• ×
الأربعاء 23 يونيو 2021 | 06-21-2021
محمد عثمان الجعلي

بطل الممتاز يهزم الإستارز

محمد عثمان الجعلي

 9  0  3079
محمد عثمان الجعلي

عندما يصدح الفنان صلاح مصطفي برائعة محجوب سراج ( بعد الغياب ) التي تقول بعض كلماتها *** بعد الغياب ... بعد الليالي المرة في حضن العذاب ...عاد الحبيب المنتظر عوداً حميداً مستطاب ... يا للهوى يا للشباب ...يا للدعاء المستجاب ، عندما نسمع هذه الكلمات الجميلة يذهب الخيال مباشرة لهلال العشق الجميل الذي إلتقي بطل غانا في مباراة ودية من العيار الأفريقي ، نعم إلتقي كبير السودان مع كبير غانا يعني لقاء (في آي بي ) وبلهجة أهل الخليج نقول للصغار وناس قريعتي راحت ( وخّروا شوية ) ، وهذه التجربة الغانية أول معانقة للهلال مع جماهيريه الوفية بنكهة أفريقية ، وبطل الممتاز هزم الإستارز بثلاثية مقابل هدف للنجوم ، وأحرز الهاتريك مهاجم الهلال الجديد تيتيه ( وتيتيه ياروشا تيتيه ) ، والهدف الأول لوحة من الفنان العالمي بيكاسو حيث لعب ضربة الزاوية الخلوق كاريكا في أول تلت ساعة ولعبها بالمقاس على رأس الغاني تيتيه الذي أودعها الشباك رأسية رائعة ، مفروض هدف زي دا يحسبوه بي هدفين !! وأضاف تيتيه الهدفين من ضربة جزاء ، الحمد لله عندنا مهاجم تخصص رأسيات وضربات جزاء ( ماشاء الله وتبارك الله ) وبيني وبينكم ناس أوكرا وشيبولا عندما يتوغلوا في منطقة 18 الخصم مافي حل إلا تعمل معاهم ضربة جزاء (تضحي بالجنين من أجل الأم ) والمدافع العاقل هو من يعطلهم بضربة جزاء ( قلبي على ضفر وعلي جعفر ياجدعان !! ) ، والجميل في الأمر أن كل كتاب الهلال الكبار أشادوا بهلال 2017 وخاصة المهاجم القناص تيتيه ، وعندما تتحدث كبار أقلام الهلال يجب أن يصمت الجميع ( فضلاً لا أمراً ) من أجل الفائدة والمصلحة العامة ، فقد كتب الأستاذ محمد أحمد دسوقي وقال ... نال المهاجم تيتيه إعجاب الجماهير بمهارته العالية في المراوغة وسرعة الإختراق وسوف يسبب هذا البلدوزر عاهات مستديمة لناس واوا أذا حاولوا إيقافه وهو يكتسح كل من يعترض طريقه ، ولقد إتصلت على عمنا محمد حسن الزين أبو الفاروق الذي كان يقول لي دائماً ( زول غيرك إنت ومحمد عبد الماجد بجغم الهلال مافي !!) وقرأت له عمود صاحب المفردة المبتسمة ( محمد عبد الماجد ) وهو يقول عن تيتيه أنه أحرز الهدف من كرة كاريكا بضربة رأسية رغم أنه قفز معه 7 من نجوم الفريق الغاني وتيتيه ينط فوق تقول بيدخل المباراة وشايل معاه ( سقالة ) ، وأضاف تيتيه جمع المهارة والثقة والقوة في لمسة واحدة وتيتيه ممكن يحسم لقب الدوري من الإسبوع التاني ، فمات أبو