• ×
الجمعة 17 سبتمبر 2021 | 09-16-2021
محمد عثمان الجعلي

الهلال والفرسان من يكسب الرهان

محمد عثمان الجعلي

 6  0  2692
محمد عثمان الجعلي

لا أدري لماذا لا يهتم إعلام القمة بمن يمثل السودان أفريقياً !! وهاهم شباب التبلدي يعودون بنقطة جوية غالية من أدغال أفريقيا بعد تعادلهم الإيجابي بهدف لكل أمام فريق سلطات الموانئ في غامبيا حيث أحرز أصحاب الأرض الهدف الأول في الدقيقة 44 وعادل لشباب السودان لاعب الوسط مفضل محمد الحسن في الدقيقة 62 ومباراة الرد يوم الأحد القادم بملعب شيكان ولقد رصد الوالي الناجح مولانا أحمد هارون حوافز ضخمة لأبطال السودان وشباب كردفان في حالة وصولهم لدوري مجموعات الكونفدرالية ونسأل الله النصر المبين لهلال التبلدي في مباراة الأياب ، يعود بطل السودان هلال العشق الجميل لي مباريات اللعب الجد جد وحصد النقاط عندما يلتقي بالخميس مفاجأة الدوري حتى الآن أهلي الخرطوم الذي يجلس على المقعد الفضي برصيد 20 نقطة وأحرز رماة الفرسان 15 هدف وولجت شباكهم 10 أهداف ويعتبر فريق الفرسان هو سيد أندية السودان حتى الآن !! ( أستغفر الله ) هناك سيد البلد الذي يجلس على مقعد الريادة الذهبي برصيد 22 نقطة وأحرز رماة الأزرق 19 هدف وولجت شباكه فقط 5 أهداف ، أما وصيفنا زمان فريق الجيران سوف يلعب أمام الآرسنال في شندي العزيزة ... عندي إحساس أن الأهلي هذه المرة سوف يرجع لأصوله ويلعب جاد أمام المريخ لأن المنافسة على التمثيل الأفريقي أصبحت بها مزاحمة خاصة هناك أندية طموحة تقدمت بأوراق إعتمادها للمنافسة على مقاعد الكونفدرالية مثل الأهلي الخرطوم وفرسان التبلدي والخرطوم الوطني وهلال كادوقلي والمريخ العاصمي ، وبمناسبة المريخ العاصمي مازالت جنوب العرضة تعيش الأفراح بمناسبة الفوز على بطل الثنائية في مباراة دعم الطلبة الودية وحتى الإدارة الحمراء أصدرت البيانات بالتهنئة لجماهيرهم بمناسبة الفوز على كبير السودان في مباراة ( كيري ) لاتضيف نقطة لرصيد الفريق في الدوري ، والله البشوف أشعار ناس المريخ يحلف يقول الناس ديل تأهلوا لنهائي أبطال أفريقيا !! تخيلوا حتى مامون أبوشيبة ترك مهاجمة التحكيم وأصبح يهضم الشعر ( والله زي ما أقول لكم ) وكمان أشاد بالحكم القومي الأمين الهادي وقال حكم نزيه !! طبعاً في عرف الإعلام السالب أن الحكم النزيه هو الذي يظلم الهلال وينحاز للمريخ !! وإليكم آخر مسدار من المسادير التي نقلها أبوشيبة من عمود مزمل وأراد أن يكررها بإعتبار أن ماتكرر تقرر ويقول المسدار
*** بي فن الزعيم قالوا إتحرق مكسيم ... وإنضرب الهلال بالراحة بلع النيم
*** قلنا لكم زمان تيمكم ده حالو أليم ... معروف الهلال الماشي بالتحكيم
السالب يحاول أن ينفي دعم التحكيم للمدفور وجادت قريحتي بالمسدار التالي *** في مباراة رسمية أتحداكم إنتوا أغلبو ...وصيفنا زمان بنعرف طريقة نضربو
*** في دوري الوطن تعالوا محزمين أنكربو ...والماشي بالتحكيم رب العباد يعلمبو تخيلوا حتى مجلس إدارة وصيفنا زمان أصبحت تتاجر بنتيجة مباراة الطلبة الودية !! فقد قال عصام الحاج وعبدالتام إن الإعلام الأزرق يتهم المريخ بشراء المباريات !! طيب مباراة دعم الطلاب هل إشتريناها من الهلال !! ضحكت وأنا أردد في سري حكاية أم كرم الله التي سرقت ( القنقر ) وعندما ضبطها صاحب الزراعة صاحت في وجهه هاك فضي قنقرك وأديني شوالي !! أنا أمك ياكرم الله المتلي أنا بتهموه بي سرقة القنقر !! فأجابها المزارع ساخراً !! ( حاشاك يا أم كرم الله سرقة القنقر !! ) بالمناسبة نتمني المريخ يلعب ( المباراتين المؤجلات ) صراحة وحشتنا وصافة المريخ وكما يقول أهل الخليج ... قديمك نديمك !! لذا لزم التنويه .
