• ×
الجمعة 29 مارس 2024 | 03-28-2024
محمد عبدالماجد

(الدواعي الأمنية) لو بقت (فأس) ما بتجيب (الكأس)

محمد عبدالماجد

 0  0  3710
محمد عبدالماجد


حملة شعواء وجهت نحو فريق حي العرب من قبل اعلام وجمهور المريخ قبل مباراة الفريقين الأخيرة بأم درمان.
فريق حي العرب طبعاً في هذا الموسم عاد الى (السوكرتا) ، بقدم في كورة رجعت لنا حي العرب زمن ياسر الزنجي وابوشامة ونجم الدين أبوحشيش وفاروق جبرة وأسعد التوم.
تخيلوا كل هذه الاسماء وغيرها كانوا يلعبون في فريق حي العرب.
حي العرب كان فريق براهو.
نكهتو.
وشكلو.
واسلوبه.
عنده كورة مختلفة، لا تملك إلّا ان تستمتع بها.
حي العرب هذا الموسم عاد.
يكفي انه ضمن أندية النخبة هذا العام.
نتمنى ان يكون فريق حي العرب في هذا الموسم ضمن الأندية التى تمثل السودان في البطولات الافريقية.
ونتمنى كذلك فريق الأهلي مروي الذي يلعب أول موسم له في الممتاز وبيعمل في حاجات فات بيها الكبار والقدرو.
سبب الهجمة التي كانت من اعلام وجمهور المريخ ضد (السوكرتا) ان فريق حي العرب لعب مباراته لدواعي (وطنية) أمام الهلال في أم درمان بسبب مشاركة الهلال الافريقية فقد كان الهلال قبل مباراة حي العرب مواجهاً بمباراة مصيرية وحاسمة أمام دي سونغو الموزمبيقي.
انتوا (الدواعي الوطنية) دي ما درسوكم ليها؟.
ما قابلتكم؟.
الهلال كان في حاجة لعامل الزمن والمسافة معاً تحاشياً للارهاق والتعب قبل التوجه الى موزمبيق لمواجهة دي سونغو المصيرية لذلك تقدم بطلب لمجلس ادارة حي العرب.
مجلس ادارة نادي حي العرب لدواعي (وطنية) وافق مشكورا ليلعب أمام الهلال في الجوهرة الزرقاء ، مثلما فعل فريق حي العرب مع المريخ سنة 2007 عندما كان المريخ يشارك (افريقياً)، حيث لعب حي العرب أمام المريخ وقتها مباراة الذهاب والاياب في الدوري الممتاز أمام المريخ في ملعبه.
ولا في زول قال شيء.
ولا في زول قال وقتها لفريق حي العرب شكراً على هذا الصنيع.
ما حدث من حي العرب سنة 2007 مع المريخ رفضه اعلام المريخ وجماهيره مع الهلال الممثل الوحيد للسودان في البطولات القارية المعترف بها.
زاد الغضب على فريق حي العرب ان الفريق قدم مباراة كبيرة أمام المريخ وكان يستحق على الاقل الخروج متعادلاً أمام المريخ في ملعبه ووسط جمهوره لولا الدواعي (التحكيمية) التي رأت غير ذلك فأهدت نقاط المباراة للمريخ.
فريق حي العرب في أم درمان او في بورتسودان ما فارقة معاه.
والدليل على ذلك المباراة الكبيرة التى قدمها فريق حي العرب أمام المريخ وكاد ان يفقد نقاطها المريخ لولا (الدواعي التحكيمية).
الناس ديل اكتر ناس بيستفيدوا من (الدواعي).
ما بخلوا ليهم (دواعي) حايمة في البلد.
من دواعي لي دواعي.
تقول عندهم (دعوه).
الطريف ان المريخ الذي يلعب في البطولة العربية وبعد ان حسم أمر تأهله بالانتصار على الجيش السوري في مباراة سهلة في لبنان 3 / 1 ، عاد وطالب من ادارة نادي الاهلي مروي بنقل المباراة التى تجمع بين الطرفين الى ام درمان بدلاً من كريمة.