الفاروق بالضحك وقال لي الزول دا كان ماني عارفه جعلي من شندي أقول رباطابي !! أها يافيصل الأقرع وجيفارا ومنعم أبوناصر وأبوحسن نحن كان إتغزلنا ( الله قال بي قولنا ) يلا ورونا فلاحتكم مع الأساتذة دسوقي وود عبدالماجد ، واللاّ بس وقعت عليكم حكاية ( الغلبتو مرتو داير يؤدب نسيبتو !! ) ، هناك وقفة يجب أن نضع لها إحتمال ولو بنسبة 1% من أجل التجويد في قادم المباريات ونفترض أن تيتيه وأوكرا ( إتجدعوا ) أمام فريق أوول إستارز ( كل النجوم ) بإعتبارهم أولاد بلد وكلهم من غانا وأصحاب لذلك ننتظر مباراة قورماهيا الكيني يوم الأحد عشان يكون التقييم شامل وكامل ، طبعاً هدف الضيوف الوحيد جاء من فاول مع عماد الصيني وتغاضى عنه الحكم ونحن نقول الضيوف يستاهلوا كل خير عشان ضيوف سيد البلد ولله در القائل
*** الله يعلم أنه ما سرني ... شئ كطارقة الضيوف النزل
*** مازلت بالترحيب حتى خلتني ... ضيفاً لهم والضيف رب المنزل
جميل أن يلعب الهلال مباراة تريعة البجا بالبدلاء ويحرز الثنائية الثعلب ، وكما نعلم أن المدرب بشر وكل مدرب له ضحايا ويجب على الثعلب التعامل بإحترافية حتي يقتع مدربه وكما قال لافاني مازالت لنا 4 خانات في الكشف الأفريقي نضيف فيها من يثبت جدارته ويستحق اللعب أفريقياً ، والفرصة أمامك وأمام غيرك ياثعلب .
*** قناة الهلال ووحدة الجمال
بدأ التدشين الفعلي لقناة الهلال وسوف ينطلق بثها الميمون في أبريل القادم مع إفتتاح الجوهرة الزرقاء ( قناة وجوهرة سمحة المقدرة ) وهلال الحركة الوطنية بحمد الله غني بجهود أبنائه على مختلف الحقب والعصور ، جميل أن يفتح رئيس الهلال صدره لإستقبال قادة الهلال السابقين من أجل خدمة محبوب الملايين وكل قادة الهلال نياشين على صدرونا وتيجان على رؤوسنا ، وجميل أن يفتح مجلس الهلال صفحة جديدة مع إعلام الهلال الشامل المتنوع وهلال الحركة الوطنية ( مافيه رئيس طوالي ) العبارة دي إلا نسمع بيها سمع ساكت عند الجيران ، وكما قلنا من قبل يجب أن تكون قناة الهلال قناة كل الأندية الرياضية وبالتأكيد الهلال والمريخ عينان في رأس الكرة السودانية وبهما يحلو التنافس وبالمناكفة والسلاسة نهرب من جحيم السياسة ، كما أن الهلال سوف يعمل مستشفي لإصابات اللعيبة ومعه فندق وأجمل من كل ذلك وحدة الروعة والجمال لأبناء الهلال ، نتمني أن نشاهد عند إفتتاح الجوهرة الكاردينال والبرير والأرباب والحكيم والمدهش والحاج عطا المنان واللواء عمر على حسن وجكسا والدحيش وأمين زكي والنقر (إخوان ) وفوزي وقاقرين وكل أبناء الهلال ، والهلال الجمال والجمال هيلنا والهلال تيم أبطال هيبة زي نيلنا .