*** نفخر بأن القامة شجرابي قلم هلالابي
الأستاذ عبد المنعم شجرابي قلم منحه الله القبول والدخول بلا إستئذان على قلوب الأحباب خاصة القراء الهلالاب وقد كتب في عموده المقروء ( أضرب وأهرب ) عن مباراة الصندوق الودية ، لو كنت مكان الأستاذ شجرابي لجعلت إسم العمود ( أضرب وأحسب ) لأن الأستاذ عبد المنعم شجرابي سدد ضربات متعددة بالمنطق والحقائق للإعلام السالب وفريقه المدعوم والمدفور من قبل إتحاد اللقيمات ، وقال الأستاذ شجرابي ... مبروك للمريخ فوزه الذي حققه في مباراة المناسبة لا المنافسة !! ( سلمت يمينك ياشجرابي ... كلام يكتب بماء الذهب على جبين التاريخ ) وأضاف الأستاذ الأحمر كان محتاجاً لهذا الفوز لمعالجة مديونيات ظاهرة وأخرى مستترة والمريخ محتاج لإنتصار يهزم به فشل الإستثمار ، وشكراً للإنتصار الذي أظهر لنا أن مجلس المريخ به أكثر من ثلاثين عضواً وقد كنا نحسبهم سبعة فقط ، وتحدث عن إلقاء الصفوة بالشماريخ على مدرجات جماهير الهلال ( يا أستاذ شجرابي جماعتك ديل فائزين عملوا كدة لو فاز الهلال كان الحكم الأمين يكون في أحمد شرفي ) وأضاف الأستاذ شجرابي ... بقدر ما كان فرح جماهير المريخ جميل كان حزن الأقمار نبيل وختم الأستاذ بقوله لا غرابة أن يقيموا الدنيا ولا يقعدوها بالفوز على ند في مباراة ودية وقد أذاهم الخسارة في آخر مباراة رسمية ، ونقول لأستاذنا العملاق شجرابي لما الصفوة قذفت الأقمار بالشماريخ إحتمال تكون شغالة بالمثل القائل ( المابتلحقوا جدعوا ) أما نحن لا نملك إلا أن نسأل الله أن يجعلنا دائماً مصدر أفراح لكل شعب السودان وربنا يجعلنا غابة والناس حطابة .
