• ×
الأحد 7 مارس 2021 | 03-06-2021
محمد الطيب الامين

جمهور الهلال هو (نعمة) يجب ان نحدث بها !!

محمد الطيب الامين

 3  0  1251
محمد الطيب الامين


* إذا كانت (العربيات) و(القطارات) هي من الصناعات الثقيلة فان صناعة الفرح لا تقل مشقة عن صناعات الأليات الثقيلة ..
* وفي العادة نحن نصنع الأفراح ولكن لا أحد يصنع الحزن ..
* الأحزان تصنع نفسها ..
* ولكن الهلال في تونس غالط هذه الفلسفة وصنع الحزن ..
* بمعنى ان الحزن الذي اصابنا عقب خسارة الأزرق أمام الليبي هو صناعة هلاليه ..
* ولعل الحالة معكوسة : نحن صنعنا حزننا وصنعنا فرح الأهلي ..
* ويوم الأحد بأذن الله نريد ان نصنع فرحنا ونصع حزن الأهلي ..
* وليس هنالك أي خيار أمام الهلال بخلاف إستعادة الهيبة وفرض الشخصية وتحقيق الإنتصار ..
* وقطعا لن نقبل من الهلال (فوزا بلا عرض) كما لن نقبل منه (عرضا بدون فوز) ..
* يعني يوم الأحد دايرين الهلال يكون (صورة وصوت) ..
* عرض ونتيجة ..
* وبأذن الله سيكون الأحد يوما من أيام الهلال الكبيرة والخالدة ..
* لا شئ يضحكني هذا الأيام خلاف الأحساس الذي يعيشه أهل المريخ ..
* فرحة ناس المريخ الأيام دي هي فرحة (مربع ذهبي) ..
* والله صحي ..
* مرات بتشرب ليك موية باااااردة وبتقول : (يا سلاااام موية سمحة دايرة ليها سمك بس) ..
* واحد تاني يقول ليك : (الموية دي دايرة ليها شية ضأن بس) ..
* هسه نفس الفهم .. فرحة ناس المريخ دي دايرة ليها فريق تأهل للمربع الذهبي ..
* دي ما فرحة فريق لسه في دور الـ(32) ..
* واي فريق بيفرح هكذا في الأدوار الأولى مصيره سينتهي بسيكافا ..
* لانو ما معقول فريق في دور الـ(32) يفرح كده ..
* بمناسبة دور الـ(32) ..
* ويييين (ريحة المطار) ؟؟
* لسه ريحة المطار ما (إتركبت ولا شنو) ؟؟
* ريحتكم بتاعت المطار دي شكلها (ريحة تركيب ساكت) ..
* يا الريحة تركيب ويا كمان إنتو عندكم (نزلة) ..
* غايتو جنس غايتو !!
* في (البث التجريبي) لإضاءة إستاد الهلال قالوا ناس أم درمان القديمة إستغنوا عن (لمبات البيت) وإكتفوا بـ(نور الهلال) ..
* كشافات إستاد الهلال ستضئ إستاد المريخ وإستاد ود نوباوي ولو ما أخاف الكضب ممكن تضئ ملعب إستاد التحرير ..
* كشافات دايرة ليها زول مأكل (سكسكانية بس) ..
* سيكسكانية بـ(التا) ..
* عندما رفض مصعب عمر السفر مع المريخ بحجة عدم إستلامه مستحقاته المالية قلنا ان ذلك سيكون خصما علي الفريق النيجيري ..
* وبالفعل ثبت بيانا بالعمل ان غياب مصعب عن تشكيلة المريخ هو خسارة للخصم ومنفعة للمريخ ..
* ولذلك إحنا قبل مباراة القمة سنطالب بمصعب عمر اساسيا في تشكيل المريخ حتى ولو كان حكم اللقاء هو عبد التام ..
* لو الحكم ظالم ما مشكلة بس مصعب عمر يكون اساسيا ..
* واتمنى من قلبي ان يشارك مصعب في لقاء فريقه أمام (مغمور نيجيريا) في اللقاء القادم ..
* دي أمنيتي ..
* واي زول طبعا حر في (أمنياتو) ..
* بالسبعة فاز الهلال بـ(البدلاء) علي فريق شانتيل ..
* والتجربة من خلال النتيجة واضح إنها لم تكن من طرفين ..
* ولكنها قطعا ستكون أفادة المجموعة التي لم تشارك في لقاء تونس ..
* وبالتحديد المباراة (وقعت لمحمد عبد الرحمن في جرح) ..
* لو لم يقدم فريق شانتيل اي خدمة للهلال بخلاف (تألق محمد عبد الرحمن) لكفانا ذلك ..
* محمد عبد الرحمن رجع في زمنو تماما ..
* وعودته بهذه القوة دون شك ستغيير من شكل الهلال علي الأقل في الجانب الهجومي ..
* وبالمناسبة ..
* كونو تلعب مع شانتيل وتقول أنا لعبت مع شانتيل أفضل مليون مرة من إنك تلعب مع (الهرم) وتكضب تقول لعبت مع الإنتاج الحربي ..
* والله صحي ..
* وإحنا لعبنا مع شانتيل وهزمناهو بالسبعة وإنتو لعبتو مع الوحدات الأردني وهزمكم بذات النتيجة التي فزنا بها علي شانتيل ..
