* عندنا في السودان (الشي لما يفوت حدو) بنقول عليهو (عوير) ..
* مثلا يقول ليك : (شيخ موكورو ده لعااااب لمن عوير) ..
* او يقول ليك : (أبو عاقلة ده لعااااب لمن غلط) ..
* و.. البت دي سمحة لما عويرة عديل ..
* عندنا في السودان (العوارة) ربما هي عنصر من عناصر التميز والجمال ..
* مع إنو شجر (العوير) هو من الاشجار الما عندها فايدة ..
* شجرة العوير هي فعلا شجرة عويرة ..
* شاعر الحقيبة (العبادي) كتب مربعا يبرهن به ما ذكرناه حيث يقول :
شوف ريمة الأرام جالسة في التصويرة
محياها كالبدور في نورو والتدويرة
انظر لعيونها ودعجتها وتحويرة
من كتر الدلال تنشاف عويرة عويرة
* قال : من كتر الدلال تنشاف عويرة عويرة ..
* زولة شدة ما حلوة ومدلعة ومنعمة تشوفها عويرة عويرة ..
* واظن وليس كل الظن إثم ان البت التي غني لها العبادي هي (والدة هيفاء وهبي) لان العبادي لما كتب كلامو ده هيفاء وهبي ما مولودة ..
* في الهلال .. صهيب الثعلب شدة ما لعااااب بنشاف عوير عوير وكذلك بشة الصغير ..
* وبمفهوم العبادي ده معناها تشكيلة الهلال كلها (عويرة عويرة) ..
* والله صحي ..
* حتى طارق العشري عوير عوير ..
* لكن المريخ ما فيهو زول عوير ..
* حاشاهم العوارة ..
* المهم ..
* في ناس من شدة الكرم بلغوا مرحلة العوارة ..
* والنكتة القديمة بتقول :
* في (مرا حامل) ، والمرا دي أكملت الشهر التاسعة وما (وضعت) ..
* ودخلت في الشهر العاشر وبرضو ما وضعت ..
* غازلت الشهر الـ(11) وبرضو ما وضعت ..
* في الشهر الـ(13) لما ما وضعت الدكتور قال يفتحها بطنها يشوف الحاصل شنو ..
* وقبل ما يفتحوا (بطنها) عملوا ليها عملية منظار ..
* في الصورة وضح إنها حامل بـ(تؤام) ..
* تؤام (ولدين) ..
* وفي المنظار ظهر ان سبب تأخير الولادة هو : (كل واحد من التؤام بيقول للتاني أطلع انت بالاول) ..
* (4) شهور التيمان ديل بتعازمو في الخروج من البطن ..
* ده بقول لده اطلع والتاني بيقول ليهو لا والله تطلع انت ..
* غايتو جنس غايتو ..
* التيمان ديل كريمين كرم جد ..
* أنا إتذكرت النكتة دي والكرم والكلام ده كلو بسبب الأمل عطبرة ..
* المريخ خايف جدا من الأمل عطبرة ..
* خايفين لدرجة إنهم بتعازموا علي التشكيلة علي طريقة (التيمان) ..
* أمير كمال بيقول لضفر ألعب انت وضفر بقول لامير كمال والله تلعب انت ..
* امير كمال عمل فيها مصاب ..
* وبكوري المدينة برضو مسك رجلو وعمل فيها مصاب ..
* وشخصيا بتوقع في تمرين امبارح يكون اربعة او خمسة من اللاعبين عملوا فيها مصابين ..
* بتوقع كده ..
* واى زول طبعا حر في (توقعاتو) ..
* أنا والله أول مرة في حياتي أشوف لي ناس بقصدوا (ما يتألقوا) عشان ما يدخلوا التشكيلة ..
* من قمنا بنسمع : (تألق جماعي في تدريب الهلال الختامي من اجل إقتحام التشكيلة) ..
* يقول ليك : تنافس شرس بين اللاعبين من اجل اقتحام التشكيلة ..
* وفي المريخ : تنافس شرس بين اللاعبين من اجل (عدم) دخول التشكيلة ..
* ديل بتنافسوا من اجل الخروج من التشكيلة ..
* والله صحي ..
