كل الذين يقولون : (لالوب بلدنا ولا بلح التانيين) واضح إنهم (ما ضاقوا بلح التانين) ..
* الهلال لما يشيل من المريخ بيشيل (البلح) ، والمريخ لما يشيل من الهلال بيشيل (اللالوب) ..
* ولالوب بلدنا عمرو ما بقي (بلح الشام) ..
* الشركة الصينية في الهلال أوشكت أن تنهي (الجوهرة الزرقاء) ، والشركة الصينية في المريخ (لا حس لا خبر) ..
* حتى الصيينين عندنا بختلفوا عن الصينيين عندكم ..
* الصينيون عندنا بشتغلوا بشهية مفتوحة ، والصينيون عندكم بشتغلوا بدون نفس ..
* حتى في (الصيني) هنالك (صيني أصلي) و(صيني صيني ساكت) ..
* معروف في فصل الشتاء النوم لا يحلُو إلا عند الصباح ..
* خصوصا لو عندك شغل أو مدرسة في الصباح الباكر ..
* النوم ما ببقي ليك سمح إلا الصباح ..
* في ناس لما تجي تصحيهم الصباح إلا تجر منهم (البطانية)..
* في نوع لو جريت منو البطانية بيصحى ، وفي نوع لو جريت منو البطانية بيقوم يتغطى بـ(الملايا) ..
* ما يحدث في (صباح الشتاء) بيذكرني المريخ في التسجيلات ..
* الهلال شال (البطانية) من المريخ قام المريخ إتغطي بـ(الملايا) ..
* شلنا منهم شيبوب وأبراهومة وجابسون وأوكرا قاموا رجعوا علاء يوسف وكلتشي وباسكال ..
* شلنا البطانية والجماعة رجعو للملايات ..
* وغايتو جنس غايتو ..
*عندما (يتعصر) جمال الوالى في التسجيلات يطير إلي (جدة) ..
* وعندما يعود الوالى من جده يجد الهلال (كد ووجد) ..
* وبعيد عن هذا .. ورد في الأخبار أن صلاح أدريس هو الذي دعم تسجيلات المريخ ماليا ..
* ومشكلة المريخ ليس في الدعم المادي وحده بل في الدعم الفني أيضا ..
* فريق بيشطب أبراهومة (الصغير) عشان يسجل باسكال (الكبير) قطع شكل محتاج لزول يدعمه فنيا ..
* إذا إكتملت الجوهرة الزرقاء وحقق الهلال كأس أفريقيا لن يملك صلاح أدريس خيارا أفضل من أن (يجمع أهلى شندي مع المريخ) ويعمل منتخب يسميهو (المريخ تكعيب) ..
* عدم نجاح الكاردينال هو هدف إستراتيجي بالنسبة للأرباب ..
* إذا صح تحالف (العديل والحبيب تكعيب) فذلك من مصلحة ..
* حتى لحظة كتابة هذه السطور لم تنفجر قنبلة تسجيلات الهلال والتى يتوقع أن تنفجر في أي لحظة ..
* ولكن للضمان نقول : يحتاج الهلال لمحترف (لعاااااب ومغمور) وذلك لأن المحترف (اللعاااااااب ومشهور) لن يكون له دافع ليقدم المنتظر ..
* النجوم المشهورين لا يخدمون الكرة وفي الغالب لا يشكلون الإضافات المطلوبة لأن معظمهم يتعالى على الكرة ..
* وأندية الخليج التى تعاقدت مع أسماء كبيرة في عالم كرة القدم كان الهدف من ذلك (دعاية وتسويق) ..
* والهلال يبحث عن إنجاز وليس (شهرة) ..
* ولذلك نرجو أن يركز الكاردينال على أجانب (لعابين ولهم دوافع ورغبة للظهور) ..
* قمة (الرعب) أن تفكر في إعارة مصعب عمر بعد أن جهز شعوره للشطب ..
* مصعب عمر جهز شعور للشطب قاموا قالوا يعيروهو خوفا من الهلال ..
* صحيح إحنا بنسجل (مواهب) من المريخ لكن ما لدرجة مصعب عمر ..
* ناس المريخ بقوا قبل ما يشطبوا بيعملوا ألف حساب ..
