على صفيح ساخن نادر التوم

(ستة) صعبة

تسخينة اولى يا 6هم ،يااا 6هم..

تسخيته تانيه (ست) الودع اأرمى الودع ليا(كلتشى)

تسخينه تالته (ستتنا) مااا زى (ستتاااااك)

تسخينه رابعه(سته) مصيرنا ضايع مرساهو العدم

تسخينه خامسة فى (الستة) موج احمر هدر

تسخينه سادسة: خلى بالك منهم فى السته ابقى بعيد عنهم فى السته فى السته فى السته فى السته

هاهى(هاء الهزيمة) تتحول (عينا) بعزم الرجال وبتفتيحهم لعيونهم

هذا المريخ عجيب ومدهش وخرافى ليس لانه سجل ستة اهداف فى الوافد الجديد

وكان هذا المريخ(قاصدها) فهو هزم فى المباراة الاولى من الامل

هزم هو بغفوة، لكن الامل لم يهزم، كما ان الصفوة لم تستسلم

قاصدها كيف طيب؟؟ قاصدها عديل كدا بالارقام والنتائج

فى المباراة الثناية امام الموردة كانت اول ثلاثة نقاط يضعها فى رصيده

ومباراة الرابطة وصل المريخ الرقم ستة من النقاط فكان من الطبيعى جدا

ومن المعقول والعادى جدا ان يهزم الرابطة بالستة

حتى يصبح بست نقاط وستة اهداف نحن بنعرف (للعدد) كويس

السته مع النقطة شان مؤنث بنذكرها(شان ما تنسى بس) وانسى بس

والسته مع الاهداف بنأنثها ونوانسها كمان حاكم بنعرف نميز العدد(تمييز) صاح

لكين المستغرب ليو الجماهير دى فى استاد الخرطوم الضيق داك

دفعت اكتر من المفخرة الواسعة دى؟؟ ولا كان فى جماهير(كاميرا خفية)؟؟

المريخ لديه هزيمة واحده فى الدورى والمره دى نالها ريكاردو

اقصد نالها (بدرى) وتانى إن شاء الله مافى وقوف، لا قدام (بث)

واللاعبون متى ما استشعروا المسؤولية ولعبوا بجدية فلن تقف امامهم عقبة

اول امس آلام المعدة قامت على شدييد (قربت اتوفى والله) والحمد لله

من الصباح للمسا أكل مافى وإستفراغ شدييييييد اخدت حقنة ونمت

قمت جعان ليكم جوعه ما خليت حاجه ما ضربتها

وانا بضرب كنت بقول والله كلتشى دا معاو حق طول ما اكل

اربعة اطباق فرد مره يا حبوووب والله فعلا(آكل بارد) اباتشى وما خلا شئ

مبروك والقادم اصعب ويحتاج للمزيد من الجهد وبلانتينيوم دا دايرين نربطوا

ودا(عالم النجوم) ولا بلاش!

رسالة فاااااااااضية

المسطول كان ينتظر حبيبته فى الطريق ويداعب موبايله

رآها قادمة من بعيد شافها (سته سته) ما شاء الله قاشره ونضيييفه

فتح رسالة ورسل ليها رسالة فاااااضية التقول داير يعما خدمة

البت وصلت قريب قالت ليو دا شنو دا يا ظريف العماتو دا؟؟؟؟

قال ليها يعنى(مافى كلاااام)

ومن هنا نبعث برسالة فاضية للمريخ النضيف وظريف وقاشر

وبنحبو ونريد وبننتظرو( ماااافى اى كلام) تيت تيت!



مخطط (نفضة)

فى الصحف(الهلامية) ان هناك مخطط لابعاد البرنس وشطبه من الفريق

مع ان المساله ما محتاجة مخطط ولا حاجة فسيدا قد تراجع اداءه جدا

وهو عاد بعد رحلة إعتزال اجبارية بعد ضربت المسيكنى فى المعبرة

هيثم كان مصابا ولم يشارك لذلك ابعده المدرب

ويبدو ان اخونا غارزيتو ما زى المدربين التانين

عموما الايام القادمة سوف تشهد مزيدا من العمل فى مخطط البرنس الشطبى



وإنت مافى

وبما ان جماهير الهلال تضع البرنس نمبر ون(بما فيها الصحفيين)

فغن هذه الجماهير سوف تسير المظاهرات والمسيرات الا نفريط فى البرنس

ولا تمرير لذلك المخطط الخبيث ولا نامت اعين اى زول

ومن قبل حملت جماهير الهلال اللافتات(بحبوا اللافتات التقول احمد مطر)

وقالت بالعربى والانجليزى(نو هيثم نو هلال)

وبالطريقة دى غايتو وفى اعتقادى (افتكر انو) الامور ح تجوط

وواحد من الاتنين ح يقعد يا إما غارزيتو يا إما الزول الابعدو غارزيتو!

تسديدات

لعام قرئى العزيز اننى لم اغب عن الكتابة منذ قدومى هنا

الا مرتين مرة كنت مريضا ومرة بالامس بسبب المرض كذلك

واكتب باستمرار لكن يبدو ان هناك ظروفا فنية تحول دون نشر العمود احيانا

ولكم العتبى.. ولن نغيب عن بعض ابدا.. بإذن الله!

سيفعل بلاتنيوم اى شئ لايقاف المد الاحمر ولكن هيهات

والله بعد الستات دى نحن بلانتينيوم دا ناوين نضربوا هناك

ولكن يجب ان نحذر ولا نغتر ونعد انفسنا جيدا

طبعا اول مره الهلالاب ح يشجعونا ما حبا فينا ولا كرها فى اسيا قيت

لكين منتظرننا بى فارغ الصبر نلاقى مازيمبى

ملاقنو ملاقنو شيلوا الصبر ساكت وح نقتص لكم من اخوة موبوتو ومبينزا

خمسة فى المعبرة والله كتيرة وانا طالب من بله رقصة كديابا اهداء لتيم اليابا

والله يرحم البابا.. خمسة كاملة يعنى هسه فرقكم من رابطة كوستى شنو؟؟هدف؟؟

ويظل المريخ الحاضر والمستقبل والتاريخ.. وكلنا مريخاب

ويامريخ بتكتلنا بى (سته) قلبية براحه علينا شويه

تخريمه: والله ذكرتونا ميسى غايتو جنس طمع!

آخر قطرة: من وصايا مولانا السيد على قدس الله سره، ينبغى النظر فى الإتجاهات (الستة).

وهذه بصمتى