• ×
الخميس 6 مايو 2021 | 05-04-2021
محمد الطيب الامين

تركوا من (كسر الفتيل) وعاقبوا الذي (شرط كرتونة الفتيل) !!

محمد الطيب الامين

 11  0  2102
محمد الطيب الامين


* من الإسئلة التي يصعب الإجابة عليها سؤال أهل دارفور القائل : (القرد برقبتو بيربطو من صلبو مالو) ؟؟
* وهو سؤال منطقي للحد البعيد ..
* لماذا نربط القرد من (صلبو) وهو يملك (رقبة) مثله وسائر الحيوانات التي لا يجرؤ احدا ان يربطها من (صلبها) ..
* والحال في الهلال يفرز سؤالا يشبه سؤال أهل دارفور والإجابة عليه تبدو عصية جدا ..
* حينما يكون الهلال بحاجة لـ(طعن الفيل) تجده يطعن (الضل) وحينما يكون الأمر محتاجا لـ(طعن الضل) فأن الهلال يطعن (الفيل) ..
* وهذا يثبت ان من أكبر مشاكل الهلال (القرار الصاح في الوقت الغلط والقرار الغلط في الوقت الصاح) ..
* وهذه مشكلة كبيرة من أسبابها (قلة الخبرة والمكابرة وقوة الرأس) ..
* وهذه الأسباب المختلفة تصنع واقعا عشوائيا تكون محصلته في الآخر (حريق القلوب العاشقة) ..
* أقال الكاردينال (كافالي) بسبب خسارة في لقاء ودي بمدنية بورتسودان ..
* والكاردينال نفسه جدد الثقة في العشري الذي أطاح بالهلال من الدور الاول ..
* علما بأن المباراة التى كانت سببا في إقالة كافالي هي تدخل ضمن استعدادات الفريق لهذا البطولة التى (طرنا منها وللعشري نصيب في ذلك) ..
* يبقي بالمنطق كده انت (شلت مدرب عشان خسر مباراة ودية استعدادية للبطولة الافريقية ولما وصلت البطولة الافريقية وطرت رفضت تشيل المدرب الطيرك مع إنك شلت مدرب خسر في الإعداد) ..
* ودي والله زي الزول البيكسر فتيل ريحة والناس بتخليهو وبتحاسب الزول (الشرط كرتونة فتيل الريحة) ..
* وإذا كان كافالي قد (شرط كرتونة الفتيل) فأن الأخ العشري قد (كسر الفتيل ودلق الريحة) ..
* كسر الفتيل وكشح الريحة فتطيب منها الأهلي الليبي ولم يبقي لنا سوا (باقيا قزاز) من ذلك الفتيل الذي كسره العشري وعاونه علي كسر الفتيل وكسر قلوبنا شلة من الهلالاب للأسف ..
* وببساطة شديدة هيثم مصطفى هو الذي أقال كافالي وهيثم هو الذي جدد الثقة في العشري ..
* لانو يا جماعة بالمنطق السبب الشالوا بيهو كافالي أضعف من السبب المفروض يشيلوا بيهو العشري إذا طبقنا شعار الكاردينال القائل : (أنا مستعد أشيل مدرب كل 24 ساعة) ..
* سبب إقالة كافالي ما منطقي ولكن سبب إقالة العشري منطقي ونص وخمسة ..
* اللهم غايتو إلا يكون العشري لسه ما كمل الـ(24) ساعة حسب ساعة الكاردينال ..
* ويا الكاردينال إختار واحد : يا ساعتك ما مظبوطة ودايرة (حجر) ويا كمان العشري قعد بأمر هيثم ؟؟
* وأنا أخشي ان تكون الساعة ما مظبوطة مع اني مقتنع مليون في المية إنو الموضوع وراهو (سيدا) ..
* علي المستوي الشخصي لا أنفي انني من المعجبين جدا بالجهد الكبير الذي بذله الكاردينال في سبيل إعمار الدار وتحديث البنية التحتية وفي ذلك (فات الكبار والقدرو) ..
* ولكن الرجل بالمقابل جعل الهلال (خفيفا) حتي حينما يكون بملعبه ووسط جمهوره ..
* طيب نجي للسؤال الأهم ..
* مصلحة هيثم شنو في إقالة الفرنسي وتجديد الثقة في العشري ؟؟
* أوريك المصلحة وين ..
* كافالي مدرب شخصيتو قوية جدا ولذلك هو طلب من هيثم ان يستغل فترته بالجهاز الفني لـ(التعلم بأدب) حتي يستفيد ..
* وقد رفض كافالي كل (نصائح هيثم التى لا تخلو من التصفية) رفضها كافالي وأنا أرجو ان لا اضطر لكشف (ما هي النصائح التى حاول سيدا ان يقدمها لكافالي) ..
* وعلي فكرة أنا بتكلم من (مصادر) مش من (جلسة قهوة) ..
* ومصادر من جووووووة جدا ..
