هذه الايام انشغل اهل الهلال طويلا بخرمجات الاتحاد العام وبالمريخ وبالحكم وبالجكومي وبالحجر وبالسته غرز وبمعتصم وبمجدي وبكل الكلام الفاضي ده
فلقد اضرت حادثة شندي بالهلال كثيرا وهو يستعد لملاقاة اعتي ابطال افريقيا
وجلسنا جميعا نجعجع ونرغي ونزبد في الفارغه
وانشغل لاعبونا بهذه المسرحية السخيفه والسيئة الاخراج
وحكاية اوقفوا الهلال واشطبوا الهلال وامسحوا الهلال من الدنيا
وامشوا الكاملين لا ما حنمشي الكاملين طيب امشوا مدني طيب خلونا حنفكر
ولو ما مشيتوا الكاملين لن يلعب الهلال افريقيا
وممكن نرسل المريخ بدلا عنكم ( وده مني قلبهم )
والمريخ هو عالمي ولا تكلمني
وما مفروض يلعب تمهيدي يا المهزومين في شندي
و العقوبات دي ملزمه للهلال ايها الهلالاب
وطز في المادة ٤٩
وروحوا اشتكونا للفيفا
ونحن ما خايفين من عيسي حياتو
ولو ما عاجبكم كلموا لينا اوكامبو او اشتكونا في لوزان
والعقوبات دي خفيفة علي الهلال ويجب ان تكون مغلظه
وبيان سخيف من المريخ ومزيد من التآمر علي ممثل الوطن
قلت لصاحبي ياربي هل هذا هو الاتحاد الذي يعول عليه كل اهل السودان رياضيا
هل بهذا الاتحاد سيتأهل المنتخب لاي بطوله قاريه
وانتخبوا معتصم جعفر وزغردوا يا ناس الحصاحيصا
ووزعوا الشربات ويسقط يسقط كمال شداد
والحصاحيصا كلها حضور في مكاتب التحاد
والدكتور معتصم يقول ان برنامجه الانتخابي يقوم علي مبادي اساسية محورها التنمية والممارسة السياسية الحقة القائمة علي الديمقراطية والتداول السلمي للسلطة والتعددية الحزبية واقرار مبادي حقوق الانسان
ويخرج علينا الجكومي ليتحدي ويؤشر واخدناها بضراعنا
وما تفهموها غلط يا ناس بورسودان
المهم اخوتي فالهلال وجد نفسه في دوامة عجيبه
وكله بسبب حكم احمق ادخل الهلال في بحر لجي وكما قالت الاية الكريمه :
كَظُلُمَاتٍ فِي بَحْرٍ لُجِّيٍّ يَغْشَاهُ مَوْجٌ مِنْ فَوْقِهِ مَوْجٌ مِنْ فَوْقِهِ سَحَابٌ ۚ ظُلُمَاتٌ بَعْضُهَا فَوْقَ بَعْضٍ إِذَا أَخْرَجَ يَدَهُ لَمْ يَكَدْ يَرَاهَا ۗ وَمَنْ لَمْ يَجْعَلِ اللَّهُ لَهُ نُورًا فَمَا لَهُ مِنْ نُورٍ
لقد تفاعلنا جميعا مع هلالنا العظيم و من فرط حبنا لهذا الكيان الكبير الذي يسكن القلوب
تفاعلنا وصرخنا وشجبنا في الميادين الصحفيه دفاعا وانتماءا
في وقت كانت كل نخب الهلالاب تدير المعركه بهدوء
وتلفونات ومس كولات وفاكسات ووايتسابات وتانجوات واجاويد
وباركوها يا ناس الهلال
نحن ما نقدر عليكم ودايرين شنو ونحن علي السمع والطاعه
ومن كافوري الو يا فداسي ولا كلمه نفذ
والجماعه ديل يلعبوا في مدني
وحاضر سعادتك
وهشتكنا وبشتكنا يا ريس... دنته رئيس والنعمة كويس
يمدلعنا... يمشخلعنا... قول لعدوك روح اتليِّس
وفي النهايه النصر للهلال
وخلاص اجلناها عشان خاطركم وامشوا مدني والعبوا بالجمعة بدلاً من الاربعاء ونحن حنقول للناس ان شرطة الكاملين مشغوله بتأمين امتحانات الشهادة السودانية..!!
