** وغرفة دبي والصلاة علي النبي :
** ومن دبي جانا الخبر شايلو النسيم
** وحبيت عشانك كسلا وتسلم يا دوك
** ومازالت المفاجآت تتوالي علي الديار الهلاليه
** وخوف ورجفه في شوارع العرضه المريخيه
** ومزمل قالوا حايم في شارع الدكاتره عشان يطلع تقارير
** قال ايه المحترفين عيانين
** بس ما تخلي قروشك زي قريش في العربيه
** والجماعه دايشين من تسجيل (بكري المدينه) في الصيفيه
** 3 مليارات وتوقفت تسجيلات المريخ في ديم المشايخه
** والقروش كملت مع الشيلة والحنه والذهب وقطع الرهض وحق الفنان والفطور
** والقروش كملت مع شهر العسل
** والقروش كملت مع شهادة البحث وبيت كافوري
** وايها الشعب يكفينا بكري المدينه
** وآسفين يا ناس الهلال بس ما تشتكونا
** وخلاص نحلها جوديه وربنا يهدينا
** وشلنا بكري وشلتوا فيصل
** لكن عماد الطيب راسه والف سيف ريمشي لوزان
** وعماد الطيب ابعدوا منه اذا كان زعلان
** ومازالت دبي هي ارض الخير حتي وان طلع بانغورا عيان
** وشيتن سيراليوني وشيتن برازيلي وشيتن توغولي وجبل اسود
** وفتح عينك في المطار يا كانوتيه
** فالسودان غير آمن وحرس القصر ماتوا ياعيني وفي نيقرز وفي همبته
** وفي خطف وفي مطاردات وفي نقض عهود وفي حنث يمين
** وممكن تلقي نفسك في نيل الحصاحيصا
** او تلقي نفسك في اهلي شندي
** و المريخاب كل يوم يعاينوا للسما في انتظار طيران الامارات
** لا دي فلاي دبي لا اتحاد لا اماراتيه لا خليجيه
** وشغالين لكل الاجانب تكسي تكسي تكسي
** واوعك تقول لزول انك جاي من دبي
** واوعك تسلم علي زول يقول انه فاز بسيكافا
** واوعك تمر جنب بنك الثروه الحيوانيه
** فالاعلام السالب هو المصاب بانفصام شديد في الذاكرة الرياضيه
** مزمل بيقول بوتاكو مصاب بالفايروسات الكبديه
** وخالد عز الدين ودكتور الهلال بيقولوا بوتاكو غير مصاب بالفايروسات الصفراويه
** وقبل ما نفحص علي ناس كانوتيه وبوتاكو واوكرا خلونا نفحص اعلام المريخ هل هو بكامل قواه العقليه
** يجب فحص الزهايمر حتي لا يظلموا محترفي الهلال والفلته الاثيوبيه
** ويجب ان يكون التقرير صحيح و شفاف والمعلومات حقيقيه
** وياريت نوفر في السودان جهاز كشف كذب عشان نخلص من كل الحيل الوصيفيه
** علي السيد مزمل ابو القاسم ان ينشر تقريره عن اصابة لاعب الهلال الاثيوبي بالامراض الفيروسيه
** وبعد ان اكد طبيب الهلال والسيد خالد عز الدين سلامة اللاعب من الكبد الوبائي ايها المطبلاتيه
** وبسرعة ممكن نعمل فحص جديد للاعب ومن ثم الغاء تعاقده ان كان مريضا وطرده من بلادنا السودانيه
** واصلا الهلال عنده طرف شمال ما شاء الله عبد اللطيف بويا صاحب الصواريخ اليساريه
** بويا موجود وهدف بويا في الحضري لو تذكروه في آخر هزيمه مريخيه
** واهداف بويا في جمال سالم جاياكم وياويلكم ويا سواد ليلكم لا حتلقوا كاس لا دوري الا بطولات بط سيكافيه
** واهداف لبوتاكو وكانوتيه وبشه وكاريكا وجكسا والجزولي وما في رحمة للراكوبه اليوغنديه
** ياريتكم تتعلموا من الهلال الصدق والتعامل بالاساليب الشفافيه
** فالهلال هو من علمكم كل القوانين الكرويه
** ويا حليلك يا شداد ليه سلمتها لاتحاد الفشل ومعتصم والناس الضيعوا الهويه
** وما شاء الله الهلال ده تربيتك والهلال من اول يوم اعلن للجميع اصابة بانغورا الطبيه
** قاموا ناس طوالي قالوا واكرا في رجله مسامير ومساطر وعمل عمليات جراجيه
[[[]]] حذاري حذاري حذاري :
** والعبرة بالخواتيم -
** فبقدر نجاح الكاردينال وغرفة دبي في عمليات الاحلال والابدال الا اننا نحذر بشده ان يحتاط هذا المجلس لمفاجأت التسجيل ( السستم ) واستجلاب البطاقات الدوليه -
** كما يجب ان يتوخي المجلس الحذر الشديد من اعداد المتربصين في المعسكر الآخر وتحالف العديلين والمطبلاتيه والذين يعملون علي افساد تسجيلات الهلال بشتي السبل -
[[[]]] خدعة هلاليه عجيبه :
** والمريخ والارباب بلعوا الطعم
** فبذكاء كاردينالي شديد شطبت ادارة الهلال مجموعة كبيره من كبار نجومها وشغلت بهم الارباب ونادي المريخ ( العاشق الاول لمشاطيب الهلال ) والذي عرف شغفه وجنونه بلاعبي الهلال - ومن ثم استطاع الهلال تحييد المريخ واكمال كل عمليات الابدال والاحلال بنجاح كبير ودون شوشره
والله كردنه عرف ليهم
[[[]]] ختام :
نحن وقوفا مع اي رئيس يجلس علي عرش امبراطوريه الهلال - لسنا بريراب ولسنا ارباباب ولسنا كاردينالاب ولسنا هيثماب بل هلالاب
وكونوا كذلك ينتصر الهلال
محمد حسن شوربجي
وين وين تلقو ذي.... دا
الهلال شحد الله و الله ادا