• ×
الأربعاء 4 أغسطس 2021 | 08-03-2021
محمد عثمان الجعلي

من المفكرة ... عباس بن فرناس قعد عضيرة

محمد عثمان الجعلي

 12  0  3432
محمد عثمان الجعلي

نعود اليوم للمفكرة ونبحر بعيداً ( إلا ربع ) عن شواطئ ( التيوة ) الرائعة وحليوة ونعود للمفكرة الإجتماعية التي تجمع كل أطياف الرياضة في أرض الخير والطيبة ، سمعنا في التلفزيون أن بلاد النيلين قد غمرتها إستثمارات إخوان العقيدة والعروبة وخاصة في مجال الزراعة ونتمنى أن ينعكس ذلك الإستثمار على معيشة المواطن الطيب المضياف ، ونرجو أن يكبر حزب (قفة الملاح ) حتى يشمل كل أو جل أبناء السودان لأن إجماع كل الناس في صعيد واحد ضد سنن الكون ولكن الحكم بالأغلبية ، ونرجو ونلح في الرجاء أن تجتمع الحكومة والمعارضة من أجل مؤتمر ( قفة الملاح الجامع ) وأن تتم ترجمة كلام التلفزيون الذي نسمعه كل يوم عن رفع المعاناة عن كاهل الجماهير إلى واقع حياتي ، يجد فيه إنسان بلدي اللقمة الحلال بالسعر المناسب وأن تعود ( الدوكة للتكل ) وأن يجتمع شمل الأسرة حول صينية الغداء زي أيام وزمان ، وشايف ماشاء الإخوة المغتربين إجتهدوا في تكوين حزب القفة برئاسة جيفارا والأمين العام فيصل الأقرع وإن كان خلف الله ودالعقيدة يعتقد في تشكيل مكاتب حزب القفة إنحيازاً جهوياً رياضياً فنحن نقول له إن الأستاذ سيف الدين خواجة الذي إختار حقيبة الإقتصاد والتخطيط قد جعلنا نائبه عثمان جميل ( مريخاب الدوحة ) وعزالدين إبراهيم أصبح وزير الشئون الدينية والفتاوى أما النائب العام فهو أخونا ( أبوعمار) من مريخاب الرياض أيضاً أما إنت خليك مسئول قوات مكافحة الشغب ( ناس السوق الأسود) و ( الخدرجية ) كان كتروا كان قلوا ... إنت مسئول من ضبط السوق ، والأيام ديل الطماطم مارقة ورخيصة شد حيلك ساكت ، أماحقيبة الزراعة بالحزب مافي أولى من المهندس بابكر عوض الشيخ ( هلالاب طيبة الطيبة ) طبعاً كل هذه المقترحات إذا لم يعتمدها الأستاذ الأمين جيفارا وأركانه ( تصبح بندق في بحر ) ، صراحة عيب على أهل السودان ألا يكونوا سلة غذاء العالم بعد هذا الدعم العربي السخي في مجال الإستثمار ، وبحمد الله هذا العام المطر وفير ونتمني أن يعود مشروع الجزيرة لسالف عهده وأن نرى الإستثمار في مشروع النقع الزراعي وفي غربنا الحبيب والشرق الخصيب والشمال الحصيف والجنوب الوريف ، نعم آن الأوان لبلادنا أن تضع السياسة الإقتصادية الراشدة التي تجعل عودة الطيور المهاجرة أسهل من شربة ماء من نهر النيل وأهلنا كرام والكريم عند المسرة يتذكر من مد له يد العون من الأبناء والأشقاء ولله در القائل *** إن أولى البرايا أن تواسيه .... عند المسرة الذي واساك في الحزن
*** إن الكرام إذا ما أيسروا ذكروا ... من كان يألفهم في المنزل الخشن
و ماقاله الرئيس البشير عند إفتتاح قناة تلفزيون الشمالية بأن الدولة سوف تضع السياسات التي تجعل أبناء المهجر يعودوا نتمني أن يتحول ذلك لسياسة واقعية .
