* تركيز الإعلام علي (رخصة) هيثم فاق تركيز هيثم علي مباراة الرابطة ..
* يا جماعة إحنا ما في حرب ..
* هيثم إستلم الرخصة (مبروك عليهو) ..
* والقضية ما قضية رخصة ، القضية قضية إنو هيثم ينسى (القديم) عشان يقدم (الجديد) للهلال بعيدا عن تصفية الحسابات ..
* بلجيكي المريخ قال انه لم يستلم حقوقه ورواتبه الشهرية والحوافز حتى الآن ..
* واضح إنو البلجيكي ده زول طيب ..
* وطيب شديد كمان ..
* زي البلجيكي ده بيكون في بلجيكا (الغنماية بتأكل عشاهو) ..
* طيبااااااااان ..
* الراجل ده بيسأل من الحوافز ..
* قبل ما يستلم الراتب الشهري بيسأل من الحوافز !!
* ده والله زي الزول البيسأل من (السقف المستعار) قبل ما يشتري (قطعة الأرض) ..
* معقولة .. هو انت راتبك ما ادوك ليهو تسأل من الحافز ..
* حافز منو ؟؟
* (حافز) عبد الرحمن ؟؟
* غايتو جنس غايتو ؟؟
* المستوى الذي يظهر به هذه الأيام ظهير الهلال الأيسر عبد اللطيف بويا يستحق ان نطلق عليه في أحسن الأحوال (مستوى مخجل) ..
* هذه العشوائية التى يمارسها بويا في الجبهة اليسرى لا تشبه تاريخ مدفعجي قاتل حق القاتل مع الهلال ولسنوات طويلة ..
* لابد من بويا ان (يشد حيلو) ويراجع حساباته ويجتهد بشكل أكبر حتي يعود كما كان وأفضل ..
* إحنا يا بويا ما بنقبل (تخرمج) لينا في ذات الجبهة التي يبدع فيها (شيخ) موكورو ..
* أصلو ما ممكن في جبهة الهلال الشمال نلقي الإبداع (قدام) والخرمجة ورا ..
* الطرف الشمال ده دايرنو يكون قاعدة إبداع وفن ..
* والهلال دون شك يحتاج لخبرات وإمكانيات بويا فهو (محب بدرجة مقاتل) ..
* فقط المطلوب منه التركيز والإنضباط ..
* من حيث (الفلس) يجلس المريخ خلف هلال الأبيض والخرطوم الوطني وأهلي شندي ..
* في مجال الكرة المريخ (وصيفا دائما) وفي مجال المال المريخ (في المركز الخامس) ..
* وفي مجال (الكمامات) المريخ في المركز الأول ..
* المفروض والله كبار المريخ يعملوا (مرطبات) ..
* مرطبات زي مرطبات العريس ..
* يطبعوا كروت ويوزعوها لكبار المريخ ..
* ويقوموا ناس اسامة ونسي يجيبوا (البرتقال والموز والفشار) ويرصوا الكراسي في دار النادي ..
* والكرت يكتبوا فيهو من ورا : (دامت الأفراح) ..
* واي كبير من كبار المريخ يضرب (الصحن) ويخت في الكشف ..
* والكشف ممكن يكون ماسكو مصطفى توفيق ..
* والمرطبات دي تكون شهرية لحدي ما جمال الوالي الشهير بـ(عزو) يرجع ..
* وكل شهر تشيلوا قروش المرطبات تحلو بيها مشكلة من مشاكلكم الكتيرة والمسيخة دي ..
* أول مرطبات حلو بيها مشكلة البلجيكي ده ..
* الزول ده بطريقتو دي علي بالقسم لو مشى ببقي ليكم زي (مرسال محمد وردي) ..
* بمشي وما بجي ..
* والله صحي ..
* عشان كده فكروا في إدارة المريخ عن طريق (المرطبات) ..
* كل ما تحسوا عندكم مشكلة طوالي أعملوا مرطبات ..
* الحاجة دي بتحصل عادي ..
* زمان عندنا صاحبنا في حياتو عمل ليهو زي (17) مرطبات ولحدي هسه (خاطب) بس ..
* كل ما يفلس بيعمل مرطبات ..
* هسه إنتو أعملوا كده ..
* والشغلانية دي بين الأخوان عادية ..
* ما فيها حاجة ..
* والسنة دي بالذات يا متنا من الضحك ويا كمان الضحك كتلنا ..