* هذا (مع مراعاة فارق البرد طبعا) ..
* غايتو جنس غايتو !!
* طارق العشري قال في تصريح له : (يوم الأحد انا عايز مشجعين وليس متفرجين) ..
* وكلامو صاح ..
* لكن كمان يا العشري إحنا برضو يوم الأحد عايزين مدرب (بيقرأ صاح) مش مدرب (بخاف) ..
* العشري قبل مباراة الذهاب قال هو (حاااافظ الكرة الليبية حفظ) ..
* وبصراحة ما ظهر به الهلال في ذلك اللقاء يؤكد ان العشري ممكن يكون حافظ الكرة الفلسطينية وليس الليبية ..
* إحنا يوم الأحد دايرين العشري (يسمع لينا الكرة الليبية) بما إنو (حافظها حفظ) ..
* يوم الأحد هو يوم التسميع يا ابن النيل ..
* المهم ..
* الهلال محتاج للجمهور ..
* وأبيكو محتاج للجمهور ..
* وقدر جمهور الهلال جعله هو (الوقود) المحركة للهلال ..
* يبقى يوم الأحد لابد ان يقول جمهور الهلال كلمته بالصوت العالي ..
* الشهرة التى إكتسبها الهلال علي نطاق العالم واحدة من اسبابها هذا الجمهور العظيم ..
* افريقيا كلها عرفت الهلال بمستواه وجمهوره العظيم ..
* وبصراحة جمهور الهلال الموسم الماضي كانت (بطنو طامة) لاسباب سببها الإدارة والفريق ..
* والوضع الراهن لا يحتمل (طمام البطن) ولذلك المطلوب من جمهورنا العظيم ان يعيد سيرته الاولي ..
* وحقيقة يا جماعة هنالك فرق كبير بين جمهور الهلال وجمهور المريخ ..
* قول لي كيف ؟؟
* والله صحي ..
* جمهور المريخ لما يملأ المدرجات بيكون واثق من الفوز وواثق من اللقيمات ..
* جمهور المريخ بيكون ضامن النتيجة ..
* بيكون عارف المباراة ساهلة ..
* عشان كده بتلقاهم زاحفين زحف نحو الاستاد ..
* في المباريات الصعبة (بيلبدوا) ..
* يقول ليك بنحضرها في التلفزيون ..
* تلفزيون بـ(الخا) ..
* وعلي العكس جمهور الهلال ..
* جمهور الهلال ما بيكون حريص علي المباريات السهلة ..
* دائما استاد الهلال يمتلئ عندما تكون المباراة صعبة جدا ..
* عندما تكون المباراة صعبة يتداعي جمهور الهلال حتي يحدث الفارق ويساعد الفريق ..
* هسه أرجع بالذاكرة للوراء وشوف اي مباراة افريقية ساهلة جمهور الهلال ما بيكون حريص علي متابعتها ..
* وبالمقابل شوف اي مباراة (صعبة ومستحيلة) تجد جمهور الهلال قد ملأ الاستاد ..
* وهذه هي مواقف الرجال ..
* وهذا هو جمهور العظيم الذي يتداعي من كل الاصقاع تلبية للنداء ..
* وطول ما الهلال يملك جمهور بهذا الفهم والوعي والأدراك لا خوف علي فريق الكرة خاصة في المباريات التى تقام هنا ..
* جمهور الهلال هو (نعمة) يجب ان نحدث بها ..
* ونرجو ان يكون الجمهور عند حسن الظن به يوم الأحد بأذن الله حتى يكون الفرج جمعي أو جماعي ..
* و..و..
* وما قلنا ليك الحب طريق قاسي و.(مليان دقداق وحُفر) ..
امسح للحصول على الرابط
بواسطة : محمد الطيب الامين
 3  0
التعليقات ( 3 )
الترتيب بـ
الأحدث
الأقدم
الملائم
  • #1
    03-17-2016 09:0
    كيف يمكن للهلال الخروج من قاع الصفر الدولي الذي بلغ عمقه ال 86 عام ؟ ؟ ربما بعد أن يطير النعام
  • #2
    جمال الدين هاشم 03-17-2016 09:0
    يا اخي خليك في جنازتك ما تكلم علي المريخ اول المريخ لعب مع فريق يلعب في الدوري النيجيري يعني كلمة نيجيريا له وزن في كورة القدم في افريقيا يعني انت لعبت مع فريق لاعند دوري وهزمكم يعني من منازلهم
  • #3
    بابكر عوض الشيخ 03-17-2016 08:0
    والله مقال رهيب وأعدك الهلال بمشيئة الله منتصر نصراً مؤزراً بهدير الجمهور الهلالي الوفي وبكتيبة الهلال وقواته الخاصة التي عودتنا على ذلك ويشهد بذلك التاريخ وسوف تعمي كشافات الهلال بصر وبصيرة كل من لا يعجبه إنتصار هلال الملايين
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019