انتوا هسع ما كنتوا معترضين.
هسع ما كان عندكم رأي.
انتوا ما درسوكم (جغرافيا).
يتلفتوا متل فناجين القهوة في الصينية.
حدث ذلك من مجلس المريخ رغم ان مباراة المريخ القادمة مع الجيش السوري يوم 11 اغسطس أي بعد 5 ايام من مباراة الفريق أمام الأهلي مروي.
فوق هذا فان المباراة التي سوف يلعبها المريخ امام الجيش السوري في أم درمان، ولن ترهق فريق المريخ بالسفر، كما كان الحال عندما لعب الهلال أمام حي العرب في ام درمان بسبب سفره الى موزمبيق بعد اقل من 48 ساعة فقط من المباراة.
عليكم الله هو (الجيش السوري) عاوز ليه تحويل مباراة.
مباراة المريخ القادمة أمام الجيش السوري تعتبر مباراة في طور (حفلة المرطبات) بعد ان حسم المريخ أمر تأهله في (لبنان).
مباراة اداء واجب.
الأغرب من كل هذا ان فريق المريخ الذي رفض ان يلعب أمام الهلال في أم درمان في ملعب المريخ بسبب (دواعي أمنية) قاطعنها من رأسهم، طالبوا من ادارة نادي الاهلي مروي ان يلعبوا امام المريخ في ملعب المريخ في أم درمان.
انتوا ما قلتوا ام درمان فيها (دواعي أمنية).
اشمعنا هنا.
ام درمان بقت سمحة الآن.
وينها (الدواعي الأمنية).
ما قلتوا في (كركبة).
لماذا تحضر (الدواعي الأمنية) عندما تكون هناك مواجهة للهلال والمريخ في ام درمان.
وما دون ذلك فان المريخ يطلب من الاهلي مروي نقل مباراته مع المريخ الى أم درمان بلد الدواعي الأمنية ذاتها.
دي قابلتكم في حتة؟.
صادفتكم يوم؟.
جنس دا شفتوه؟.
رأيكم شنو محمد الشيخ مدني الذي سافر مع المريخ الى (لبنان) ، يشوف ياسر يوسف والي الولاية الشمالية عشان يلغي ليهم المباراة في كريمة أمام الاهلي مروي بسبب (الدواعي الأمنية).
بتلقوا ليكم (دواعي أمنية).
لو فتشتوا ما بتغلبكم (الدواعي).
قالوا الايامات دي الاهلي مروى سمو فاير.
بيضرب من طرف.
شرف ابوروف.
وشيكوزي.
واكول.
وخليفة.
وعمرو.
ومصعب.
الاهلي مروي مولع نار.
ولا عندهم حارس مرمى بفك الكورة.
ولا في حكم بطرد ليكم لاعب في كريمة.
عشان كدا أحسن ليكم تشوفوا الوالي.
كريمة الايامات دي بلد انتصارات ساكت.
فوز بس.
الأهلي مروي ما بعرف شيء غير دا.
شوفوا ياسر يوسف والي الشمالية يشوف ليكم (دواعي أمنية) مستعجلة زي ما شافها ليكم في الخرطوم الفريق عبدالرحيم محمد حسين.
اذا كانت العاصمة مكركبة وفيها (دواعي أمنية) ، كريمة يعني ح تكون رائقة.
بقت على كريمة يعني.
أحسن ليكم شوفوا ليكم (دواعي أمنية) في مروي.
قالوا المطر.
قالوا البحر قايم.
الفيضانات.
قولوا أي شيء.
اتصرفوا.
ما تقعدوا لي كدا، متل قزاز البيبسي في المناسبات.
خلوا محمد الشيخ مدني يتصرف ليكم.
اضربوا لي اوكتاي.
يمكن يكون عندو مشروع استثماري في كريمة يجيب ليكم (الدواعي الأمنية).
اكربوا بطنكم ساكت.
وألعبوا كورتكم.
ما تعملوها لينا كلها (اعتذارات) و (ظروف) و (جوابات).
بالمناسبة (الدواعي الأمنية) ما بتجيب ليها (كأس).
ما في كأس بجيبوه بالدواعي.