* يعني دي وقائع يا مولانا ..
* المهم ..
* العشري زول (مطيع) بشكل يجعلك تستغرب في شخصيته المهزوزة جدا ..
* العشري ضعيف ومنفذ جيد وما زول مواجهه ..
* كافالي طفرت (دمعة من عينه) حينما قالوا له ان (اللاعب فلان) قاعد يبيع الهلال أمام أهلي شندي فيجب ان لا تشركه ..
* اي والله ..
* زول في هلالنا ده مشى لكافالي قال ليهو فلان ده ببيع الهلال أمام اهلي شندي فابعده ..
* والمصيبة التى لا يعرفها (القائل) ان كافالي سلم الكلام ده (صرة في خيط) للاعب المعني ..
* يعني كافالي بشجاعة جا وقال للاعب : (فلان ده جا قال انت قاعد تبيع الهلال) ..
* إتخيل إلي اين وصل الهلال ؟؟
* الحال في الهلال وصل درجة ان يقف (فلان) عقب نهاية مباراة الأحد مباشرة يقف في (مدخل اللاعبين) وهو يتحدث بالهاتف ويضحك حتى ضرسه الأخير ..
* زول كان قاعد جوة الملعب واول ما المباراة انتهت والناس مارقين هو مسك التلفون في (الممر) وقعد يتكلم ويضحك وكأن الهلال قد تأهل ..
* وهذه الضحكة الفاضحة رصدها (نجم كبير) لا نذكر اسمه حتي لا يلحق مهند الطاهر في شهر ستة ..
* رصد الضحكة وشاف تعابير الوجه ولكنه لم يستبين مع من يتحدث هذا (المبسوط) ..
* وعلي ذكر مهند الطاهر ..
* ما بين صورة المكالمة المدعومة بالضحك في (الممر) وما بين دموع مهند الطاهر التى هطلت عقب وداع الهلال نكتشف فعلا ان الهلال اصبح لا يحترم الذين يحترمونه ..
* بكي مهند الطاهر مثل الشافع ليلة سقوط الهلال لان الغزال (قلبو حي بحب الهلال) بينما غيره من الذين نحترمهم (يضحك) بعد خمسة دقائق من سقوطنا المرير ..
* قلتها من قبل واكررها اليوم : الهلال فيهو مشكلة (نفوس وضمائر وظلم) ..
* تجريح ونميمة وقوالات اضرت بالهلال ولسه ..
* السنة الماضية الهلال لعب الابطال وبلغ المربع الذهبي هو (بلا كنبة احتياطي وبلا هجوم) ..
* كنبتنا كانت كلها مصابين ..
* ومع ذلك بلغنا المربع الذهبي ..
* والسنة دي (شوهنا الهلال) لان نفوسنا ما نظيفة ولان قلوبنا تنبض بالمصلحة ويتكاسل نبضها حينما يتعلق الأمر بالهلال ..
* وأنا والله حكاية الهلال طار دي ما مزعلاني بقدر ما مزعلني إنو الهلال مقبل علي (حريق وفرتقة) لا يعلم بها إلا الله ..
* الجو يا الكاردينال لن يساعد اللاعبين علي العطاء وهم ما ح يقدروا يقولوا ليك الكلام ده ..
* ما بقدروا يا الكاردينال لانو ده زمن (سيد النصيحة إلا يكون شال ليهو رشاش) ..
* اللاعبون لن يستطيعوا مصارحتك بحقيقة الأجواء داخل الفريق ولكن اسمعها مننا إحنا ..
* أنا اسألكم سؤال ؟؟
* تري كم من الزمن إحتاجه اعضاء الفريق من اجل اقناع العشري بضرورة ان يكون اتير توماس ضمن الـ(18) لاعبا المختارين لمباراة الليبي ؟؟
* اتير الذي شكى من (وجع العيون) وبخل عليه الهلال بالعلاج ..
* وانا لما اقول اتير يا جماعة ما لانو اتير (منطقها) .. لا بالعكس شخصيا عندي رأي في اتير ولكن قدمته الان كـ(نموذج) يمكن ان يكشف الستار امام الموازنات والترضيات وتصفية الحسابات ..
* اما موضوع الثعلب وايشيا فهو (حكاية وحكاية) ..
* دي ملامح من مشاكل الهلال وغدا نواصل في ذات الإتجاه علي ان نعود ونختم هذه السلسلة بعد غدا للحديث عن اللاعبين انفسهم لاننا لن نعفيهم مهما كانت الاسباب ..
* ونواصل ..
