الواحد لو وقف في الحوش وقعد يدعي.
قعد (ينده)ورفع ايدو في السماء.
وسأل ربو.
وقال بي صوت عالي (يا الله ضربتين جزاء وحالة طرد).
فيها حاجة.
وعشان المريخاب ما يقوموا يحسوا اني قاصدهم ح اقول مع ضربتين الجزاء
وحالة الطرد عاوز لي (مكيّف) في السخانة دي.
ح اطلع ليكم من الاحراج.
في ناس بتعقدوا من الكلام دا.
بشعرو بي احراج.
من تجيب ليهم سيرة ضربات الجزاء بتعقدوا.
وبدون ما يشعروا كدا بحسوا بالخجل.
يمكن تزعلوا وتقولوا ليه ضربتين جزاء؟.
واشمعنا.
والزول دا قاصد حاجة تانية.
وليه حالة طرد؟.
الكرت الاحمر دا ما سمح.
زي التلج.
بريّح الزول في عضمو.
الحكاية بقت ظاهرة.
وما عاوزة ليها اي استاذ جغرافيا.
ولا (الفة).
واضحة وظاهرة.
عشان الحاجات دي.
وعشان ما تمشوا مجلس الصحافة والمطبوعات.
وتقعدوا تزعلوا لي.
وتصدقوا.
وتغشوا في نفسكم.
عملت ليكم مع الجاحات دي (مكيّف).
مكيّف موية عادي.
مكيّف كهربة ..مع الكهربة الغالية دي ما عاوزو.
قالوا ليك واحد مشى يشتري ليه مكيّف كهربةفي واحد لاقهو شايل
المكيّف بتاع الكهربة ..قال ليه جايب ليك مكيّف كهربة..هي عليك الله
وينها الكهربة عشان تجيب ليك مكيّف كهربة ؟..كان احسن ليك تجيب مكيّف
(موية).
بتاع المكيّف ..قال ليه هي وينها (الموية)؟.
لو جبت لي مكيّف موية ..لا بلقى كهربة ولا موية ..احسن بتاع (الكهربة)
على الاقل لو الكهربة جات ما نقعد ننتظر (الموية).
اها عليكم الله يا جماعة الكلام دا كلو فيه (اشارة) للمريخ.
فيه اي تلميح.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء
سوى رؤياكم الغالية).
ويا الله ضربتين جزاء.
وحالة طرد.
ومكيّف.
قالوا ليك الحكام الافارقة ..بدخلوا الخرطوم تلفوناتهم (تلاتين
عشرة)وبطلعوا بي (الجلاكسيات).
مالكم انتوا؟..انا قاصد الهلال.
انتوا موش قلتوا يا مريخاب ..حكم مباراة الهلال في احدى مباريات الهلال
الافريقية طلع بي مطار الخرطوم شايل الجلاكسي واللاب توب.
ليه هسع وقت قعدنا نتكلم عن (الحكام) الموضوع بقى ليكم صعب.
ليه الموضوع بقى ليكم حار.
وبقيتوا ما بترضوا الكلام في الحكام.
نحن في تاريخ البطولات الافريقية دي كلها ..من سنة 1964 ..في حكم حصل
حسب لينا ضربتين جزاء في مباراة واحدة.
ابدا ..وطبعا لا.
دي خلوها.
حصل في مباريات الهلال الافريقية الحكم طرد لينا لاعب من الفريق التاني.
ابدا ..وطبعا لا.
غلبنا الترجي هنا.
وغلبنا الاهلي المصري.
وغلبنا الزمالك.
وقلبنا القطن.
كلهم غلبانهم بدون ضربة جزاء واحدة.
وبدون ما يطردوا لينا لاعب واحد.
ولا كرت اصفر.
طيب عشان ما تعدوا لي يوم الجمعة دي كلو زعلحصل في كل مباريات
المريخ الحكم احتسب على المريخ ضربة جزاء وهو بلعب في ام درمان.
دي حصلت.
برة ما بحسبوا على المريخ ضربة جزاء عاوزين يحسبوها ليهم هنا.
شفتوا انا عشان الحاجات دي بقت ظاهرة شديد..عملت ليكم مع ضربتين الجزاء
وحالة الطرد (مكيّف).
عشان ما في زول يزعل.
وما في اي واحد فيكم يقول شيء.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء
سوى رؤياكم الغالية).
ويا رب.
يا الله..
ضربتين جزاء.
وحالة طرد.
الباقى بتموه ناس بكري المدينة.
ضربتين جزاء.
وحالة طرد.
ومكيّف.
ولو عاوزين تتكلموا كتير ..وتنظروا مع (المكيّف) بعمل ليكم (بطيخة).
هي وينها الكورة البحسبوا ليها ضربتين جزاء؟.