*** ألف تحية لليماني ود الحبشية
لا أخفي إنحيازي لمصلحة السوداني في بلاد الغربة خاصة ناس الليموزين وأعتقد ذلك شعور كل أبناء السودان وهذا الترابط نعمة نحمد الله عليها ، قبل أيام إستوقفت سائق ( دباب ) لمشوار ، الدباب يامحجوب على من هلالاب قوز جبة بالمتمة ، هو ودعم الركشة لكن كرعيه أربعة وزي القلاب الصغير ، وأكتر من كدة يشرح ليكم فيصل الأقرع عشان ناس جدة أدرى بدباباتها ، المهم شفت الزول أسمر وسعدت بالركوب معه فكانت لهجته أحياناً سودانية ومرة عربية ، فقلت له من وين في الأهل !! فأجابني ضاحكاً أنا عارفك فاكرني سوداني وغيرك كتير ، وأنا أتشرف أن أكون سوداني إسمي جمال من اليمن ولكن عشت في السودان وأزوره بإستمرار لأن شركتنا في جدة تعمل في مجال إستثمار السمسم ، وأنا أزور السودان من أيام نميري ، فقال بصراجة إنتوا عندكم طيبة ودين يحسدكم عليها كل العالم !! وأضاف زرت السودان أيام حكومة البشير كانت تتشدد في خروج العملة الصعبة من البلد وأنا كنت خارج من المطار ومعي عشرين ألف دولار فسألني مسئول الأمن عن الإقرار المكتوب لهذه العملة وقلت له ليس معي أخذني لضابط كبير وعندما شرحت له الموقف قال للعسكري يا أخي خليه يمشي دا ضيفنا !! ولقد هزت هذه الكلمة كياني وجعلتني أحبكم أكثر ، كما أنني كنت أزور بعض عوائل أصحابي وصاحب المنزل غير موجود فتستقبلني زوجته وتقوم بضيافتي وهذه الميزة نفقدها في كثير من الدول العربية والإسلامية ، ثم أضاف ضاحكاً ... أنا جدي لأمي من أثيوبيا وكنت أجلس مع أصحابي في القضارف ومعنا ضابط كبير يجلس بكل تواضع مع البسطاء ونأكل البوش والكمونية مع بعض ولكن عندما أغيب عنهم يقولون ( الليلة جمال ود الحبشية مشى وين !! ) وحينها وصلت محطتي المقصودة ورددت في نفسي ألف تحية لجمال ودالحبشية ولو كنت وزير الداخلية كان أديتك الجنسية .
*** إعجاز القرآن في علوم الطيران
يقول عضو مجلس النواب الفرنسي الدكتور جرونييه إنني درست القرآن وتتبعت كل الأيات التي تتحدث عن العلوم الصحية والطبية والطبيعية فوجدتها تتطابق تماماً مع معارفنا الحديثة فأسلمت لأني علمت أن محمداً أتي بالحق قبل أكثر من ألف سنة ( صلوات ربي وسلامه عليك ياحبيبنا يارسول الله ) ، والقرآن هو معجزة الله الخالدة التي تنتظر من يتدبرها ليقدم للإنسانية الفائدة الكبرى ، ولو نظرنا لعلوم الطيران نجد أن القرآن لفت نظر أبناء الإسلام لصناعة الطائرات وإرتياد الفضاء ، فالأية 79 من سورة النحل تلفت نظر المسلمين للتفكر في علوم الطيران في قوله تعالى ( ألم يروا إلى الطير مسخرات في جو السماء مايمسكهن إلا الله ) ويقول علماء اللغة أنه عندنا يكون الحديث عن الجماد في معظم الآيات يرد ذكر إسم الجلالة ( الله ) أما ذكر الرحمن يرد حينما يكون الحديث عن الكائنات الحية كما في سورة تبارك ( أو لم يروا إلى الطير فوقهم صافات ويقبضن مايمسكهن إلا الرحمن إنه