* خايفين من الأمل ..
* مع إنو الأمل ناقص عدد من اللاعبين المهمين بسبب التحكيم ..
* الأمل ده هو سبب (الكتمة زاتا) ..
* أولاد حلتنا بقول ليك (تلاتة اشخاص) ما بتقدر تنساهم :
1_ زول نساك وانت في (زنقة) ..
2- زول ما نساك وانت في (زنقة)
3- والزول الزنقك زاتو ..
* والامل عطبرة هو الزول الزنق المريخ زاتو ..
* عشان كده المريخ ما بيقدر ينسى الامل ..
* واى ظلم للأمل غدا طوالي إعتبرونا إحنا منسحبين ..
* اي ضربة جزاء (وهمية) إحنا والأمل منسحبين ..
* اي تسلل ما تسلل .. إحنا منسحبين ..
* اي ريحة (لقيمات) .. إحنا منسحبين ..
* لو شمينا ريحة (كلونيا) برضو منسحبين ..
* وأنا والله العظيم كنت بتمنى المباراة دي تكون في عطبرة ..
* لكن ما حنك ..
* في الدورة التانية بتمشوا عطبرة ..
* المهم ..
* المريخ ح يلعب مباراته غدا بذات الشعار الذي الذي لعب به مباراة الاهلي ولا سيتم تغيير الشعار ؟؟
* السؤال ده بنتوجه به للأخ الحبيب معاوية الجاك ..
* معاوية في (عموده) إنتقد شعار المريخ بقسوة ..
* وقال ان المريخ لا يملك ولا شعار (زي الناس) ..
* وأهمية كلام معاوية تأتي من كونه قلم مريخي كبير ..
* يعني (شاهد من الأهل) ..
* وحسب ظني المشكلة ما في الشعار ..
* معاوية ربما يرى ان الشعار كـ(قماش) او كـ(تفصيل) لا يشبه المريخ ..
* ومن الأرجح إنو قماش شعار المريخ (إسموكن) او (بولستر) ، والبولستر أقل درجة من (الدمورية) ..
* يعني تقدر تقول (البولستر) هو ارخص واقل قماش في السوق ..
* حتي (الهزاز) أقيم من قماش شعار المريخ ..
* لكن دي كلها ما مشكلة ..
* نوعية القماش ما مشكلة ..
* ولا تفصيلة القماش هي المشكلة يا معاوية ..
* المشكلة في اللون نفسه ..
* لون شعاركم ده ما سياحي ..
* معقولة شعار عامل زي (كبسولات النزلة) ؟؟
* كبسولات النزلة فوق (أحمر) وتحت (اصفر) ..
* وانا مرات كتيرة لما أشوف اوكرا جاري بتخيل لي دي (كبسولة) بالحجم العائلي ..
* والله صحي ..
* ياخي الألوان دي كتيييييرة ..
* شوف ليكم أي لون تاني ..
* لون (زينب) لون (فوشي) ..
* المهم تفكونا من (كبسولات النزلة) ..
* هسه شعار الهلال براهو بفتح النفس ..
* الشعار براهو بفتح النفس خليك من الهلال كفريق ..
* تشوف الأبيض والأزرق ده بتحس براحة نفسية عميقة ..
* بتحس بالهيبة والوقار والراحة والطمأنينة ..
* لكن بصراحة شعاركم مزعج ..
* في اندية كتيرة غيرت شعارها ..
* وإنتو السنة الفاتت شايفكم جبتو شعار ليموني ..
* طيب الليموني ده مناسب جدا مالكم خليتوا ؟؟
* ما تخلوا ..
* أمسكوا في الليموني ..
* او البنفسجي ..
* حاجة كده تفتح النفس عشان تستقطبوا مشجعين جدد ..
* جوهرة الهلال دي بعد تكتمل كل الهلالاب الزعلانين بيجوا لطابقنا التاني ..
* المهم ..
* غيروا لون الشعار ..
* وما تنسوا ..
* القماش الأجود هو (القطن) ما (البولستر) يا معاوية الجاك ..
* بولستر بـ(الخاء) ..
* و..و..
* و(الأمل) القاقا وسوا عجاجة حِلُو القِرين كُبايتين..!!