*** دفاع واوا قاعد في الطراوة
الجيران حاولوا تقليد هلال الساجدين والناس الصالحين في اللعب مع الأندية المصرية من أجل خوض التجارب الأفريقية ولعبوا مع الإتحاد السكندري وترتيبه 11 في الدوري المصري وشال منهم كأس الميناء ( وخلاهم خشمهم ملح ملح ) ولعبوا مباراة تانية أمام جماهيرهم في البقعة وكان خط الدفاع ( أسماء في حياتنا ) بقيادة جدو واوا وتمكن مشطوب الزمالك السابق خالد قمر من زيارة شباك المريخ للمرة التالتة على التوالي وثبت شرعاً أن دفاع واوا قاعد في الطراوة ، ويوم الثلاثاء ناس المريخ مسافرين جيبوتي عشان يلعبوا مع إتصالات جيبوتي في البطولة العربية يوم الجمعة 20 يناير ونحن قبل كدة قلنا ليكم الوصية بي المهلة جيبوا لينا فول حاجات عشان لزوم الدكوة لكن بعد حال دفاعكم دا !! فول الحاجات كتير علينا جيبوا لقينا قدوقدو ( يتكون من دخن وروب وبسكويت ) أو بالعدم جيبوا لينا قورو قالوا بينفع الفتر والصداع النصفي ، وواوا دا جيبوا ليه شوال من صفق الشجر ( القورو ) الزول دا فتران ليه زمن !! لكن المعايش جبارة وماتنسوا كمان تيمكم فيه ناس نعسانين دا غير التكت والحقار ، فريق كورة تحلف يمين تقول مسلسل دكين . طبعاً المريخ تعادل مع الإتحاد السكندري في مباراة البقعة بهدف غير شرعي إحتج عليه مدرب الإحترافية والوقار مختار مختار ، وكما قال الأستاذ محمد عبد الماجد تعادل المريخ بهدف أحرزه الحكم !! بالمناسبة الأهلي شندي هزم الإتحاد السكندري بهدف نظيف !! لذا لزم التنويه .
*** همسة الوداع
حبايبنا الحلوين عندهم كان مدافع غاني إسمه كريم الحسن الزول دا لا حس لا خبر !! ماعارفين شطبوه!! أعاروه !! إختطفوه !! ناس حقوق الإنسان ماشايفين شغلهم ، هسه كان موجود كان ممكن يسد خانة عصام عبدالرحيم إذا أصيب في جيبوتي عشان مافي حارس إحتياطي ومنجد النيل موقوف بسوء السلوك من أيام هلال كادوقلي وجمال سالم مع المنتخب ، وواوا مامكن يكون حارس والشوف ظلمه ، أما أوجو عنده ملاريا (الباعوضة ذاتها إتلومت ) كيف قرصت أوجو !! واللاّ إمكن العكس !! أبوشيبة مازال يحاول أن يثبت بالأدلة أن كرة بكري في شباك الإتحاد السكندري عبرت !! وبهذه المناسبة نهمس في أذن الإعلام الأحمر إنتوا كورة دهب شيبون في شباك إتحاد الجزائر عبرت ولاّ ماعبرت ؟ مجرد سؤال .
امسح للحصول على الرابط
بواسطة : محمد عثمان الجعلي
 9  0
التعليقات ( 9 )
الترتيب بـ
الأحدث
الأقدم
الملائم
  • #1
    منعم ابوناصر 01-16-2017 05:0
    البركه فى ظهورك ياودبلل مالك ياخوى جاى مندفع كده هدى اللعب شويه دخولك ذى هرجلة مريخك وكورتو الجايطه والطويله وعويره خليك دبلماسى وانت العربيه بتعمل فيها شنو غير السبعات وكشف الحال حدكم نقطه واحده وكانت من تعادل مع الصومال والتانيه ايضا نقطه وبذالك اطلق عليكم الموز ابونقطه وايضا تمهيدى عربى وافريقى
  • #2
    ْعبّدِالُلُُه بّلُلُ الُقًرَيَاتْيَ 01-15-2017 11:0
    حُبّيَنَا الُجْْعلُيَ لُكِ الُتْحُيَُه وَلُكِلُ الُمٌْعلُقًوَوَوَنَ فَيَ رَحُيَقً الٌُختْامٌ وَتْحُيَُه ٌخاصّةِ لُلُاٌخوَانَ وَدِ ْعقًيَدِ وَلُمٌرَيٌَخابّيَ الُجْسِوَوَوَرَ ْعزُالُدِيَنَ ابّرَاُهيَمٌ مٌجْرَدِ سِؤالُ يَاجْْعلُيَنَا انَتْ مٌُهاجْمٌكِمٌ دِا تْيَتُْه بّالُحُنَطِوَرَ ْعلُيَ الُطِلُاقً يَالُجْْعلُيَ اٌخلُيَكِ مٌنَ تْيَتُْه لُوَ سِجْلُتْوَ رَوَنَالُدِوَ نَحُنَ مٌايَُهمٌنَا وَاسِمٌْع يَاجْْعلُيَنَا نَحُنَ نَمٌثُلُ سِوَدِانَ الُْعزُةِ وَالُكِرَامٌُه فَيَ الُبّطِوَلُُه الُْعرَبّيَُه مٌْعنَاُها الُاٌخوَةِ الُمٌغًتْرَبيَيَنَ حُا يَشِاُهدِوَا الُزُْعيَمٌ وَُهوَ يَمٌثُلُ بّلُادُِه فَيَ الٌُخارَجْ كِفَاكِمٌ ُهرَجْلُُه يَاجْْعلُيَنَا وَانَتْ ْعلُيَ بّالُطِلُاقً بّتْنَفٌَخ فَيَ قًرَبُّه مٌقًدِوَدُِه ( حُنَبّرَ قًبّاضُ الُطِــــــــــــــــيَرَ ) ..