وكل بوليس حارس ليهو طالب عشان ما يشف في الامتحانات
والشرطه في خدمة الشعب
والبلد بلدنا ونحن اسيادها
والما عجبو يسافر بورتسودان ويشرب من المالح
و ما دايرين الكاملين يعني ما دايرين الكاملين
وطالبين التأجيل يعني طالبين التأجيل
والهلال كلمته واحده
وما بتنيها
قلنا ليكم الكاملين غير مطابقة للمواصفات
وابطالنا لا يمكن ان يلعبوا في الكاملين
لان كبار افريقيا لا يمكن ان يلعبوا في ملعب اشبه بالحواشه
والفيفا لن ترضي
وعيسي حياتو لن يرضي
وافريقيا التي تعشق الهلال لن ترضي
وفرنسا التي قالت ان جمهور الهلال اكبر جمهور في افريقيا لن ترضي
والحمد لله فلقد انتهت المؤامرة الحمراء
والعبوا غيرها ايها الحاقدون
والآن ستبدأ الخطه رقم ٢ لجندلة الهلال
وكل المعنيين مدعوون لمناقشة بروتوكولات وصيفون
وسوف تناقش خطط جندلة الهلال محليا وافريقيا
ولازم الهلال يبدأ نزيف النقاط زي السنه الفاتت
وبرافو بعض حكام صلاح فأنتم تعشقون المريخ
والهلال لازم تطلعوه لينا من دور الثمانيه
وادبوه لينا في المحلي
وعليكم بالاستمرار في تعطيل مسيرته
ونحن ما حنقصر معاكم
شفتوا كيف هزينا الهلال وبهدلناهو بعد مباراة شندي
وخليناهو يتعرض لاول هزيمه من سنين وبعد آخر هزيمة المورده
يجب ان تستمر الحرب ضد الهلال عشان نفوز بالدوري والكاس تاني
السنه الفاتت الوزير حسن بدوي مشكور ساعدنا كتيرا
والسنه دي بعض حكام صلاح هم حبايبنا
و الهلال بدأ النزيف وخسر ٣ نقاط
ودايرين متلهم في كل دوره
وهكذا هي الخطه رقم ٢ من بروتوكولات وصيفون
وابدأ التنفيذ
اخلاق اهل السودان :
قادت أمانة موظف بشركة أسواق العثيم إلى إعادة مبلغ 147 ألف ريال أودعت في حسابه في أحد البنوك السعودية بالرياض عن طريق الخطأ.
فقد تفاجأ الأمين أحمد الجيلي عمر(سوداني الجنسية) بزيادة كبيرة في رصيده بالبنك، وقام بمراجعة الإدارة المالية بشركة أسواق العثيم ظنا منه أن المبلغ أضيف إلى حسابه عن طريق الخطأ مع الراتب الشهري وحول الراتب لحساب الشركة.
وبعد أن تأكدت شركة أسواق العثيم بأن المبلغ لم يورد إلى حسابه عن طريقها وبعد التدقيق اتضح أن المبلغ أضيف إلى حسابه بخطأ من أحد موظفي البنك، ومن ثم قامت الشركة باتباع الإجراءات المالية المطلوبة بالتنسيق مع الموظف والبنك لاسترجاع المبلغ كاملا.
ومن جانبه عبر يوسف بن محمد القفاري الرئيس التنفيذي لشركة أسواق العثيم عن إشادته بأمانة الموظف الذي يعمل بأحد فروع الشركة بالرياض، وثمن حسن تصرفه بعد اكتشاف المبلغ الذي أضيف إلى حسابه عن طريق الخطأ.
اللهم ارفع الظلم عن اهل السودان :
قالوا :مهما طال ليلُ الظلمِ البهيم إلاّ وبعده يسطع نور العدل المبين،
وقال سفيان الثوري رحمه الله تعالى عندما سأله رجل فقال: "إني أخيط ثياب السلطان. هل أنا من أعوان الظلمة؟" فقال سفيان : "بل أنت من الظَّلمة أنفسهم، ولكن أعوانَ الظَّلمة من يَبيع لك الإبرة والخيوط".
محمد حسن شوربجي
© 2014 Microsoft Terms Privacy & cookies Developers English (United States)