* غايتو جنس غايتو ؟؟
* الهلال الآن يخطو بثبات نحو الأفضل ..
* سيكون الهلال انيقا علي يد طارق العشري ..
* والعطر الذي ستكتمل به إناقة الهلال هو (الثعلب) ..
* الثعلب علي اليمين وموكورو علي الشمال يبقى المرحوم غلطان ودي ما دايرة كلام ..
* الما شاف البحر بتخلعو الترعة .. عشان ده إعلام المريخ بتغزل في النعسان والبلد فيها موكورو ..
* دنيا عجيبة !!
* قال شنو ؟؟
* قال المريخ سجل شقيق النعسان في فريق الشباب ..
* ده معناها إنتو كبار وصغار نعسانين ..
* والأغرب من كده إلاعلام المريخ طالب الحُكام بتشكيل حماية للنعسان من ضرب الخصوم ..
* والله لو إنتو دايرين حماية للنعسان إحنا المفروض نعمل (سياج) لشيخ موكورو ..
* والله صحي ..
* المهم ..
* ورد في الأخبار ان إنارة أبراج استاد الهلال الجديدة ستجعل ليل أم درمان نهار ..
* يعني لو وقعت منك (إبرة) جمب جامعة الأحفاد بتلقاها ..
* بنات جامعة الأحفاد لو في واحدة وقعت منها (دمعة) بالنهار ممكن عادي تجي تفتشها بـ(نور كشافات الهلال) ليلا ..
* والدمعة لغير الناطقين بها هي (الدبوس) الذي يثبت (الطرحة) ..
* طرحة بـ(الصاء) ..
* وبتاع الركشة لو وقع منه (كلب) بالنهار ممكن عادي يجي يفتشو بـ(نور الهلال) ليلا ..
* والكلب لغير الناطقين بها هو (الجنيه) ..
* جنيه بـ(الخاء) ..
* نور كشافات الهلال بيرمي بعيد ..
* زي ضل الدليب ..
* حتي ناس سوق أم درمان والشهداء بيستفيدوا من (نور الهلال) ..
* تاني قولوا وداعا لحرامية الأسواق ..
* والمريخ هو المستفيد الأكبر ..
* زمان بتذكر كان (جيرانا) عندهم لمبة في الشارع وإحنا ما عندنا لمبة ..
* يلا لما نكون عايزين نلعب (ضمنة) بنمشي إحنا وأولاد حلتنا نقعد تحت لمبة جيرانا ..
* بنلعب بأدب عشان ما نزعجهم ..
* وجيرانا إستفادوا من قعدتنا دي لانو كنا بنحرسهم من الحرامية ..
** نفس الفهم ..
* المريخ ح يستفيد من (لمبة الهلال) ..
* المريخ هو أصلا (ضل) وح يستفيد كتير من نور الهلال الرامي بعيدا مثل (ضل الدليب) ..
* المريخ مع حالة الفلس دي عادي تاني ممكن يتمرن بنور كشافات الهلال ..
* والله صحي ..
* وفروا كهربتكم وإتمرنوا بنور كشافاتنا .
* خليكم مفتحين ..
* بحالتكم دي ما بتقدروا تجيبوا كهربا كل يومين تلاتة ..
* أهو الكاردينال كتر خيرو لا قصر معانا ولا قصر معاكم ..
* بس أنا عندي طلب ..
* طلبي هو .. كهربتنا دي تتمرنوا بيها لكن ما تشحنوا بيها تلفوناتكم ..
* ده بس طلبي ..
* واي زول طبعا حر في (طلباتو) ..
* طلباتي وأنا حر فيها ..
* إن شاء الله أطلب أغنية (سبعة يوم واليوم سنة) وأهديها لشلبياية وكل الجالية السودانية بالأردن ..
* أنا حر ..
* غايتو بالجد أحسن حاجة في (فلس المريخ ده) إنو السنة دي ابطال افريقيا لا بيكون فيهو (ريحة) ولا بيكون فيهو (يوسف بلايلي) ..
* الجزائر فيها يوسف بلايلي والسودان برضو فيهو يوسف بلايلي ..
* لكن عيون (الكاف) شافت يوسف بلايلي حقهم وما شافت يوسف بلايلنا ..
* لكن مصيرو يوسف بلايلنا يقع زي ما يوسف بلايلهم وقع ..
* وقع بـ(الشاء) ..
* و..و..
* والجاني منك ومن تباريح الهوى وصفو (زي المنشط) ..