قرار الوزير خطوة متأخرة ولكن ..!
طبعا اعلام المريخ ما صدق انو الشرطة القت القبض علي رئيس نادي الهلال في ديون سابقة نسو كل مواضيعهم المهمة وتفرغوا للكتابة في موضوع الهلال .. هسي يا جماعه ده موضوع يخليكم تنسو خروجكم من دوري رابطة الاندية الافريقية من دور ال32 .. اها البرير بي تلفون بس دفع المديونية 200 ما شفتو الشيك المعتمد .. دي مشكلة وحلينها في دقائق انتو مشكلتكم ما بتتحل الا السنة الجاية عارفين ليه لانو مافي دوري رابطة الاندية الافريقية الا السنة الجاية وتحديدا في مارس ده لو تم استثنا الفريق من الادوار التمهدية ..!
انتو عارفين يا جماعه انا عرفت انو الاخ جمال الوالي رئيس المريخ ده راجل زكي بشكل مبالغ فيهو واظن انو العمل السياسي للوالي افاده كتير جدا في عمله الاداري بنادي المريخ ..!
الراجل المشبع بالعمل السياسي وفور خروج فريقه فكر وقدر وقال لازم اشوف لي طريقه اسكت الاعلام الاحمر .. قام قال ننظم سيكافا التصريح ده قالوا بعد الخروج من بطولة افريقيا طوالي ونشرته صحيفة الزعيم قبل ما الصحيفة تترفع علي النت قام السيد نيكولاس سكرتير اتحاد سيكافا كان في الخرطوم التقول كان ساكن في المطار وعلي اول طيارة للخرطوم ..!
تاني يوم طوالي عمل مؤتمر صحفي اعلن فيهو عن قبول اتحاد سيكافا لطلب المريخ بالاستضافة التقول كان بفتش ليهو في دولة تستضيف البطولة وما صدق انو لقي المريخ جاهز للامر ده ..!
نعود لذكاء الوالي هسي الاقلام الحمراء كلها قاعد تكتب عن موضوع سيكافا بغض النظر عن مع او ضد لكنهم انشغلو بالموضوع بتاع سيكافا ونسو موضوع خروج المريخ من دوري ابطال افريقيا وبكره بطلع ليك ليهم موضوع تاني هو تكوين اللجان ومن ضمنها اللجنة الاعلامية وشوفو لو ما كانت كل الاقلام تتمتع بعضوية تلك اللجنة .. عليكم الله يا جماعه هسي ده كلام فريق يغادر دوري الابطال يجي ينظم ليهو بطولة ما معروفه تابعه لياتو جهة طيب السؤال البفرض نفسو قول المريخ شال الكاس وطبعا ده متوقع بنسبة كبيرة ليس لقوة المريخ ولكن لضعف المنافسين اها كاس سيكافا ده لو شالو برجعهم لدوري الابطال وزي ما قال اخونا حسن محجوب (سيكافا ما بتفش غبينتنا ) يعني لسه ناس حسن محجوب مغبونين من الخروج تجي يا جمال تغشهم ببطولة (قش الدموع ) دي والله يا جمال بالغت عديل كده ..!
انت يا جمال مش زمااان قلت عن اعلام المريخ انو اعلام سالب عليك الله شغال بيهم مالك خليهم يكتبوا زي ما ديرين وفي النهاية بجوك راجعين براهم..!
دي سؤال برئ جدا انتو ملف سيكافا وخاصة الملف المالي تمت مناقشته او بطريقة اخري تمت اجازته ؟ علي حسب علمي الملف ده لحدي الان مفتوح وما عارفين راسو من قعرو والملف ده خلي امين عبدالقادر يحرد ليكم المجلس عديل كده ويلتزم بيتو كدي اول حاجة يا جماعه ناقشو ملف سيكافا 2009 وبعدين افتحو ملف سيكافا 2011 ..!
خليكم من سيكافا مساعد الرئيس رئيس القطاع الرياضي الفريق عبدالله حسن عيسي نفي انو في عدد من الاعضاء سعدين بخروج المريخ من دوري الابطال لانو في بعض الاقلام الحمراء ذكرت الموضوع ده .. معقول يا جماعه عضو مجلس يتمني خروج فريقه من اكبر بطولات الكاف ؟
الموضوع ده ممكن لسبب بسيط تزكروا لما جمال الوالي جاب حسام البدري للاشراف علي المريخ .. اااي افتكر بتزكرو الموضوع ده لانو الاخ محمد جعفر قريش قدم استقالتوا معترضا علي التهميش وحرد عدييل من المجلس وقال ما ممكن اكون انا السكرتير واخر واح يعرف انو المريخ تعاقد مع مدرب ..!
