• ×
الإثنين 17 مايو 2021 | 05-16-2021
محمد الطيب الامين

(طبلية) تاني ناصية في شارع ميت !!

محمد الطيب الامين

 0  0  7712
محمد الطيب الامين
* اسوأ (عشرة) حاجات في الدنيا دى (سبعة) هى :
1- الكلب البينبح فيك قدام البنات
2- والدفرة مقابل (اللقيمات)
3- وجع الضرس البيشيل بيك الليل
4- واللاعب البينط من الطابق الرابع
5- والمجنس الجنسيتو ما بتنسحب ..
* الحاجات دي ممكن تعمل ليك (رأس في صداعك) ..
* زمان كان الصداع بجي في الرأس وهسه مع جابسون ده بقى الرأس هو البيمشي للصداع ..
* وغايتو جنس غايتو ..
* جلسة قريبة من الحرم ضمت (جمال الوالى والحضري والأرباب) ..
* وكل الذين شاهدوا الصورة لاحظوا أن الأرباب قد فارق (الزي السوداني) وأصبح (سعودي) أكتر من السعوديين ..
* الصورة أكدت أن صلاح أدريس إعتمد (العُقال) كجزء من شخصيته مثلما إعتمد الكاردينال (الكسكتة) ..
* يعني تاني الأرباب لما يفاوض لاعب ح يلبسو (العُقال) على وزن (الكسكتة) ..
* وبما أن ذلك كذلك حقو جمال الوالى الشهير بـ(عزو) يشوف ليهو (كاب) ويتم الناقصة ..
* كاب بـ(الكاء) ؟؟
* بما أن معظم التسجيلات تتم داخل منزل أسامة عطا فنحن نقترح أن يسافر أسامة إلى دبي ومعه (الختم) حتى يسهل مهمة تسجيل أجانب الهلال ..
* هكذا نقترح ..
* وأى زول طبعا حر في (مقترحاتو) ..
* أسامة المفروض يعمل ليهو شنطة زي شنطة الدكاترة يكون فيها (الختم والقلم والأورنيك) ..
* وأول ما يجيهو إتصال يشيل شنطتو ويمشي البيوت عشان يتم التسجيل ..
* التسجيلات في البيوت كويسة برضو بتخلى بينا (ملح وملاح) ..
* حاجة تكسف ..
* الجميل في غارزيتو أنه من إنصار الشباب ..
* يعني أبراهومة الصغير سيكون أساسي قبل الكراسي ..
* أبراهومة هو لاعب غارزيتو المفضل وشيبوب كذلك ..
* بالمناسبة .. لازم جمهور الهلال يشوف أسم جديد لأبراهومة ..
* ممكن نسميهو (الذراع القصير) ..
* الغريبة المريخ ما فكر يسحب جنسية أبراهومة ..
* حاجة غريبة والله ..
* كان بالمرة تقدموا طلب بسحب جنسية أبراهومة ..
* المريخ لو ما شافها شينة كان طالب بحقه في (تعليم جابسون اللغة العربية) ..
* والله صحي ..
* لكن شافوها شينة ..
* كان ح يقولوا ليك جابسون إتعلم اللغة العربية عندنا عشان كده لا يحق له التسجيل في الهلال ..
* وجع جابسون وشيبوب وأبراهومة يوازي وجع الذي يفقد (حبيبته وصديقه وجُزلانه) في يوم واحد ..
* حاجة صعبة شديد ..
* بالصباح تفقد حبيبتك والنهار تفقد أعز صديق وآخر اليوم وانت راجع البيت تفقد (جُزلانك) ..
* نفس الأحساس ده يعيشه المريخاب هذه الأيام ..
* وتبكو بس .. عين قطرة وعين مس ..
* الإنسان لا يشرب (المُر بعد الحلو) إلا في حالة المرض ..
* لو عيان بتشرب (العصير الحلو) بعد داك بتشرب (الدواء المُر) ..
* وفي الاحوال الطبيعية بتأكل (الملح الذى هو مُر) وبعد داك بتأكل (الحلو) ..
* الآن تسجيلات الهلال (حلوة) وختامها سيكون احلى بـ(ساماتا أو أسالي) ..
