وابتدأ الطوفان
+ قلنا ليكم ده زمن القروش .
+ زمن البنكنوت ، زمن الفكة .
+ قلنا ليكم الغنى افضل من الفقر ، والدين نفسه يحض على تركك لورثتكم اغنياء بدلاً من تركهم فقراء يتكففون الناس ، منعوهم او اعطوهم .
+ قلنا ليكم الافضل استئجار القوي الامين .
+ قلنا صلاح ادريس الانسب لقيادة الهلال ، صحيح الرجل معاند ومشاكس ، ولسانه طويل ومفتري عند الاختصام ، لكنه بالمقابل محب (دفيع) لناديه الذي يعشق حد الفناء .
+ دفيع دي،،،، ختوا تحتها مليون الف خط .
+ لانو البحبوا الهلال كتار ، العلماء كتار ، والمنظراتية راقدين هبطرش ، لكن الفنادق ما بتقبض تنظير وتسجيل اللاعبين بالمال ما بالحنك .
+ قلنا الارباب رجل المرحلة ، رغم اننا نعيب عليه الكثير من الاشياء ، وعجز القادرين على التمام الذي لا يزال يمارسه كل حين .
+ ميشو اتخارج ، والناس باصرت القصة ، وعاد من الهضبة الاثيوبية بعد جس النبض الذي مارسه و(القرصة) التي اراد من خلالها ان يقول شيئاً ما .
+ الآن حرن سادومبا ، ورفض الذهاب مع البعثة لاداء مباراة الرد في زمبابوي .
+ لاحظ ان المباراة تلعب في بلاده وهو دافع اضافي للذهاب واللعب .
+ سادومبا رفض الذهاب مطالباً بسداد مستحقاته .
+ اختلف مع الزميل الحبيب قسم خالد في توقيع العقاب على سادومبا والمناداة بشطبه .
+ سادومبا ليس لاعباً سودانياً محلياً كي نذكره بالانتماء والعشق والتفاني في حب الشعار وغيرها من مفردات لا تساوي شيئاً في زمن الاحتراف والماديات الذي نعيشه .
+ حتى اللاعبين السودانيين المحترفين تبدلت مفاهيمهم مع عهود الاحتراف والاحداثيات ، وفي جارنا مريخ الوالي ، التريان الغنيان، هرب سفاري مطالباً بمبالغ مستحقة .
+ عقاب سفاري كان بخصم مبالغ من رواتبه الشهرية ، هذا هو العقاب الرادع في هذا الزمان ، رغم انني اشك ان سفاري سيقبض باليمين ما سيقتطع منه بالشمال .
+ ما علينا ، المهم ان سادومبا له مطالب من الافضل تدبير مستحقاتها بدلاً من تعقد العلاقة اكثر ، وتطورها الى ما لا يحمد عقباه .
+ الهلال محتاج لسادومبا ، وسادومبا محتاج لي قروشوا ، ده ملخص الحكاية .
+ ادفعوا لسادومبا فهو ليس من بني عمومتكم ، ولا رضع من (حليب الهلال) ، ده زول شغلتوا الكورة ، معيشتوا ورزق اولادوا .
+ انها الاشارات اذن ، انه الطوفان القادم ، طوفان المطالب ، والاحتياجات ، النفقات ، التجهيزات ، المعسكرات ، الطائرات الخاصة .
+ قلنا ليكم الارباب ، قلتوا امرقوا من البلد .
+ قلنا ليكم يالارباب ، بالعدم بدائل تغطي مكانه ، وتصرف زي صرفوا .
+ ود اللمين قال ميزانيات وايرادات وشنو ما عارف ، والرشيد قال اصلوا طريقة للارباب مافي نهي بالكل .
+ قلتوا جاهزين ، اها وين كاردينالكم ، وين ابومرينكم ، وين طه ؟؟؟؟
+ انا خايفكم بالطريقة دي تلحقوا الهلال امات طه .
+ اها يالرشيد قول اتنين .
+ اترشدي .
مسدار سادومبا
ما قلتوا الكاردينال ،،،،،، نيرانو جاهزة طرمبة
وكت الجد جفل ،،،،،،،،،،،،،، ادا الحبايب زمبة
قلنا زمن صلاح ،،،،،،،،،،،،،،،قلتوا اكبر بمبة
سادومبا وحرن ،،،،،،،،،،،،،باكر بيحرن ديمبا