بكل شئ بصير ) وكلمة صافات لأن الأصل في حركة الطيران صف الجناح ( التحليق ) وهي تدل على السكون وعدم الحركة لأن الطيران يكون بفعل التيارات الهوائية يمسك الرحمن الطير أن يقع على الأرض بفعل الجاذبية ، وكلمة ألم يروا دعوة للتفكر وإكتشاف وسائل للطيران وآلاته التي تجوب الآفاق مثل الطيور ، وعندما تحدث القرآن عن خلق الخيل والبغال والحمير لتركبوها وزينة ختم الآية بقوله ( ويخلق مالا تعلمون ) ومما لاشك أن كل المواد الأولية والإنسان الذي وفقه الله لصنع الطائرة كل هذه من خلق الله وصنعه ، وتحمل أثقالكم إلى بلد لم تكونوا بالغيه إلا بشق الأنفس ، والمغتربين يشيلوا ويخمخموا في الشنط الهدايا وكان ماربنا فتح عليكم بالطائرات كانت الحمير ( جاها دبر ) بفتح الدال والباء ، وأول من صنع طائرة هما أخوان من أمريكا (أورفيل ورايت ) عام 1903 وطارا على إرتفاع 100 متر لمدة ساعة وربع ، أما أول من حاول الطيران من المسلمين هو عباس بن فرناس في الأندلس عام 880 حيث غطي جسمه بالريش وصنع لنفسه أجنحه وطار من قمة جبل لمدة 10 دقائق ووقع كسر ظهره وجلس 7 سنين ( عضيرة ) وتوفي رحمه الله عام 887 بالمناسبة السبب في سقوط عباس بن فرناس ( بعد القضاء والقدر ) لأنه ماعمل لنفسه ضنب عشان يحفظ له التوازن !! لذا لزم التنويه .
*** خاتمة قبل الوداع
الحمد لله شعب السودان يتفاعل مع القرآن في كل مناحي حياته وحلقات الذكر في المساجد بعد صلاة الفجر أو بعد صلاة المغرب ، ومن طرائف أهل المتمة عندما كنا طلاباً في شندي الثانوية كنا نحضر يوم الخميس للمتمة بالبنطون ( قبل أن يتم عمل كبري البشير ) وكنا نجلس لحلقة التلاوة بالمسجد العتيق بعد صلاة المغرب ومعنا الإخوة إبن الوهاج وعثمان السيد ( إن شاء هسه وظيفتهم وظيفة الجنيات لي حدهم ) أول حاجة إبن الوهاج موظف كبير في الأمارات وعثمان السيد مدير قسم القلب بمستشفي أحمد قاسم ( شقيق المدرب المعروف محسن سيد ) يعني لو عندكم واحد حبوبته عندها تعب قلب يمشي لي عثمان طوااااالي ) هومابقصر لكن ماتجيبوا سيرتي مع العلم أن هذا الثنائي من أحباب الرحيق ، معليش سرحنا ياشباب ... كان شيخ الحلقة مولانا الفكي أحمد عبد الماجد ( الضريري ) عليه رحمة الله ، الذي إسترد الله منه نعمة البصر وهو صغير ، وكان يتجاوب مع التلاوة الجميلة ويهتز طرباً ولكن لو غلطت ممكن تجيك ( لبعة بالبسطونة ) وكان معنا عمنا الشيخ عثمان عيسى (عليه رحمة الله ) وقرأ المدثر بالسين فقال له مولانا الضريري بعنف ( أمرق لسانك في الثاء... لسانك لسانك ) طبعاً أهلنا الجعليين مابرضوا ( النهرة قدام الناس ) فقال الشيخ للضريري ... عليك الله يامولانا ...هسه قول مرقت لساني ( لامن ) وصل الواطة دي إنت جايب ليه خبر ؟ مجرد سؤال ... وإلى أن نلقاكم في مفكرة قادمة نترككم في حفظ الله ورعايته ، وكما يقول الحبيب محمد الفاتح ( كتاحة ) أقعدوا بالعاااااافية .
