* الأندية أعدت نفسها للموسم الجديد بما تراه مناسباً فى الإحلال والإبدال
* وحسب إستطاعتها
* فكثيرٌ من الأندية عينها بصيرة ولكن إيدها قصيرة
* حتى بعض الأندية التى كنا نظن ان إيدها طويلة
* لمن جينا لى نقطة الأجانب لقينا إيدها مضقلمة ولا تبعد كفة يدها عن أبطها كثيراً
برغم ان تلك الأندية متأبطة تمثيلية الغنا والثروة والقوة المالية الضاربه
* ففى موضوع الأجانب القوة المالية الضاربة ضربت طناش وأتت بأبوتلاتة بى
الف
* وشيل وما بنختلف
* المهم
* الأندية أعدت ما إستطاعت ممنيةً النفس بظهور مشرف فى الموسم الجديد
* فهل أعدت الصحف الرياضية نفسها بما إستطاعت كى تظهر بمظهر أكثر
تشريفاً للموسم الجديد ؟
* أعتقد بإمكان الصحف أن تعد نفسها للموسم الجديد ومجانى
* فقط إذا وضعنا هدفاً أمامنا مقدساً
* نحترمه ونتخذه شعاراً لانسقطه من الحسابات مهما كان
* ذلك الهدف هو التحلى بالخلق الرياضى
* يعنى نخلى أخلاقنا رياضية
* فالقارئ أخلاقو هنا
* شايفين اصبعى وين !
* القارئ أخلاقو فى راس نخرتو
* ويحتاج لكلمات تفرق عليهو شوية
* بقدر المستطاع تبعد الكتابات عن المهاترات وبعض الإساءات التى تتسرب
أحياناً بين السطور
* فالإعتراف بالآخر هو رقى فى الفهم
* وإحترام الرأى الآخر تقدم فى الفهم
* خاص صفحة الأحمر الوهاج
* والإعتراف بجهود القدامى ممن قادوا النادى وقدموا له وفاءاً لهم وإحتراماً للكيان
* هذا لايمنع المداعبات البريئة والفخر بالنفس والكيان
* لمن نقول بطل المحمولة جواً يبقى بنفخر بأنفسنا ولا نقصد لإساءة لغيرنا
* ومثلاً إذا قلنا الشيك رجع مثلاً وأبو ستة بفتش فى ابو كسكته
* يبقى بنداعب إخوتنا الأهلة وبنملك الأهلة الشرفاء حقيقة القوة المالية الضاربة
* عشان يعرفوا فعلاً إنها ضاربة
* وطماطم الملاح تظل طماطم ملاح وممكن تتفخ أكتر بس لا يمكن تبقى طماطم
سلطة
* ممكن نشاغل ونقول الهابط صاعد لكن م ممكن نشئ إطلاقاً
* إنها دعوه لنرتقى بأخلاقنا الرياضية
* فكل الخسائر يمكن تعويضها إلا خسارة الأخلاق
* تعالوا نحافظ على أخلاقنا الرياضية وعلى أخلاقنا السودانية
* وبعد داك اى خسارة بتتعوض
* وإن طال الزمن
* فالحرامى لو حاقظ على أخلاقو ما كان سرق
* والزانى لو تمسك بمكارم الأخلاق ما كان زنى
* والمختلس لو إحترم منصبو وتمسك بأخلاق البلد ما كان إختلس حق الشعب
* يبقى نحافظ على أخلاقنا والباقى ملحوق برغم السوق والدخل الممحوق
* أيها الناس
* الهلال مهم بالنسبة لينا
* فلولا الهلال لما إستمتعنا بلذة شهد مانديلا
* خاص صفحة الأحمر الوهاج
* ولما شلنا كاس مانديلا فى نيجيريا ولم نطف به أنحاء نيجيريا
* ولم نكاوى بندل يونايتد
* ولكن كنا نتحرق شوقاً لمعانقة أرض الوطن والتأمل فى عيون الأهلة الزرقاء
* والمريخ بالنسبة للهلال مهم شديد
* فهو السبب الأساسى فى حرج الهلال من صفره الدولى
* ولولا المريخ لما جرى الهلال خلف الأميرة السمراء تمنية وتمنين سنه
* يبقى خلونا نحترم بعضنا فى مناكفات بريئة
* ولكن دعونا نحترم أنفسنا قبل ان نوقر الآخرين
* البلد ما مستحمله
* الفيها مكفيها
* المهم
* قنبلة كردنه طلعت فشوش
* بس بعد قفل باب التسجيلات الناس إحتارت
* منو هو الأكبر من ساماتا
* هل هو أوكراه
* أم جابسون
* أم شيبولا
* أم تيتيه
* أم اب ستة يا اب كسكته ؟؟؟
* أيها الناس
* خاص صفحة الأحمر الوهاج
* يقولون إذاأردت أن تطاع فأمر بالمستطاع
* والأبو البضغط أو لاد و شدييييييييييييد
* بجى اليوم البقيف قدامو فيهو واحد من أولادو ويقول ليهو ابيت
* أبييييييييييت
* أبيت دى بتقوى البقية على الخروج عن القنوع وتبذر فيهم روح التحدى
* يبقى فعلاً إذا أردت ان تطاع فأمر بالمستطاع
* أيها الناس
* إن تنصروا الله ينصركم
* أها
* نجى لى شمارات والى الهرتوم
* أكان شفت يا والينا
* الناس تنق وتنتنق فينا
* الأدوية اللينا
* وناس تقول وووب علينا
* وناس تقول الله لينا
* وناس تردد ما معقول ما معقول يا والينا
* وناس تقول الأدوية المنقذة للحياة أهم شئ بالنسبة لينا
* الأدوية المنقذة للحياة قول جبناها يا لينا
* هى وينها الحياة قول لينا !!!!!
* خاص صفحة الأحمر الوهاج
سلك كهرباء
** ننساك كيف والكلب قال القحة ولا صمت الخشم النستنا قولة هو ذاتو..وهز
ضنبو وجرى فرحااااااااااااااااان؟!!!
والي لقاء
سللللللللللك
مرات كتاباتك فيها التعقل ممزوج بالخبث الساخر والغيره للهلال العظيم ،،،، اتمني ان يكون الوطن في حدقات العيون أولاً ونترك هذا التعصب المميت والمدمر فالتكون ثوره حقيقه صادقه لصحافة رياضيه فابداها يا سلك ونحن الهلالاب ح نكون عوناً لك ،،،،بس تكون صادق وأمين
والهلال والمريخ لهم مقدره كبيره بالوصول والفوز بالأميرة الزرقاء بل اكثر ولكن الجهل والتعصب القبلي بين الناديين عصيب علي الهدف بل أعظمها
في التعصب والجهل ،،،الصحف الرياضيه ،،،،
اخوك الهلالابي
ياسر الامين ابراهيم. ( الدوحه)