وينها الكورة البطردو فيها لاعب كورة؟.
ويا الله ضربتين جزاء.
اهم شيء ضربتين جزاء.
بالتحديد كدا.
ضربتين جزاء بالاسم.
ممكن واحدة تضيع.
تضرب في العراضة.
المريخاب من ضربات الجزاء الكتيرة ..بقوا واحدة يجيبوها وواحدة يضيعوها.
ضربات الجزاء عندهم كتيرة.
ما فارقة معاهم.
لكن اهم من كل هذه الضربات ..حالة الطرد.
خاصة لو كانت حالة الطرد في الشوط الاول.
عشان نخش الشوط التاني ..مرتاحين.
ندخل بدون ضغوط.
على كدا يتجدعوا ناس (اكرا).
قالوا ليك في واحد شاف (اكرا) بيرقص بعد هدفو في وفاق سطيف ..قام قال
ليه والله رقصتك دي احق بيها (لامبيتي).
مفروض يرقصها الحكم.
امس في عطبرة خسر المريخ امام الامل بهدفين.
هزيمة المريخ امس هي الخسارة الثالثة للمريخ في الدوري الممتاز.
عارفين المريخ خسر ليه؟.
عشان ما في ضربات جزاء.
ولا ضربة.
ولا كورنر ساكت.
خسروا عشان ما في حالة طرد.
ناس بكري المدينة اتعودوا ما ينتصروا إلّا بي ضربات الجزاء.
دي بقت عندهم عادة.
قالوا ليك بكري المدينة في عطبرة قدر ما قعد (يتوقع)..ما حسبو ليه ضربة جزاء.
بكري المدينة في عطبرة عمل فيها (ربيع طه).
ربيع طه عديل كدا
ربيع طه شنو؟.
بكري المدينة دا فرقة كاملة.
فرقة الاصدقاء.
لكن مع ذلك ما حسبوا ليه ضربة جزاء.
في عطبرة ما في لعب.
ما في ضربة جزاء ساكت.
ما في حالة طرد هدية كدا.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء
سوى رؤياكم الغالية).
ويا الله.
ويا رب.
ضربتين جزاء.
وحالة طرد.
ومكيّف في السخانة دي.
ضربتين جزاء بدون مكيّف الواحد يعمل بيهم شنو؟.
يا جماعة بالمنطق كدا..لو الجماعة ديل في عطبرة امام الامل ما
انستروا..ح ينستروا امام (العلمة) في الجزائر.
العلمة قالوا ليك دمها فائر.
الجزائرون قالوا ليك بعد ما شاهدوا مباراة المريخ ووفاق سطيف ..قالوا
مباراة العلمة خلوها لينا.
وهسع اكيد بعد ما شاهدوا مباراة الامل والمريخ ..اقتنعوا ان الانتصار
الذي حققه المريخ على وفاق سطيف لم يكن مستحق.
في عطبرة بتعملوا كدا.
في الجزائر ح تعملوا شنو؟.
ويا الله.
ويا رب.
الله يدينا في مباراة الهلال ومازيمبي القادمة ضربتين جواء.
والله يدينا حالة طرد ..يتعرض لها لاعب من لاعبي مازيمبي.
والباقى خلوه علينا.
اصلو ما بنقصر.
بنتمها (وقيع).
الغريبة ..والشيء الما واقعة لي ..اعلام المريخ بتكلم عن (نقالة)
مباراة الهلال والتطواني وما عاوزننا نتكلم عن (الحكم).
الكلام عن النقالة ممكن.
عن الحكم لا.
شفتوا المنطق دا.
ويا الله.
ويا رب.
ضربتين جزاء.
وحالة طرد.
ومكيّف في السخانة دي.
انتوا عارفين ..لو جبتوا ليكم ناس من السوق.
من الملجة.
من الشارع.
ومنحتوهم ضربتين جزاء.
وحالة طرد.
بيغلبوا.
الحاجات دي لو لقاها فريق درجة تانية بشيل الكاس.
ما تقعد تنظر فينا ساكت يا غارزيتو.
تنظيرك نحن عارفنو.
نحن حافظنو.
وعارفين البئر وغطاها.
و
(ونحن عايشين والحمدلله (النفس) بينزل ويطلع إلى الآن..ولا ينقصنا شيء
سوى رؤياكم الغالية).

و
الهلال انتصر بسهولة على الميرغني كسلا بثلاثية.
اندرزينهو بدأ يرجع.
مطلوب من الهلال ما يفرط لينا في الصدارة.
اوعكم.
الاستهتار ما مقبول.
امسكوا في الصدارة ..وحققوا البطولة المفضلة للهلال.
.
السيدة (ل)..بكري المدينة دا لو في السوق الشعبي بيدوه ضربة جزاء.
وقرّض على كدا.