* شئ لا يصدقه عقل.. وبين التساؤل والاندهاش يضيع العمر يا ولدي..دون أي معلومة مؤكدة او تبرير مقنع.
* الحقيقة اختلطت بالاكاذيب.. والخير بالشر.. والاصلاح بالافساد والمتعة بالخطر.. والشجاعة بالجبن والامانة والشرف بالسرقة والصدق بالخديعة.. والليل بالنهار.
* وبالعصر مرورو..!!
* لم تعد هناك قيمة واحدة خالصة بدون شوائب.
* بات صعباً بل مستحيلاً أن تصدر حكماً يرتاح له قلبك.
* او تدرك حقيقة يضمنها عقلك.
* ساد اللون الرمادي. بعد أن ساحت كل الألوان فوق بعضها.
* نعم أنها حالة من خليط السمك لبن تمر هندي.
* وكأن عالمنا قد سيطر عليه حفنة من الدجالين يقودونه إلى الهاوية.
* أو كأن عصابة من الأفاكين تتلاعب بنا وتخدعنا وتغشنا.
* كأنما عملوا لنا تنويم مغنطيسي أو كشحوا لينا كشحة خلونا ما نقدر نفرق ما هو الصاح وما هو الغلط.
* هل هم أم نحن.. هل دينانا أم دنياهم عالمنا أم عالمهم.
* وبقينا ما بين الوك وشيبون.
* وتصريحات سودكال وتهديده للهلال.
* والمريخ بعد أن كانت خزانته مليئة بالمال بات يسكنها الفيران والجقور.
* ويا حليل الوالي.. وظهر علي الفادني.
* ظهر مجموعة من المشعوذين والدجالين والأفاكين تتهم من تشاء وتجرم من تريد.. وتفعل ما تهوى.
* وهي التي تملك الصكوك لتقول لنا ده هلالابي وده ما هلالابي.
* وهؤلاء يطلقون البخور ويحركون الدمى كما يريدون..
* ويخرجون العفريت من القمقم ثم تفشل ان تعيده اليه مرة أخرى.
* ونحن بين هؤلاء وهؤلاء لا ندري إلى أين نحن ذاهبون هل إلى الجنة أم الجحيم.
* انهم المتلاعبون بالعقول والمشوشون عليها.
* لذلك خربت العقول.. لتأتي القرارات هشة وضعيفة.. وحتى عندما تأتي قوية فانها (تبلع) كأنها حبة بندول ويتم التراجع عنها.
* ويموت من وقف خلفها حسرة وكمداً.
* إنه زمن اختلفت فيه المعايير وتاهت فيه الحقيقة وأصبح الكل يغني على ليلاه.. في انتظار الفرج.
* والكل يبحث وينغب عن المفتاح وسط عتمة وظلام وكأنه داخل مغارة على بابا والاربعين حرامي.
* وحتى هذه المغارة تحول فيها الحرامية من (40) إلى (40) مليون.
* وكل يوم سرقة جديدة وفنون في الجريمة.
* واحدين يسرقوا في الدهب وآخرين ينقبون عنه.
* ونحنا قاعدين نعاين.. لا لمينا كده ولا كده.
* وكده كده يا التريلة.
* نقرأ عن الجرائم التي ترتكب هل نحن في السودان أم في دولة أخرى.
* وكنا زمان نغني نحنا في السودان نهوى اوطانا لو رحلنا بعيد.
* غنانا كان حلو وكلو حنية وشوق ولهفة.
* وهسة بقينا تغني اضربني بمسدسك املاني انا رصاص.
* زمان غنوا سفري السبب لي اذاي وغربة في دار هناي.
* ويا حليلو قال ناوي السفر يا حليلو.
* ودموع في الغربة بكاية.
* وهسة بقينا نغني الفي ريدو فرط دقس بيجي غيرو يعمل مقص.
* ابوي قال لي ما تبيعي الشطة بيع الشطة عشان حبيبي اللقطة.
* حارة حارة وما بتنكتم.. الجات من صلة الرحم.
* الكنت فيهو بهيم وليهو روحي ماثورة بعد انتظرتو سنين ركبني ماسورة.
* يا ناس الدنيا انتو خلو وسيبو الحسادة قلوبكم تصفوها عشان تبقى ريادة.
* ما تحنك معايا كتير.. ولو أبيتني فرتق طير.
* كل حاجاتنا اتغيرت واختلفت.
* وكورتنا بقت روكة.
* واسماء الاندية تخوف.. اسود الجبال ـ فهود الشمال ـ ذئاب كوستي ـ الافيال ـ النمور ـ الفرسان ـ الكوماندوز ـ النسور ـ الرهيب.
* كل حاجة بقت براها.. وبقينا بعاد.. والناس مشت وطشت وهجت وخلت الرياضة.
* الفاظ بذئية اساءات تجريح.. اتهامات.
* وجوه جديدة ظهرت واشكال غريبة تحكمت.. وباتت تتخذ القرار.
* زمان الاداري لما يتخذ القرار ما يتراجع عنه ويصر على موقفه الذي اتخذه لانه على حق.
* وهسة في زمن البلع الاداري يبلغ كلامو زي الماحصل شئ.. وينفي ما صرح به.
* والغاب اللاعبين حاجة تانية ومرة تضحك ومرة تبكي.
* والناس صابرة وكلها أيام والغاز يكون موجود بس الناس تصبر.
* أها يا جماعة انابيب ايران غاز بعد مقاطعتنا لايران سميها شنو!!
* اصبروا وما تستعجلوا الأمور حتكون ظابطة والناس شغالة شغل كويس.
* والدنيا دوارة.. منو الكان يصدق أن المريخ يكون مفلس للدرجة دي واللاعبين يرفضون التوقيع له والسفر يبقى بالقطاعي.. والبوفيه المفتوح قفلوا.. والله المريخاب حالتهم تحنن.
* كل الاشياء تغيرت وانعدم الوفاء.. وظهر أصحاب المصالح.. والعمل على محاربة كل من وضع بصمة.
* ولكن هل يستطيع هؤلاء ِأن يضعوا بصمتهم الله أعلم.
* ويتوب علينا ربنا.
* الامور مشت باسطة وتم ايقاف شيبوب وتحويل الوك للفيفا ولا الكاف ما عارف.
* مجلس المريخ استقال.. والوالي على الخط يسخن.
* والهلال امبارح حاجة تاني اداء قوي وبطولي ورجولي.. رغم من الاخطاء الدفاعية والتي يمكن معالجتها.
* كاريكا عاد وبشة تألق كالعادة والشعلة اعلن عن نفسه.
* والهلال كان هلال الهنا والسرور.
* وما عاوزين نطبل ونعيش في الاوهام.
* ولكن الجاب حسن محمد صالح تونس شنو.
* وهارون كالعاة اتحفنا بصورته وهو يقدم العزاء للكوكي في وفاة والدته.. والله لفتة جميلة والاجمل صورتك الخائف عليها.
* وطالما الكاردينال في تونس ضروري يكون هو في تونس.
* هو منو؟؟ هو في غيرو.
* ويتوب علينا ربنا.
* والله يستر على الهلال من العين ومن حب السيطرة والمنتفعين واصحاب المصالح والاجندة الخاصة.
خبر طازج: هلال تفتيحة ضرب التيحا.
>>>