لو دواعيكم بقت (فأس)، ما في (كأس).
علماً ان الجيل الحالي في المريخ كله ما شاف كاس الممتاز إلّا من خلال (سمير فضل).
هذا هو الموسم الخامس للممتاز والمريخ بدون كأس.
كذلك غاب كأس السودان عن المريخ لموسمين.
يعني ناس بكري المدينة ومحمد عبدالرحمن وصلاح نمر واحمد ادم والتش وخالد النعسان وعصام عبدالرحيم ومنجد النيل أصلاً ما حققوا ليهم بطولة مع المريخ.
ديل مع كل هذه (الدواعي) ما شافوا ليهم كأس.
آخر مرة فاز المريخ بالممتاز في الميدان متين؟.
ومتى فاز المريخ بكأس السودان.
الناس ديل بتكلموا ساكت.
يلقوا ليهم فريق زي الجيش السوري ويملأوا الجرايد نقة.
ناس طلعوا من (التمهيدي) وكمان قاعدين يتفاصحوا.
بعدين لبنان دي نحن سمعنا بيها عند صباح الشحرورة.
وسمعنا بيها عند فيروز.
وحتى عند غادة السماني التى مكثت لسنوات طوال في لبنان.
لكن لبنان في الكورة يطرشنا.
ديل ناس (ضربة الجزاء) عندهم (شمومة).
..............
ملحوظة : اسكتوا ساي.
هوامش
اللجنة المنظمة في الاتحاد ولجنة الانضباط عاقبت اوتارا من خلال (فيديو) المباراة.
وعاقبت عبداللطيف بويا من خلال (الفيديو).
والدليل على ذلك ان لجنة الانضباط عاقبت الحكم صديق الطريفي.
لماذا لم يستعمل الاتحاد (الفيديو) في خروج محمد عبدالرحمن الاخلاقي.
لماذا قال الاتحاد ان تقرير الحكم لم يرصد الواقعة.
وهل رصد تقرير الحكم واقعة بويا او أوتارا.
الدواعي الأمنية الظاهر وصلت الاتحاد.
مثل هذا التساهل يشجع على الخروج من الاخلاق.
الاتحاد قبل محمد عبدالرحمن سقط في هذه الواقعة.
السقوط هنا سقوط للاتحاد وليس محمد عبدالرحمن.
بكرة يلعب الهلال أمام الخرطوم الوطني.
خرطوم (ما بنفك سيف تيري).
خرطوم (لن نطلق سراح حمزة داؤود).
بكرة الهلال يلعب امام فريق يدار من خارج المجلس.
فريق ينفذ الأوامر بالتلفون.
لذلك يجب الحذر من هذا الفريق.
فريق ما عندو قرار.
ولا عندو مجلس.
جمهور الهلال ينتظر منه دعماً كبيراً ومساندة للهلال غداً أمام الخرطوم الوطني.
وننتظر ان يقدم الهلال مباراة كبيرة وان يحقق فوزاً كبيراً على خرطوم (ما بنفك سيف تيري).
هلال الابيض يحقق انتصاراً سهلاً على مريخ الفاشر.
كمال الشغيل مدرب شاطر وفاهم وعنده كورة في رأسه.
كنا نتمنى ان يكون كمال الشغيل ضمن الجهاز الفني للهلال مع لامين انداي والزغفوري وفلوريان وجيبا.
وجود مدرب سوداني في الجهاز الفني أمر مهم.
خاصة اذا كان ذلك المدرب في قيمة وفهم كمال الشغيل.
الهلال سوف يلعب أمام الخرطوم الوطني ثم هلال الابيض ثم الاهلي شندي ثم الاهلي مروي ثم المريخ.
وكل المباريات سوف تكون صعبة.
لذلك وجب الحيطة والحذر من الكروت الملونة.
لا نريد ان يفقد الهلال أي لاعب في المباريات القادمة.
مباريات كلها صعبة ومهمة وحساسة.
وابقوا على سفر.
..........
عاجل : بكرة ننتظر المطر.


امسح للحصول على الرابط
بواسطة : محمد عبدالماجد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019