امسح للحصول على الرابط
بواسطة : محمد عثمان الجعلي
 12  0
التعليقات ( 12 )
الترتيب بـ
الأحدث
الأقدم
الملائم
  • #1
    تاج السر محمد صالح بمعونه عبد الكريم 01-17-2017 01:0
    تحياتي أحسب اني اعرفك تماما لكن الآن وصلت لجهالتي بك لك الود والتحايا ومزيدا من الابداع مع امتناني تاج السر
  • #2
    ابو حازم 01-12-2017 02:0
    لك التحية يا جعلينا وانت تعود مذكرا بقفة الملاح نسال الله لها العافية والامتلاء كما كانت في السابق ويوشيلوها اتنين من اضنيها.
    بالنسبة للطيران وعباس ابن فرناس بقول للحبيب عز الدين ان المريخ قدر طار مرة بالصدفة وتاني غلبو هل معنى ذلك ان استلف فكرة ابن فرناس، اعملو ليكم ضنب وطيرو تاني عشان تثبتو لينا انكم فعلا استحقيتو الشكرة.
    تحياتي لكل ناس المتمة وبمناسبة حرف الثاء كان معنا واحد في المدرسة بنطق الثاء سين والاستاذ كان بشاكلو فيها بقول ليه طلع لسانك، كان بطلع لسانه بعد ينطق الحرف هههه.
  • #3
    بابكر عوض الشيخ 01-12-2017 01:0
    والله يالجعلي حزب قفة الملاح ده بجيب هوا عديل وبعدين محبة أهل السعودية ومن يقيمون فيها للسودانيين أمر طبيعي وغير مختلق وقد ذكرتني قصة اليمني أحد أخواننا السعوديين بالمدينة والذي سألني عن مكان ما يريد أن يصل إليه أوقفت سيارتي على جانب الطريق ونزلت ثم وصفت له الموقع وصفا دقيقاً وسأل أكثر من ثلاث أشخاص ولم يدلوه على الموقع وبعدها قال لي يازول ((الجمال موجود في كل مكان لكن الجمال الأصلي في السودان)).
  • #4
    ابن الوهاج 01-12-2017 11:0
    يا سلام يا جعلينا على مقالك اليوم .. لكنه عجيب .. يضحك و يبكي.. يرفع فووووق و يوقع ..يفلق و يداوي.. شكرا" على انعاشك لذاكرتنا و أرواحنا بتذكيرنا بحلقة الفكي أحمد عبد الماجد الدخ الضريري أبو ظر.. ما أنسى في تلك الحلقة يوم واحد جا قال عندو غنماية ضايعة و عايز الفاتحة .. الشيخ قال لي واحد أقرا سورة الشمس و نحن نقول وراه "جمعت" .. وبدا يقرا : و الشمس وضحاها و نحن نقول "جمعت" .. و القمر .. جمعت .. الى أن قال : قد أفلح من دساها و قد خاب من زكاها و هنا قال الشيخ : وقف وقف والله الغنماية دي ما تتلقي لي يوم القيامة.. شكرا" أبوناصر يا دوب عرفت اننا متعلمين و ما أدروباتية ..