* تسجيلات الهلال ستكون عكس ما قال التجاني حاج موسى ..
* والتجاني حاج موسى في (الريدة) شرب الحلو ومن بعد شرب المُر فكتب قائلا : (سقيني بعد الحلو مُر) ..
* وإحنا تسجيلاتنا دايرنها تكون : (سقيتني بعد الحلو حلو) ..
* بعد الحلو تانى نشرب حلو يا الكاردينال ..
* يعنى بعد (جابسون وأبوستة وأبراهومة والصادق شلش) نقوم نجيب (أسالي) ..
* والهلال لو جاب أسالي سيكون حالنا مثل حال الذى يأكل (سلطة فواكة) ثم يأكل (باسطة) ..
* كلو حلو في حلو ..
* زي الزول البيفطر بـ(مديدة بلح) وبيحلي بـ(كاستر) ..
* تسجيلات الهلال ستكتسب قيمتها بالمحترفين الأجانب ..
* لابد أن يكون المحترفين أفضل من الوطنيين حتى نحقق الأبطال التى تعتبر غاية في الموسم الجديد ..
* تبقت ثلاثة أسابيع للتسجيلات ولذلك يجب أن لا يستعجل الكاردينال في الصفقات الخارجية ..
* مزيد من البحث والتفاوض والتفاضل يمكن أن يسجل الهلال عناصر قادرة على كتابة تاريخ جديد للهلال العظيم ..
* سقف طموحاتنا هذا العام أبطال أفريقيا ..
* بل أن طموحاتنا أكبر حتى من كأس افريقيا ..
* بمناسبة الطموحات ..
* كل حاجة في الدنيا دى عندها سقف ما عدا الطموحات ..
* الطموح لو بقى عندو سقف ده معناها ما طموح ..
* والطموحات احيانا يكذبها الواقع وتعاكسها الظروف وضيق الزمن وضيق ذات اليد ..
* هسه أمسك ليك أى شافع في الشارع واسألوا قول ليهو : لما تبقى كبير عايز تبقى شنو ؟؟
* ح يقول ليك : دكتور ..
* ونفس الشافع تعال اسألو بعد تلاتة سنين ح يقول ليك : داير أبقى مهندس ..
* وذات الشافع تعال واسألو بعد عشرة سنين ح يقول ليك : داير أبقى مدير بنك ..
* ونفس الشافع تعال ليهو بعد (15) سنة بتلقاهو عندو (طبلية) تانى ناصية في شارع ميت ..
* انا داير اقول جمال الوالى لما دخل المريخ بدأ بطموحات (الاطفال) هذه ..
* بدأ داير يبقى دكتور (بطل دوري يعني) ..
* وبعد السنة الأولى قرر يبقى مهندس (وصيف دوري يعني) ..
* ولما أكمل العام التالت طموحو بقى يبقى مدير بنك (يشارك في الأبطال صحبة راكب يعني) ..
* وبعد ما أكمل العام الـ(14) فتح ليهو طبلية في شارع ميت (بقي وصيف لوصيف كأس السودان) ..
* طموحاتو ماتت قدام عينو ..
* دفع مليارات ودولارات وطابق شاخور وفي النهاية المريخ بقي (وصيف لوصيف الكأس) ..
* وصل الحال بالمريخ أن يكون (نجم تسجيلاتهم) أصغر من جمال الوالى بسنتين ..
* تخبط وعشوائية يعيشها المريخ في عهد جمال الوالى ..
* حليل أسامة ونسي ..
* الغريبة ما في زول بيقدر يقول حليل أسامة ونسي ..
* ما في ..
* حتى لو المريخ نزل دوري الأولى ما ح تلقى زول يقول (حليل أسامة ونسي) ..
* وغايتو الله يكفينا شر (المُصدي) اللمعتو الأيام ..
* ونركب صافنات ونجيبة (شكرية) وأصلو الزول بيموت والذكرى تفضل حية ..
* و..و..
* والجفلن خلهن أقرع .(مازن شمس الفلاح) ..
امسح للحصول على الرابط
بواسطة : محمد الطيب الامين
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019