• ×
الأربعاء 29 سبتمبر 2021 | 09-28-2021
محمد عثمان الجعلي

الهلال يهزم أمل عطبرة بالجوهرة

محمد عثمان الجعلي

 9  0  3346
محمد عثمان الجعلي

عندما عملت في جدة عام 2004 كنت أدردش مع فنان السودان الكبير الأستاذ الطيب عبدالله إبن شندي العزيزة والأستاذ الطيب به خفة دم وسرعة بديهة قلت له يوماً ... والله يا الطيب لما أحكي بعض نكاتك لأصحابي يقول لي ... معقول الأستاذ الطيب عبدالله بقول نكات !! فأجابني ضاحكاً ( إنتوا قالوا ليكم الطيب عبدالله دا نكير !! ولا شنو !! ) وسألته ذات مرة ماهي أحب أغنياتك لنفسك !! فقال والله يا أخي في جناك ليك جنا !! وأغنية السنين أحب الأغنيات لنفسي وهي من كلماتي وألحاني ، وتقول بعض كلمات السنين *** بالأمل صبرت قلبي وعشت في دنيا الأماني ... أهدهد الشوق بين ضلوعي وأترجم الآلام أغاني ... أروي للناس سر عذابي وأحكي ليهم ماسلاني ... لا نفع دمعي السكبتو لا شفع عندك حناني... عندما نسمع هذه الكلمات الجميلة يذهب الخيال مباشرة لهلال العشق الجميل الذي فاز على الأمل عطبرة بثلاثية مقابل هدف أحرز للهلال تيتيه هدفين وحاول الضيوف تقليص الفارق بهدف من ضربة جزاء أحرزها ياسر عبدالله ولكن الشاب ولاء الدين أحرز الهدف الثالث للهلال في الدقيقة 76 وإرتفع سيد البلد برصيده إلى 22 نقطة في المركز الأول ورفع شعاره المحبب ...تمتع بالرحلة ودع القيادة لنا ، ويحمد للمدرب الكوكي أنه أشرك الكثير من العناصر الشابة مثل ولاء الدين وأبوستة وشلش ورمضان كابو وغيرهم من الشباب طبعاً وصيفنا أهلى الخرطوم أما المريخ فهو وصيف الوصيف رغم عودته بست نقاط من كوستي حيث فاز على الرهيب بهدف وعلى الرابطة بهدف ( المريخ يتكلوا فيه زي العجوز الماشين يشلقوه ) ونحن أولادنا يتعرضوا للعنف القانوني وغير القانوني ورغم ذلك لن نهاجم التحكيم ، ونعتقد أن قاضي الملعب بشر والخطأ غير مقصود ، تألق أبوعاقلة وهو يلعب ضد فريقه السابق ولا يحاسب على هفوة هدف الضيوف والرجل خانته وسط متقدم وبارك الله فيه وهو يلعب مدافع ، وهذا هو الهلال وشيبوب حرق بنفس وكذلك أوكرا وكاريكا ومعظم النجوم ، فيصل الأقرع حذرني من التغزل بنجوم الهلال وخاصة تيتيه !! وياهو دا الهلال روعة وجمال وتيتيه ( ياروشا تيتيه ) ... أما الجيران تقول ليهم بالأمل صبرت قلبي وعشت في دنيا الأماني .
*** إعلام الهلال للإحترافية مثال
نحمد الله حمداً كثيراً بعد نعمة الإيمان والسودان أن جعلنا هلالاب ، بالله هسه لو السودان دا مافيه هلال الصالحين والناس الساجدين كنا نقبل وين !! ومحبة الهلال نعمة تستوجب الشكر ، لأن الهلال تميز في الماضي والحاضر والمستقبل ، شوفوا جمهور الهلال الذي نال جائزة الجمهور المثالي من الكاف وشوفوا إدارة الهلال ( خبرة ومال ) من زمن ماقبل الطيب عبدالله مروراً بالمدهش والحكيم والأرباب والبرير والكاردينال وشوفوا لعيبة الهلال ماقبل جكسا ومنزول مروراً بالدحيش وقاقرين وطارق وتنقا وصولاً لجيل كاريكا وبشة ، أنظروا لصحافة الهلال شجرابي ودسوقي ورمضان وإبراهيم عوض ومحمد عبد الماجد وياسر فضل المولي وأحمد الفكي ومحمد الفاتح ( كتاحة ) وسيف الدين خواجة وآخرين لا يسع المجال لذكرهم ، ونريد أن نقف عند ماكتبه أستاذنا صاحب ( نحو المدى ) سيف الدين خواجة وهو يعطر صباحنا من دوحة العرب ، هذا الرجل كلما أقرأ له أشعر أنه أضاف لي الكثير ويكفي عموده في صحيفة كفر ووتر بعنوان ( حال الهلال ياريس أسمعنا مرة ) حيث تحدث خواجة عن مستوى الهلال المتذبذب في بعض المباريات ورفض تبرير المدرب الكوكي بحجة ( الحمل الزائد في التمارين ) وقال يجب على الكوكي معرفة كيفية تفريغ الحمل الزائد وطالب الأستاذ خواجة بوجود المدرب القدير أحمد عبدالله في منظومة الهلال الحالية لأنه خبير بتغذية اللعيبة ومتابعة أوزانهم وحلحلة مشاكلهم وأن عدم الإستقرار الفني والإداري هو سبب تدهور مستوى بعض اللاعبين ، وكما أشار الخواجة لأهمية وجود نجوم العهد الذهبي وحضورهم لتمارين الفريق الحالية من أجل أن يستفيد نجوم الهلال من تجاربهم ، ويجب علي إدارة الهلال تفعيل مبدأ الشورى بين أقطاب الهلال من أجل فائدة الفريق وكان سلفنا الصالح يهتم بالشورى خاصة الفاروق عمر رضى الله عنه وبالتأكيد لن نكن مثلهم ولكن نتشبه بهم والتشبه بالرجال فلاح ولله در القائل