  • #5
    سيف الدين خواجه 01-12-2017 10:0
    حبيبنا الجعلي حياك وبيك الله اليوم متعه جد اما قفة الملاح موزير للاقتصاد اول حاجة اعملها اجعل كل بيت ياكل من داخل منزله جميع الخضروات وما فاض يبيعه للسوق بهذا يكتفي اي زول واجعل كل اسرة تربي الدواجن في منزلها توفيرا للجهد فالاقتصاد تدبير وتفكير وعلي البشير ينقطنا بسكاته ما قتل الانقاذ الا الكلام !!!اما العالم الفرنسي فكل من يقرا القران بتدبر سيسلم والمسلم سيفتح الله له تاملات عجيبه وما اكثر غفلتنا وانظر(وانزلنا الحديد فيه باس شديد ومنافع للناس )اتضح ان الحديد ليس من اصل الارض بل وافد عليها واتظر (اذا الصبح تنفس ) هل تصدق علميا كل هوواء الارض يتجدد فجرا وص\ق الرسول الاعظم اذ يقول (لا يشبع منه العلماء ولا يخلق علي كثرة الرد) كل شئ في الفرقان ولكن نحن من قصر وسبقنا الي كنزنا العقلي والقلبي والوجداني !!!بالمناسبة عثمان جميل زول طاهي رهيب يدو طاعمه ولسانه اطعم وهو من اظرف المريخاب مع الظرف فيهم قليل !!1وانظر لبداية العالم كل نجمات المجتم لبسن الابيض تفاؤلا ببداية العام كما قالت احداهن (هذا لون التفاؤل والحياة والحب ولا يمكن البس احمر لون الدم والموت )
  • #6
    ابوحسن 01-12-2017 10:0
    لك التحية استاذنا محمد عثمان زادك الله علما اخونا الجعلي مفكرة مفيدا لامة الدين والعلوم والسياسة ولكن قفة الملاح حاجه تانية هم كبير علي جميثع الاطراف بس الحكومة اتاخرت كتير فيه شديد سبعة وعشرون عاام في السلطة ولم تستقر قفة الملاح لماذا لماذا هل هي مقصودة ام مشغولة في الهموم الذاتية من بعض الذين وكلت لهم الامانة في سودانا العظيم برجاله الشرفاء فيه
  • #7
    ابو عمار 01-12-2017 07:0
    الحكومة لو قدرت تؤمن للناس قفة الملاح ما قصرت لكن حكاية نكون سلة غذاء العالم دي صعبة شديد ونسمع بها من منذ نصف قرن نحن مفروض نكون مستودع العالم للغذاء مش سلة غذائه.
    واحد من الاهل مغترب 17 سنة متصلة وكلما يسالوه متين ماشي السودان يقولهم رمضان الجايي احد اخواله ساله اها يازول متين جايي امك كبرت وابوك تعب خلاص ووو فقال له ان شاء الله رمضان الجايي فرد خاله (والله رمضانك دة الا يكون رمضان المنو والقيامة).فاخاف يكون تامين قفة الملاح يكون هكذا!!
    الجعلي الليلة دخلتني في (حزب القفة ) يعني (شيلتني القفة مع الجماعة) كما يقول السودانيون في مجالسهم وكما اسمع من اهلي بالدامر وقراها وحلالها يقولون : (فلان شايل القفة) يعني قاعد في المجلس وماعارف حاجة. ويقولون (فلان دة قفة ساكت) يعني طيرة وداقس وماناقش حاجة.
    واذكر ان احد بسطاء واميي قريتي الجباراب بالدامر كان يداعب صديقا له متعلم ومثقف وقاري تلات جامعات جوبا والاسلامية والفرع ولكنه بسيط ومتواضع لحد بعيد ويصفه بانه (قفة ساكت) واخونا المثقف يضحك حتى تسيل دموعه .
    قفة الملاح دي الحكومات الوطنية كلها (61) سنة ماقدرت تسهلا على المواطن السوداني باقيلك نحن المغتربين الغلابة ديل بنقدر عليها نحن لو مشينا قعدنا في السودان كيس الملاح بتاع الورق بجرسنا خلي القفة واخاف القفة فاضية تجرسنا !!
