمنا الحاج قوقل فوجدت كلماتها صغيرة المبنى فقيرة المعني وهي من أغاني الفنان الشاب حسين الصادق وتقول *** تلاتة نيسانات شايلات خدار مارات ... أنا من البلوم ، ثم تتحول هذه النيسانات التلاتة بقدرة قادر فتصبح نيسان واحد ويقول حسين الصادق *** سواقو قام بالليل ... ماسك مجاري السيل ... شايل عجوة القنديل ... المحروسة من الطير ... أنا من البلوم !! فقلت في نفسي رحم الله الفن السوداني ورحم الله الصحافة الرياضية التي تنتمي لها صحيفة الخاوية وغارزيتو ليه حق يرقص !! ياهو فن التمهيداب وذوق وصايفة الوصيف ونحمد الله إننا هلالاب ... لكن لو أنا كنت مكان حسين الصادق كنت أضفت للتلاتة نيسانات ... عبارة وساحب جنسية الواوات ، بالمناسبة عندما كان الإعلام السالب يهضرب بالفوز على الهلال كان إعلام الهلال يرفع يافطة صغيرة مكتوب عليها ... العارف عزو مستريح !! لذا لزم التنويه .
*** همسة الوداع
حبايبنا الحلوين ممكن يعملوا عيد ميلاد عشان نتيجة مباراة هلال مريخ الودية وعظيم أنت ياهلال ، والخاسر الوحيد في هذه المباراة هو فاروق جبرة عشان غارزيتو سوف يطلع في الكفر !! مباراة زي دي تستاهل ناس المريخ يعملوا ليها حفلة بإنصاف مدني ، ربنا يجعل البركة في الهلال الذي أدخل السرور في قلوب الجيران ، ناس المريخ فرحانين تقول جابوا كأس القارات مش مباراة ودية والتغيير فيها مفتوح !! ونهمس في أذن الإعلام الأحمر بالله خريج الروضة بعملوا إحتفال زي خريج الجامعة !! ولا التمهيدي بكون زي المعفي من الأبطال ؟ مجرد سؤال .
امسح للحصول على الرابط
بواسطة : محمد عثمان الجعلي
 22  0
التعليقات ( 22 )
الترتيب بـ
الأحدث
الأقدم
الملائم
  • #2
    ابن الوهاج 04-10-2017 12:0
    انت يا مريخ .. انت سيف بتار .. بتار .. انت ليه في سرور في سرور و ناس الجعلي ليه في النار النار.....انت بسام بسمتك الهام انت ليه في سرور في سرور و ديك ليه في النار النار...
  • #3
    idris 04-10-2017 01:0
    علي بي الطلاق وانا بقرأ في عمودك جاتني دممعه من وين ما عارف هههههههههههههههههههههههههههه
  • #4
    ابوعلي 04-09-2017 06:0
    الجعلي شوف ملاح النعيمية البتعملو كل جمعة ماعندك أي علاقة مع كرة القدم
  • #5
    bagadi 04-09-2017 05:0
    افرحوا ساي و الايام بيننا يا دلاقين
    ولا نسيتوا

    يا دلاقيييين
  • #6
    منعم ابوناصر 04-09-2017 05:0
    قالو ياالجعلى ان عنتر قتله اعمى خلى الوصيفى يفرح ونحن مبسوطين من مستوى سيدالبلد والحمدلله كانت التيجه لصالح الوصيف الدائم لو كان غير كده كان حصلت كارثه ومع كده رجمو رجل الرايه ورجمو الجمهور الراقى جمهور سيدالبلد دا والوصيف فائز مابالك لوحصل العكس
  • #7
    اشرف محمد حسين 04-09-2017 04:0
    احلف قول والله عمرو المريخ ماغلب الهلال مرتين وراء بعض....لوالهلال بتكلم كان اتكلم وقال انو المريخ غلبوا 8مرات وراء بعض...اها اقول ليك كلام احسب قول ده الغلب الااول ...وامسك العدد سمح
  • #8
    ابن الوهاج 04-09-2017 03:0
    انت يا مريخ زينة فوق زينة .. نحن نفرح بيك و انت نادينا .. لا أسد بنفع و الا كوكينا ...الغلب بي 2 روعة جعلينا..