*** يارافعاً راية الشورى وحارسها ... جزاك ربك خيراً عن مجيبيها
*** رأي الجماعة لا تشقي البلاد به ... رغم الخلاف ورأي الفرد يشقيها
*** جوع الخليفة والدنيا بقبضته ... منزلة في الزهد سبحان موليها
*** فمن يباري أبا حفص وسيرته ... أو من يحاول للفاروق تشبيها
نسأل الله أن يجتمع شمل أبناء الهلال لأنهم خيار من خيار .
*** نحن يامولانا هارون ضد تحنيط جسد الفرعون
مولانا هارون من الولاة الناجحين ولكن عملية ترميم جدار إتحاد اللقيمات المنهار ربما تخصم من رصيد الرجل في البنك الوطني فهذا الإتحاد بإنحيازه الفاضح للمريخ فقد شخصيته وهيبته وأصبح جثة هامدة رغم أنه يتفرعن على الأندية الصغيرة وأكبر دليل قصة واوا ونقاط هلال كادوقلي التى يتهرب الإتحاد من حسمها ولو كان المشتكي المريخ لنال النقاط بين عشية وضحاها والكل يذكر كأس المكاتب عام 2015 ، ونحن يامولانا هارون ضد تحنيط جثة الفرعون ولن يطالك اللوم إذا كتبت في تقريرك ( غلطان المرحوم ) وهذا الإتحاد إنتحر بعد ربط مصيره برضاء النادي الأحمر ونسي أنه إتحاد قومي يمثل كل السودان ، وبما أنك رجل قانون أنظر للهجوم الذي يتعرض له حكام الوطن من قبل الإعلام السالب والإتحاد الكسيح حتى الآن لم يستطع مقاضاة صحيفة واحدة من الصحافة الصفراء ، والحكم هو قاضي الملعب وحمايته واجب الجميع ، والمريخ عندما تقدم بطلب سحب جنسية واوا من أجل أن يحرم الهلال من خدمات اللاعب ( ولايحيق المكر السيئ إلا بأهله ) والآن بعد أن أصبح سحب جنسية واوا ممهوراً بتوقيع السيد رئيس الجمهورية أصبحت العملية هيبة دولة لا مجال للمجاملة فيها ولن تنجح محاولات المريخ بإعادة الجنسية لعجوز ساحل العاج مرة أخرى ، ولقد جادت القريحة بالمسدار التالي
*** خالد عزالدين صدوق مابعرف كضب
*** هيبة الدولة وتوقيع عمر البشير مالعب
*** لو نغيما عاد والمريخ من الدوري يحتجب
*** جنسية واوا يا أخوان لااااااااااازم تنسحب
وكما نعلم زعيم أفريقيا نيلسون مانديلا تشرف بجنسية السودان مرة واحدة !! واوا كمان مع شنو !! عشان يتجنس مرتين !! قفة ولاأضان قفة !! بالمناسبة المدرب أب قفة باع فاروق جبرة في أول لفة !! لذا لزم التنويه .
*** همسة الوداع
حبايبنا الحلوين لايمكن يعترفوا ويقولوا إنهم غلطانين !! وأقرب مثال جنسية واوا المضروبة فقد حاول حتى الأستاذ عصام الحاج اللعب على الحبلين وقال ... إن إسم الشخص الذي سحبت جنسيته هو سيرجي ونحن زولنا سيرجيو ... ناقصة واو ، يعني الواو هي العلاج ياود الحاج !! ناس شندي ماعندهم ( إمور التلات ورقات ) ولي عنق الحقيقة !! إلا تكون وارد جنوب العرضة !! وبهذه المناسبة نهمس في أذن الإعلام الأحمر إذا كان سيرجيو باسكال واوا عندكم شك في سحب جنسيته بسبب حذف الواو ليه ماتستلفوا ليه حرف واو من إسم جدو!! مش الألف والواوات عنده دبل !! ولاّ الكلام دا ماياهو ؟ مجرد سؤال .
رد سريع
امسح للحصول على الرابط
بواسطة : محمد عثمان الجعلي
 9  0
التعليقات ( 9 )
الترتيب بـ
الأحدث
الأقدم
الملائم
  • #1
    الامين عبد القادر السمانى 04-06-2017 11:0
    التحية والسلام اخوى الجعلى والتحية عبركم لكل الهلالاب الاوفياء ونبارك لكم المسيرة الظافرة بالانتصارات الباهرة وان شاء الله نتويجها يوم السبت الاخضر فى قمة الطلاب وماعاوزين مدافعنا يلعب بعد اذن الاتحاد السجمان برضو نقول حاضر بس تعالوا الملعب بدرى ومعاكم جدو واوا رغم عدم قانونيته ولكن نحن موافقين رايكم شنو ؟؟؟
    ومسدارك نار يالجعلى ( خالد عزالدين صدوق مابعرف كضب
    *** هيبة الدولة وتوقيع عمر البشير مالعب
    *** لو نغيما عاد والمريخ من الدوري يحتجب
    *** جنسية واوا يا أخوان لااااااااااازم تنسحب )) اسحبوها كم مرة شقيقة الحال دى تطير عيشتها يا جدو واوا !!!
    كتاحة معقولة تفوت عليك يا تفاحة ولا عجبتك ( المريخ يتكلوا فيه زي العجوز الماشين يشلقوه ) ما دة الباقى ليهم عديمى البصيرة ولكن العيب فى اتحاد السجم العام والحمد لله وصلت نهايتهم مع المدهش -
    ودمتم للوطن والهلال فى حفظ الرحمن ورعايته
  • #2
    فيصل الاقرع 04-05-2017 06:0
    هههها يا كتاحه ما بتعرف الشلوقه بالعربي الحديث ياكتاحه عملية ازالة المياه البيضاء من العين وماشاءالله استاذنا يا الجعلي جاب ليك مرابيع حديثه مجاراتا لمربوع خالد عزالدين يا ود عقيده الدوري في جيب الساعه شكله اتحاد اللقيمات سلمكم الصك
  • #3
    الكتاااااحة والتفاااااحة 04-05-2017 04:0
    ( المريخ يتكلوا فيه زي العجوز الماشين يشلقوه )