امسح للحصول على الرابط
بواسطة : محمد الطيب الامين
 11  0
التعليقات ( 11 )
الترتيب بـ
الأحدث
الأقدم
الملائم
  • #1
    حسن المهدى 03-24-2016 05:0
    لو صحيح ما زكرتة رغم اختلافى معطك فى بعض اعمدتك التى لا تخلو من الكوميدية اقدر افول انك اكتر صحفى هلاللى شجاع والذين يطالبونك ان تكون اوضح من هذا فأعلمو ان الحقيقة واضحة والله المستعان اصبحت ما كورة قدم بل هى تصفية حسابات
  • #2
    03-24-2016 04:0
    كيف يمكن للهلال الخروج من قاع الصفر الدولي الذي بلغ عمقه ال 86 عام ؟ ؟ ربما بعد أن يطير النعام
  • #3
    وطن الجمال 03-24-2016 11:0
    أنا علقت في الاول تعليق جانبي لكن لما كملت قراية المقال لقيت الزول قال كلام لم يقله احد من قبله واقسم لكم ان ما قاله كان في نفسي منذ ايقاف عمر بخيت والمعز ومهند بتلك الطريقة المهينة وان اللاعبين نفسياتهم ما مرتاحة مع الكاردينال وكل زول خايف يلاقي نفس المصير. أنتبه يا كردنة انت بتعمل شغل كويس في الهلال بس بتحطم في الفريق بالتأثير النفسي السلبي على اللاعبين.
       الرد على زائر
    • 3 - 1
      بشير الرفاعي 03-24-2016 06:0
      بس عمر بخيت و المعز و مهند تم الاستغناء عنهم و هيثم بعيد جدا من الهلال و الراجل دا محمل كل مشاكل اللاعبين و توراتهم لهيثم
  • #4
    وطن الجمال 03-24-2016 11:0
    ليه نحن بنسمي زجاجة العطر فتيل وليه بنسمي العطر ريحة مع أنو الريح مجازا يرمز لما يخرج من الانسان ونتأفف منه. ومع ذلك بعضنا مصرين ان احنا اكتر شعب "عربي" يتكلم لغة فصيحة. يا اخوانا ما احسن الزول يتحسس راسه. ونحن ليه بنقلل من أصولنا الافريقية ونتشبث بشيء اكتسبناه كان بالرضا او بالعافية! محتار أنا في اللي بحتقر رقبته.
  • #5
    السربايوب 03-24-2016 11:0
    قولنا وقالو لي (والله قهوة برازيلي كمان) لو صح كلامك واحترامك لنفسك ولقلمك ارجو ذكر اسامي المصادر بتاعتك ولا اي كلام من غير تحديد اسماء ده بكون كلام (بن ساي ياخوي)
  • #6
    Abu Al-Moayad 03-24-2016 09:0
    نوعيتك من الصحفيين لايوجد لهم اي وصف غير انهم يشبهون المشاطات لان كل مواضيعك قوالات اختشي ياراجل وخاف ربك قال ايه قلوب بعض الناس غير نظيف وانا اقول لك انت اولهم اتقي الله يجعل لك مخرجا.
    فعلا أفعال مشاطات .. ,اسفى على الصحافه و الصحفيين!!!!!
  • #8
    شطة حمراء قبانيت 03-24-2016 08:0
    ماتتكلم بالغموتي وتطعن في الضل انت ذاتك يا كاتب العمود دا ! اذا بتحب فريقك حقيقي وعايز مصلحته امرق الحقايق وبالاسامي والاحداث مش بي طريقة ناس قلنا وقالوا ! يعني اكتر من تطير من قولة التيت حيحصل ليك شنو !
  • #9
    كمال الدين ميرغني وقيع الله بلاص 03-24-2016 08:0
    من اين اتيت انت الينا وكل مواضيعك تتحدث عن تشفي وحقد دفين اتحداك ان تكشف لنا ماهي النصائح التي حاول هيثم ان يقدمها لكافالي قال ايش انا بتكلم من مصادر مش من جلسة قهوة ياخي بالغت عديل هههههههههه انت مضحك بجد يا حبيب دي اظنها قعدة عدييييييييييييييييييييييييييل بي فنانها كمان امثال نوعيتك من الصحفيين لايوجد لهم اي وصف غير انهم يشبهون المشاطات لان كل مواضيعك قوالات اختشي ياراجل وخاف ربك قال ايه قلوب بعض الناس غير نظيف وانا اقول لك انت اولهم اتقي الله يجعل لك مخرجا
       الرد على زائر
    • 9 - 1
      ugi uf]hggi 03-24-2016 09:0
      كلام كلام حقيقي و معروف في ظل تسلط الجاهل ال اسمه كاردينال ال اشتري بعض الناس بفلوسو و طرد الهلالاب الحقيقين و خلق الاحقاد بين الناس و ما يهم ابو كسكتة الا الشهرة و الظهور في القنوات الفضائية و هذه شيمة الجاهل و الفاقد التربوي
  • #11
    alyyas 03-24-2016 12:0
    بصراحة عمود خطير وخطير وخطير وجاءب للقراءة مرة ومرات ، سبحان الله في الهلال مؤامرات اكيد طيران 1000% ، أين انتم يا إدارة ؟ وعايزين ليكم تأهل الا تشموه قدحة . الله ليك يا هلال .
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019