  • #9
    بابكر عوض الشيخ 04-09-2017 02:0
    التحية لبكري المدينة الذي لم يحتفل بالهدف وطبعا دي تربية وأخلاق الهلال (مش كده يامهند الطاهر) عموما مبروك عليكم كأس أطفال الروضة والهلال لا يبحث إلا عن الكؤؤوس المعروفة
  • #10
    بابكر عوض الشيخ 04-09-2017 02:0
    التحية لبكري المدينة الذي لم يحتفل بالهدف وطبعا دي تربية وأخلاق الهلال (مش كده يامهند الطاهر) عموما مبروك عليكم كأس أطفال الروضة والهلال لا يبحث إلا عن الكؤؤوس المعروفة
  • #11
    ابو احمد 04-09-2017 02:0
    واحد من اكبر المطبلين والنفاخين والمضللين...ناس الهلال لو بصدقوا ما تكتب واطاطهم صبحت..الليلة جيت تقلل من المباراة ..وودية ..؟دي فيها كاس لو شلته كانت هريتنا لكن وين هيهات ..انت ما بتشيل الا كاسات دوري حكام صلاح ، اما البينا وبينكم راس حقتنا والكل يعلم ذلك..هاك جوبا ومروي والدمازين ودنقلا وابها ،شي خسارة في الميدان وشي هروب من الميدان..
    الهلال قوي وحيجيب الابطال وخليك علي كدة وطمن لي كردنة اصلو ما ناقش حاجة.
  • #12
    سعد محمد عبد السلام 04-09-2017 01:0
    يالجعلى اذا كان الهلال غالب ياتري هل سوف يكون هذا رايك؟؟؟؟؟؟؟؟
    طبعا اكيد كنت بتخطط لكتابه عمود ما فى حالة فوز الهلال اتمنى ان تطلعنا على بعض القصاصات التى دونتها وانك كنت سوف تكتبها لو الهلال غلب
    الحمد لله الذي جعل النيسانات اتنين بس واحد نيسان (Made in sudan)والتاني (made in egypt( ولك التحيه

    سعد محمد عبد السلام
    جعلى أصلي من المحميه
  • #13
    ودعقيده خلف 04-09-2017 12:0
    والله ضحكت كثير سبعه لعيبه من الهلال اما ثلاثه مهاجمين من الاحمر الوهاج والعقرب تلدغ دي فضيحه تاريخيه
  • #14
    ودعقيده خلف 04-09-2017 12:0
    المسدار هديه للجعلي وكتاحه نائبه والحيران الاقراع والامين جفار واحمد الفكي وادروب وهللاب المدينه قون بكري الجميل الجابو بي باصاتووو خلي الناس تجدع والزناطير فاتووو الليله الهلال اعلنا تحت مماتووو وقون عاشور شرط شرط دفاعكم وصاتووووووو
  • #15
    ودعقيده خلف 04-09-2017 11:0
    طبعن يا اخوانا الاعتراف بالذنب فضيله اخوكم كتاحه اعترف للجعلي بالحاصل عن الهليل ولكن استاذ الجعلي راسوو قوي كماقال الاستاذ محمد الفاتح كتاحه لكن المثل بقول كلم السمع وكمان الجعلي عندو نفس يكتب ويقراء بعض الصحف الحمراء ويسخر منها استحي علي نفسك واخجل
  • #16
    ودعقيده خلف 04-09-2017 11:0
    استاذ الجعلي اليك الهديه دي احمر نار زعيم الشعب كلو جسار خابر للدروب القمه عارف اوكار يالخايف النجوم تحرق حشاك نار
  • #17
    ودعقيده خلف 04-09-2017 11:0
    استاذ الجعلي لك التحيه دوما ومبرووكه عليك الثانيه لكن ما تبقي بخيل اقسمه معاك لي صاحبك كتاحه لان الفقره اتقسمو النبقه يا صفراب
  • #18
    الكتاااااحة والتفاااااحة 04-09-2017 11:0
    هووووى يالجعلي ......
    اعمل حسابك وماتخلى راسك قوى
    كم مره نصحتك وقلت ليك الناس ديل كعبين
    مابتسمع الكلام
    اها شيل شيلتك الليلة
  • #19
    انور محمد سيد 04-09-2017 10:0
    كلامك دة كلو حلوو ززز بس بيت البكاء بوين عشان نجي نعزي
  • #20
    جلابي الدوحه قطر 04-09-2017 09:0
    جاي من وين يا معلم بتتكلم عن مباراة الامس ولا مباراة تانيه
    قال مولع نار
    ههههههههههههههههههههههههههههههههههههههههههههههههههههههههه
  • #21
    اشرف محمد حسين 04-09-2017 09:0
    اها الحكم عمل شنو..المباراة ده حضرتها انت براك والاشنو..!!!وماصاح الكوكى متطرب وغارزيتو متطرب.. انت البارح ماشفتوا كيف واقف فى الخط..!!..روح اللعب بعيد ياولى..مع وغارزيتو مش حاتقدر تغمض اضنيك.م
  • #22
    ابو صديق 04-09-2017 09:0
    والله كذااااااااااااااااااب يالجعلي الفريق دا لو فاز بالدوري تكون معجزة بي ناس الريده وشيبوب ديل الله لا تكسبك يا كاردينال - خليك جعلي صاااااح وبطل طبطبه دا فريق شنو دا
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019