    بصراحة دى غلبتني
    المسعفين .......
    عم الامين وفيصل الاقرع
    بسرعة عشان الشمار
    مولع ناااار
  • #4
    البابا 04-05-2017 12:0
    قال الجعلي
    (بالله هسه لو السودان دا مافيه هلال الصالحين والناس الساجدين كنا نقبل وين)
    ونقول ليهو نقبل علي مكة فيها الكعبة والجعلي نصلي وندعو ربنا يوفق الرحيق في زيادة الضيق في صدور ناس (سديق)
  • #5
    سيف الدين خواجه 04-05-2017 09:0
    يا حبيبنا كما تستفيد نستفيد ايضا من شعرك الغزير ونشرب من خفة دمك كوب عصير عشان يساعدنا علي المسير ونحن بين نارين االعمر وللغربة هجير نكتب بحرية الهلال تربينا لا ماجور لا اجير والجماعة كل عام ليهم(قيت ) في التزوير!!!
  • #6
    Omer 04-05-2017 09:0
    حارس فريق الامل عملها وااااااضحة يا صفراب .
    معروف انو مباراتكم مع حبايبكم ناس الامل هي اكتر مباراة مضمونة .
    الامل يستأسد علي المريخ وقدام الهلال يبقي حمام .
    ولما الهلال يكون حمام وفي اسوأ حالاته يظهر الدعم والبيع زي ماعمل الحارس امبارح .
    الهدف الاول فضيحة وباقي الاهداف لاتدخل في حارس مبتدئ .
    نطالب الاتحاد بفتح تحقيق في التواطوء الوااااااضح دا .
  • #7
    البابا 04-05-2017 09:0
    مني علبة دربس حلاوة للبلقا جنسية واوا
    شرط ماتكون ناقصة ولا واو واحد
  • #8
    ودعقيده خلف 04-05-2017 08:0
    استاذ الجعلي وحبيبنا ابو كرفته حمراء تسر الناظرين لك التحيه بس صدارتك مؤقته لاتفرح بها كثير من هسع بقولا ليك الفرق ثلاثه نقاط والممتاز في الجيب السري لاتفريط فيهو ابدا مهما كلف الامر والشعار المحبب تمتع بالرحله ودع القياده لنا يا مغيور يا حمال الطوب
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019