*** ألف تحية للمريخابي الجعلى ود المحمية
أجد متعة خاصة وأنا أتابع آراء أحباب الرحيق وخاصة المريخاب منهم لأن الهلالاب شهادتي فيهم مجروحة وسوف نتطرق لبعض تعليقات الرحيق السابق
ونبدأ بالأديب إبن الوهاج من الأمارات الذي كان تعليقه أغنية إختار لها لحن ( إنت يافتان زينة فوق زينة ) وقال ... إنت يامريخ زينة فوق زينة ... نحن نفرح بيك وإنت نادينا ... لا أسد نفع ولا كوكينا ... الغلب بي إتنين روعة جعلينا ، أما خلف الله ودالعقيدة مريخاب خيبر فقال ... هذا المسدار هدية للجعلي وكتاحة والحيران الأقرع والأمين جيفارا وأحمد الفكي وبكري عيسى حمد ( أدروب ) ومسداره ...قوون بكري الجميل الجابو بي باصاتو ...خلي الناس تجدع والزناطير فاتو ، ونقول لود العقيدة إحتمال شيخنا أحمد الفكي يسامحك لكن البقية شيل شيلتك ( الوداك تهبش العقرب في جحرها شنو !! ) ، والمريخابي أنور محمد سعيد قال ساخراً ...كلامك كلو حلو بس بيت البكاء بي وين ونقول للإبن أنور ( مافي زول عجوز إسمه أنور ) سعيك مشكور ونحن أنصار سنة ينتهي العزاء بإنتهاء مراسم الدفن !! أمشوا شوفوا جنازة واوا وين !! ( أقصد جنسية واوا ) ونختم بالظريف سعد محمد عبدالسلام ( أنا ماعارفه من مريخاب وين أرجو أن يسجل جواله حتى يتم التواصل بيننا ) وهو قال جعلى أصلي من المحمية !! يعني إحنا تايوان يا أبوالسعود !! وتقول رسالة سعد ...يا الجعلي إذا كان الهلال فائز هل سوف يكون هذا رأيك !! أتمني أن تطلعنا على قصاصات دونتها لو كان الهلال غلب !! الحمد لله جعل النيسانات إتنين واحب سوداني والتاني مصري ، ونقول للأخ سعد صراحة كدة كان العنوان بكون ( أبوالهل طلع فائز على مريخ العجائز ) ونعتذر للإخوة أبوصديق وأشرف محمد حسين وجلابي الدوحة قطر وأبو أحمد وبابكر عوض الشيخ وأستاذنا محمد الفاتح ( كتاحة ) ونقول لكتاحة ود العقيدة قال القونين واحد للجعلى والتاني لكتاحة والفقراء إتقسموا النبقة وشكراً لكل قراء الرحيق بدون فرز .
*** همسة الوداع
حبايبنا الحلوين عرفنا كان عندهم أحزان متراكمة أخرجتها مباراة دعم الطلبة وشالوا كأس الفضة مع العلم أن الهلال سبق له أن شال من المريخ كأسين دهب في السبعينات ، وبهذه المناسبة نهمس في أذن الإعلام الأحمر يعني لازم تكونوا حتى في الكأسات وصايفة ؟ مجرد سؤال .

امسح للحصول على الرابط
بواسطة : محمد عثمان الجعلي
 6  0
التعليقات ( 6 )
الترتيب بـ
الأحدث
الأقدم
الملائم
  • #1
    فيصل الاقرع 04-12-2017 12:0
    سلام جعلينا هلا هلا ابوشيبه الاطرش بقي اقول مسادير ؟والله هانت الذلابيا يا ودعقيد هديتك مقبوله لكن ان شاء الله نرد ليك الهديه مدبله زي القدح في الدوري مش في دعم العيال
    دا سؤال يا جعلينا (من يكسب الرهان )الجواب الديمه كسبان
    وجميل جدا انك تهتم بالمعلقين وتخاطبهم بمختلف توجهاتهم
    اما تجاهل الاعلام لهلال الابيض فانه امر معيب والله فهلال الابيض بالتسبه لنا هو الرئه الثانيه التي نتنفس بها اما الهمسه يا الجعلي ماانت (اذا وردنا العكر والطين لغيرنا ونحن لنا المجمر وصافر )