* الكاردينال أدخل في نفوس المريخاب خوف لن يخرج بأخوي وأخوك ..
* الشطب في المريخ بقى أصعب من التسجيل ..
* وبالمناسبة .. المريخ هو أول نادي في العالم يشطب لاعب ويعمل معه مخالصة ثم يوقع معه عقد بأن لا يعود للسودان مجددا ..
* والله صحي ..
* فعل المريخ ذلك مع باسكال لحظة شطبه في العام الماضي ..
* الغريبة ما قدروا يعملوا العقد ده مع أوكرا وجابسون ..
* حاجة تكسف ..
* عاد قبل أيام نجم الملكية جوبا الأسبق ومايسترو شبيبة القيروان السابق ورمانة الهلال الحالي (شرف شيبوب) من القاهرة سليما ومعافى ..
* شيبوب بعد أن تلقى العلاج على يد أكبر أخصائي في الوطن العربي دكتور أحمد عبد العزيز عاد الى الخرطوم ووجد (زواج بوي في وشو) ..
* (رقيص شيبوب في عرس بوي) أكد شفاء نجم شبيبة القيروان من أى إصابة والحمدلله ..
* بالمناسبة .. شيبوب فترتو في الهلال ستكون (14) سنة ..
* والـ(14) سنة دي إحنا قررنا يلعب لينا فيها أربع سنوات وباقي السنوات العشرة يكون مصاب ..
* هكذا قررنا ..
* وأي زول طبعا حر في (قراراتو) ..
*عشرة سنين سنستحمل إصابة شيبوب والأربعة السنين الأخيرة سنستفيد منه داخل الملعب ..
* ما مستعجلين إحنا ..
* وجابسون ذاتو بنديهو تلاتة سنين إصابة وبعد داك يلعب لينا سنة ويمشي ..
* ما عندنا مشكلة ..
* زماااان قلتوا لينا الشغيل مصاب ولما سجلناهو شال نجومية أول موسم مع الهلال ولم يزل بكامل صحته وعافيته ..
* يبقي إحنا إصاباتكم بنعرفها كويس ..
* هسه رمضان عجب ده شكلو كده عندو إصابة في (الساق) ..
* رمضان عجب (مشيتو) ما عاجباني ..
* من خلال (مشيتو) بتحس إنو عندو إصابة ح تظهر بعد سنة ..
* ولو ما متنا أنا بذكركم بعد سنة ح تقولوا رمضان عجب مصاب ..
* مع إنو أنا شايف الكاردينال ظبط (كبري) عجب ولم يتبقى إلا الإفتتاح ..
* (وكبري) عجب شهر ستة ح يخليكم تعملوا (70) فحص و(34) إستئناف وفي النهاية ما ح تلقوا حاجة ..
* أكبر غلط إرتكبه المريخ هو (تقديم فحوصات في شيبوب بعد أن انتهى عهد اللقيمات) ..
* فحوصاتكم دي لو كانت في زمن اللقيمات كان ممكن تجيب نتيجة ..
* لكن معليش اللقيمات مع رفع الدعم مستحيل تكسبكم شكوى ..
* المهم ..
* إحنا واولاد حلتنا إخترنا الرقم (6) لجابسون في الموسم الجديد ..
* وأبراهومة بنديهو الرقم (5) ..
* بنديهو الرقم خمسة عشان ما يكون بعيد من جابسون ..
* يكون جمبو .. جابسون (6) وأبراهومة (5) (جمب بعض يعني) ..
* أما بالنسبة للأخ غير الشقيق أوكرا فسنقدم له الرقم (10) وإن شاء الله ينفعو ..
* نوزع الأرقام من هسه عشان أى زول يكون عارف حاجاتو ..
* وعندنا رقم ح نخليهو (إحتياطي) لرمضان عجب شهر ستة ..
* رمضان عجب بأذن الله سيلعب معنا دور المجموعات ..
* فقط نطلب منه أن يدعي الإصابة ولا يشارك مع المريخ في البطولة الأفريقية حتى يضمن مشاركته مع الهلال في دور المجموعات ..
* ونركب صافنات ونجيبة (حلفاوية) وأصلو الزول بيموت والذكرى تفضل حية ..
* و..و..
* والبزرع (لو) بحصد (ياريت) يا عزو ..