    خطوة خطوة ممكن الناس تجهز القفاف الفاضية قفة كل مواطن او كل تلاتة في قفة نمزق فاتورة القفاف ثم نفكر بعد ذلك في كيف تملاها بالملاح كان ما نبقى خسرنا القفاف في الفاضي!!
    نقوم نفشل في الوزارة بتاعة القفة دي الجماعة ينتقدونا يقولا علينا (ديل قفف ساكت) و(ديل شايلين القفة ساكت) ولا يقولو علي النائب العام المسكتني ليها دي( دة قفة ساكت ).!
    في السودان بعد تشتري حاجاتك وتملا الكيس وتدفع القروش وتمشي يلحقك البائع بقولك (حق الكيس ماديتني ليهو)!!
    يا حليل قُفاف الحلبيات الدلاليات الكانن بجن عندنا في الحلة قفاف كبار وفيهن كل شيء تلقى الاواني والعدة واللحمة احيانا والحلاوة والملابس والنعلات ولعب الاطفال والخضار وكذلك قفة حبوتنا المرحومة بت عبد الله جمر .
    البسمع كلام الحكومة عن قفة الملاح ومشروع الجزيرة وغيرها يقول الناس يادوب استلمو السلطة امس وليس قبل 27 سنة !!
    قبل يومين لاف في سوق الخدار بجوار العثيم بالطحاء وجدت الطماطم راقدة هبطرش الكيلو ريال تقريبا وتحسرت على اهلنا بالسودان المشتهين الطماطم وقلت في نفسي لو في طريقة الطماطم دي تمشي ليهن بي هناك على الاقل يشبعو فيها !!
    جمال ود الحبشية دة لو دققت معاهو شوية تلقاهو عندو جنسية سودانية ولو دققت اكتر يمكن يقولك لو حد عاوز جنسية بساعدو يطلعها !!
    جمال ود الحبشية دة لو دققت معاهو شوية تلقاهو عندو جنسية سودانية ولو دققت اكتر يمكن يقولك لو حد عاوز جنسية بساعدو يطلعها !!

    وبمناسبة شيخ الحلقة عندنا قريبنا كان مواصل تعلم القرآن الكريم والفقه مع شيخنا فكي حسين ود قرشي بجامع امبوري بالجباراب ولما تزوج انقطع تماما عن المسجد فارسل اليه شيخنا فكي حسين من يسأل عن سبب انقطاعه عن المسجد فلما وصله وبلغه كلام الشيخ قال له (والله شيخنا فكي حسين براه لو عرس تاني ما يجي الجامع).
  • #8
    فيصل الاقرع 01-11-2017 07:0
    سلام جعلينا وحباب قفة الملاح هي اقصد حباب المفكره التي طارت من المعراكه والتكل والدباب و حلقت في علوم الطيران ثم هبطت بسلام في حلقة الفكي احمد ولك الشكر في تفسير الايات والتي شخصيا كنت اعتقد ان المقصود هو الطيور لا الطائرات اما بخصوص الاستثمار العربي في مجال الزراعه والله يا الجعلي ما علي شاننا نحن ولكن خائفين علي رقبتن دي من الجوع لانه اماما امريكا عرفوها ما ليها امان لكن برضو الخير بلحقنا
    ولك التحيه ولكل اعضاء حكومة قفة الملاح
  • #9
    الامين عبد القادر السمانى 01-11-2017 05:0
    التحية والسلام اخوى الجعلى وعدت اليوم لقفة الملاح وهى فعلا هاجس الشعب السودانى من يصحى همه فى قفة الملاح ونتمنى ان تراعى دولتنا وتخفف على هذا الشعب المقهور من السوق وسياسة الدولة --
    ومرحبا بالمهندس بابكر عوض الشيخ وودالعقيدة رجل المهام الصعبة ( الاسود والخدرجية ) السوق كله وزول الاقتصاد سيف الدين خواجة واخونا عثمان جميل