قريش راجل طيب وما بتاع مشاكل قال احسن يقعد في بيتو وما يعمل مشاكل في المريخ .. وقريش لم يعترض طبعا علي البدري لكن اعتراضه انصب في الطريقة التي حضر بها البدري ..!
طبعا الاعلام الاحمر (ماكلو) ما بريدو محمد جعفر قريش مع انو راجل محترم جدا ومؤدب وبحترم كل زول وفوق لي ده زول منظم وبحب المريخ شديد معقول يتهموه انو تمني خروج المريخ او هكذا اشاعوا وكتبوا ..!
نجي تاني لموضوع ذكاء الوالي الخارق .. عشان هو عارف البطولة اصلا عملها ليه قام قال ليهم الجهاز الفني لسه ما وقف علي مستوي عدد من اللاعبين يعني البطولة دي اتعملت لي حسام البدري عشان يقف علي مستواهم عليك الله يا جمال هسي موسي الزومة وطارق مختار ديل مستواهم شنو زاتو عشان البدري يشوفهم وقول شافهم بقدر يعمليهم شنو يعني ..!
خليك من الزومة وطارق هسي كورة الشغيل دي دايره ليها مدرب ديل يا حبيب انتظر بيهم شهر ستة بس وشوف ليك لاعبين غيرهم ..!
اخيرا اخيرا ..!
كدي خلونا لحدي الحتة من موضوع نا سالمريخ ديل الايام جاية كتير نشوف المواضيع المهمة وهو موضوع الهلال ..!
بالامس اصدر المهندس اسامة ونسي رئيس المجلس الاعلي للشباب والرياضة بولاية الخرطوم قرارا شكل بموجبه لجنة لحصر كافة المديونات لنادي الهلال وحصرها اولا ومن ثم كيفية التعامل معها واعتقد انها خطوة صائبة من السيد الوزير وانت كانت متأخر بعض الشئ لان لجنة التسيير وحسب افادة الاخ كرار التهامي امين خزينة السابق ان مجلسه قام بتسليم كل المستندات المالية والديون والدائينين لمجلس الشباب ولكنه للاسف الشديد لم يتحرك الا بعد ان فاجأه مجلس الهلال المنتخب بالاستقالة الجمعاعية علي خلفية توقيف رئيس النادي الاخ الامين البرير في استحقاق فندق بلاز ..!
موضوع فندق بلاز انتهي بعد ان قام البرير بتسديد المديونية ولكن من يضمن غدا ربما تم توقيفه ايضا من قبل الجهات الدائنة للهلال وهنا تكمن المشكلة .!
نعم كما قلت واوكد الان من حق الشركات والمؤسسات مطالبة الهلال بديونها وفي زات الوقت من حق مجلس الهلال الحالي ان يعرف عدد الدائينين حتي يتسني له عقد اتفاقات جديدة معهم بالكيفية التي تحفظ للشركات والهئيات والافراد حقوقهم والكيفية التي تريح المجلس باعتبار ان المجلس الحالي ورث تلك المديونيات من المجالس السابقة ..!
نتمني ان تقوم اللجنة المكلفة بحصر الديون خلال الفترة التي حددها القرار حتي يتفرغ مجلس الادارة لمهامه التي جاء من اجلها لا سيما ان الفريق امامه مباراة مهمة في دور ال16 امام الافريقي التونسي وهي بالطبع تحتاج الي اعداد خاص ختي يتمكن الفريق من الصعود لمرحلة دور الثمانية ليحقق انجاز كبيرا له بتواجده في هذه المرحلة للمرة الرابعة علي التوالي ..!!
اخيرا جدا ..!
الغريب في الامر ان روابط مشجعي الافريقي التونسي بدأت اعمالها بعد صعود الهلال مباشرة الي دور ال16 ..!
امبارح القريبة دي جاني واحد صاحبي مريخابي شديد قال لي تعرف يا قسم خروج الهلال من دور الستو عشر ده مسؤليتنا شي فقرا .. وشئ دعا .. وشئ كشف اوراق للفريق الضيف المهم ما بكون طرنا برانا ..!
ده غير المنتديات الحمراء شغالها الشاغل كشف اوراق الهلال للافريقي زي ديل الواحد يقول فيهم شنو عليكم الله ..!
هو الهلال الشفتوهو ده عايز ليهو كشف اوراق ما افريقيا كلها عارفاهو بعبع مخييييييييييييييييييييييييييييف وعندو المقبرة الداخل فيها مفقود مفقود ..!
لهولاء نقول اذهبوا فأنتم الطلقاء ..!