  • #2
    عزالدين ابراهيم عبدالرحمن 04-11-2017 05:0
    ناس الجعلي والكوكبه سلام بس ما تسالو مننا تقولو الزول الكان رافع ضغطنا دا مش وين اها جيتكم وين فوق العوراء فوق غلبكم من بكري وعاشور قلت لي مرتاحين للمستوي كمان يا فالح يا ابو ناصر اي فريق في الدنيا بعد يفوز بحاول يامن فوزو ويلعب علي المرتدات دا اسلوب الكبار وانتو فرحتو بدي وبعد دا ما قادرين تجيبو هدف وبرضو تقول لي مستوي عن اي مستوي تتكلم يا ابو ناصر والمباراه الجايه مالكم كل سنه تبكو للاتحاد يرحلوها ليكم بعد ترممو صفوفكم الخلفيه خوفا من بكري يا اتحاد اووووووووووووب علينا اجلوها لينا والله عيب طيب كيف حا تلعبو الافريقيه هناك كمان في تاجيل ماااااااااااااااااااااااااافي ؟؟؟؟؟؟؟؟؟؟؟؟؟؟؟؟
  • #3
    الكتاااااحة والتفاااااحة 04-11-2017 02:0
    صدقني يا بو جعل
    لقيت منعم ابو ناصر براااااهو
    واقف منتظر
    تاني التكتح مالقيت
    بس انا عندى رد لود عقيدة
    ضرى عيشك ياود عقيدة
    لكن مباراة القمة اوعك تلبد
    وتعمل فيها رايح
    امرق لى بره وقول للجعلي : مبروك يالجعلي ليك ولى كتاحة
    طبعا الجعلي المره الفاتت قسم معاى النبقة
    نشوفك انت بتقسم النبقة مع منو ؟؟؟؟؟
  • #4
    منعم ابوناصر 04-11-2017 10:0
    قول لحبابيك الحمر افرحو شويه لانكم سوف تبكو كثيرا والايام بيننا وياريت انكم كنتم افضل بل سيدكم كان افضل من عجايزكم وبشهادة النقاد او المحللين الحمر ونحن مبسوطين من المستوى ومبسوطين لان مدربكم نزل كل المدافعين ولعيبة الوسط عشان يوقف هجوم سيد البلد ويوقف الاغماءات الحصلت فى المدرجات من كثرة التهديف وقبل النهايه ومع ارعاب الحكم وهتاف صفر ياحكم الزمن انتهى الحمدلله كانت كتيبه رعب وكان فى الشوط الثانى اعتمادكم على المرتده0 اتصل على واحد من الحناكيش بسأل من كلمه قنقر ياالجعلى كلمناك مرارا وتكرارا ان تراعى هذه الفئه المهم انا حولتهم الى فيصل الاقرع
  • #5
    ودعقيده خلف 04-11-2017 12:0
    استاذ الجعلي لك التحيه بس انت بطمن في نفسك ونفس جماعتك الصفراب احسن ليكم تخففو شويه من ارتفاع الضغط والسكري
  • #6
    ابن الوهاج 04-10-2017 10:0
    هلالك مهلهل يا الجعلي بطل الهضربة .. كوكيك دايش لأنه مطول من البلد و لسة لما يتعرف على مجموعة لاعبي غرب افريقيا بتاعنكم ديل عايز ليه 6 شهور حتى لو بدون اسماء .. لعيبتكم الكبار بقوا بتاعين شوط واحد .. الله يستر عليكم من الفرسان هذه الكتيبة التي لا ترحم .. يا الجعلي انتو مغلوبين أخجل شوية قول مبروك .. ما تبخس انتصارنا و كاسنا و الله نحن ناسنا فتروا من رفع الكؤوس محليا" و اقليميا" وقاريا" و لعيبتكم مساكين يرفعوا يدينم في التدريب بس .. عندكم لاعب قبل المباراة كان بيعاين فوق في السما بدون ما يرفع يديه .. دي طريقة بلة الغائب و الا راجل العيلفون .. الله يكون في عونكم .. أصفار أصفار ..
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019