  • #3
    الامين عبدالقادر 01-15-2017 06:0
    التحية والسلام اخوى الجعلى وماشاء الله عليك اليومين ديل همة ونشاط مايسحروك قبل ما تجغم الهلال ونبدأ من حيث انتهيت لانها لقطة الرحيق بحق ( وبهذه المناسبة نهمس في أذن الإعلام الأحمر إنتوا كورة دهب شيبون في شباك إتحاد الجزائر عبرت ولاّ ماعبرت ؟ مجرد سؤال .)) ياخى ابوشيبة بموت خاف الله زول كبير فى السن ماتجيب لينا الهوى !!!
    لقد لعب الشباب واحسنوا استقبال جماهيرهم مع الفريق الغانى ولكن اتخوف من تجربة عماد الصينى فى قلب الدفاع -- فى الارتكاز معقولة ولكن مع مقارعة الكبار تصعب شديد لانها تحتاج لوقت ونحن امام تنافس افريقى شرس وجهة نظر جيفارا لا تتعدى الرحيق -
    وايضا زعلان لاستبعاد الموهبة الفطرية الثعلب واسمه ثعلب يا لافانى ويستبعد من الكشف الافريقى ؟؟؟
    قناة الهلال واذاعة الهلال وفندق الهلال لكل الرياضيين بالتأكيد وليس حكرا على اسياد البلد لاننا هلال الامة والحركة والوطنية يا خوى عزالدين وبراحة على جعلينا انت وصاحبك ود عقيدة
    ودمتم للوطن والهلال فى حفظ الرحمن ورعايته
  • #4
    ابو حازم 01-15-2017 01:0
    التحية ليك يا حبيبنا الجعلي ولكل قراء كفر ووتر العزيزة، ونشكرك على كتاباتك الجميلة في حق سيد البلد الذي يستاهل اكثر من ذلك، واكثر ما عجبني في فوز الهلال على بطل غانا ان الصحف المريخية تاني يوم ما جابت سيرة الهلال نهااااائي وده بدل على انهم الرجفة حصلت من الان.
    يا عز الدين ياخوي تيتيه ده مخلنو للكبار والقدرو يعني الراجل طلع من النوع البجيب اقوان في الكبار ما في الصغار يعني بلو راسكم وخلي ناس واوا يكترو من القدوقدو عشان ركبهم تشيلهم ويستحملو الضغط الراجيهم.