    وصاحبك ود الحبشية زول فنجرى واليمن الى الان لهم مواقع فى اسواقنا رغم سياساتنا التى ابعدت الكثيرين من السودان --
    وعضو مجلس النواب الفرنسى ربنا هداه للاسلام ونعمة الاسلام ولكن هل سوف يستطيع ان يغيير فى تركيبة الشعب الفرنسى ودعوتهم للاسلام ؟؟؟
    اليوم المفكرة غزيرة بحق وتحتاج لوقفات كثيرة
    ودمتم للوطن فى حفظ الرحمن ورعايته
  • #10
    عزالدين ابراهيم عبدالرحمن 01-11-2017 05:0
    كده يا الجعلي انا ياداااااااااااااااب عرفت الهلال دا يقع كل مره من دوري الابطال كدي مالو اتاريكم استلفتو فكره عباس بن فرناس وسويتو ليكم .... عشان كده كل سنه واقعين كاسر ضهركم وضهرالكوره السودانيه حبوباتنا قالن با الجعلي الشر بره وبعيد خليكم في وقوعكم دا ونحن استفدنا من عباس بن فرناس عشان كده ما عملنا لينا.....وسلام يا بتوع عباس بن فرناس
  • #11
    عزالدين ابراهيم عبدالرحمن 01-11-2017 04:0
    من قبال ما اكمل القرايه سودان شنو الببقي سله غذاء العالم دا كان السودان قبل الانقاذ الان الجزء الاسفل راااااااح (الجنوب)الجزء الغربي حروب ومليشيات وما عارف حميدتي وبطيخ ومشروع الجزيره باعو منو مليون فدان للسعوديه شن فضل في السودان يا اخونا الجعلي عشان تبقي سله غذاء بس ام بده او الكلاكله حتي
    وما دام تم تعيني وزيرا للشئون الدينيه سوف استعير من الهيئه القضائيه سلطتها لسويعات واصدر القرار الاتي نصه
    1- القتل رميا بالرصاص لكل من ينتمي الي حكومه الاخوان من بشه الي اصغر جندي ينتمي اليها
    2-مصادره كافوري وكل املاك اي مؤتمر وطني كل الاموال (ماليزيا الامارات سويسرا كل بنوكه العالم )
    3-تزويج نسائهم الي اخوانا في الجنوب عشان يكونو المؤتمر الطني في دوله الجنوب (وراكم وركم )
    بعد كده نقراء المقال يا جعلي نشوفك كاتب شنو ؟؟؟؟
  • #12
    منعم ابوناصر 01-11-2017 04:0
    تحياتى جعلينا مفكره مفيده وماده دسمه وشملت الهم الدائم وهو قفة الملاح التى سوف نتطلع لها فى اول اجتماع مع الحزب الحاكم طبعا دا بعد تسجيل الحزب 0000 جميله قصة ابن الحبشيه وهذا هو السودان والسوادانين وقبل يومين ذهبنا الى مجمع الملك فهد الطبى لزيارة اخونا غسان ابن المهندس بشرى سعيد الذى الم به حادث مرورى نتمنى له الشفاء وعند مدخل المجمع وفى بوابة التفتيش سأل العسكرى اين تذهبون شحرنا له فقال الاثبات بعدين رجع وقال كلكم سودانين قلنا نعم قال تفضلبو يعنى بدون يشوف الاثيات وهذه نعمه نحمدالله عليها كثيرا نتمنى ان تحافظ الاجيال على تلك السمعه الطيبه 00000ومعلومات جميله ومفيده عن الاعجاز العلمى 000ومعلومة ابن فرناس الحين اكتملت عندنا اول كانت ناقصه مع تحياتى لاهلنا ناس المتمه وعرفنا ابن الوهاج طلع دفعه طيب دكتورعثمان السيد تركت ليهو شنو اكتر من كده مجرد سؤال
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019