    وتحياتي للجميع
  • #5
    ابوحسن 01-15-2017 09:0
    لك التحية استاذنا محمد عثمان والله انشاءالله تكون بدايه مبشرة بموسم جميل لابو الهل معشوق السودانيين وماشاءالله يا ابو عثمان
    علي تدشين قناة الهلال العالمية كل وجها البلد كانوا موجودين وطبعا قال الكاردينال هناك فندق ومستشفي با سم الهلال كلام حقييقة
    يليق بمكانه ابو الهل العالمية طبعا احبابنا ناس الصفوة الغيره مسكاهم والحسد علي الكلام الحاصل مع الهلال دا ما بينفع معاهم ههههههه وما عندهم زول بفكر في حاجات زي دي الله يستر ويكفينا شر العين الحمراوشرارة **
  • #6
    منعم ابوناصر 01-15-2017 09:0
    جعلى تحياتى قول لصاحبك الوصيفى عزو والعارف عزو مستريح نحن لما جبنا كأس خارجى هو لسه ماعارف المريخ من التحرير والكاسات الخارجيه والداخليه وطبعا دى كلها من الصيده بتاعتنا وبالذات كاسات الذهب الانت ماعندك منها ولاخاتم ذهب (((لو فعلا 80% من صحفيى الهلال انتم 100% مدفورين ومن رجل واحد واتحداك اسأل مزمز مدفور الوالى الذى بدوره دفر البقيه من امثال ابوخيبه وتبع الرقاصات وسلك العريان وهلموجرا انتم احسن لاتتكلمو عن اشياء انتم من اسس لها اين اعلامكم المدفور طوالى من الرئيس طوالى 000وقول لصاحبك الوصيفى ودالعقيده ايطال البعرب فضلت خيرنا وصلنا فيها مراحل متقدمه لكن انتم فضائح وسبعات ودائما عندكم نقطه واحده حتى اطلقوا عليكم الموز ابونقطه والدليل على ذالك لعبكم تمهيدى فى العرب مع اتصالات جيبوتى وتفرغ زينه الشنقيطى
  • #7
    ودعقيده خلف 01-14-2017 11:0
    استاذ الجعلي لك التحيه دوما ومشتاقين والله وبعتزر لعدم التعليق في الاعمده الذي مرت مرار الكرام اما بالنسبه للزعيم لاعب في ابطال العرب وانت خليك فراجي بس يا صفرابي وبعد حلحلو مشاكلكم مع امكم فطومه وتعال تفاصح علي الزعيم
  • #8
    عزالدين ابراهيم عبدالرحمن حاج موسي 01-14-2017 06:0
    الجعلي انت ما سمعت كردنه قال شنو هو وستكم فطومه قالو الي سنه 2025 كردنه رئيس للهلال يعني رئيس طوووووووالي قصبه عنكم
    والحاجه صراحة تستغرب ليها تعشق الهلال علي ايه ؟؟؟؟؟؟؟؟؟؟؟؟؟؟؟
    انتو شفت تزكروني الناس اليغشوهم ناس داعش انت تدخل الجنه امك كافره وابوك كافر وانتو وانتو وووو يمشو يفجرو نفس الأسلوب ناس الهلال يستعملو معاكم انتو فرحانين هلال الوحده الوطنيه الهلال من كبار القاره الهلال ما بلعب التمهيدي وانتو فرحانين لدرجه نسيتو أصلا الهلال دا فريق كورة ومطلوب منو كاسات خارجيه دا هدفو بس لا قناة ولا ازاعه ولا فندق قومو لفو يا مغشوشين
  • #9
    عزالدين ابراهيم عبدالرحمن حاج موسي 01-14-2017 06:0
    مجرد سؤال حبيبنا الجعلي تيتيه دحين في معسكر مصر مشي مع بعثه الأمم المتحده والله المعسكر ماشايف جاب ولا هدف حتي في الفرق درجه تانيه المصريه هل درجه تانيه المصريه اقوي من بطل غانا ؟ مجرد سؤال
    وكبار صحفي الهلال ديل يا جعلي تابعينا لياتو جهه ال80% والله 20% كباركم ديل نحن ما عرفناهم يا جنه والحبيب أبو حازم نحن من أبو فرناس طرنا وجينا لينا بكاس وانتو لي دربي ودربك دا طايرين واخر السنه علي ضهركم وبرضو كبار القاره الكبار بالكاء.
    ولما تمشو كينيا ماتنسوه سوقو معاكم حكم من الخرطوم الظروف ما معروفه
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019